1, 2. Engvângin nge Isua thusawi ngaithlatu tam takin a awmzia an hriat loh?

MI CHUAN amah betu tuemaw thusawi ri chu a hre mai thei a. A awphawi dân aṭangin a sawitu pawh a hre hial thei bawk. Mahse, a thusawi awmzia a hriatthiam si loh chuan a tân eng awmzia nge a neih ang? (1 Kor. 14:⁠9) Chutiang bawkin, mi sâng tam takin Isua thusawi chu an hria a. An hriat thiam theih tûr ṭawngin anni chu a be hial a ni. Mahse, an zînga a tam zâwk chuan a thusawi awmzia an hre thiam lo va. Chuvângin, Isua chuan a thu ngaithlatute hnênah: “In zain ka thu hi ngaithla ula, hei hi hre fiah rawh u,” tiin a hrilh a ni.​—⁠Mk. 7:​14, C.L. Re-edited.

² Engvângin nge mi tam tak chuan Isua thusawi awmzia chu an hriat thiam loh? Mi ṭhenkhat chuan ngaih dân nghet leh rilru dik lo tak an neih sa vâng a ni a. Chutiang mite hnênah Isua chuan heti hian a sawi a ni: “Nangmahni thurochhiahte chu in pawm theihna tûrin Pathian thupêkte in duh lo hi rem in hre zet mai e,” tiin. (Mk. 7:⁠9) Chutiang mite chuan a thusawi awmzia chu hriat thiam an tum tak tak lo. An nun kawngte leh an ngaih dânte chu an thlâk duh lo va. An bengte chu an chhi pawh a ni mai thei e, mahse, an thinlung erawh chu an khâr tlat si! (Matthaia 13:​13-15 chhiar rawh.) Chuti chu, Isua zirtîrna hlâwkpui thei tûrin  kan thinlung chu engtin nge kan hawn reng theih ang?

3. Engvângin nge zirtîrte’n Isua thusawi an hriat thiam theih?

³ Isua zirtîr inngaitlâwm takte entawn tûr siam chu kan zui a ngai a. An chungchângah Isua’n heti hian a sawi a ni: “Nangni mit erawh chu a vânnei a ni, a hmuh ṭhin avângin; in beng pawh a vânnei a ni, a hriat ṭhin avângin,” tiin. (Mt. 13:16) Engvângin nge mi dangte’n an hriat thiam loh laiin anni chuan an hriat thiam bîk? Pakhatnaah chuan, anni chuan zawhna an zâwt peih a, Isua thusawi awmze dik tak zawn chhuah an peih bawk a. (Mt. 13:36; Mk. 7:17) A pahnihnaah chuan, an thinglunga an lo pawm tawhte chunga an thil hriat thar rem chhoh chu an duh a ni. (Matthaia 13:​11, 12 chhiar rawh.) A pathumnaah chuan, anni chuan an thu hriatte leh hriat thiamte chu an nunpui mai ni lovin, mi dangte ṭanpui nân pawh an hmang duh bawk a ni.​—⁠Mt. 13:​51, 52.

4. Isua tehkhin thute hre thiam tûr chuan eng thil pathumte nge tih ngai?

⁴ Isua sawi tehkhin thute chu hriat thiam kan duh chuan a zirtîr rinawmte entawn tûr siam chu kan zui a ngai a. Hetah pawh hian thiltih ngai pathum a awm a ni. Pakhatnaah chuan, hun pea zirna te leh Isua thusawite chhût ngun duhna neih a, a ṭûl anga zir bingna neih bawk a, zawhna inâwm takte kan zawh a ngai a ni. Chu chuan hriatna min neihtîr ang. (Thuf. 2:​4, 5) A dawtah chuan, chu hriatna chu kan thu hriatsa nêna rem khâwmin, chu mi kan hlâwkpui dân kan ngaihtuah a ngai a ni. Chu chuan hriat thiamna min neihtîr ang. (Thuf. 2:​2, 3) A tâwpah chuan, kan thu zirte chu kan nunpui tûr a ni a. Chu chu kan tân finna a ni.​—⁠Thuf. 2:​6, 7.

