1, 2. Wetin mek bɔku pipul dɛn nɔ bin de ɔndastand wetin Jizɔs min?

SƆMBƆDI go yɛri we pɔsin de tɔk to am. I go ivin no di kayn we aw di pɔsin mek in vɔys. Bɔt us bɛnifit i go gɛt if i nɔ ɔndastand wetin di pɔsin tɔk? (1 Kɔr. 14:9) Semweso, bɔku bɔku pipul dɛn bin de yɛri wetin Jizɔs bin de tɔk. I bin ivin de tɔk to dɛn insay dɛn yon langwej we dɛn de ɔndastand. Bɔt stil, nɔto dɛn ɔl bin de ɔndastand wetin i min. Na in mek Jizɔs bin tɛl dɛn se: “Una ɔl lisin to mi ɛn ɔndastand wetin dis min.”—Mak 7:14.

² Wetin mek bɔku pipul dɛn nɔ bin de ɔndastand wetin Jizɔs min? Sɔm dɛn bin gɛt dɛn yon we aw dɛn de tink ɛn dɛn bin de lisin to Jizɔs fɔ di rɔng rizin. We Jizɔs bin de tɔk bɔt dɛn kayn pipul ya, i bin se: “Una de tek tɛm pwɛl Gɔd in lɔ so dat una go du di tin dɛn we una granpa dɛn bin de du.” (Mak 7:9) Dɛn pipul ya nɔ bin tray fɔ ɔndastand wetin Jizɔs min. Dɛn nɔ bin want fɔ chenj di we aw dɛn bin de tink ɛn du tin. Dɛn bin de yɛri wetin Jizɔs bin de tɔk, bɔt dɛn at bin de pan ɔda tin. (Rid Matyu 13:13-15.) So aw wi go rɛdi wi at so dat wi go bɛnifit frɔm di tin dɛn we Jizɔs bin tich?

3. Wetin mek di disaypul dɛn bin ebul fɔ ɔndastand Jizɔs?

³ Wi fɔ falamakata Jizɔs in disaypul dɛn we bin put dɛnsɛf dɔŋ. Jizɔs bin tɛl dɛn se: “Una fɔ gladi fɔ di yay we una gɛt bikɔs dɛn de si, ɛn una fɔ gladi fɔ di yes we una gɛt bikɔs dɛn de yɛri.” (Mat. 13:16) Wetin mek dɛn bin ebul fɔ ɔndastand we ɔda pipul dɛn nɔ bin ebul fɔ ɔndastand? Fɔs, dɛn bin rɛdi fɔ aks kwɛstyɔn dɛn ɛn tray fɔ no wetin Jizɔs rili min. (Mat. 13:36; Mak 7:17) Sɛkɔn, dɛn bin rɛdi fɔ ad pan wetin dɛn bin dɔn biliv. (Rid Matyu 13:11, 12.) Tɔd, dɛn bin rɛdi fɔ yuz wetin dɛn dɔn lan fɔ ɛp dɛnsɛf ɛn ɔda pipul dɛn.—Mat. 13:51, 52.

4. If wi want fɔ ɔndastand Jizɔs in parebul dɛn, us tri tin dɛn wi fɔ du?

⁴ If wi want fɔ ɔndastand Jizɔs in parebul dɛn, wi fɔ falamakata in disaypul dɛn. Wisɛf nid fɔ du tri tin. Fɔs, wi fɔ fɛn tɛm fɔ stɔdi ɛn tink gud wan bɔt wetin Jizɔs se. Wi fɔ lan mɔ na ɔda buk dɛn we di ɔganayzeshɔn de mek ɛn aks di rayt kwɛstyɔn. Dis go mek wi no wetin Jizɔs min. (Prɔv. 2:4, 5) Afta dat, wi nid fɔ si aw di tin dɛn we wi dɔn no, gri wit di tin dɛn we wi bin dɔn ɔlrɛdi no, ɛn wi fɔ tray fɔ si aw dɛn go bɛnifit wi. Dis go mek wi ɔndastand wetin Jizɔs se. (Prɔv. 2:2, 3) Dɔn, wi fɔ du wetin wi de lan. Dis go sho se wi gɛt sɛns.—Prɔv. 2:6, 7.

