1, 2. Taano ta dai nasabutan kan dakul na nagdadangog ki Jesus an kahulugan kan mga tataramon niya?

PUWEDENG nadadangog nin sarong tawo an kaulay niya. Tibaad naririsa pa ngani niya an tono kan boses kaini. Pero ano an pakinabang kaiyan kun dai man niya nasasabutan an kahulugan kan mga sinasabi sa saiya? (1 Cor. 14:9) Sa kaparehong paagi, rinibo an nakadangog kan mga sinabi ni Jesus. Kinaulay pa ngani niya sinda sa lengguwaheng nasasabutan ninda. Pero, bakong gabos sa sainda an nakasabot sa kahulugan kan mga tataramon niya. Huli kaini, sinabi ni Jesus sa mga nagdadangog sa saiya: ‘Hinanyuga ako asin sabuton nindo gabos.’—Mar. 7:14.

² Taano ta dakul an dai nakasabot sa kahulugan kan mga sinabi ni Jesus? An iba may dati nang mga opinyon o may sala pa nganing mga motibo. Sinabi ni Jesus sa siring na mga tawo: “Matibayon nindong linulusutan an pagbuot nin Diyos tanganing mapagdanay an saindong tradisyon.” (Mar. 7:9, NW) Dai man talaga hininguwa kan mga tawong ini na masabutan an kahulugan kan mga tataramon niya. Habo nindang baguhon an saindang mga kinaugalian asin opinyon. Tibaad bukas an mga talinga ninda, pero saradong marhay an saindang mga puso! (Basahon an Mateo 13:13-15.) Paano ta masisiyerto  na pirming bukas an satong puso tanganing makinabang kita sa katukduan ni Jesus?

3. Taano ta nasabutan kan mga disipulo an mga tataramon ni Jesus?

³ Kaipuhan tang arugon an halimbawa kan mapakumbabang mga disipulo ni Jesus. Sinabi niya sa sainda: ‘[Maugma] an saindong mga mata huli ta naghihiling asin an saindong mga talinga ta nagdadangog.’ (Mat. 13:16) Taano ta nakasabot sinda mantang an iba dai? Inot, andam sindang maghapot asin magsiyasat kan tunay na kahulugan kan mga tataramon ni Jesus. (Mat. 13:36; Mar. 7:17) Ikaduwa, andam sinda na madugangan an mga dati na nindang inako sa saindang puso. (Basahon an Mateo 13:11, 12.) Ikatulo, andam sindang gamiton an mga nadangog asin nasabutan ninda, bako sana sa personal nindang buhay kundi pati sa paghihinguwa ninda na tabangan an iba.—Mat. 13:51, 52.

4. Tanganing masabutan an ilustrasyon ni Jesus, anong tulong lakdang an kalabot?

⁴ Kun gusto tang masabutan an mga ilustrasyon ni Jesus, kaipuhan na arugon ta an halimbawa kan maimbod na mga disipulo niya. Tulong lakdang man an kalabot digdi. Inot, kaipuhan na andam kitang magtao nin oras sa pag-adal saka paghurop-hurop sa mga sinabi ni Jesus, mag-research, asin magpalataw nin angay na mga hapot. Nagbubunga ini nin kaaraman. (Tal. 2:4, 5) Ikaduwa, kaipuhan tang mahiling an koneksiyon kan kaaraman na iyan sa dati na niyatong aram asin kun paano kita personal na makikinabang diyan. Maresulta ini sa pakasabot. (Tal. 2:2, 3) Ikatulo, dapat tang gamiton an satong mga nanudan, na inaaplikar iyan sa satong buhay. Pagpapahiling ini nin kadunungan.—Tal. 2:6, 7.

5. Iilustrar an pagkakalain kan kaaraman, pakasabot, asin kadunungan.

⁵ Ano an pagkakalain kan kaaraman, pakasabot, asin kadunungan? Ikakailustrar ini sa arog kaining paagi: Imahinaron na nakatindog ka sa tahaw kan tinampo asin sarong bus an nagdadangadang pasiring saimo. Inot, aram mo na bus iyan—iyan an kaaraman. Pagkatapos, narealisar mo na kun dai ka mahali sa tinitindugan mo, mababangga ka kan bus—iyan an pakasabot! Kaya naghali ka tulos sa aagihan kan bus—iyan an kadunungan! Bakong makangangalas na idinuduon sa sato kan Bibliya na kaipuhan tang ‘ingatan an praktikal na kadunungan.’ Nangangahulugan ini kan sato mismong buhay!—Tal. 3:21, 22, NW; 1 Tim. 4:16.

