Go sa šetšwe gore ba boledišana ba lebantše difahlego goba ka mogala, molaetša wa e-mail, ka go bonana Inthaneteng goba ka lengwalo, bagwera ba kgonthe ba boledišana gantši go ya kamoo maemo a ba dumelelago ka gona. Ka gona, gore re be kgauswi le Modimo, re swanetše go boledišana le yena ka mehla. Lega go le bjalo, se se dirwa bjang?

Re ka boledišana le Jehofa ka thapelo. Lega go le bjalo, go rapela Modimo ga go swane le ge re itshwaretše mehlamo le thaka ya rena. Re swanetše go lemoga gore ge re rapela, re bolela le Mmopi wa rena, Yo Godimodimo legohleng. Se se swanetše go re tutuetša gore re rapele ka go mo hlompha ka mo go tseneletšego le go mmoifa. E le gore dithapelo tša rena di amogelwe ke Modimo, re swanetše go latela ditekanyetšo tše itšego. Tše tharo tša tšona ke tše.

Ya pele, dithapelo di swanetše go lebišwa go Jehofa Modimo a nnoši—e sego go Jesu, motho yo go thwego ke mokgethwa goba seswantšho se itšego. (Ekisodo 20:4, 5) Beibele e bolela ka go lebanya gore: “Dilong tšohle tsebišang Modimo dikgopelo tša lena ka thapelo le ka topo gotee le ka go leboga.” (Bafilipi 4:6) Ya bobedi, dithapelo di swanetše go dirwa ka leina la Morwa wa Modimo, e lego Jesu Kriste. Jesu o hlalositše gore: “Ga go yo a tlago go Tate ge e se ka nna.” (Johane 14:6) Ya boraro, dithapelo tša rena di swanetše go dumelelana le thato ya Modimo. Beibele e re: “Go sa šetšwe seo re se kgopelago go ya ka thato ya Modimo, Modimo o a re kwa.” *—1 Johane 5:14.

Ke therešo gore segwera sa kgauswi se ka se swarelele ge e ba motho o tee e le yena a bolelago. Go fo etša ge bagwera ba thabela go boledišana, re swanetše go dumelela Modimo gore a bolele le rena gomme re mo theetše ge a bolela. Na o tseba gore Modimo o bolela le rena bjang?

Lehono Jehofa Modimo o “bolela” le rena a diriša Lentšu la gagwe le ngwadilwego, e lego Beibele. (2 Timotheo 3:16, 17) Ke ka baka la’ng re re’alo? Ka mohlala: A re re o hweditše lengwalo go tšwa go mogwera wa gago wa kgauswi. Ka morago ga go le bala, o ka botša ba bangwe o thabile wa re: “Mogwera wa ka o sa tšwa go bolela le nna ka lengwalo!” Lega go le bjalo, ba be ba sa boledišane ba lebantše difahlego, eupša e be e le ka lengwalo. Ka tsela e swanago, ka go bala Beibele o dumelela Jehofa gore a bolele le wena. Lega go le bjalo, Gina, yo a tsopotšwego sehlogong sa mathomo, o re: “Ke nagana gore ge e ba ke nyaka gore Modimo a ntšee ke le mogwera wa gagwe, ke swanetše go hlahloba ‘lengwalo’ leo a re ngwaletšego lona, e lego Beibele.” O oketša ka gore: “Go bala Beibele letšatši le letšatši go mpatameditše kgauswi kudu le Modimo.” Na o dumelela Jehofa gore a bolele le wena letšatši le lengwe le le lengwe ka go bala Lentšu la gagwe, e lego Beibele, letšatši le letšatši? Go dira bjalo go tla go thuša gore o ikwe o le kgauswi kudu le Modimo.