5. Hriatna te, hriat thiamna te, leh finnate inan lohna chu sawi rawh.

⁵ Hriatna te, hriat thiamna te leh finnate inan lohna chu eng nge ni? Chu chu hetianga entîr theih a ni: Kawng lai taka i din laiin bus pakhat i lamah a rawn tlân phei angah han ngaihtuah teh. A hmasain, bus a ni tih i hria a,​—⁠chu chu hriatna a ni. A dawt lehah chuan, i dinna ngaia i din reng chuan bus chuan a rawn su thei che tih i hre chhuak a​—⁠chu chu hriat thiamna a ni! Chuvângin, bus sut phâk loh tûrah i zuang sawn ta a​—⁠chu chu finna a ni! Bible-in ‘finna dik tak chu vawn tlat’ a ngaihzia a sawiuar pawh hi a mak hran lo. Kan tân nunna a ni si a!​—⁠Thuf. 3:​21, 22; 1 Tim. 4:⁠16.

6. Isua tehkhin thu pasarih kan ngaihtuah laiin, eng zawhna palite nge kan zawh ang? (Phêk 10-naa  bâwm chu en rawh.)

⁶ He thuziak leh a dawta thuziakah hian Isua sawi tehkhin thu pasarihte chu kan bih chiang ang. Kan bih chian lai chuan, hêng zawhnate hi kan zâwt ang: Tehkhin thu awmzia chu eng nge ni? (Chu chuan hriatna nei tûrin min ṭanpui a.) Engvângin nge Isua’n he tehkhin thu hi a sawi? (Chu chuan hriat thiamna min neihtîr a.) Engtin nge he thu hi mahni leh mi dangte ṭanpui nân kan hman theih? (Chu chu finna a ni.) A tâwpnaah chuan, hei hian Pathian Jehova leh Isua chungchâng eng nge min zirtîr?

7. Aṭam chi fang tehkhin thu awmzia chu eng nge ni?

⁷ Matthaia 13:​31, 32. Isua sawi anṭam chi fang tehkhin thu awmzia chu eng nge ni? Anṭam chi fang chuan Lalram thuchah leh chu mi puan chhuahnain a rah chhuah​—⁠Kristian kohhran​—⁠chu a entîr a. ‘Chi zawng zawng aia tê ber’ anṭam chi fang ang bawkin, Kristian kohhran chu C.E. 33 khân te tak têin a inṭan a. Mahse, kum sâwmbi tlêm tê chhûngin kohhran chu beisei phâk bâkin a ṭhang chho chak hle a ni. (Kol. 1:23) Isua’n “chunglêng savate  chu . . . a zârahte chuan an riak ṭhîn,” tia min hrilh avângin, he ṭhan chhohna hi a ṭangkai hle a. Savate hian Kristian kohhran chhûnga thlarau lam chaw, daihlim, leh inhumhimna hmutu rilru dik pute chu a entîr a ni.​—⁠Ezekiela 17:23 nên khaihkhin rawh.

8. Engvângin nge Isua’n anṭam chi fang tehkhin thu chu a hman?

⁸ Engvângin nge Isua’n he tehkhin thu hi a hman? Anṭam chi fang ṭhan len dân mak tak mai chu Pathian Ram ruahmanna a ṭhan chhoh dân, a vênhim dân, leh dâltu zawng zawng a hneh dân entîr nân a hmang a. Kum 1914 aṭangin Pathian inawpna pâwl mita hmuh theih lam ṭhan len dân chu a va mak tak êm! (Is. 60:22) Chu inawp pâwl beltute chuan thlarau lam vênhimna ṭha tak an dawng a. (Thuf. 2:7; Is. 32:​1, 2) Chu bâkah, dodâlna zawng zawng hneha Lalram thu hrilhnain hma a sâwn chhoh dân chu tihtâwp theih rual a ni lo.​—⁠Is. 54:⁠17.

9. (a) Aṭam chi fang tehkhin thu aṭangin eng nge kan zir theih? (b) Chu chuan Jehova leh Isua chungchâng eng nge min zirtîr?

⁹ Anṭam chi fang tehkhin thu aṭangin eng nge kan zir theih? Thuhretu tlem tê awmna hmun emaw, kan thu hrilhnain rah tam tak a chhuah nghâl lohna hmun emawah kan awm pawh a ni thei e. Mahse, Lalram ruahmannain hmasâwnna dâltu zawng zawng a hneh thei tih hriatna chuan chhel tûrin min tichak ang. Entîr nân, kum 1926-a unau Edwin Skinner-a India rama a thlen khân, chu mi ramah chuan Thuhretute tlêm tê chauh an la awm a. Atîrah chuan hma a sâwn chak lo hle a, rawngbâwlna chu “khirh hle” nia sawi a ni. Mahse, thu a hrilh zawm zêl a, Lalram thuchahin hmasâwnna dâltu lian tak takte a hneh dân chu a hmu a ni. Tûnah chuan India ramah Thuhretute chu mi 37,000 chuang an awm tawh a, kum kal taa Hriatrengna inkhâwmah mi 108,000 chuang lai an inkhâwm a ni. Lalram ruahmannain hma a sâwn dân ropui tak entîrna pakhat pawh hi han ngaihtuah teh. Unau Skinner-a India rama a thlen kum vêkah chuan Zambia ramah pawh rawngbâwlna thawh ṭan a ni a. Tûnah chuan thuchhuahtu mi 1,70,000 chuang an awm a, kum 2013-a Hriatrengna inkhâwmah mi 7,63,915 an tel a ni. Chu chu Zambia rama mi 18-ah 1 zêl Hriatrengna inkhâwmah an tel tihna a ni. An ṭhan chhoh dân chu a va mak êm!