5. Gi ɛgzampul fɔ sho se fɔ no sɔntin, fɔ ɔndastand sɔntin, ɛn fɔ gɛt sɛns, na tri difrɛn tin.

⁵ Fɔ no sɔntin, fɔ ɔndastand sɔntin, ɛn fɔ gɛt sɛns, na tri difrɛn tin. Aw dɛn difrɛn? Lɛ wi tɔk bɔt dis ɛgzampul: Lɛ wi se yu tinap midul rod ɛn wan bɔs de kam wit spid. Fɔs, yu si se na bɔs de kam. Dat min se yu no. Dɔn, yu no se if yu kɔntinyu fɔ tinap midul di rod, di bɔs go kam bang yu. Dat sho se yu ɔndastand! So yu rɔn kɔmɔt na di rod. Dis de sho se yu gɛt sɛns! No wɔnda we di Baybul se wi fɔ ‘du di tin dɛn we wi dɔn lan’ bikɔs i go sev wi layf!—Prɔv. 3:21, 22; 1 Tim. 4:16.

6. Us kwɛstyɔn dɛn wi fɔ aks wisɛf we wi de tɔk bɔt Jizɔs in parebul dɛn? (Luk di  bɔks we de na pej 10.)

⁶ Insay dis atikul ɛn di ɔda wan, wi go tɔk bɔt sɛvin parebul dɛn we Jizɔs bin pul. We wi de tɔk bɔt dɛn, wi go aks dɛn kwɛstyɔn ya: Wetin dis parebul min? (Dis go ɛp wi fɔ no wetin di parebul min.) Wetin mek Jizɔs bin pul dis parebul? (Dis go ɛp wi fɔ ɔndastand di parebul.) Aw wi go yuz dis parebul fɔ ɛp wisɛf ɛn ɔda pipul dɛn? (Dis go sho se wi gɛt sɛns.) Dɔn, wetin dis parebul de tɛl mi bɔt Jiova ɛn Jizɔs?

7. Wetin di parebul bɔt di mɔstad sid, min?

⁷ Rid Matyu 13:31, 32. Wetin Jizɔs in parebul bɔt di mɔstad sid, min? Di mɔstad sid min di kɔngrigeshɔn ɛn di gud nyus we wi de prich bɔt di Kiŋdɔm. Jɔs lɛk di mɔstad sid we “smɔl pas ɔl di ɔda sid dɛn,” na so di kɔngrigeshɔn bin smɔl we i bigin insay di ia 33. Bɔt jɔs afta shɔt tɛm, di kɔngrigeshɔn bin kam big. Bɔku pipul dɛn nɔ bin de fil se di kɔngrigeshɔn go big kwik kwik wan so. (Kɔl. 1:23) I rili fayn we di kɔngrigeshɔn big bikɔs Jizɔs bin se di “bɔd dɛn” go kam “bil dɛn os dɛn de.” Di bɔd dɛn na dis parebul na di pipul dɛn we de kam na di kɔngrigeshɔn fɔ lan bɔt Gɔd. Dɛn  pipul ya tan lɛk di bɔd dɛn we bin de go na di mɔstad stik fɔ fɛn shed, tin fɔ it, ɛn say fɔ de.—Luk Izikɛl 17:23.

8. Wetin mek Jizɔs bin pul di parebul bɔt di mɔstad sid?

⁸ Wetin mek Jizɔs bin pul dis parebul? Jizɔs bin yuz di mɔstad sid we de gro big big wan, fɔ sho aw Gɔd in Kiŋdɔm de go bifo, aw i de protɛkt Gɔd in pipul dɛn, ɛn aw natin nɔ ebul fɔ stɔp am. Frɔm 1914, di pat pan Gɔd in ɔganayzeshɔn we de na dis wɔl de rili go bifo. (Ayz. 60:22) Di ɔganayzeshɔn de ɛp di wan dɛn we de insay de fɔ kam nia Jiova mɔ ɛn mɔ, ɛn dis dɔn protɛkt dɛn. (Prɔv. 2:7; Ayz. 32:1, 2) Ɛn di we aw di Kiŋdɔm de go bifo dɔn sho se natin nɔ ebul fɔ stɔp am.—Ayz. 54:17.

