TOONSE twakabona kale bantu kabanyema, alimwi cakutadooneka andiswe twakanyema kale cimwi ciindi. Nokuba kuti kunyema tulakonzya kukubona kuti mbube butali kabotu ibuteelede kutondezyegwa, kanji-kanji tulimvwa kuti tulijisi kaambo kalimvwisya ncotweelede kunyema, kwaambisya ciindi umwi naatucitila cintu citali kabotu. Mane buya cibalo cijanika mubbuku litegwa American Psychological Association cakaamba kuti “kunyema taakwe mbokubede, kulagwasya alimwi mbube bujanika mumuntu uli woonse.”

Kuyeeya kuli boobu kulakonzya kubonwa kuti kuliluzi ikapati kuti twabona majwi ngaakaamba mwaapostolo Munakristo Paulo ciindi naakasololelwa amuuya. Kazyi kuti zimwi ziindi bantu balakonzya kunyema, wakaamba kuti: “Amunyeme, nokuba boobo, mutabisyi pe; mutabbizyi zuba kamunyemede pe.” (Baefeso 4:26) Twalanga twaambo ootu, sena eeci caamba kuti tweelede kunyema-nyema, naa sena tweelede kusolekesya kulijata?

Ciindi Paulo naakapa lulayo kujatikizya kunyema, kuboneka kuti wakali kuyeeya majwi aasintembauzyo iwakalemba kuti: “Amukopane, pele mutabisyi pe.” (Intembauzyo 4:4) Pele ncinzi cini ncaakali kupandulula Paulo mululayo oolu ilwakasololelwa amuuya? Wakaamba kuti: “Amuzisowe zintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse.” (Baefeso 4:31) Paulo wakali kukulwaizya Banakristo kuti tiibakeelede kuciindizya kunyema. Cikkomanisya ncakuti, cibalo cijanika mubbuku lyakuti American Psychological Association cilazumanana kwaamba kuti: “Buvwuntauzi butondezya kuti ‘kunyema kapati’ takugwasyi pe, alimwi kupa buyo kuti mwaalilwe . . . kulimana penzi liliko.”

Mbuti lino mbotukonzya ‘kuleka’ kuciindizya kunyema akweeleba bubi boonse ibuboola akaambo kakunyema? Mwami musongo Solomoni wamu Israyeli yansiku wakalemba kuti: “Bupampu bwamuntu bulamulesya kufwambaana kunyema, alimwi cilamubotela kujatila milandu” (Tusimpi 19:11) Mbuti “bupampu bwamuntu” mbobugwasya ciindi muntu nanyema?

Bupampu nkucikonzya kuzyiba mbobubede bukkale. Kuba abupampu caamba kumvwisya bwini zintu  mbozibede. Mbuti eeci mbocikonzya kutugwasya ciindi muntu umwi naatunyemya?

Ciindi notwacitilwa cakutalulama, ambweni inga twanyema. Pele ikuti twatobela mbotulimvwa akucita zintu cabukali, ambweni inga twaliletela buyo mapenzi swebo kutugama naa bantu bamwi. Mbubwenya mulilo watalanganizyigwa kabotu mboukonzya kuumpa ŋanda, akwalo kunyema kulakonzya kunyonyoona mpuwo yesu alimwi azilongwe zyesu abamwi kubikkilizya a Leza. Aboobo, ikuti twalimvwa kuti tuyabwiindila kunyema, inga cagwasya kulangisya akuzyiba capa kuti bukkale bube boobo. Kubumvwisya kabotu bukkale oobo kuyootugwasya kulijata kutegwa tutanyemi.

Kwakaceede buyo asyoonto kuti Mwami Davida, usyi Solomoni atile bulowa bwamwaalumi uutegwa Nabala. Mucoolwe wakagwasyigwa kumvwisya bwini zintu mbozyakabede. Davida abantu bakwe bakakwabilila mbelele zya Nabala munkanda yamu Juda. Nicakasika ciindi cakuti mbelele zigelwe boya, Davida wakalomba zyakulya kuli Nabala. Mpoonya Nabala wakamwiingula kuti: “Sena ndeelede kubweza cinkwa cangu, maanzi aangu anyama yangu njindajaila basikugela bangu akuzipa bantu mbonditazyi ankobazwa?” Eelo kaka ooku kwakali kutukilwa! Naakamvwa majwi aaya, Davida abaalumi bwakwe bali 400, bakakanza kuti bakamujaye Nabala alimwi amukwasyi wakwe woonse.—1 Samuele 25:4-13.

Ciindi Abigayeli, mukaintu wa Nabala naakamvwa cakacitika, wakaunka kuyoobonana a Davida. Mbwaakamubonena buyo Davida alimwi abaalumi bakwe, wakafwugama kumaulu aakwe akwaamba kuti: “Akaka kondileka ndemubelesi wako ndikwaambile alimwi koswiilila majwi aangu ndemubelesi wako.” Kumane, wakamupandulwida Davida kuti Nabala wakacita cabufwubafwuba alimwi akuti Davida uyakuusa kumbele kuti naa wacita cibi eeci akutila bulowa.—1 Samuele 25:24-31.

Ino ncinzi Davida ncaakaiya kumajwi ngaakamwaambila Abigayeli alo aakamugwasya kutontomana mubukkale oobu bukatazya? Cakusaanguna, Davida wakabona kuti Nabala wakali mufwubafwuba, alimwi cabili, wakabona kuti naakapilusya cibi, naakatila bulowa. Mbubwenya mbuli Davida, mulakonzya kunyema akaambo kacintu cimwi. Ino ncinzi ncomweelede kucita? Cibalo cijanika mubbuku lyakuti Mayo Clinic icaamba mbotukonzya kukweendelezya kunyema cakati, “Amuswe ciya akubala ziindi zili kkumi.” Inzya, amulindile kwakaindi kaniini akuyeeyesya catalisya penzi eelyo alimwi akuyeeya ntenda iikonzya kucitika akaambo kakunyema kwanu. Amulekele bupampu kutegwa bumulesye kufwambaana kunyema.—1 Samuele 25:32-35.

Masimpe, bantu banji mazuba aano bagwasyigwa kutegwa kabacikonzya kulijata. Ba Sebastian bakapandulula mbobakaiya kulijata kunyema alimwi akulyeendelezya kwiinda mukwiiya Bbaibbele ciindi nobakali muntolongo ku Poland, kabajisi myaka yakuzyalwa iili 23. Bakaamba kuti: “Cakusaanguna ndilayeeya kujatikizya penzi eelyo. Kumane ndilasola kubelesya lulayo lwamu Bbaibbele. Ndakajana kuti Bbaibbele ndibbuku ligwasya kapati.”

Ba Setsuo abalo bakabelesya nzila njiyonya eeyo. Bakaamba kuti: “Ndakali kubabwentela bamwi ikuti bandinyemya kumulimo. Pele lino mbwaanga ndaiya Bbaibbele, muciindi cakubwenta, inga ndilibuzya kuti: ‘Ino nguni uulubizyide aawa? Sena ndime ndapa kuti kube penzi eeli?’” Kulibuzya boobu kwakabagwasya kutafwambaana kunyema, alimwi bakali kucikonzya kulijata kutegwa batanyemi.

Zintu zitupa kunyema inga kazijisi nguzu kapati, pele lulayo lujanika Mujwi lya Leza lulaanguzu kwiinda. Aboobo, kwiinda mukubelesya lulayo lwamu Bbaibbele alimwi akupaila kutegwa Leza amugwasye, anywebo mulakonzya kulekela bupampu kumugwasya kutafwambaana kunyema naa kucikonzya kulijata.