10. Dawidim tehkhin thu chuan eng awmzia nge a neih?

¹⁰ Matthaia 13:33 chhiar rawh. Dawidim tehkhin thu awmzia chu eng nge ni? He tehkhin thu hi Lalram thuchah leh chu miin a rah chhuahte sawina a ni bawk. “Chhangphut” chuan hnam zawng zawngte a entîr a, a zaa a thawh vekna chuan thu hrilh rawngbâwlna avânga Lalram chanchin a darhna chu a entîr a ni. Anṭam chi tehkhin thu-a anṭam ṭhan chhoh dân chu chiang taka hmuh theih a nih laiin, dawidimin chhangphut hlawm a fan chhuah dân chu atîrah chuan hmuh theih a ni lo. Hun engemawti chhûng a liam hunah chauh a nghawng chhuah chu a hmuh theih chauh a ni.

11. Engvângin nge Isua’n dawidim chungchâng tehkhin thu chu a hman?

¹¹ Engvângin nge Isua’n he tehkhin thu hi a hman? Lalram thuchah nasa taka a darh zau theih dân leh inthlâkthlengna a thlen theih dân târ lan nân a ni. Lalram thuchah chu “kâwlkil thleng pawhin” hrilh darh a ni tawh a. (Tirh. 1:⁠8) Mahse, thuchah avânga inthlâkthlengna thlengte chu hmuh theih a ni reng lo va; a ṭhen phei chu atîrah phei chuan hriat pawh a ni lo mai thei. Mahse, inthlâkthlengna chu a awm a​—⁠a mihring tam lama inthlâkthlengna bâkah, he thuchahin darh zau thei tak pawmtute mizia thlâkthlengna pawh a thlen bawk a ni.​—⁠Rom 12:2; Eph. 4:​22, 23.

12, 13. Dawidim tehkhin thu anga Lalram thu hrilhna a ṭhan chhoh dân entîrna pe rawh.

¹² Lalram thu hrilhnain a rah chhuah chu a hnu kum tam takah hmuh a ni fo ṭhîn. Entîr nân, tûna branch office danga rawngbâwl mêk Franz-a leh Margit-i chuan kum 1982 khân Brazil branch-ah rawng an bâwl a. Chutih lai chuan thingtlâng khaw pakhatah thu an hril a ni. An Bible zirpuite zîngah chuan nu pakhat leh a fa palite an tel a. Chutih hun lai chuan a fapa upa ber chu kum 12 mi niin, a zakzum hle a, zirna neih ṭan hmain lo bihrûk a tum ṭhîn a ni. Rawngbâwlna chanvo dang an dawn tâkah chuan, nupate chuan an zirpui zawm thei ta lo va. Mahse, chu khua chu kum 25 hnuah an va tlawh leh thei a ni. Eng nge an va hmuh? Thuchhuahtu mi 69 leh regular pioneer 13 nei kohhran, Kingdom Hall thara inkhâwm chu an va hmu a ni. A nih leh, mipa naupang zakzum thei tak chu engtin nge a awm? Tûnah chuan kohhran upaho rawnkhâwmtu, coordinator angin rawng a bâwl tawh a ni! Isua tehkhin thu-a dawidim ang bawkin, Lalram thuchah chuan ṭhang chhovin mi tam takte nun a thlâkthleng a​—⁠chu chuan, va tlawhtu nupate chu a tihlim hle!

