1, 2. Apay nga adu kadagiti dimngeg ken Jesus ti saan a nakaawat iti kaipapanan ti imbagana?

NO ADDA makisasao kadatayo, mabalin a mangngegtayo ti ibagbagana ken madlawtayo ti tono ti bosesna. Ngem adda kadi serbina no ditay met maawatan ti kaipapanan ti ibagbagana? (1 Cor. 14:9) Kasta ti napasamak idi nagsao ni Jesus iti sanguanan ti rinibu a tattao. Nagusar iti lengguahe a maawatanda ngem adu ti saan a nakatarus iti kaipapanan dagiti imbagana. Gapu iti dayta, kinuna ni Jesus: “Imdengandak, dakayo amin, ket tarusanyo ti kaipapananna.”—Mar. 7:14.

² Apay nga adu ti saan a nakaawat iti kaipapanan dagiti imbaga ni Jesus? Dadduma ngamin kadakuada ket addaan iti kabukbukodan a kapanunotan ken di umiso a motibo. Kinuna ni Jesus kadakuada: “Silalaing nga inwalinyo ti bilin ti Dios tapno pagtalinaedenyo ti tradisionyo.” (Mar. 7:9) Saanda a talaga a kayat a maammuan ti kaipapanan dagiti ibagbaga ni Jesus ken dida met kayat a baliwan ti ar-aramid ken panangmatmatda. Mabalin a silulukat ti lapayagda ngem nakarikep ti pusoda! (Basaen ti Mateo 13:13-15.) Kasanotayo ngarud a masigurado a silulukat ti pusotayo tapno magunggonaantayo kadagiti pannursuro ni Jesus?

3. Apay a naawatan dagiti adalan ti imbaga ni Jesus?

³ Masapul a tuladentayo ti kinapakumbaba dagiti adalan ni Jesus. Kinunana kadakuada: “Naragsak dagiti matayo agsipud ta makakitada, ken dagiti lapayagyo agsipud ta makangngegda.” (Mat. 13:16) Apay a naawatanda ti imbaga ni Jesus idinto ta saan a naawatan dayta ti dadduma? Adda tallo a banag nga inaramidda. Umuna, nagsaludsodda ken inkagumaanda nga ammuen ti kaipapanan dagiti sungbat ni Jesus. (Mat. 13:36; Mar. 7:17) Maikadua, silulukat ti pusoda a mangnayon kadagiti datin nga ammoda. (Basaen ti Mateo 13:11, 12.) Maikatlo, kayatda nga iyaplikar iti biagda dagiti banag a nangngegan ken naawatanda ken usaren dagita a mangtulong iti dadduma.—Mat. 13:51, 52.

4. Tapno maawatantayo dagiti ilustrasion ni Jesus, ania ti tallo a banag a masapul nga aramidentayo?

⁴ No kayattayo a maawatan dagiti ilustrasion ni Jesus, masapul a tuladentayo ti ulidan dagiti matalek nga adalanna. Adda met tallo a banag a masapul nga aramidentayo. Umuna, masapul nga iwayaantayo nga adalen ken mennamennaen dagiti imbaga ni Jesus. Kasta met, agsukimattayo ken iyimtuodtayo dagiti mayanatup a saludsod. Dayta ket pannakaammo. (Prov. 2:4, 5) Maikadua, kitaentayo no kasano a mainaig daytoy a pannakaammo iti datin nga ammotayo ken no kasanotayo a magunggonaan iti dayta. Dayta ket pannakaawat. (Prov. 2:2, 3) Kamaudiananna, masapul nga usaren wenno iyaplikartayo ti naadaltayo. Dayta ket sirib.—Prov. 2:6, 7.

5. Iyilustrar ti nagdudumaan ti pannakaammo, pannakaawat, ken sirib.

⁵ Ania ti nagdudumaan ti pannakaammo, pannakaawat, ken sirib? Usigem daytoy nga ilustrasion: Ipapanmo a nakatakderka iti tengnga ti kalsada ket adda sumungsungad a bus. Umuna, ammom a dayta ket bus—dayta ket pannakaammo. Maikadua, napanunotmo a mabalin a madungparka no saanka nga aglisi—dayta ket pannakaawat! Isu a sidadaras a nagtarayka—dayta ket sirib! Di pakasdaawan nga ipagpaganetget ti Biblia a “saluadam ti praktikal a kinasirib” ta mabalin a kaipapanan dayta ti mismo a biagmo!—Prov. 3:21, 22; 1 Tim. 4:16.

6. Ania ti uppat a saludsod a panunotentayo bayat nga ad-adalentayo ti pito nga ilustrasion ni Jesus? (Kitaen ti  kahon iti panid 8.)

