1, 2. Pine nemene matre ala nyimu la itre atr ka tha trotrohnine kö la aliene la itre ithanata i Iesu?

AME la ketre atr a ithanata koi së, tha easë hmekuje kö a drenge la nine aqane ithanata i angeic, ngo memine fe la nine hnenyinawa. Ngo ame göi troa trotrohnine la hnei angeic hna qaja, tre nyipi ewekë tro sa trotrohnine la aliene la itre ithanata i angeic. (1 Korinito 14:9) Hnei Iesu hna ithanata kowe la itre atr ka ala thauzan ngöne la sipu qene hlapa i angatr. Ngo tha trotrohnine asë kö hnene la nöjei atr la aliene la itre trenge ithanata i nyidrë. Celë hi matre öni Iesu: “Dei ni ju hnei nyipunie asë, me trotrohnin.”—Mareko 7:14.

² Pine nemene matre ala nyimu qa ngöne la itre atr cili la itre ka tha trotrohnine la aliene la itre ithanata i Iesu? Ame la itre xan, tre hetre aqane waiewekë i angatre hë, maine pena hetrenyi thei angatr la itre mekune ka menu. Hnei Iesu hna qaja la itre atr cili me hape: “Loi koi nyipunie lo hna apatene la wathebo i Akötesie troa trongëne la thina i nyipunie.” (Mareko 7:9) Tha hnei angatre kö hna thele troa trotrohnine la aliene la itre trenge ithanata i Iesu. Nge tha pi tro kö angatr a saze la itre hnei angatre hna majemin, me itre aqane mekune i angatr. Ame la itre atr cili, angatre hi a drenge hnene la  itre hnangenyë i angatr, ngo gufa kö la trotrohnine ngöne la itre hni i angatr. (E jë la Mataio 13:13-15.) Tro sa atre tune kaa ka hape, ka tru pala hi koi së la itre ini qaathei Iesu?

3. Pine nemene matre kola trotrohnine hnene la itretre drei Iesu la itre ithanata i nyidrë?

³ Nyipi ewekë tro sa xötrethenge la tulu ne la itretre drei Iesu, tulu ne itre ka hni ka ipië. Öni nyidrë koi angatr: “Manathithi la ite lue meke i nyipunie, ke kola goeën, me ite hnangenyë i nyipunie, ke kola deng.” (Mataio 13:16) Pine nemene matre angatre a trotrohnine ngo tha trotrohnine fe kö itre xan? Köni ewekë hnei angatre hna kuca. Ame la hnapan, tre, pi tro angatr a atre la aliene la itre ithanata i Iesu, celë hi matre angatr a hnying. (Mataio 13:36; Mareko 7:17) Ame la hnaaluen, angatr a ce wange la itre ewekë hnei angatre hna hnyipi kapa memine la itre ewekë hnei angatre hë hna kapa. (E jë la Mataio 13:11, 12.) Ame la hnaakönin, jëne la itre ewekë hnei angatr hna atre hë, tro angatr a kepe ixatua qa ngön, a tha koi angatre hmekuj, ngo nyine tro fe a xatua itre xan.—Mataio 13:51, 52.

4. Nemene la köni ewekë nyine tro sa kuca matre troa trotrohnine la itre ceitune i Iesu?

⁴ Haawe, loi e tro fe sa xötrethenge lo köni ewekë hna kuca hnene la itretre drei Iesu, matre tro sa hane trotrohnine la itre ceitune hna kuca hnei Iesu. Ame la hnapan, loi e tro sa xomi ijin troa inine me mekune ajuine la itre ithanata i Iesu, me thele ewekë ngöne la itre itusi së, nge tro sa amejëne la itre nyipi hnying. Celë hi aqane tro së lai a hetrenyi la atrehmekun, ene la troa atre Akötresie. (Ite Edomë 2:4, 5) Ame la hnaaluen, tro sa xome la atrehmekune cili troa ce wange memine la itre ewekë hne së hë hna atre, me wange fe la thangane ej koi së isa ala cas. Celë hi trotrohnine lai. (Ite Edomë 2:2, 3, MN) Ame la hnaakönin, tre, ame la itre hne së hna atre hë, loi e tro sa melën. Celë hi inamacane lai.—Ite Edomë 2:6, 7.

