1, 2. Dahaka dainai Iesu idia kamonai henia taudia momo ese ena hereva ena anina idia lalopararalaia lasi?

 TAU ta ese ta ena hereva regena ia kamonaia diba. Unai gado regena ia diba. To bema unai hereva anina ia lalopararalaia lasi, ia dekenai unai be anina lasi, ani? (1 Kor. 14:9) Unai hegeregerena, taunimanima tausen momo be Iesu ena hereva idia kamonai. Idia laloparara gadona dekenai ia hereva henidia. To, momo ese iena hereva anina idia lalopararalaia lasi. Unai dainai, Iesu ia gwau: “Umui ibounai e, lau umui kamonai henia, bona egu hereva ena anina umui lalopararalaia.”​—Mar. 7:14.

² Dahaka dainai momo be Iesu ena hereva ena anina idia lalopararalaia lasi? Haida be mai edia lalohadai aukadia bona kereredia. Iesu be idia dekenai ia gwau: “Umui ese aonega dalanai Dirava ena taravatu umui dadaraia, emui sene karadia umui badinaia totona.” (Mar. 7:9) Unai taudia idia hekwarahi lasi Iesu ena hereva ena anina idia lalopararalaia totona. Idia ura lasi edia kara bona lalohadai idia haidaua. Idia kamonai to edia kudouna ia auka dainai, kara ta idia karaia lasi. (Mataio 13:13-15 duahia.) To, edena dala ai eda kudouna ita  kehoa unai amo Iesu ena hadibaia herevadia amo namo ita abia?

3. Dahaka dainai hahediba taudia be Iesu ena hereva idia lalopararalaia?

³ Namona be Iesu ena manau hahediba taudia ita tohotohoa. Idia dekenai ia gwau: “Umui moale badina emui matana idia itaia bona emui taiana idia kamonai.” (Mat. 13:16) Dahaka dainai idia laloparara to haida be lasi? Dala toi idia badinaia. Namba 1: Idia henanadai bona Iesu ena hereva anina idia tahua namonamo. (Mat. 13:36; Mar. 7:17) Namba 2: Idia ura edia diba idia habadaia. (Mataio 13:11, 12 duahia.) Namba 3: Idia kamonai bona laloparara gaudia idia gaukaralaia idia sibona bona ma haida durua totona.​—Mat. 13:51, 52.

4. Iesu ena parabole ita lalopararalaidia totona, edena dala toi ita badinaia?

⁴ Bema ita ura Iesu ena parabole ita lalopararalaidia, namona be iena hahediba taudia edia haheitalai ita tohotohoa. Dala toi ita badinaia danu. Namba 1: Nega ita atoa Iesu ena hereva ita stadilaia, laloa dobu, tahua, bona henanadai maorodia ita henia. Unai be diba abia karana. (Aon. 2:4, 5) Namba 2: Unai diba be ita dibaia vadaeni gaudia ida ita hahegeregerea, bena ita do ia durua dalana ita tahua. Unai be laloparara karana. (Aon. 2:2, 3) Namba 3: Ita dibaia gaudia be eda mauri lalonai ita gaukaralaia. Unai be aonega karana.​—Aon. 2:6, 7.

5. Diba, laloparara, bona aonega edia idau haheitalaia.

⁵ Diba, laloparara, bona aonega edia idau be dahaka? Edia idau ita diba totona, mani inai haheitalai ita laloa: Oi be dala huanai oi gini bona basi ta ia mai noho. Gau ginigunana be, oi itaia unai be basi—diba oi abia unai. Gau iharuana be, oi diba bema oi gini noho, basi ese oi do ia bampaia—unai be laloparara karana! Gau ihatoina be, dala amo oi raka siri—unai be aonega karana! Unai dainai, Baibel ese ita ia hamaoroa “aonega” do ita naria namonamo. Badina unai amo mauri do ita abia!—Aon. 3:21, 22; 1 Tim. 4:16.