⁶ Iti daytoy nga artikulo ken iti sumaganad, usigentayo ti pito nga ilustrasion nga inusar ni Jesus. Bayat nga ad-adalentayo dagita, panunotentayo dagitoy a saludsod: Ania ti kaipapanan daytoy nga ilustrasion? (Matulongannatayo daytoy a maaddaan iti pannakaammo.) Apay nga inusar ni Jesus daytoy nga ilustrasion? (Daytoy ti mangiturong iti pannakaawat.) Kasano a mausartayo daytoy nga impormasion a mangtulong iti bagitayo ken iti sabsabali? (Daytoy ket sirib.) Ken maudi, ania ti isuro daytoy kadatayo maipapan ken Jehova ken ni Jesus?

7. Ania ti kaipapanan ti ilustrasion maipapan iti bukel ti mustasa?

⁷ Basaen ti Mateo 13:31, 32. Ania ti kaipapanan ti ilustrasion ni Jesus maipapan iti bukel ti mustasa? Ti bukel irepresentarna ti mensahe ti Pagarian ken ti kongregasion Kristiano. Idi nangrugi ti kongregasion Kristiano idi 33 C.E., bassit laeng dayta a kas iti bukel ti mustasa a “kababassitan kadagiti amin a bukel.” Ngem kalpasan ti sumagmamano a dekada, sipapartak a dimmakkel ti kongregasion. Adu ti saan a mangipagarup a mapasamak ti kasta a nakaskasdaaw nga idadakkel. (Col. 1:23) Nagpateg daytoy nga idadakkel gapu ta kuna ni Jesus kadatayo a “dagiti tumatayab  iti langlangit” ‘nakasarakda iti pagaponan kadagiti sangana.’ Dagitoy a piguratibo a tumatayab iladawanda dagiti naemma a tattao a nakasarak iti naespirituan a taraon, paglinongan, ken pagkamangan iti mismo a kongregasion Kristiano.—Idilig ti Ezequiel 17:23.

8. Apay nga inusar ni Jesus ti ilustrasion maipapan iti bukel ti mustasa?

⁸ Apay nga inusar ni Jesus daytoy nga ilustrasion? Inusarna ti nakaskasdaaw a panagtubo ti bukel ti mustasa kas pangiladawan iti bileg ti Pagarian ti Dios a mangpadakkel, mangsalaknib, ken mangparmek iti amin a lapped. Sipud 1914, nakaskasdaawen ti idadakkel ti makitkita a paset ti organisasion ti Dios. (Isa. 60:22) Masalsalakniban iti naespirituan dagidiay makitimtimpuyog iti dayta nga organisasion. (Prov. 2:7; Isa. 32:1, 2) Kasta met, agtultuloy ti pannakayadelantar ti interes ti Pagarian ket awan ti aniaman nga ibubusor a makalapped iti dayta.—Isa. 54:17.

9. (a) Ania ti maadaltayo iti ilustrasion maipapan iti bukel ti mustasa? (b) Ania ti isuro daytoy kadatayo maipapan ken Jehova ken ni Jesus?

⁹ Ania ti maadaltayo iti ilustrasion maipapan iti bukel ti mustasa? Mabalin nga agnanaedtayo iti lugar a manmano ti Saksi wenno nalabit awan ti makitatayo a madagdagus a resulta ti trabahotayo a panangasaba. Ngem makapagtalinaedtayo a naandur no laglagipentayo a kabaelan ti Pagarian a parmeken ti amin a lapped. Kas pagarigan, idi simmangpet ni Brother Edwin Skinner idiay India idi 1926, sumagmamano laeng idi ti Saksi iti dayta a pagilian. Idi damo, nabuntog ti panagrang-ay ken “nakarigrigat” ti trabaho a panangasaba sadiay. Ngem intultuloyna ti nangasaba ket nakitana no kasano a napagballigian ti mensahe ti Pagarian dagiti dadakkel a lapped. Ita, addan nasurok a 37,000 nga aktibo a Saksi iti India ket nasurok a 108,000 ti immatendar iti Memorial iti napalabas a tawen. Usigem pay ti maysa a pagarigan ti nakaskasdaaw a panagsaknap ti mensahe ti Pagarian. Nangrugi ti trabaho a panangasaba iti Zambia iti isu met laeng a tawen nga isasangpet ni Brother Skinner idiay India. Ita, nasuroken a 170,000 ti agibumbunannag sadiay ken 763,915 ti immatendar iti Memorial idi 2013. Kaipapanan daytoy nga immatendar ti 1 iti kada 18 a tao iti Zambia. Anian a nakaskasdaaw nga idadakkel!