6. Ano an apat na ihahapot ta mantang pinag-aadalan an pito sa mga ilustrasyon ni Jesus? (Hilingon an  kahon.)

⁶ Sa artikulong ini asin sa masunod, pag-aadalan ta an pitong ilustrasyon na ginamit ni Jesus. Mantang ginigibo iyan, ihahapot ta an minasunod: Ano an kahulugan kan ilustrasyon na ini? (Matabang ini sa sato na magkaigwa nin kaaraman.) Taano ta itinao ni Jesus sa sato an ilustrasyon na ini? (Maresulta ini sa pakasabot.) Paano ta magagamit an impormasyon na ini sa pagtabang sa satong sadiri asin sa iba? (Ini an kadunungan.) Ultimo, ano an itinutukdo kaini sa sato dapit ki Jehova asin ki Jesus?

7. Ano an kahulugan kan ilustrasyon dapit sa pisog nin mustasa?

⁷ Basahon an Mateo 13:31, 32. Ano an kahulugan kan ilustrasyon ni Jesus dapit sa pisog nin mustasa? An pisog mismo nagrerepresentar sa mensahe kan Kahadian saka sa nagin resulta kan paghuhulit kan mensaheng iyan—an Kristiyanong kongregasyon. Arog kan pisog nin mustasa na iyo ‘an labi kasadit sa gabos na mga pisog,’ nagpuon man sa sadit an Kristiyanong kongregasyon kan 33 C.E. Pero, sa laog nin pirang dekada, marikas na nagdakula an kongregasyon. Dai linalauman an paglakop kaiyan. (Col. 1:23) Kapaki-pakinabang an pagdakula na ini huling sinasabi sa sato ni Jesus na ‘an mga gamgam nin langit minatugdon sa saiyang mga  sanga.’ An piguratibong mga gamgam na ini iyo an mga tawong tama an kamugtakan nin puso na nakakua nin espirituwal na kakanon, limpoy, asin istaran sa Kristiyanong kongregasyon.—Ikumparar an Ezequiel 17:23.

8. Taano ta ginamit ni Jesus an ilustrasyon dapit sa pisog nin mustasa?

⁸ Taano ta ginamit ni Jesus an ilustrasyon na ini? Ginamit niya an makangangalas na pagdakula nin sarong pisog nin mustasa tanganing iilustrar an kapangyarihan kan Kahadian nin Diyos na maglakop, magprotektar, asin mapangganahan an gabos na ulang. Puon kan 1914 nagin makangangalas an pagdakula kan nahihiling na kabtang kan organisasyon nin Diyos! (Isa. 60:22) Napoprotektaran sa espirituwal an mga nakikiasosyar sa organisasyon na iyan. (Tal. 2:7; Isa. 32:1, 2) Dugang pa, dai napupugulan an nagpapadagos na paghiwas kan intereses kan Kahadian asin napapangganahan kaiyan an gabos na pagkontra.—Isa. 54:17.

9. (a) Anong leksiyon an manunudan ta sa ilustrasyon dapit sa pisog nin mustasa? (b) Ano an itinutukdo kaini sa sato dapit ki Jehova asin ki Jesus?

⁹ Ano an manunudan ta sa ilustrasyon dapit sa pisog nin mustasa? Tibaad nakaistar kita sa lugar na pipira sana an mga Saksi o dai ta tulos nahihiling an resulta kan satong paghuhulit. Pero mapapakusog kitang magtagal kun gigirumdumon ta na kaya kan Kahadian na mapangganahan an gabos na ulang. Halimbawa, pag-abot ni Brother Edwin Skinner sa India kan 1926, dikit sana an mga Saksi sa nasyon na iyan. Kan inot, maluwayon an pag-uswag asin nagin masakit an gibuhon. Pero padagos siyang naghulit asin nahiling niya kun paano napangganahan kan mensahe kan Kahadian an dakulang mga ulang. Ngunyan labi nang 37,000 an aktibong Saksi sa India, asin labing 108,000 an nag-atender sa Memoryal kan nakaaging taon. Pag-isipan man an halimbawa kun paanong makangangalas na naglakop an areglo kan Kahadian. Kan taon na mag-abot si Brother Skinner sa India, nagpupuon pa sana an gibuhon sa Zambia. Ngunyan labi nang 170,000 na parahayag an naghuhulit duman, asin 763,915 an nag-atender sa Memoryal kan 2013. Buot sabihon, 1 sa kada 18 indibidwal sa Zambia an nag-atender. Makangangalas nanggad na pagdakul ini!

