E lau i miliona o tino i te lalolagi kātoa e fakamanatu ne latou a te Kilisimasi ona ko pogai kese‵kese. E fia fakaaoga ne nisi tino a taimi penā fakatasi mo olotou taugasoa mo kāiga. A ko nisi tino e mafau‵fau ki te Atua io me e fakaaoga ne latou a taimi konā ke fesoasoani atu ki tino ma‵tiva. E mautinoa eiloa me e tāua eiloa a mea konei. Kae e se iloa ne latou a te feitu sē ‵lei o te aso malōlō tenei.

Muamua la, e tali‵tonu a tino e tokouke me i te Kilisimasi ko te aso fanau o Iesu. Kae ne lotoma‵lie a tino sukesuke ki mea mua e tokouke, me e se iloa atu a te taimi tonu ne fanau ei a ia. E fai mai The Christian Book of Why, me ne ita fitifiti a Kelisiano i aso mua ke fakaaoga se po masina ke fai mo aso fanau o Iesu, me e ma‵nako latou ke ‵kalo katoatoa kea‵tea mai faifaiga fapaupau katoa. Se mea tāua, me e seai eiloa se fakaasiga mai i te Tusi Tapu, me ne fakamanatu ne Iesu tena aso fanau. Kae ‵kese mai ei, ne fakatonu atu a ia ki ana soko ke fakamanatu tena mate.—Luka 22:19.

A te lua, e lotoma‵lie a tino ‵poto e tokouke me ne māfua mai te lasiga o faifaiga o te Kilisimasi mai tuu fapaupau mo faifaiga sē Kelisiano. E aofia i mea konei ko te Santa Claus, lakau Kilisimasi, te aveavega o meaalofa, mea fakagali‵gali mo nisi mea aka foki. Ne tusi mai a te tusi ko The Externals of the Catholic Church e uiga ki nisi faifaiga konei: “Kafai e maua ne tatou a meaalofa Kilisimasi io me e fakatau‵tau ne tatou a mea fakagaligali lanu launiu i ‵tou fale, io me ko koga tapuaki, e mata e tokofia i a tatou e iloa ne latou me ko aofia ‵tonu eiloa tatou i faifaiga fapaupau?”

Kāti e mafai o mafaufau koe me se a te mea e masei ei ke aofia i vaegā faifaiga kolā e foliga ‵lei mai penā. E maua te tali i te tolu o manatu. E se manako te Atua ke palu fakatasi a faifaiga fapaupau mo te tapuakiga ‵ma. E auala i Tena pelofeta ko Amosa, ne fai atu a Ieova te Atua ki ana tino tapuaki fui‵fai i Isalaelu mua: “Au e takalialia ki otou ‵kaiga fia‵fia faka-te-lotu . . .  Fakagata otou pese logoa.”—Amosa 5:21, 23.

Kaia ne ‵mafa katoa ei penā a pati konā? Mafaufau ki mea ne fai ne tino i te malo ki mātū o Isalaelu mua. A Ielopoamo, te lotou tupu muamua eiloa, ne faka‵tu ne ia a pulumakau faite i te fa‵kai o Tanu mo Peteli, ko te mea ke fakamalosi atu ki ana tino ke tapuaki atu ki ei i lō te tapuaki faka‵lei atu ki a Ieova te Atua i te faletapu i Ielusalema. Ne fakatoka foki ne te tupu a ‵kaiga fia‵fia kae ‵tofi aka a faitaulaga ke fesoasoani atu ki tino i te faiga o fakamanatuga konā.—1 Tupu 12:26-33.

E foliga mai me ne ‵lei eiloa a mea ne fai ne te kau Isalaelu. A te ‵tonuga ‵loa, e mata, e seki fai ne latou a mea katoa konei i te igoa o te lotou tapuakiga ki te Atua kae fakafiafia atu ki a Ia? E fakaasi faka‵lei mai eiloa i pati ‵mafa kolā ne fai atu ne te Atua e auala i a Amosa mo nisi pelofeta ana lagonaga ki vaegā faifaiga penā. E auala i te pelofeta ko Malaki, ne fai mai te Atua: “Au ko te Aliki [Ieova], kae e se mafai eiloa au o mafuli.” (Malaki 3:6) E mata, e se fakaasi mai ei a lagonaga o te Atua ki fakamanatuga e uke o te Kilisimasi i aso nei?

Mai tua o te mafaufau ki manatu ‵tonu konā, e lau i miliona o tino ko oti ne fakaiku aka ne latou ke ‵kalo kea‵tea mai te fakamanatuga o te Kilisimasi. I lō te fai penā, e maua eiloa ne latou a te fiafia mo te lotomalie tonu mai i te fakamāumāu taimi fakatasi mo olotou taugasoa mo kāiga kae fesoasoani atu ki tino ma‵tiva i so se taimi e ma‵nako latou ki ei i te tausaga kātoa.