5. Hamenë jë la ketre ceitun ka amamane la eisapengönene la atrehmekune,trotrohnin, me inamacan.

⁵ Nemene la eisapengönene la köni ewekë celë: atrehmekune, trotrohnin, me inamacan? Loi e tro sa aceitunëne lai memine la ewekë celë: Pane mekune jë epuni ka hape, epuni a cile e kuhu nyipine gojeny, nge kola nyenyape catre la kar koi epun. Ame la pane ewekë hnei epuni hna öhn, tre, kar; celë hi atrehmekune lai. Ame la hnaaluen, epuni a öhn ka hape, epuni e kuhu nyipine la gojeny, nge kolo ha troa wilë epuni hnene la kar; celë hi trotrohnine lai. Matre canga kötre jea ju hi epun; celë hi inamacane lai. Öni Tusi Hmitrötr koi së ka hape, tro sa ‘xome catrëne la inamacan,’ ke celë hi lai ka troa amele së!—Ite Edomë 3:21, 22; 1 Timoteo 4:16.

6. Nemene la foa lao hnyinge nyine tro sa amexej ngöne la easa wange xötrëne la sevene lao ceitune i Iesu? (Wange ju la itre mekune hna  eköhagen.)

⁶ Ame ngöne la tane mekune celë memine la ka troa xulu, tro sa ce wange la sevene lao ceitun hna kuca hnei Iesu. Ame hë la easa wange xötrëne itre ej, loi e tro sa amexeje la itre hnyinge celë: Nemene la aliene la ceitune celë? (Kolo hi lo atrehmekune lai.) Nemene la kepine matre qaja jë  Iesu la ceitune celë? (Kolo hi lo trotrohnine lai.) Nemene la aqane tro sa huliwane la itre ithuemacanyi celë thatraqai së me göi tro fe a xatuane la itre xa atr? (Kolo hi lo inamacane lai.) Ame hë e cili, nemene la hne së hna inin göi Iehova me Iesu qa ngöne la ceitune cili?

7. Nemene la aliene la ceitune i Iesu göi itine sinapi?

⁷ (E jë la Mataio 13:31, 32.) Nemene la aliene la ceitune i Iesu göi itine sinapi? Itine sinapi la ka nyihatrene la maca ne la Baselaia hne së hna cainöjën, memine la ekalesia i Keresiano. Ame lo kola nyiqaane la ekalesia i Keresiano lo 33 M.K., * eje petre kö a itine ‘ka co fene la nöjei itin’ asë.’ Ame ngöne la hnepe ijine ka xoxopatr, canga nyimenyime hi eje kökötr, thangane hi la huliwa ne cainöj. Nyimutre la itre atr ka haine la aqane kökötre nyimenyimene la huliwa. (Kolose 1:23) Öni Iesu, ‘ite waco e caha a tithe la ite umene la sinöe.’ Kolo lai a hape, kökötre catre hë la ekalesia i Keresiano, nge itre atr ka hni ka nyipici a öhne la xeni ne la u, me hetre ititaxapo, me hnë lapa.—Wange ju fe la Ezekiela 17:23.

8. Nemene la kepine matre qaja jë Iesu la ceitune göi itine sinapi?

⁸ Nemene la kepine matre qaja jë Iesu la ceitune celë? Hnei nyidrëti hna xome  nyine ceitun la aqane cia nyimenyimene la itine sinapi göi troa amamane la aqane kökötr, me ithupë, me elë hune la nöjei jol hnene la Baselaia i Akötresie. Qaane lo 1914, nyine haine la aqane kökötrene la ekalesia i Keresiano. (Isaia 60:22) Ame la itre atr ka lapa e hnine la ekalesia, tre angatr a kapa la ixatua göi troa lapa qale catre koi Iehova. (Ite Edomë 2:7; Isaia 32:1, 2) Pëkö ketre aqane icilekeu ka atreine troa sawa la ekalesia troa kökötr.—Isaia 54:17.

