1, 2. Ngaa ang madamo nga nagpamati kay Jesus indi makahangop sa kahulugan sang iya ginsiling?

ANG isa ka tawo mahimo makabati sang tingog sang isa nga nagapakig-istorya sa iya. Mahimo pa gani niya matalupangdan ang tono sang tingog. Pero ano ang pulos sini sa iya kon wala niya nahangpan ang kahulugan sang ginahambal sa iya? (1 Cor. 14:9) Kaanggid man sa sini ang linibo nga nakabati sa ginsiling ni Jesus. Nakighambal pa gani sia sa ila sa lenguahe nga mahangpan nila. Pero indi tanan sa ila nakahangop sa kahulugan sang iya ginsiling. Bangod sini, ginsilingan ni Jesus ang iya mga tagpalamati: “Pamati sa akon, kamo tanan, kag hangpa ang kahulugan sini.”—Mar. 7:14.

² Ngaa madamo ang indi makahangop sa kahulugan sang ginsiling ni Jesus? Ang pila may mga opinyon na nga daan kag sala nga mga motibo. Si Jesus nagsiling parte sa ila: “Nagapadihot kamo sa pagsikway sa sugo sang Dios agod sundon ang inyo tradisyon.” (Mar. 7:9) Ini nga mga tawo wala gid nagtinguha nga mahangpan ang kahulugan sang iya ginsiling. Indi nila gusto bag-uhon ang ila mga kinabatasan kag mga pagtamod. Ang ila mga dulunggan mahimo nga nakabati, pero sarado ang ila tagipusuon! (Basaha ang Mateo 13:13-15.) Gani, paano naton mapat-od nga ang aton tagipusuon nagapabilin nga bukas agod makabenepisyo kita sa panudlo ni Jesus?

3. Ngaa nahangpan sang mga disipulo ang ginsiling ni Jesus?

³ Dapat naton sundon ang halimbawa sang mapainubuson nga mga disipulo ni Jesus. Ginsilingan niya sila: “Malipayon kamo bangod makakita ang inyo mga mata kag makabati ang inyo mga dulunggan.” (Mat. 13:16) Ngaa nakahangop sila samtang ang iban wala? Una, handa sila sa pagpamangkot kag sa pagpangita sa matuod nga kahulugan sang ginsiling ni Jesus. (Mat. 13:36; Mar. 7:17) Ikaduha, handa nila nga idugang ang ila bag-o nga natun-an sa ila na mismo ginapatihan. (Basaha ang Mateo 13:11, 12.) Ikatlo, handa sila nga gamiton ang ila nabatian kag nahangpan, indi lang sa ila kaugalingon kundi sa ila man pagpanikasog nga buligan ang iban.—Mat. 13:51, 52.

4. Para mahangpan ang mga ilustrasyon ni Jesus, ano ang tatlo ka tikang nga nadalahig?

⁴ Kon gusto naton mahangpan ang mga ilustrasyon ni Jesus, dapat naton sundon ang halimbawa sang matutom nga mga disipulo. Nadalahig man sa sini ang tatlo ka tikang. Una, dapat handa kita nga maghatag sing tion sa pagtuon kag sa pagpamalandong sa ginsiling ni Jesus, mag-research, kag magpautwas sing nagakaigo nga mga pamangkot. Nagaresulta ini sa ihibalo. (Hulu. 2:4, 5) Dayon, dapat naton hibaluon kon paano ina nga ihibalo nagahisanto sa nahibaluan na naton, nga ginahantop ang benepisyo sini sa aton. Nagaresulta ini sa paghangop. (Hulu. 2:2, 3) Sa katapusan, dapat naton gamiton ang aton natun-an, nga ginaaplikar ini sa aton kabuhi. Nagapakita ini sing kaalam sa aton bahin.—Hulu. 2:6, 7.

5. Iilustrar ang kinatuhayan sang ihibalo, paghangop, kag kaalam.

⁵ Ano ang kinatuhayan sang ihibalo, paghangop, kag kaalam? Sa pag-ilustrar: Ibutang ta nga nagatindog ka sa tunga sang dalan kag nakita mo nga ang bus nagapakadto sa imo. Una, nahibaluan mo nga may bus—amo ina ang ihibalo. Dayon, narealisar mo nga kon indi ka maghalin, mabungguan ka gid sang bus—amo ina ang paghangop! Gani nagpahigad ka dayon—amo ina ang kaalam! Ina ang rason kon ngaa ginpadaku sang Biblia nga dapat naton ‘bantayan ang maayo nga kaalam.’ Nagakahulugan ini sang aton kabuhi!—Hulu. 3:21, 22; 1 Tim. 4:16.