10. Ano an kahulugan kan ilustrasyon dapit sa lebadura?

¹⁰ Basahon an Mateo 13:33. Ano an kahulugan kan ilustrasyon dapit sa lebadura? An ilustrasyon na ini nanunungod man sa mensahe kan Kahadian asin sa resulta kaiyan. An “gabos,” o an bilog na masa nin harina nagrerepresentar sa gabos na nasyon, asin an proseso nin pag-usbog nagrerepresentar sa paglakop kan mensahe kan Kahadian paagi sa paghuhulit. Kun an pagdakula kan pisog nin mustasa malinaw na nahihiling, an paglakop kan lebadura dai tulos naririsa. Paghaloy-haloy pa mahihiling an epekto kaiyan.

11. Taano ta ginamit ni Jesus an ilustrasyon dapit sa lebadura?

¹¹ Taano ta ginamit ni Jesus an ilustrasyon na ini? Ipinapahiling niya na an mensahe kan Kahadian may kapangyarihan na maglakop na marhay asin magpabago. An mensahe kan Kahadian nakaabot na ‘sagkod sa kapuro-puruhi kan daga.’ (Gui. 1:8) Pero dai pirming risa an mga pagbabagong resulta kan mensahe; an iba sa mga epekto kaiyan tibaad dai ngani mariparo sa primero. Pero talagang may pagbabago—bako sanang pagbabago sa bilang kundi pati sa personalidad kan mga nag-ako kan lakop nang mensaheng ini.—Roma 12:2; Efe. 4:22, 23.

12, 13. Magtao nin mga halimbawa kun paano nag-uswag an gibuhon na paghuhulit kan Kahadian arog kan ipinapahiling sa ilustrasyon dapit sa lebadura.

¹² Sa parati, nahihiling an epekto kan paghuhulit dakul na taon pa pagkatapos na punan na gibuhon iyan. Halimbawa, si Franz asin Margit, na naglilingkod ngunyan sa ibang sangay, naglilingkod kan 1982 sa sangang opisina sa Brazil. Naghulit sinda sa sarong sadit na banwaan. Kabilang sa mga napunan ninda nin pag-adal sa Bibliya an sarong ina asin an saiyang apat na aki. An matuang lalaki, na 12 anyos pa sana kaidto, masusupgon na marhay asin parating nagtatago bago magpuon an pag-adal. Huling nagbago an asignasyon kan mag-agom, dai ninda naipadagos an pagtutukdo sa mga ini. Pero nabisita ninda an banwaan na ini pakalihis nin 25 taon. Ano an naabutan ninda duman? Sarong kongregasyon na nagtitiripon sa bagong Kingdom Hall na may 69 parahayag asin 13 sa sainda an regular payunir. Kumusta man an aking masusupgon? Siya ngunyan an parakoordinar kan grupo nin kamagurangan! Arog kan lebadura sa ilustrasyon ni Jesus, nag-usbog an mensahe kan Kahadian asin binago an buhay nin dakul, na ikinaugma nanggad kan mag-agom!

¹³ An dai nahihiling na kapangyarihan kan mensahe kan Kahadian na baguhon an mga tawo, risang-risa nanggad sa mga nasyon na ipinagbabawal an gibuhon kan Kahadian. Masakit maaraman kun sagkod sain na nakaabot an mensahe sa siring na mga nasyon, pero sa parati nabibigla na sana kita sa resulta. Halimbawa, nakaabot sa Cuba an mensahe kan Kahadian kan 1910, asin binisita iyan ni Brother Russell kan 1913. Pero, maluway an pag-uswag kan primero. Kumusta na ngunyan an Cuba? May labing 96,000 na parahayag na an naghuhulit kan maugmang bareta, asin 229,726 an nag-atender sa Memoryal kan 2013—iyan 1 sa kada 48 nakaistar sa islang nasyon na iyan. Dawa sa mga nasyon na dai ibinabawal an satong gibuhon, tibaad nakaabot na an mensahe nin Kahadian sa mga lugar na sa paghuna kan mga Saksi duman dai mahuhulitan. *—Par. 8:7; 11:5.

14, 15. (a) Paano kita personal na makikinabang sa leksiyon sa ilustrasyon dapit sa lebadura? (b) Ano an itinutukdo kaini sa sato dapit ki Jehova asin ki Jesus?

¹⁴ Paano kita makikinabang sa itinukdo sa sato ni Jesus sa ilustrasyon dapit sa lebadura? Kun huhurop-hurupon ta an kahulugan kan ilustrasyon ni Jesus, marerealisar ta na dai kita kaipuhan na mahadit kun paano makakaabot an mensahe kan Kahadian sa minilyon na dai pa nakadangog kaiyan. Kontrolado ni Jehova an gabos  na bagay. Pero ano an papel ta? An Tataramon nin Diyos nagsisimbag: ‘Itanom mo pagkaaga an saimong banhi asin pagkahapon dai mo pagpahingaluan an saimong kamot; huli ta ika dai nakakaisi kun arin an urog karahay, kun baga ini kun baga idto, kun baga sindang duwa anas na marahay.’ (Par. 11:6) Siyempre, kasabay kaini, nungkang lingawan na ipamibi an kapangganahan kan gibuhon na paghuhulit, lalo na sa mga nasyon na ipinagbabawal iyan.—Efe. 6:18-20.