10. Ania ti kaipapanan ti ilustrasion maipapan iti lebadura?

¹⁰ Basaen ti Mateo 13:33. Ania ti kaipapanan ti ilustrasion maipapan iti lebadura? Tuktukoyen met laeng daytoy nga ilustrasion ti mensahe ti Pagarian ken ti resultana. Ti “intero a masa” ti arina irepresentarna ti amin a nasion, ket ti proseso ti panagalsa iladawanna ti panagsaknap ti mensahe ti Pagarian babaen ti trabaho a panangasaba. Nupay nalawag a makita ti idadakkel ti bukel ti mustasa, saan a dagus a madlaw ti panagwaras ti lebadura iti masa. Makita laengen ti epektona inton agangay.

11. Apay nga inusar ni Jesus ti ilustrasion maipapan iti lebadura?

¹¹ Apay nga inusar ni Jesus daytoy nga ilustrasion? Kayat nga ipakita ni Jesus nga adda pannakabalin ti mensahe ti Pagarian a naan-anay nga agwaras ken mangaramid iti panagbalbaliw. Nakadanonen ti mensahe ti Pagarian iti “kaadaywan a paset ti daga.” (Ara. 1:8) Nupay kasta, saan a kanayon a makita dagiti resultana a panagbalbaliw. Iti damo, saan pay ketdi a madmadlaw ti dadduma nga epektona. Ngem adda mapaspasamak a panagbalbaliw—saan la nga iti bilang dagiti umawat iti mensahe ti Pagarian no di pay ket iti mismo a personalidadda.—Roma 12:2; Efe. 4:22, 23.

12, 13. Mangted kadagiti pagarigan no kasano a rimmang-ay ti trabaho a panangasaba a kas nadeskribir iti ilustrasion maipapan iti lebadura.

¹² Masansan a makita laeng ti epekto ti trabaho a panangasaba kalpasan ti adu a tawen. Kas pagarigan, da Franz ken Margit, nga agserserbi itan iti sabali a sangay, ket nagserbida iti sanga nga opisina iti Brazil idi 1982. Nangaskasabada iti maysa a bassit a nasulinek nga ili. Karaman kadagiti inyadalanda ket ti maysa nga ina ken ti uppat nga annakna. Managbabain unay ti inauna a lalaki, nga agtawen laeng idi iti 12, isu a masansan nga aglemmeng sakbay ti panagadalda. Gapu iti panagbalbaliw ti annongen dagiti agassawa, saandan a naituloy nga iyadalan dagiti agiina. Ngem kalpasan ti 25 a tawen, bimmisitada iti dayta a lugar. Ania ti nakitada? Maysa a kongregasion a buklen ti 69 nga agibumbunannag, a 13 kadakuada ti regular pioneer. Baro metten ti Kingdom Hall-da. Komustan daytay managbabain nga ubing? Maysa itan a koordineytor ti bagi dagiti panglakayen! Kas iti lebadura iti ilustrasion ni Jesus, nagsaknap ti mensahe ti Pagarian ken binalbaliwanna ti biag ti adu. Anian a ragsak dagiti bimmisita nga agassawa!

¹³ Ti saan a madmadlaw a bileg ti mensahe ti Pagarian a mangbalbaliw kadagiti tattao ket nangnangruna a makita kadagiti pagilian a maiparparit ti trabaho a panangasaba. Kasla narigat nga agsaknap ti mensahe kadagita a pagilian, ngem masansan a nakaskasdaaw ti resultana. Alaentay a pagarigan ti Cuba. Nakadanon ti mensahe ti Pagarian sadiay idi 1910, sa binisita dayta ni Brother Russell idi 1913. Nabuntog ti irarang-ay ti trabaho idi damo. Ngem komusta itan ti Cuba? Nasuroken a 96,000 nga agibumbunannag ti mangikaskasaba iti naimbag a damag, ken 229,726 ti immatendar iti Memorial idi 2013—1 iti kada 48 a tao nga agnanaed sadiay. Uray kadagiti pagilian a saan a maiparparit ti panangasaba, mabalin a nakadanonen ti mensahe ti Pagarian kadagiti lugar nga ipagarup dagiti Saksi sadiay a saan unay a makaskasabaan. *—Ecl. 8:7; 11:5.

14, 15. (a) Kasanoka a magunggonaan iti ilustrasion maipapan iti lebadura? (b) Ania ti isuro daytoy kadatayo maipapan ken Jehova ken ni Jesus?