9. (a) Nemene la ini nyine xome qa ngöne la ceitune göi itine sinapi? (b) Nemene la hne së hna inin göi Iehova me Iesu qa ngöne la ceitune celë?

⁹ Nemene la ini nyine tro sa xome qa ngöne la ceitune göi itine sinapi? Maine jë, easë ngöne la ketre nöj gaa xalaithe hi la Itretre Anyipici Iehova, nge tha tru kö hnei atr ka pi hane hmi. Ngo tha tro pi kö sa thëthëhmine ka hape, atreine hi la Baselaia troa elë hune la nöjei jol. Tro lai a thuecatre së matre tro pala hi sa cile catr. Ka tune la ketre trejine me easë, Edwin Skinner; ka traqa angeic e Inde lo 1926. Ame la ijine cili, tha tru kö hnei Itretre Anyipici Iehova, nge “huliwa ka hace” la troa cainöj e cili, ke, kösë pëkö thangan. Ngo hnei angeice hna catre cainöj, me öhne la aqane elë hune la itre jol e cili hnene la maca ne la Baselaia. Ame enehila, ase hë sasaithe la 37 000 la etrune la Itretre Anyipicin e Inde, nge hna sasaithe fe la 108 000 lao ka traqa kowe lo Drai Ne Amekunën lo 2013. Ame lo macatre ne traqa Edwin e Inde, ketre kolo fe hi a nyiqaane cainöj e Zambie. Ame hë enehila, ase hë sasaithe la 170 000 lao Itretre Anyipicin e cili, nge 763 915 lao ka traqa ngöne la Drai Ne Amekunën lo 2013. Kösë e 18 lao atr e Zambie, ala cas la ka traqa kowe la Drai Ne Amekunën. Nyine haine la aqane kökötrene la huliwa e cili!

10. Nemene la aliene la ceitune göi leven?

¹⁰ (E jë la Mataio 13:33.) Nemene la aliene la ceitune göi leven? Kola qaja la maca ne la Baselaia me aqane saze la atr hnene ej. Nge, ame la kola “cengöne cipa” la falawa tre, kola nyihatrene la nöjei nöj asë. Ame la aqane cipa trootro la falawa hna nyi levenën, tre kola amamane la aqane kökötre trootro la maca ne la Baselaia, thangane la huliwa ne cainöj. Maine nyipici laka canga mama hi la aqane cia la itine sinapi, ngo ame kö la aqane kökötre lai leven, tre, ka thaa mama kö. Ngo tro pë hë a mama koi së la thangane la leven, itre hnepe ijine thupen.

11. Nemene la kepine matre qaja jë Iesu la ceitune celë?

¹¹ Nemene la kepine matre qaja jë Iesu la ceitune celë? Iesu a amamane ka hape, tro la maca ne la Baselaia a kökötr “uti hë la cane la fene hnengödrai,” nge tro ej a ujëne la hni ne la itre atr. (Ite Huliwa 1:8) Tha canga mama kö koi së la ewekë ka saze thei angatr. Eje hi laka, ala nyimu la itre atr e cailo fen ka kapa la  maca ne la Baselaia, me nue ej troa saze angatr.—Roma 12:2; Efeso 4:22, 23.

12, 13. Qaja jë la itre xa aqane kökötrene la huliwa ne cainöj tune la hna amamane ngöne la ceitun göi leven.