6. Iesu ena parabole seven ita laloa neganai, edena henanadai foa do ita henia? (Maua itaia.)

⁶ Inai stadi bona stadi gabena ai, Iesu ese ia gaukaralaia parabole seven do ita herevalaia. Inai henanadai foa do ita henia: (1) Parabole ena anina be dahaka? (Ita ia durua diba ita abia totona.) (2) Dahaka dainai Iesu ese ita dekenai inai parabole ia henia? (Unai amo laloparara ita abia.) (3) Edena dala ai unai diba ita gaukaralaia ita bona ma haida durua totona? (Unai be aonega karana.) Bona (4) idia amo Iehova bona Iesu dekenai dahaka ita dibaia?

7. Mastadi uhena ena parabole ena anina be dahaka?

⁷ Mataio 13:31, 32 duahia. Mastadi uhena ena parabole ena anina be dahaka? Uhe ese ita harorolaia Basileia sivaraina bona Keristani kongrigeisen ia laulaulaia. Lagani 33 C.E. ai Keristani kongrigeisen ia matamaia neganai, ia be maragi herea, mastadi uhena bamona. To, lagani 20 bamona lalonai, haroro gaukara dainai Keristani kongrigeisen ia tubu daekau. (Kol. 1:23) Iesu ia gwau: “Guba manudia idia mai bona ena rigi huanai noho gabuna idia davaria.” Unai manu ese kudou-maoro taudia idia laulaulaia, idia be Keristani kongrigeisen dekenai idia mai bona Dirava ena hereva idia dibaia, bona ena gimaia henunai noho namona idia davaria.​—Esekiela 17:23 sekea.

8. Dahaka dainai Iesu ese mastadi uhena ena parabole ia gaukaralaia?

 ⁸ Dahaka dainai Iesu ese inai parabole ia gaukaralaia? Ia ese mastadi uhena ena tubu dalana amo Dirava ena Basileia ia bada ia lao, ita ia gimaia, bona koua gaudia ia hanaia daladia ia hahedinaraia. Lagani 1914 amo Dirava ena tanobada oreana ena tubu karana be ia hedinarai goevagoeva! (Isa. 60:22) Unai orea idia bamoa taudia be Dirava ese ia naridia. (Aon. 2:7; Isa. 32:1, 2) Danu, Basileia ena gaukara idauidau idia bada noho, ta ese ia koua diba lasi.​—Isa. 54:17.

9. (a) Mastadi uhena ena parabole amo dahaka ita dibaia? (b) Unai parabole amo Iehova bona Iesu dekenai dahaka ita dibaia?

⁹ Mastadi uhena ena parabole amo dahaka ita dibaia? Reana ita noho gabunai Witnes taudia be momo lasi eiava eda haroro gaukara ena anina ia hedinarai haraga lasi. To, Basileia ese koua gaudia ia hanaia diba karana ita laloa neganai, ita haheauka diba. Hegeregere, lagani 1926 ai, Tadikaka Edwin Skinner be India dekenai ia ginidae neganai, Witnes taudia be momo lasi. Matamanai, momo idia kamonai lasi, bona ia hekwarahi bada. To, ia haroro noho bona ia itaia Basileia sivaraina ese koua gaudia badadia ia hanaia. Hari, India ai, Witnes taudia be 37,000 ia hanaia, bona lagani gunana ena Memorial idia mai taudia ibounai be 108,000 ia hanaia. Basileia ia tubu daekau dalana ma ta ita laloa. Tadikaka  Skinner be India dekenai ia ginidae laganina ai, Zambia dekenai haroro gaukara idia hamatamaia. Hari pablisa 170,000 mai kahana be unuseniai idia haroro, bona lagani 2013 ai Memorial idia mai taudia be 763,915. Anina be Zambia ai taunimanima 18 amo tamona be Memorial ia mai. Unai be tubu dalana idauna momokani!