¹⁴ Kasanotayo a magunggonaan iti insuro ni Jesus iti ilustrasionna maipapan iti lebadura? No utobentayo ti kaipapanan ti ilustrasion ni Jesus, maawatantayo a saantayo a  rumbeng a problemaen no kasano a madanon ti mensahe ti Pagarian ti minilion a di pay nakangngeg iti dayta. Kontrolado ni Jehova ti amin a bambanag. Ania ngarud ti aramidentayo? Sumungbat ti Sao ti Dios: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.” (Ecl. 11:6) Siempre masapul a ditay met liplipatan nga ikararag ti panagballigi ti trabaho a panangasaba, nangnangruna kadagiti pagilian a pakaiparparitanna.—Efe. 6:18-20.

¹⁵ Kanayonanna, ditay koma maupay no saantay a dagus a makita ti resulta ti trabahotayo. Ditay koma umsien ti “aldaw dagiti babassit a banag.” (Zac. 4:10) Mabalin a ti resultana inton agangay ket dakdakkel ken nasaysayaat ngem iti ninamnamatayo!—Sal. 40:5; Zac. 4:7.

16. Ania ti kaipapanan ti ilustrasion maipapan iti agdaldaliasat a komersiante ken iti nalmeng a gameng?

¹⁶ Basaen ti Mateo 13:44-46. Ania ti kaipapanan ti ilustrasion maipapan iti agdaldaliasat a komersiante ken iti nalmeng a gameng? Idi panawen ni Jesus, agdaliasat ti dadduma a komersiante agingga iti Indian Ocean tapno agbirokda iti kasayaatan a perlas. Irepresentar ti komersiante iti daytoy nga ilustrasion dagiti naemma a tattao nga agregregget a mangbirok iti kinapudno. Ti “maysa a perlas a nangato ti pategna” iladawanna ti nakapatpateg a kinapudno maipapan iti Pagarian. Gapu ta nakapatpateg dayta iti komersiante, sidadaan a mangilako a “dagus” iti amin a banag nga adda kenkuana tapno magatangna dayta. Dinakamat pay ni Jesus ti maysa a tao nga agtrabtrabaho iti talon a nakasarak iti “nailemmeng” a gameng. Saan a kas iti komersiante, saan nga agbirbirok iti gameng daytoy a tao. Ngem kas iti komersiante, sidadaan a mangilako iti “aniaman a bambanag” tapno maadda kenkuana dayta a gameng.

17. Apay nga inusar ni Jesus ti ilustrasion maipapan iti agdaldaliasat a komersiante ken iti nalmeng a gameng?

¹⁷ Apay nga inusar ni Jesus dagita a dua nga ilustrasion? Kayatna nga ipakita a mabalin a masarakan ti kinapudno iti dua a pamay-an. Adda dagiti nangaramid iti adu a panagsakripisio tapno mabirokanda dayta. Adda met dagidiay saan a mangbirbirok iti dayta ngem nasarakanda—nalabit naidanon kadakuada. Aniaman ti pamay-an a nasapulanda ti gameng, agpada a nabigbigda ti pategna ken sidadaan a nangaramidda iti dakkel a panagsakripisio tapno matagikuada dayta.

18. (a) Kasanotayo a magunggonaan kadagitoy dua nga ilustrasion? (b) Ania ti isuro daytoy kadatayo maipapan ken Jehova ken ni Jesus?

¹⁸ Kasanotayo a magunggonaan kadagitoy dua nga ilustrasion? (Mat. 6:19-21) Isaludsodmo iti bagim: ‘Ti kadi kababalinko ket kas iti kababalin dagitoy a lallaki? Kasta kadi ti panangipategko iti kinapudno? Sidadaanak kadi nga agsakripisio tapno maadda kaniak dayta, wenno itultulokko a ti dadduma a bambanag, kas kadagiti inaldaw nga aktibidad, ti mangsinga iti panangipamaysak iti dayta?’ (Mat. 6:22-24, 33; Luc. 5:27, 28; Fil. 3:8) No talaga nga ipatpategtayo ti kinapudno, sidadaantayo a mangaramid iti aniaman a panagsakripisio tapno mayun-unatayo dayta iti biagtayo.

19. Ania ti usigentayo iti sumaruno nga artikulo?

¹⁹ Sapay koma ta ipakitatayo a dimngegtayo ken talaga a naawatantayo ti kaipapanan dagitoy nga ilustrasion maipapan iti Pagarian. Maipakitatayo dayta no saantay laeng nga ammuen ti kaipapananda no di ket iyaplikartayo pay dagiti naadaltayo kadagita. Iti sumaruno nga artikulo, usigentayo ti tallo pay nga ilustrasion ket kitaentayo no ania dagiti maadaltayo.