9. (a) Us lɛsin wi lan frɔm di parebul we Jizɔs bin pul bɔt di mɔstad sid? (b) Wetin dis tɛl wi bɔt Jiova ɛn Jizɔs?

⁹ Wetin wi lan frɔm di parebul we Jizɔs bin pul bɔt di mɔstad sid? Sɔntɛm wi de na say usay Jiova Witnɛs dɛn nɔ bɔku ɔ usay di prichin wok nɔ de go bifo kwik kwik wan. Bɔt we wi mɛmba se natin nɔ ebul fɔ stɔp Gɔd in Kiŋdɔm, i go ɛp wi fɔ bia we wi de na dɛn kayn ples dɛn de. Fɔ ɛgzampul, we Brɔda Ɛdwin Skina bin go na India insay 1926, na wan-wan Witnɛs dɛn nɔmɔ bin de de. We i bin jɔs go de, bɛtɛ pipul dɛn nɔ bin de kam na di trut, ɛn i “nɔ bin izi” fɔ prich de. Bɔt i kɔntinyu fɔ prich, ɛn i si se natin nɔ bin ebul fɔ stɔp di prichin wok. Naw, i dɔn pas 37,000 Witnɛs dɛn we de na India ɛn na lɛk 108,000 pipul dɛn bin go di Mɛmorial las ia. Wan ɔda kɔntri we de sho wi aw Gɔd in Kiŋdɔm dɔn go bifo, na Zambia. Di prichin wok bin stat na Zambia di sem ia we Brɔda Skina go na India. Naw, i dɔn pas 170,000 pɔblisha dɛn we de prich na Zambia, ɛn 763,915 pipul dɛn bin go di Mɛmorial las ia. Dis min se we yu kɔnt 18 pipul dɛn na Zambia, 1 pan dɛn bin go di Mɛmorial. Di prichin wok de rili go bifo!

10. Wetin di parebul bɔt di yist min?

¹⁰ Rid Matyu 13:33. Wetin di parebul bɔt di yist min? Dis parebul de tɔk bɔt di gud nyus bɔt Gɔd in Kiŋdɔm ɛn di we aw i de chenj pipul dɛn layf. “Di flawa” min ɔl di neshɔn dɛn. Di rayz we di flawa de rayz de sho aw di prichin wok de go bifo. We di mɔstad sid de gro, ɔlman de si am klia wan, bɔt wi nɔ de si di yist we i kin bigin rayz. Bɔt leta wi kin si am klia wan.

11. Wetin mek Jizɔs bin pul di parebul bɔt di yist?

¹¹ Wetin mek Jizɔs bin pul dis parebul? I bin de tray fɔ sho se di gud nyus bɔt di Kiŋdɔm ebul fɔ go ɔlsay ɛn i ebul fɔ chenj pipul dɛn layf. Di gud nyus dɔn go “ɔlsay na di wɔl.” (Akt 1:8) Sɔntɛnde, wi nɔ kin notis di we aw di gud nyus de chenj pipul dɛn layf. Bɔt dis nɔ min se i nɔ de du ɛnitin. Bɔku pipul dɛn de lisin to di gud nyus ɛn chenj dɛn layf.—Rom 12:2; Ɛfi. 4:22, 23.

12, 13. Gi ɛgzampul dɛn we de sho aw di gud nyus dɔn go bifo jɔs lɛk aw Jizɔs bin tɔk na in parebul bɔt di yist.