6. Ano ang apat ka pamangkot nga aton ipautwas samtang ginabinagbinag naton ang pito ka ilustrasyon ni Jesus? (Tan-awa ang  kahon.)

⁶ Sa sini kag sa masunod nga artikulo, binagbinagon naton ang pito ka ilustrasyon ni Jesus. Samtang ginabinagbinag ini, ipautwas naton ang masunod nga mga pamangkot: Ano ang kahulugan sini nga ilustrasyon? (Magabulig ini para makatigayon kita sing ihibalo.) Ngaa gingamit ni Jesus ini nga ilustrasyon? (Nagaresulta ini sa paghangop.) Paano naton magamit ini nga impormasyon para mabuligan ang aton kaugalingon kag ang iban? (Amo ini ang kaalam.) Kag sa katapusan, ano ang ginatudlo sini sa aton parte kay Jehova kag kay Jesus?

7. Ano ang kahulugan sang ilustrasyon parte sa lamigas sang mustasa?

⁷ Basaha ang Mateo 13:31, 32. Ano ang kahulugan sang ilustrasyon ni Jesus parte sa lamigas sang mustasa? Ang lamigas mismo nagarepresentar sa mensahe sang Ginharian kag sa mga resulta sang pagbantala sina nga mensahe—ang Cristianong kongregasyon. Kaangay sang lamigas sang mustasa nga “pinakagamay sa tanan nga binhi,” ang Cristianong kongregasyon gamay man sang nagsugod ini sang 33 C.E. Pero sa sulod sang pila ka dekada, madasig ini nga nag-uswag. Ang pagdaku sini labaw pa sa ginapaabot. (Col. 1:23) Ini nga pag-uswag mapuslanon gid bangod nagsiling si Jesus nga “ang mga pispis sa langit” mahimo ‘makahulon sa mga sanga sini.’ Ining malaragwayon nga mga pispis nagapatuhoy sa sinsero nga mga indibiduwal nga nagapangita sing espirituwal nga pagkaon, handong, kag palasilungan sa sulod sang Cristianong kongregasyon.—Ipaanggid ang Ezequiel 17:23.

8. Ngaa gingamit ni Jesus ang ilustrasyon parte sa lamigas sang mustasa?

 ⁸ Ngaa gingamit ni Jesus ini nga ilustrasyon? Gingamit niya ang dalayawon nga pagtubo sang lamigas sang mustasa para iilustrar ang ikasarang sang Ginharian sang Dios sa pagpasangkad, pag-amlig, kag sa pag-atubang sa tanan nga kabudlayan. Sugod sang 1914, ang pag-uswag sang makita nga bahin sang organisasyon sang Dios tumalagsahon gid! (Isa. 60:22) Ang mga nagapakig-upod sa sina nga organisasyon nakabaton sing dalayawon nga espirituwal nga pangamlig. (Hulu. 2:7; Isa. 32:1, 2) Luwas sini, ang padayon nga pagsangkad sang mga intereses sang Ginharian indi gid mapunggan, kag nangin madinalag-on sa tanan nga pagpamatok.—Isa. 54:17.

9. (a) Ano ang matun-an naton sa ilustrasyon parte sa lamigas sang mustasa? (b) Ano ang ginatudlo sini sa aton parte kay Jehova kag kay Jesus?

⁹ Ano ang matun-an naton sa ilustrasyon parte sa lamigas sang mustasa? Ayhan diutay lamang ang mga Saksi sa aton lugar ukon indi dayon naton makita ang resulta sang aton pagbantala. Pero ang pagdumdom nga masarangan sang mga hilikuton sang Ginharian ang tanan nga kabudlayan magapabakod sa aton nga magpadayon. Halimbawa, sang si Utod Edwin Skinner nag-abot sa India sang 1926, ilisipon lamang ang mga Saksi didto. Sang primero, kahinay sang pag-uswag, kag ang hilikuton “tama gid ka budlay.” Pero nagpadayon sia sa pagbantala kag nakita niya kon paano nagmadinalag-on ang mensahe sang Ginharian bisan pa sa dalagku nga mga kabudlayan. Sa karon, sobra na sa 37,000 ang aktibo nga Saksi sa India, kag sobra sa 108,000 ang nagtambong sa Memoryal sang nagligad nga tuig. Binagbinaga ang isa pa ka halimbawa kon paano madasig nga nagsangkad ang mga hilikuton sang Ginharian. Sa tuig mismo nga nag-abot si Utod Skinner sa India, bag-o man nagsugod ang hilikuton sa Zambia. Sa karon, sobra sa 170,000 ang mga manugbantala didto, kag 763,915 ang nagtambong sa Memoryal sang 2013. Nagakahulugan ini nga sa 18 ka tawo sa Zambia, 1 sa ila ang nagtambong. Dalayawon gid ini nga pag-uswag!