10. Hatubua muramura ena parabole ena anina be dahaka?

¹⁰ Mataio 13:33 duahia. Hatubua  muramura ena parabole ena anina be dahaka? Hatubua muramura ese Basileia sivaraina bona ita harorolaia amo ia vara anina ia laulaulaia danu. “Paraoa ibounai” ese bese ibounai ia laulaulaia, bona ena tubu karana ese haroro gaukara amo Basileia sivaraina halasia karana ia laulaulaia. Mastadi uhena ia tubu be ita itaia diba, to hatubua paraoa ia tubu matamaia dalana be ita itaia lasi. Nega ia hanaia lalonai ena tubu karana ita itaia diba.

11. Dahaka dainai Iesu ese hatubua muramura ena parabole ia gaukaralaia?

¹¹ Dahaka dainai Iesu ese inai parabole ia gaukaralaia? Ia ura hahedinaraia Basileia sivaraina be mai ena siahu dainai, gabu ibounai dekenai ia lao bona taunimanima edia mauri ia haidaua. Basileia sivaraina be “tanobada ena daudau momokani gabudia dekenai” ia lao. (Kara 1:8) Matamanai unai sivarai ese ia haidaua gaudia be ita itaia lasi. To gabu idauidau ai taunimanima momo ese Basileia sivaraina idia kamonai noho bona unai sivarai ese edia kara ia haidaua.​—Roma 12:2; Efe. 4:22, 23.

12, 13. Hatubua muramura ena parabole bamona, Basileia harorolaia gaukara ena tubu dalana ena ekspiriens haida herevalaia.

¹² Haroro gaukara ena anina be lagani haida murinai ia hedinarai. Hegeregere, Franz bona Margit, hari brens ma ta dekenai idia gaukara, be guna lagani 1982 ai, Brazil ena brens ofesi ai idia gaukara. Idia be taoni maragina ta ai idia haroro, bona idia hamatamaia Baibel stadi amo ta be sina ta mai ena natudia foa. Mero roboana ena mauri lagani be 12, ia be hemarai merona bona stadi ia do matamaia lasi neganai nega momo ia hunia. Franz bona Margit be asainmen matamata idia abia dainai, unai taudia edia stadi idia karaia lou lasi. To, lagani 25 murinai unai taoni dekenai idia vadivadi. Dahaka idia davaria? Kongrigeisen ta mai ena pablisa 69, idia 13 be regula painia, bona ibounai be Kingdom Hall matamatana ai idia hebou. To, unai hemarai merona be edena bamona? Hari ia be elda orea ena kodineita! Iesu ena parabole ai ia gwauraia hatubua muramura bamona, Basileia sivaraina be ia bada ia lao bona momo edia mauri ia haidaua​—unai headava tau bona hahine idia vadivadi neganai idia moale bada!

¹³ Gavamani ese ia taravatua tanodia ai, Basileia sivaraina ese taunimanima edia mauri ia haidaua noho. Ita diba lasi unai bamona tanodia ai sivarai namona be momo ese idia kamonai o lasi, to nega momo anina namona ia vara dainai ita moale. Hegeregere, Cuba ita laloa. Lagani 1910 ai, Basileia sivaraina be unai tano ai idia harorolaia, bona lagani 1913 ai Tadikaka Russell be Cuba hanua ia vadivadi. Matamanai kamonai taudia be momo lasi. Hari Cuba ai dahaka ia vara? Pablisa 96,000 mai kahana be sivarai namona idia harorolaia, bona lagani 2013 ena Memorial ai taunimanima 229,726 idia mai—anina be taunimanima 48 amo tamona be unai hebou ia lao. Gavamani ese ia taravatua lasi tanodia dekenai danu, Basileia sivaraina be gabu momo dekenai idia harorolaia vadaeni, ena be unai gabu ai idia noho Witnes taudia idia laloa unuseniai idia do haroro lasi. a​—Had. 8:7; 11:5.

14, 15. (a) Hatubua muramura ena parabole amo dahaka namo ita abia? (b) Unai parabole amo Iehova bona Iesu dekenai dahaka ita dibaia?