¹² Wi nɔ kin si di we aw di prichin wok de go bifo, pas afta sɔm tɛm. Fɔ ɛgzampul, insay di ia 1982, wan brɔda ɛn in wɛf bin de wok na di branch ɔfis na Brazil. Bɔt naw dɛn de wok na ɔda branch. Di brɔda in nem na Frans ɛn in wɛf nem Magit. We dɛn bin de wok na di branch ɔfis na Brazil, dɛn bin de prich na wan smɔl tɔŋ. Wan pan dɛn Baybul stɔdi dɛn na wan uman we gɛt 4 pikin dɛn. Dis uman in big bɔy pikin we ol 12 bin de shem bad bad wan ɛn i kin tray fɔ ayd bifo dɛn bigin di stɔdi. Di ɔganayzeshɔn bin chenj dis brɔda ɛn sista ya dɛn wok so dɛn nɔ bin ebul fɔ kɔntinyu di stɔdi. Bɔt dɛn bin ebul fɔ kam bak na di tɔŋ afta 25 ia. Wetin dɛn bin si? Dɛn bin kam mit wan kɔngrigeshɔn we gɛt 69 pɔblisha dɛn ɛn 13 pan dɛn pɔblisha ya na bin rɛgyula payɔnia dɛn. Dɛn ɔl bin de kam mitin insay wan nyu Kiŋdɔm Ɔl. We da bɔbɔ we bin de shem bad bad wan? Na in naw na bin di kɔdinetɔ fɔ di ɛlda dɛn na dis nyu kɔngrigeshɔn! Dis bin mek Brɔda Frans ɛn in wɛf gladi bad! Jɔs lɛk di yist we Jizɔs bin tɔk bɔt na in parebul, di gud nyus bɔt di Kiŋdɔm dɔn go ɔlsay ɛn i dɔn chenj pipul dɛn layf.

¹³ Di gud nyus de chenj pipul dɛn layf, ivin na kɔntri dɛn we wi brɔda dɛn nɔ fri fɔ prich. I nɔ kin izi fɔ no aw di gud nyus de go bifo na dɛn kayn kɔntri dɛn de. So wi kin gladi we wi yɛri aw di gud nyus de go bifo na dɛn say dɛn de. Fɔ ɛgzampul, lɛ wi tɔk bɔt wan kɔntri we dɛn kɔl Kyuba. Di pipul dɛn na Kyuba bigin yɛri di gud nyus insay 1910, ɛn Brɔda Rɔsɛl bin go de insay 1913. Bɔt di gud nyus nɔ bin de go bifo kwik kwik wan. Bɔt we naw? I dɔn pas 96,000 pɔblisha dɛn we de prich di gud nyus na Kyuba, ɛn na 229,726 pipul dɛn bin go di Mɛmorial insay 2013. Dis min se we yu kɔnt 48 pipul dɛn na da kɔntri de, 1 pan dɛn bin go di Mɛmorial. Ivin na kɔntri dɛn we wi brɔda dɛn fri fɔ prich, pipul dɛn kin yɛri di gud nyus na say dɛn we di Witnɛs dɛn fil se dɛn nɔ de prich. *—Ɛkli. 8:7; 11:5.

14, 15. (a) Aw wi go bɛnifit frɔm di parebul we Jizɔs bin pul bɔt di yist? (b) Wetin dis tɛl wi bɔt Jiova ɛn Jizɔs?

 ¹⁴ Aw wi go bɛnifit frɔm di parebul we Jizɔs pul bɔt di yist? We wi tink gud wan bɔt wetin Jizɔs in parebul min, wi go si se no nid nɔ de fɔ wɔri tumɔs bɔt aw bɔku pipul dɛn we nɔ yɛri di gud nyus yet, go yɛri am. Di prichin wok de na Jiova in an. So, wetin na wi yon wok? Gɔd in Wɔd se: “Plant yu sid dɛn na mɔnin ɛn nɔ blo te ivintɛm; bikɔs yu nɔ no uswan go bɛtɛ, sɔntɛm na dis wan ɔ di ɔda wan, ɔ sɔntɛm dɛn ɔl tu go bɛtɛ.” (Ɛkli. 11:6) Bɔt wi nɔ fɔ stil fɔgɛt fɔ pre mek di gud nyus go bifo, mɔ na kɔntri dɛn usay wi brɔda dɛn nɔ fri fɔ prich.—Ɛfi. 6:18-20.