10. Ano ang kahulugan sang ilustrasyon parte sa lebadura?

¹⁰ Basaha ang Mateo 13:33. Ano ang kahulugan sang ilustrasyon parte sa lebadura?  Ini nga ilustrasyon nagapatuhoy man sa mensahe sang Ginharian kag sa mga ginapatubas sini. Ang “bug-os nga linamas” sang harina nagarepresentar sa tanan nga pungsod, kag ang proseso sang pagkumbo nagalaragway sa paglapnag sang mensahe sang Ginharian paagi sa pagbantala nga hilikuton. Samtang ang pagtubo sang lamigas maathag nga makita, ang paglatom sang lebadura indi makita sa umpisa. Pero pagligad sang tion, mangin maathag ang mga epekto sini.

11. Ngaa gingamit ni Jesus ang ilustrasyon parte sa lebadura?

¹¹ Ngaa gingamit ni Jesus ini nga ilustrasyon? Ginapakita niya nga ang mensahe sang Ginharian may ikasarang sa paglapnag kag sa paghimo sing mga pagbag-o. Nakalab-ot ini “tubtob sa ukbong sang duta.” (Binu. 1:8) Pero ang mga pagbag-o bangod sang mensahe indi pirme makita; ang pila sa mga epekto sini mahimo pa gani indi matalupangdan sa umpisa. Pero may mga pagbag-o gid—indi lamang sa kadamuon kundi pati man sa personalidad sang mga nagbaton sining lapnag nga mensahe.—Roma 12:2; Efe. 4:22, 23.

12, 13. Maghatag sing mga halimbawa kon paano nag-uswag ang pagbantala sang Ginharian subong sang ginlaragway sa ilustrasyon parte sa lebadura.

¹² Ang epekto sang pagbantala masami nga makita pagligad sang mga tinuig sa tapos ini ginsugdan. Halimbawa, sanday Franz kag Margit, nga nagaalagad karon sa iban nga sanga talatapan, nag-alagad sa sanga talatapan sa Brazil sang 1982. Nagpanaksi sila sa gamay nga banwa. Lakip sa ila gintun-an sa Biblia amo ang isa ka iloy kag ang apat ka kabataan sini. Ang kamagulangan, nga 12 anyos pa lang sadto, mahuluy-on katama kag masami nagapanago antes sang pagtuon. Bangod nagbag-o ang asaynment sang mag-asawa, wala na nila napadayon ang pagtuon. Pero 25 ka tuig sang ulihi, nakabisita sila liwat sa sini nga banwa. Ano ang nakita nila? May kongregasyon na diri nga may 69 ka manugbantala, 13 sa sini ang regular payunir, kag may bag-o na sila nga Kingdom Hall. Kamusta naman ang mahuluy-on nga bata? Sia na subong ang koordenitor sang hubon sang mga gulang! Kaangay sang lebadura sa ilustrasyon ni Jesus, ang mensahe sang Ginharian nagtubo kag nagpabag-o sa kabuhi sang madamo—kag nalipay gid sa sini ang mag-asawa!

¹³ Ang indi makita nga ikasarang sang mensahe sang Ginharian sa pagpabag-o sa mga tawo makita gid sa mga pungsod diin ginadumilian ang hilikuton. Mabudlay mahibaluan kon daw ano na kalapnag ang nalab-utan sang mensahe sa sina nga mga pungsod, kag sa masami nagakakibot kita sa mga resulta sini. Binagbinaga halimbawa ang Cuba. Ang mensahe sang Ginharian nakalab-ot didto sang 1910, kag si Utod Russell nagbisita sa Cuba sang 1913. Pero ang pag-uswag mahinay sa umpisa. Apang kamusta na subong ang Cuba? Sobra na sa 96,000 ang manugbantala sang maayong balita, kag 229,726 ang nagtambong sa Memoryal sang 2013—buot silingon 1 sa kada 48 ka pumuluyo sang pungsod. Bisan sa mga pungsod nga wala ginadumilian ang hilikuton, ang mensahe sang Ginharian mahimo nakalab-ot sa mga lugar diin ginahunahuna sang mga Saksi didto nga indi nila pirme mabantalaan ina nga lugar. *—Man. 8:7; 11:5.

14, 15. (a) Paano kita personal nga makabenepisyo sa leksion sang ilustrasyon parte sa lebadura? (b) Ano ang ginatudlo sini sa aton parte kay Jehova kag kay Jesus?