¹² Kola mama la thangane la hna cainöje ngöne la itre macatre thupene la hna xötrei drenge la maca. Hanawange la hna melëne hnei Franz me Margit lo 1982, lue trefëne ka huliwa ngöne la Bethela ne Brésil. Hnei nyidroti hna cainöj ngöne la ketre neköi traon ka co. Nyimutre la itre atr hnei nyidroti hna nyiqaane ini Tusi memin, tune la ketre föe memine la foa lao nekö i eahlo. Ka 12 lao macatre ne la haetra, nge ka lapa thaupu pe hi. Ame itre xa ijin, nyën a zae qëmekene troa ini Tus. Pine laka hna upi Franz me Margit kowe la ketre götran, thatreine hmaca kö nyidroti troa wange hmaca la itre ka ini Tusi me nyidro. Thupene la 25 lao macatre, bëeke hmaca jë hi nyidro troa wange la ekalesia. Pane mekune jë la etrune la madrine i nyidro la kola öhne laka 69 hë lao atr ka cainöj, nge 13 thei angatr la ka pionie lapa, nge angatre hë a icasikeu ngöne la ketre Uma Ne Baselaia ka hnyipixe! Goi öhne fe nyidro lo nekönatr ka lapa thaupe ekö, a ketre thupëtresiji hë enehila nge angeice la kordinatör ne la ekalesia! Tune lo ceitune göi leven hna qaja hnei Iesu, hna kökötre la maca ne la Baselaia ame hna saze la itre atr ka ala nyim.

¹³ Ame ngöne la itre xa nöj, ngacama hna wathebone kowe la itre trejine troa cainöj, ngo tro pala hi a hetre thangane kowe la itre atr e cili. Nge ame itre xa ijin, easa sesëkötre hnene la aqane kökötrene la maca ngöne la itre götrane cili. Tune e Cuba, nöje hna ketr hnene la maca ne la Baselaia lo 1910, nge hna wange la nöje cili hnei C. Russell lo 1913. Ame ngöne la xötrei, tha tru kö hnei atr ka kapa la nyipici. Ngo tune kaa hë enehila e Cuba? Ase hë sasaithe la 96 000 lao trejine ka cainöjëne la maca ka loi, nge ala 229 726 la ka traqa kowe la Drai Ne Amekunën lo 2013, kösë maine 48 lao atrene la nöj, ala cas la ka traqa. Ame mina fe ngöne lo itre nöj hna thing, ke hna hane fe ketr hnene la maca ne la Baselaia, la itre götrane tha hna mekune kö ekö hnene la Itretre Anyipici Iehova troa hane cainöje ngön. * (Wange ju la ithuemacany)—Ate Cainöj. 8:7; 11:5.

14, 15. (a) Nemene la ini nyine tro sa xome qa ngöne la ceitune göi leven? (b) Nemene la hna ini së göi Iehova me Iesu hnene la ceitune celë?

¹⁴ Nemene la ini nyine tro sa xome qa ngöne la ceitune göi leven? Ame la easa mekune ajuine la aliene la ceitune i Iesu, easë hi a öhne ka hape, tha tro kö sa hnehengazone menune la aqane tro la maca ne Baselaia a ketr la itre milio lao atr ka tha hane pala kö dreng la maca. Atre kö Iehova la nyine kuca. Ngo nemene pe la nyine tro sa kuca? Öni Tusi Hmitrötr e sa: “E hmakanyi traneju la ite feja i ’ö, nge e heji the shawa kö la iwanakoime i ’ö, ke tha ’te kö eö la ka troa cia, maine celë maine cili, nge maine troa ce loi lu’ ej.” (Ate Cainöj 11:6) Eje hi laka, loi e tro pala hi sa sipo Iehova troa amanathithine la huliwa ne cainöj, ene ngöne la itre götrane hna thinge petre kö.—Efeso 6:18-20.