¹⁵ Apat frɔm dat, wi nɔ fɔ fil bad if wi de prich, bɔt wi nɔ de si bɛtɛ. Wi nɔ fɔ ɛva tɛkɛ “di tɛm we dɛn bigin” sɔntin. (Zak. 4:10) Tɛm go kam we di gud nyus go go bifo pas aw wi bin ivin tink se i go go bifo!—Sam 40:5; Zak. 4:7.

16. Wetin di parebul bɔt di biznɛsman we de travul ɛn di valyu tin we ayd, min?

¹⁶ Rid Matyu 13:44-46. Wetin di parebul bɔt di biznɛsman we de travul ɛn di valyu tin we ayd, min? Di tɛm we Jizɔs bin de na di wɔl, sɔm biznɛsman dɛn bin de travul go fa say fɔ go bay pal. Di biznɛsman we Jizɔs tɔk bɔt insay dis parebul na pipul dɛn we de du ɔlkayn tin fɔ mek dɛn no di tru bɔt Gɔd. Di “dia dia pal” na di gud nyus bɔt di Kiŋdɔm. We di biznɛsman kam si se da pal de gɛt valyu, i go sɛl ɔl wetin i gɛt “wantɛm wantɛm” so dat i go bay di pal. Jizɔs tɔk bak bɔt wan man we bin de wok na fam ɛn fɛn wan valyu tin we bin “ayd” na grɔn. Dis man nɔ bin tan lɛk di biznɛsman we bin de fɛn jɛntri. Bɔt jɔs lɛk di biznɛsman, i bin rɛdi fɔ sɛl “ɔl wetin i gɛt” fɔ bay di tin we gɛt valyu.

17. Wetin mek Jizɔs bin pul di parebul bɔt di biznɛsman we de travul ɛn di valyu tin we ayd?

¹⁷ Wetin mek Jizɔs pul dɛn tu parebul ya? I bin de tray fɔ sho se pipul dɛn kin fɛn di trut difrɛn difrɛn we dɛn. Sɔm pipul dɛn kin luk fɔ am ɛn du ɔlkayn tin fɔ fɛn am. Bɔt sɔm pipul dɛn dɔn fɛn di trut pan ɔl we dɛn nɔ bin de luk fɔ am. Sɔntɛm na pɔsin go prich to dɛn. Insay di tu parebul dɛn we wi jɔs tɔk bɔt, di biznɛsman bin de luk fɔ sɔntin we gɛt valyu, bɔt di man we bin de wok na fam nɔ bin de luk fɔ sɔntin we gɛt valyu. Bɔt we dɛn kam fɛn sɔntin we gɛt valyu, dɛn bin sɛl ɔl wetin dɛn gɛt fɔ mek dɛn ebul gɛt am.

18. (a) Aw wi go bɛnifit frɔm dɛn tu parebul dɛn ya? (b) Wetin de dɛn tɛl wi bɔt Jiova ɛn Jizɔs?

¹⁸ Wetin wi go du fɔ mek dɛn tu parebul ya bɛnifit wi? (Mat. 6:19-21) Aks yusɛf dɛn kwɛstyɔn ya: ‘A de tink di sem we lɛk dɛn man ya? A valyu di trut? A rɛdi fɔ lɛf ɔda tin dɛn biɛn fɔ mek a ebul ol di trut wit tu an? Ɔ a de alaw ɔda tin dɛn, lɛk dunia yagba fɔ ambɔg mi?’ (Mat. 6:22-24, 33; Lyuk 5:27, 28; Fil. 3:8) If wi rili lɛk di trut, wi go put am fɔs na wi layf.

19. Wetin wi go tɔk bɔt insay di nɛks atikul?

¹⁹ Lɛ wi sho se wi dɔn rili lisin ɛn ɔndastand di parebul dɛn bɔt di Kiŋdɔm. Wi fɔ mɛmba se wi nɔ fɔ jɔs no wetin di parebul dɛn min, bɔt wi fɔ fala di lɛsin dɛn we dɛn de tich. Insay di nɛks atikul, wi go tɔk bɔt tri parebul dɛn bak we go bɛnifit wi.