Amabwambu ahanjekaña mpinji yejima neyi anahumañani, ahanjekaña kuzatisha nshiña, intaneti hela kudisonekela nyikanda. Dichi, hakwikala ibwambu daNzambi, twatela kuhanjekaña nindi mpinji yejima. Hanu dinu, tunateli kuhanjeka ñahi nindi?

Tunateli kuhosha naYehova kuhitila mukulomba. Hela chochu, kulomba kudi Nzambi kwambuka nachitunateli kuhanjeka nebwambu detu mutwesekena. Twatela kwiluka netu neyi tunakulomba, tunakuhosha naNleñi yetu, Mukwakubadika yuma yejima. Chumichi chatela kutusañumuna kulomba nakalemesha. Hakwila Nzambi yeteji kulomba kwetu, twatela kulondela yuma yakeñekaña. Tusambilenu kuhanjeka hayuma yisatu yitwatela kwila.

Chatachi, twatela kulomba hohu kudi Yehova Nzambi, bayi kudi Yesu, “akwakujila” hela kumukishuku. (Kwidika 20:4, 5) Bayibolu yahoshaña hatooka nawu: ‘Mulejenu Nzambi yuma yejima yimunakeñi nakulomba, nakulembelela, nakusakilila.’ (Afwilipi 4:6) Chamuchiyedi, twatela kulomba kuhitila mwijina daMwana kaNzambi, Yesu Kristu. Yesu yomweni wahosheli nindi: ‘Kwosi muntu niwumu wukwinza kudi Tata chiña hadami.’ (Yowanu 14:6) Chamuchisatu, twatela kulomba kwesekeja nachakeñañayi Nzambi. Bayibolu yahoshaña nawu: ‘Neyi tukulomba chuma chamwaya muchima windi, wukututiya.’ *—1 Yowanu 5:14.

Ilaña, antu hiyanateli kutwalekahu kwikala amabwambu neyi chakwila wumu diyi wahoshaña mpinji yejimaku. Neyi chochu chahanjekaña muntu nebwambu dindi, twatela kumwiteja Nzambi yahosheña nanetu nawa twatela kumutiyilila. Komana mweluka chahoshañayi Nzambi nanetu?

Makonu, Yehova Nzambi wazatishaña Izu dindi Bayibolu ‘kuhosha’ nanetu. (2 Timotewu 3:16, 17) Tunatalishi mudihi? Chakutalilahu: Fwikijenu munatambwili mukanda kufuma kudi ibwambu denu. Chimwawutaña, hekwawu mukulejaku akwenu namuzañalu nenu, “Nahanjeki nebwambu dami.” Ilaña kuhanjeka kumwahanjeka hikwadiñi kwahakanwaku, mwataña hohu mukanda. Munjila yoyimu, neyi mutañaña Bayibolu, munakwiteja Yehova kuhosha nenu. Gina wutwatena muchibaaba chatachi, wahosheli nindi, “Natoñojokaña nami neyi inakukeña Nzambi yanmoneña nindi nidi ibwambu dindi, natela kutaña ‘mukanda’ watusonekelayi, Bayibolu.” Wabombeleluhu nindi, “Wubwambu wami naNzambi wunakoleluku muloña wakutaña Bayibolu ifuku nifuku.” Komana mwamwitejaña Yehova kuhosha nanenu ifuku nifuku kuhitila mukutaña Izu dindi, Bayibolu ifuku nifuku? Wubwambu wenu naNzambi wukukola chikupu neyi mwilaña mwenimu.