¹⁵ Dugang pa, dai kita madisganar kun dai ta tulos nahihiling an mga resulta kan satong paghuhulit. Dai ta dapat nuarin man pagmenuson an “aldaw kan saradit na kapinunan.” (Zac. 4:10, An Banal na Biblia) Tibaad pag-abot nin panahon, mas dakula asin mas marahayon pa ngani an magin resulta kisa sa linalauman ta!—Sal. 40:5; Zac. 4:7.

16. Ano an kahulugan kan ilustrasyon dapit sa nagbibiyaheng negosyante asin kan ilustrasyon dapit sa nakatagong kayamanan?

¹⁶ Basahon an Mateo 13:44-46. Ano an kahulugan kan ilustrasyon dapit sa nagbibiyaheng negosyante asin kan ilustrasyon dapit sa nakatagong kayamanan? Kan panahon ni Jesus, may mga negosyante na nagbibiyahe sagkod sa harayuon na Dagat Indio tanganing makakua kan pinakamarahay na mga perlas. An negosyante sa ilustrasyon na ini nagrerepresentar sa mga tawong tama an kamugtakan nin puso na nagmamaigot na marhay tanganing mapaniguan an saindang espirituwal na mga pangangaipo. An “sarong perlas na dakulaon an halaga” naglaladawan sa mahalagang marhay na katotoohan dapit sa Kahadian. Huling aram niya an halaga kan perlas na iyan, andam an negosyante na ipabakal tulos an gabos niyang pagsadiri tanganing mabakal iyan. Nagtao man si Jesus nin ilustrasyon dapit sa sarong tawo na nagtatrabaho sa sarong uma asin nakanumpong nin ‘nakatagong’ kayamanan. Bakong arog kan negosyante, an tawong ini dai naghahanap nin kayamanan. Pero andam man siyang ipabakal an ‘gabos niyang pagsadiri’ tanganing mapasaiya an kayamanan.

17. Taano ta itinao ni Jesus an mga ilustrasyon dapit sa nagbibiyaheng negosyante asin nakatagong kayamanan?

¹⁷ Taano ta itinao ni Jesus an duwang parabulang iyan? Ipinapahiling niya na an katotoohan nanunumpungan sa lain-lain na paagi. May mga tawo na hinahanap iyan asin ginigibo an gabos tanganing manumpungan iyan. An iba, dawa dai iyan hinahanap, nanumpungan iyan huling tibaad may nagdara kaiyan sa sainda. Ano man an kamugtakan, aram kan lambang saro sa sainda an halaga kan nanumpungan ninda asin andam sindang magsakripisyo nin dakula tanganing makua iyan.

18. (a) Paano kita makikinabang sa duwang ilustrasyon na ini? (b) Ano an itinutukdo kaini sa sato dapit ki Jehova asin ki Jesus?

¹⁸ Paano kita makikinabang sa duwang ilustrasyon na ini? (Mat. 6:19-21) Haputon an sadiri: ‘An kaisipan ko daw arog man kan mga tawong ini? Ibinibilang ko daw na sarong kayamanan an katotoohan? Andam daw akong magsakripisyo tanganing makua iyan, o tinutugutan ko daw an ibang bagay, arog kan mga kahaditan sa aroaldaw na buhay, na mairayo an atensiyon ko diyan?’ (Mat. 6:22-24, 33; Luc. 5:27, 28; Fil. 3:8) Kun gurano kadakula kan satong kagaya-gayahan na manumpungan an katotoohan, magigin siring man kaiyan kakusog an satong determinasyon na pirming inuton iyan sa satong buhay.

19. Ano an pag-aadalan ta sa masunod na artikulo?

¹⁹ Ipahiling lugod niyato na nagdangog kita asin talagang nasabutan ta an kahulugan kan mga ilustrasyon na ini dapit sa Kahadian. Tandaan, bakong igo na aramon ta sana an kahulugan kan mga iyan kundi kaipuhan man na iaplikar ta an mga leksiyon na nanunudan ta diyan. Sa masunod na artikulo, pag-aadalan ta an tulo pang ilustrasyon asin hilingon kun anong mga leksiyon an manunudan ta sa mga iyan.