1, 2. ?From wanem plante man oli no haremsave tok blong Jisas?

TAEM man i toktok, yumi harem voes blong hem, mo maet yumi harem tu se hem i kros no i glad. Be sipos yumi no haremsave, i blong nating nomo we yumi harem voes blong hem. (1 Korin 14:9) Jisas i toktok long plante taosen man long lanwis blong olgeta. Be i no olgeta evriwan we oli haremsave. Taswe Jisas i talem long olgeta se: “Yufala evriwan i lesin gud long mi, blong yufala i haremsave.”—Mak 7:14.

² ?From wanem plante man oli no haremsave tok blong Jisas? From we oli gat prapa bilif blong olgeta mo oli gat ol rong tingting. Jisas i tok long ol man ya se: “Yufala i stap livim Loa we God i givim, nao yufala i go folem ol kastom blong yufala nomo.” (Mak 7:9) Oli no traehad blong kasem mining blong tok blong Jisas. Oli no wantem lego kastom blong olgeta mo oli no wantem jenisim tingting blong olgeta. Oli harem tok blong Jisas be oli no haremsave. (Ridim Matiu 13:13-15.) ?Olsem wanem long yumi? ?Yumi mas mekem wanem blong kasem gud ol tijing blong Jisas?

3. ?From wanem ol disaepol oli haremsave tok blong Jisas?

³ Yumi mas folem eksampol blong ol disaepol blong Jisas we tingting blong olgeta i stap daon. Jisas i talem long olgeta se: “Yufala i save harem gud, from we yufala i save luk ol samting ya, mo yufala i save harem ol tok ya.” (Matiu 13:16) ?From wanem ol disaepol ya oli haremsave tok blong Jisas be ol narafala oli no haremsave? Ol disaepol oli mekem 3 samting. Faswan, oli askem kwestin mo oli traem faenemaot mining blong tok blong Jisas. (Matiu 13:36; Mak 7:17) Namba tu, oli joenem niufala save we oli kasem long ol save we Jisas i givim long olgeta finis. (Ridim Matiu 13:11, 12.) Namba tri, oli folem ol samting we oli lanem, mo oli yusum blong givhan long narafala.—Matiu 13:51, 52.

4. ?Wanem trifala samting we yumi mas mekem blong kasem mining blong ol parabol blong Jisas?

⁴ Yumi tu, yumi mas mekem 3 samting sipos yumi wantem kasem mining blong ol parabol blong Jisas. Faswan, yumi mas gat save. Hemia i min se yumi stadi mo tingting dip long tok blong Jisas, yumi lukaot moa save, mo yumi askem ol gudfala kwestin. (Ol Proveb 2:4, 5) Namba tu, yumi mas haremsave tok blong Jisas. Hemia i min se yumi joenem niufala save ya wetem save we yumi gat finis, mo yumi luksave olsem wanem bambae i givhan long yumi. (Ol Proveb 2:2, 3) Namba tri, yumi mas waes. Hemia i min se yumi folem save ya mo yumi mekem i wok long laef blong yumi.—Ol Proveb 2:6, 7.

5. ?Wanem pijatok i soemaot se save, haremsave, mo waes, trifala i defdefren?

⁵ Save, haremsave, mo waes, ?trifala i defdefren olsem wanem? Yu traem tingbaot pijatok ya: Yu stap stanap long medel blong big rod, nao wan bas i ron i kam stret long yu. Fastaem, yu luk se wan bas i stap kam. !Hemia nao save! Afta, yu kasem save se sipos yu stap stanap nomo long rod ya, bas ya bambae i sperem yu. !Hemia nao haremsave! Ale, kwiktaem nomo, yu jam i go long saed blong rod. !Hemia nao waes! Baebol i talem se yumi mas “holemstrong waes” from we i save sevem laef blong yumi.—Ol Proveb 3:21, 22; 1 Timoti 4:16.

6. ?Wanem fofala kwestin we bambae yumi ansa long olgeta taem yumi tokbaot 7 parabol blong Jisas? (Yu luk  bokis.)

⁶ Long stadi ya mo long nekiswan, bambae yumi tokbaot 7 parabol blong Jisas. Bambae yumi ansa long ol kwestin ya: ?Wanem mining blong parabol ya? (Hemia nao save.) ?Jisas i wantem tijim ol man long wanem? (Hemia nao haremsave.) ?Bambae yumi yusum save ya olsem wanem, blong givhan long yumi bakegen mo blong givhan long narafala? (Hemia nao waes.) Las kwestin se, ?parabol ya i soemaot wanem long saed blong Jehova mo Jisas?

7. ?Wanem mining blong parabol blong sid blong nambangga?