¹⁴ Hatubua muramura ena parabole ai Iesu ese ita ia hadibaia gaudia amo dahaka namo ita abia? Iesu ena parabole  anina ita laloa dobu neganai, ita laloparara namo lasi Basileia sivaraina idia do kamonai lasi taudia dainai ita lalohekwarahi. Iehova be gau ibounai ia biagua. To iseda gaukara be dahaka? Baibel ia haere: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” (Had. 11:6) To namona be nega ibounai haroro gaukara do ia heau namonamo totona ita guriguri, gavamani ese idia taravatua tanodia ai danu.​—Efe. 6:18-20.

¹⁵ Namona be ita lalomanoka lasi bema iseda gaukara ese anina ia havaraia lasi. Namo lasi ita laloa ita be “gaukara maragina” sibona ita karaia. (Sek. 4:10) Badina gabeai ita laloa lasi dalanai eda gaukara ese anina namona do ia havaraia!​—Sal. 40:5; Sek. 4:7.

16. Loaloa hoihoi tauna bona hunia dava bada kohuna edia parabole ena anina be dahaka?

¹⁶ Mataio 13:44-46 duahia. Loaloa hoihoi tauna bona hunia dava bada kohuna edia parabole ena anina be dahaka? Iesu ena negai, loaloa hoihoi taudia be India Davarana amo idia lao pel nadi namodia abia totona. Inai parabole lalonai ia gwauraia hoihoi tauna ese kudou-maoro taudia ia laulaulaia, idia gaukara goada hereva momokani idia dibaia totona. “Dava bada pel nadi” ese Basileia ena hereva momokani ia laulaulaia. Hoihoi tauna be unai pel nadi ena davana ia diba neganai, maoromaoro ena kohu ibounai ia hoihoilaia unai pel ia hoia totona. Danu Iesu ese uma ai ia gaukara tauna ta ia herevalaia, bona ia ese “hunia” dava bada kohu ia davaria. Inai tau be loaloa hoihoi tauna bamona lasi, ia ese dava bada kohudia ia tahua lasi. To hoihoi tauna bamona, ena gau “ibounai” ia hoihoilaia unai dava bada kohu ia abia totona.

17. Dahaka dainai Iesu ese loaloa hoihoi tauna bona hunia dava bada kohu ena parabole ia henia?

¹⁷ Dahaka dainai Iesu ese unai parabole rua ia henia? Ia hahedinaraia hereva momokani be dala idauidau ai ita davaria diba. Taunimanima haida ese idia tahua bona idia gaukara goada idia davaria totona. Ma haida, ena be idia tahua lasi, to idia davaria​—reana haida ese idia dekenai idia abia mai. Herevana edena dala ai hereva momokani idia davaria, to idia diba idia davaria gauna be mai anina bada bona idia gaukara goada idia abia totona.

18. (a) Inai parabole rua amo dahaka namo ita abia? (b) Unai parabole amo Iehova bona Iesu dekenai dahaka ita dibaia?

¹⁸ Inai parabole rua amo dahaka namo ita abia? (Mat. 6:19-21) Sibona oi nanadaia: ‘Lauegu kara be unai tatau ruaosi edia bamona, a? Hereva momokani lau laloa bada, a? Egu mauri lalonai gau haida lau haidaua hereva momokani lau abia totona, eiava dina ta ta ena gaukara idauidau ese lau idia koua, a?’ (Mat. 6:22-24, 33; Luka 5:27, 28; Fili. 3:8) Hereva momokani ita davaria ena moale ena bada ese ita do ia doria iseda mauri lalonai ita atoa guna totona.

19. Stadi gabena ai dahaka do ita herevalaia?

¹⁹ Namona be ita hahedinaraia Basileia ena parabole edia anina ita kamonai bona lalopararalaidia. Laloatao, namona be parabole ena anina ita diba sibona lasi, to ita dibaia gaudia ita badinaia danu. Stadi gabena ai, ita ese parabole ma toi bona idia amo do ita dibaia gaudia do ita herevalaia.