¹⁴ Paano kita makabenepisyo sa gintudlo ni Jesus nga ilustrasyon parte sa lebadura? Kon pamalandungan naton ang kahulugan sang ilustrasyon ni Jesus, marealisar naton nga indi na kita dapat magkabalaka sing sobra parte sa kon paano malab-ot sang mensahe sang Ginharian ang minilyon nga wala  pa makabati sini. Kontrolado ni Jehova ang tanan. Pero ano ang aton hilikuton? Ang Pulong sang Dios nagsabat: “Sa kaagahon isab-ug ang imo binhi, kag sa kahaponon dili pagpunggi ang imo kamut; kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.” (Man. 11:6) Siempre, indi kita dapat malipat nga ipangamuyo ang kadalag-an sang pagbantala, labi na sa mga pungsod nga ginadumilian ini.—Efe. 6:18-20.

¹⁵ Isa pa, indi kita dapat maluyahan kon indi dayon naton makita ang mga resulta sang aton hilikuton. Indi naton dapat pagpakadiutayon ang “adlaw sang magamay nga mga butang.” (Zac. 4:10) Ang mga resulta sa ulihi mahimo nga mas daku kag mas dalayawon sangsa ginapaabot naton!—Sal. 40:5; Zac. 4:7.

16. Ano ang kahulugan sang ilustrasyon parte sa nagalakbay nga manugpatikang kag bahandi nga natago?

¹⁶ Basaha ang Mateo 13:44-46. Ano ang kahulugan sang ilustrasyon parte sa nagalakbay nga manugpatikang kag bahandi nga natago? Sang panahon ni Jesus, ang pila ka manugpatikang ukon negosyante mahimo maglakbay tubtob sa Dagat Indian para makakuha sing pinakamaayo nga mga perlas. Ang manugpatikang sa sini nga ilustrasyon nagarepresentar sa sinsero nga mga tawo nga naglakbay sa malayo para matigayon ang ila espirituwal nga mga kinahanglanon. Ang “isa ka perlas nga may daku nga balor” nagarepresentar sa hamili nga kamatuoran sang Ginharian. Bangod nahibaluan sang manugpatikang ang balor sina nga perlas, handa sia nga ibaligya “gilayon” ang tanan niya nga pagkabutang agod mabakal ini. Nagsiling man si Jesus parte sa tawo nga nagatrabaho sa uma kag nakakita sing “natago” nga bahandi. Indi pareho sang manugpatikang, ini nga tawo wala nagapangita sing bahandi. Pero kaangay sang manugpatikang, handa niya ibaligya “ang tanan” agod matigayon ang bahandi.

17. Ngaa ginhatag ni Jesus ang mga ilustrasyon parte sa nagalakbay nga manugpatikang kag natago nga bahandi?

¹⁷ Ngaa ginhatag ni Jesus ining duha ka parabola? Ginapakita niya nga ang kamatuoran masapwan sa madamo nga paagi. Ang pila ka tawo nagapangita sa sini kag naglakbay sa malayo para masapwan ini. Ang iban wala nagapangita pero nakasapo sini—ayhan bangod may nagdala sini sa ila. Ano man ang rason, ang tagsa ka tawo nakahibalo sang balor sang ila nakita kag handa sila nga maghimo sing daku nga mga sakripisyo para matigayon ini.

18. (a) Paano kita makabenepisyo sa sining duha ka ilustrasyon? (b) Ano ang ginatudlo sini sa aton parte kay Jehova kag kay Jesus?

¹⁸ Paano kita makabenepisyo sa sining duha ka ilustrasyon? (Mat. 6:19-21) Pamangkuta ang imo kaugalingon: ‘Ang akon bala panimuot kaangay sini nga mga tawo? Ginapabaloran ko bala ang kamatuoran kaangay nila? Handa bala ako magsakripisyo para matigayon ini, ukon ginatugutan ko ang iban nga butang, subong sang mga kabalaka sa adlaw-adlaw nga pagkabuhi, nga magsablag sa akon?’ (Mat. 6:22-24, 33; Luc. 5:27, 28; Fil. 3:8) Kon mas tudok ang aton kalipay sang nasapwan naton ang kamatuoran, mas mabakod man ang aton determinasyon nga unahon ini sa aton kabuhi.

19. Ano ang binagbinagon naton sa masunod nga artikulo?

¹⁹ Kabay pa nga mapakita naton nga namati kita kag nahangpan gid naton ang kahulugan sini nga mga ilustrasyon parte sa Ginharian. Dumduma, ginahimo naton ini indi lamang paagi sa paghibalo sa kahulugan sini kundi paagi sa pag-aplikar sa mga leksion nga aton natun-an sa sini. Sa masunod nga artikulo, binagbinagon naton ang tatlo pa ka ilustrasyon kag tan-awon kon ano nga mga leksion ang aton matun-an.