⁷ Ridim Matiu 13:31, 32. ?Wanem  mining blong parabol ya? Sid blong nambangga i minim gud nius blong Kingdom we yumi talemaot, mo frut blong hem, hemia Kristin kongregesen. Taem kongregesen ya i stat long yia 33, i no gat plante man long hem. Hem i olsem sid blong nambangga we “i smol we i smol, i winim ol narafala sid.” Be kwiktaem nomo hem i kam bigwan, from we ol Kristin oli prij. Plante oli no ting se bambae hem i gru hareap, gogo i kam bigwan we i bigwan. (Kolosi 1:23) Jisas i talem se ‘ol pijin oli mekem nes blong olgeta long ol han blong hem.’ Hemia i min se taem kongregesen i stap kam bigwan, hem i wan ples we ol man we hat blong olgeta i stret, oli save kasem kakae we i kamaot long tok blong God. Ol man ya oli save harem gud blong joen wetem kongregesen we i protektem olgeta, olsem pijin i harem gud blong stap long sado blong wan tri.—Skelem wetem Esikel 17:23.

8. ?Jisas i wantem tijim ol man long wanem?

⁸ ?Jisas i wantem tijim ol man long wanem? Jisas i wantem tijim ol man se Kingdom blong God bambae i kam bigwan, bambae i protektem ol man blong God, mo bambae i winim ol samting we oli stap blokem hem. Stat long yia 1914, Kristin kongregesen i gru gogo i kam bigwan olgeta. (Aesea 60:22) Long kongregesen ya, ol man oli kasem ol samting we oli  nidim, blong oli save stap klosap long Jehova. (Ol Proveb 2:7; Aesea 32:1, 2) Nating se plante man oli agensem kongregesen ya, be i gohed nomo blong kam bigwan moa, oli no save stopem.—Aesea 54:17.

9. (1) ?Yumi lanem wanem long parabol ya? (2) ?Parabol ya i soemaot wanem long saed blong Jehova mo Jisas?

⁹ ?Yumi lanem wanem? Maet yumi stap long wan ples we i no gat plante Witnes mo wok blong prij i no karem plante frut. Be yumi no mas fogetem se Kingdom i save winim enikaen trabol. Save ya i givim paoa long yumi blong yumi stanap strong. Yu traem tingbaot kantri blong India. Taem Brata Edwin Skinner i go long India long yia 1926, i no gat plante Witnes, mo wok blong prij i “had,” i no gat plante frut. Be brata ya i gohed blong prij, mo hem i luk we Kingdom i winim ol bigbigfala samting we oli blokem gud nius. Tede, i gat bitim 37,000 Witnes long India, mo bitim 108,000 oli kam long Memoriol long yia 2013. Long sem yia we Brata Skinner i go long India, wok i jes stat long Sambia tu. Be naoia, i gat 170,000 Witnes long Sambia, mo 763,915 oli kam long Memoriol long yia 2013. Hemia i min se, long evri 18 man long Sambia, i gat 1 i kam long Memoriol. !Yumi sapraes long bigfala namba ya!

10. ?Wanem mining blong parabol ya?

¹⁰ Ridim Matiu 13:33. ?Wanem mining blong parabol ya? Parabol ya i soemaot se gud nius blong Kingdom i save jenisim laef blong man. “Olgeta flaoa ya” i minim olgeta neson blong wol. Taem is i stap mekem flaoa ya i solap, hemia i pija blong wok blong prij we i mekem gud nius blong Kingdom i kasem olgeta man. Taem sid blong nambangga i gru, ol man oli luksave kwiktaem nomo. Be taem is i stap wok insaed long flaoa, man i no save luk. Biaen nomo, hem i jes luk we flaoa i solap.

11. ?Jisas i wantem tijim ol man long wanem?

¹¹ ?Jisas i wantem tijim ol man long wanem? Jisas i soemaot se gud nius blong Kingdom i gat paoa blong “finisim olgeta ples long wol,” mo blong jenisim tingting mo fasin blong man. (Ol Wok 1:8) Maet fastaem yumi no luk ol jenis ya, be i gat. Plante man long evri ples oli stap bilif long gud nius blong Kingdom, mo gud nius ya i stap jenisim fasin mo laef blong olgeta.—Rom 12:2; Efesas 4:22, 23.

12, 13. Yu tokbaot sam ples we wok blong prij i kam bigwan, olsem Jisas i soemaot long parabol ya.

¹² Frut i save kamaot plante yia afta we man i harem gud nius. Olsem  nao, long yia 1982, Franz mo Margit we tufala i stap long Betel long Brasil, tufala i prij long wan smol taon. Tufala i statem plante Baebol stadi. Wan long olgeta, hemia wan mama wetem 4 pikinini blong hem. Fasbon boe blong hem i gat 12 yia. Boe ya i stap sem, mo plante taem hem i haed. Be Franz mo Margit tufala i muv i go long narafala ples, ale stadi i stop. Twanti faef yia afta, tufala i gobak long smol taon ya. ?Tufala i luk wanem? !Wan kongregesen we i gat 69 pablisa long hem, mo 13 long olgeta oli fultaem paenia! !Antap long hemia, i gat wan niufala Haos Kingdom! ?Olsem wanem long smol boe ya we i stap sem? !Naoia, hem i kodineta blong ol elda long kongregesen ya! Gud nius blong Kingdom i olsem is long parabol blong Jisas. Hem i kasem evri ples mo i jenisim laef blong plante man.