 ¹⁵ Ketre, tha tro pi kö sa kucakuca e tha canga öhne kö së la thangane la hne së hna cainöj. Tha tro kö sa “methinëne la drai ne la ite ewekë ka co.” (Zakaria 4:10) Maine jë tro kö lai a sisitria catre elanyi la thangane hune la hne së hna mekun!—Salamo 40:5; Zakaria 4:7.

16. Nemene la aliene la lue ceitun, ene la atre salem me trenga mo hna juetrën?

¹⁶ (E jë la Mataio 13:44-46.) Nemene la aliene la lue ceitun, ene la atre itö (maine atre salem) me trenga mo hna juetrën? Ame ngöne la hneijine i Iesu, hna majemine tro gaa nanyi hnene la itre ka salem matre troa thele la itre penina ka mingöming me itöne itre ej. Ame la “penina ka tru alameken” ngöne la ceitune i Iesu, tre kola nyihatrene la nyipici ka tru alien, ene la Baselaia, nge ame la atre salem, kola nyihatrene la itre atr ka hni ka nyipici, nge ka thele agöne la nyipici cili. Canga saqe hi la atr salemëne la nöjei ewekë i angeic matre troa itöne lai penina ka lolo cili. Hnei Iesu fe hna qaja la ketre ceitun, ene la atre ka huliwa ngöne la hlapa, nge ka öhne la trenga mo “hna juetën.” Tha ceitu i angeice kö memine la ka salem, tha hnei angeice kö hna thele la trenga mo. Ngo ame hë la angeic a öhne la etrune ej, canga saqe hi angeice fe salemëne la “ite ewekë i angeice” göi troa itön ej.

17. Nemene la kepine matre qaja jë Iesu la lue ceitun, ene la atre salem me trenga mo hna juetrën?

¹⁷ Nemene la kepine matre qaja jë Iesu la lue ceitune celë? Nyidrëti a amamane ka hape, nyimu aqane troa öhne la nyipici. Ame itre xa atr, angatr a thele la nyipici, ame hnei angatre hna huujëne la mele i angatr troa kapa ej. Ame itre xan, ngacama tha angatre kö a thele la nyipici, ngo öhne ju hi angatr me kapa ej, maine jë hnene la ketre trejin hna traqa troa cainöje koi angatr. Trotrohnine hnyawa hi la lue atr ne la lue ceitun la etrune la ewekë hnei nyidroti hna isa öhn, ame hnei nyidroti hna huliwa catre matre kapa la ewekë cili.

18. (a) Nemene la ini nyine tro sa xome qa ngöne la lue ceitune celë? (b) Nemene la hna ini së göi Iehova me Iesu hnene lue ceitune celë?

¹⁸ Nemene la ini nyine tro sa xome qa ngöne la lue ceitune celë? (Mataio 6:19-21) Isa waipengöi epuni ju me hape: ‘Tune kaa fe la aqane ujënge kowe la nyipici, ceitunge fe kö memine la lue atr celë? Eni kö a goeëne la nyipici ceitu me trenga mo? Canga saqenge kö huujëne la melenge troa kapa ej, maine eni pena a nue la itre xa ewekë troa sewe ni, tune la itre ewekë hna kukehnine ngöne la mel?’ (Mataio 6:22-24, 33; Luka 5:27, 28; Filipi 3:8) Maine tro sa hnine la nyipici, tro hë sa canga kuca la nöjei ewekë matre troa amë panën ej ngöne la mele së.

19. Nemene la hne së hna troa ce wange ngöne la tane mekune ka troa xulu?

¹⁹ Catre pi së amamane ka hape, hne së hna drenge me trotrohnine hnyawa la aliene la itre ceitune celë. Tha tro pi kö sa thëthëhmine ka hape, tha tro hmekuje kö sa atre la aliene itre ej. Loi e tro fe sa trongëne la itre ini hne së hna xome qa ngön. Ame ngöne la tane mekune ka troa xulu, easë a troa ce wange la köni xa ceitun, me wange la itre ini nyine troa xome qa ngön.