¹³ Long ol kantri we oli putum tabu long wok blong prij, gud nius blong Kingdom i gat paoa yet blong jenisim laef blong man. Plante taem yumi sapraes blong harem olsem wanem gud nius i stap kasem fulap man long ol kantri olsem. Yu traem tingbaot kantri blong Kuba. Long yia 1910, gud nius i kasem Kuba, mo long yia 1913, Brata Russell i go long aelan ya. Fastaem, i no gat plante man we oli bilif long gud nius. ?Be olsem wanem naoia? I gat bitim 96,000 pablisa long Kuba, mo 229,726 man oli kam long Memoriol long yia 2013. Hemia i min se, long evri 48 man long Kuba, i gat 1 i kam long Memoriol. Mo tu, long ol kantri we ol Witnes oli fri blong prij, maet gud nius blong Kingdom i kasem finis plante ples we ol brata mo sista oli ting se man i no save prij long olgeta. *—Prija 8:7; 11:5.

14, 15. (1) ?Yumi lanem wanem long parabol ya? (2) ?Parabol ya i soemaot wanem long saed blong Jehova mo Jisas?

¹⁴ ?Yumi lanem wanem? Taem yumi tingting dip long mining blong parabol ya, yumi luksave se i no nid blong wari long kwestin ya se: ?Olsem wanem gud nius blong Kingdom bambae i kasem ol milian man we oli no harem yet? Jehova nao bambae i lukaot long bisnes ya. Be yumi, ?yumi mas mekem wanem? Baebol i talem se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.” (Prija 11:6) Nating se i olsem, oltaem yumi mas tingbaot blong askem long Jehova blong i blesem wok blong prij, antap moa, long ol kantri we oli putum tabu long wok ya.—Efesas 6:18-20.

¹⁵ Mo tu, yumi no mas kam slak sipos yumi luk se wok blong yumi i no karem frut kwiktaem. Nating se long  stat, “wok ya i gohed sloslo nomo,” be bambae i karem frut. (Sekaraea 4:10) !Maet frut we i kamaot bambae i plante moa bitim wanem we yumi tingbaot!—Ol Sam 40:5; Sekaraea 4:7.

16. ?Wanem mining blong tufala parabol ya?

¹⁶ Ridim Matiu 13:44-46. ?Wanem mining blong tufala parabol ya? Long taem blong Jisas, sam bisnesman oli stap wokbaot i go long ol ples farawe blong lukaot ol gudgudfala ston ya perel. Long parabol blong Jisas, “perel we i nambawan” i minim nambawan trutok blong Kingdom. Bisnesman i minim ol gudfala man we oli stap lukaot trutok. Bisnesman ya i rere blong salem olgeta samting we hem i gat, blong i save pem perel ya. Jisas i talem wan narafala parabol tu. Hem i tokbaot man we i faenem wan bigfala bokis mane we narafala man i bin “haedem” long wan pis graon. Man ya i no stap wokbaot olbaot blong lukaot ol sas samting, olsem bisnesman ya. Be taem hem i faenem bokis ya we i fulap long mane, hem tu i rere blong salem “olgeta samting we hem i gat” blong pem graon ya.

17. ?Jisas i wantem tijim ol man long wanem?

¹⁷ ?Jisas i wantem tijim ol man long wanem? Hem i wantem soemaot se i gat defdefren rod blong kasem trutok. Sam man oli lukaot trutok, oli traehad long evri rod gogo oli faenem. Sam narafala oli no lukaot trutok, be oli harem samples, maet taem yumi prij long olgeta, nao oli bilif long hem. Long tufala parabol ya tugeta, man i luksave se samting we hem i faenem i gud tumas, nao hem i rere blong lego evri samting, blong kasem gudfala samting ya.

18. (1) ?Yumi lanem wanem long tufala parabol ya? (2) ?Tufala parabol ya i soemaot wanem long saed blong Jehova mo Jisas?

¹⁸ ?Yumi lanem wanem? (Matiu 6:19-21) I gud yumi askem se: ‘?Mi mi gat sem tingting olsem man long tufala parabol ya? ?Mi mi ting se trutok i wan sas samting, olsem wan bigfala bokis mane? ?Mi mi rere blong lego evri samting blong kasem trutok, no mi letem sam samting, olsem ol wari blong laef, oli pulum tingting blong mi i gowe long trutok?’ (Matiu 6:22-24, 33; Luk 5:27, 28; Filipae 3:8) Sipos yumi rili laekem trutok, yumi rere blong lego evri samting, mo putum trutok i stap fastaem long ol narafala samting long laef blong yumi.

19. ?Bambae yumi tokbaot wanem long nekis stadi?

¹⁹ Yu mas lesin gud mo harem save mining blong ol parabol ya. Be yu mas tingbaot tu se i no naf blong save mining blong olgeta nomo. Yu mas folem ol samting we yu lanem, mo mekem i wok long laef blong yu. Long nekis stadi, bambae yumi tokbaot 3 moa parabol we yumi save lanem plante samting from.