¹³ Hmuh theih loh Lalram thuchah thiltih theihnain mite a thlâk theih dân chu zalên taka thu kan hrilh theih lohna ramahte hian a lang chiang hle a. Chutiang ramah chuan chanchin ṭha eng chenin nge a thlen tih hriat a harsa a, a hnua kan thu hriatte hi a mak ṭhîn hle. Entîr nân, Cuba ram hi han ngaihtuah teh. Kum 1910-ah Lalram thuchah chu a thleng a, kum 1913-ah Unau Russell-a chuan a va tlawh a ni. Mahse, atîrah chuan hma a sâwn chak lo hle. Mahse, tûnah chuan Cuba ramah eng nge kan hmuh? Chutah chuan thuchhuahtu mi 96,000 te chuan chanchin ṭha an hril a, kum 2013-a Hriatrengna inkhâwmah mi 2,29,726 an tel a​—⁠chu chu thliarkâra awm mi 48 zînga 1 zêl an tel tihna a ni. Thu hrilhna khap a nih lohna ramahte pawh, Lalram thuchah chu tualchhûng Thuhretute’n thu hrilh theihna tûra an ngaih lohna hmunahte pawh hrilhin a awm thei a ni. *​—⁠Thur. 8:7; 11:⁠5.

14, 15. (a) Dawidim tehkhin thu chu engtin nge a mi mala kan hlâwkpui theih? (b) Hei hian Jehova leh Isua chungchâng eng nge min zirtîr?

 ¹⁴ Isua min zirtîr dawidim tehkhin thu chu engtin nge kan hlâwkpui theih? Isua tehkhin thu awmzia kan ngaihtuah hian, Lalram thuchah la hre lo mi maktaduai tam takte hnêna Lalram thuchah thlen dân tûr chungchâng chu kan ngaihtuah buai lutuk tûr a ni lo tih kan hria a. Thil engkim hi Jehova chuan a thunun a ni. Mahse, kan thawh tûr chu eng nge ni? Pathian Thu chuan: “Zîngah i chi tuh la, tlaiah i kut sûm suh; i hre si lo, a ṭhang ṭha tûr khawii nge, hei hi nge, kha kha nge, an ṭha ve ve dâwn,” tiin min chhâng a ni. (Thur. 11:⁠6) Chutih rual chuan, a bîk takin rawngbâwlna khapna ramahte chuan thu hrilh rawngbâwlna hlawhtlin nâna ṭawngṭaisak chu kan theihnghilh ngai tûr a ni lo.​—⁠Eph. 6:​18-20.

¹⁵ Chu bâkah, atîrah rawngbâwlna rah chhuah hmu nghâl mai lo mah i la, kan lunghnual tûr a ni lo va. “Thil tênau hunte hi” kan hmusit ngai tûr a ni hek lo. (Zak. 4:10) A tâwpah chuan a rah chhuah chu kan beisei aia nasa leh ropui zâwk a ni thei a ni!​—⁠Sâm 40:5; Zak. 4:⁠7.

16. Sumdâwng tehkhin thu leh ro phûm rûk tehkhin thu awmzia chu eng nge ni?

¹⁶ Matthaia 13:​44-46 chhiar rawh. Sumdâwng leh ro phûm rûk tehkhin thu awmzia chu eng nge ni? Isua hun lai khân sumdâwng ṭhenkhatte chu tuikeplung ṭha ber berte lei tûrin hmun hla tak, India tuipui thlengin an zin ṭhîn a. He tehkhin thua sumdâwng hian an thlarau lam mamawhte phuhru tûra engkim tih inhuam thinlung dik tak pute a entîr a ni. “Tuikeplung hlu tak pakhat” chuan Lalram thutak hlutna a entîr a. Sumdâwng chuan tuikeplung hlutna chu a hriatin, a lei theih nân a thil neih zawng zawng hralh nghâl a inhuam a ni. Isua chuan ro “phûm rûk” hmutu lova hna thawk mi pakhat chungchâng a sawi bawk a. Ani chu sumdâwng ang lo takin, ro zawngin a vâk kual lo. Mahse sumdâwng ang bawkin, ro a neih theih nân “a neih zawng zawng” hralh a inhuam a ni.

17. Engvângin nge Isua’n sumdâwng tehkhin thu leh ro phûm rûk tehkhin thu hi a sawi?

¹⁷ Engvângin nge Isua’n he tehkhin thu pahnihte hi a sawi? Thutak chu kawng chi hrang hranga hmuh a nihzia târ lan nân a ni. Mi ṭhenkhat chuan engkim huamin thutak an zawng a. Mi dangte erawh chuan an zawng lo chung pawhin an hmu a ni​—⁠chu chu tuemawin an hnênah an va hrilh pawh a ni thei ang. Eng pawh ni se, chu mite pahnih chuan an thil hmuh hlutna chu an hria a, chu mi neih theih nân thil tam tak chân an inhuam a ni.

18. (a) Engtin nge he tehkhin thu pahnihte hi kan hlâwkpui theih? (b) Hei hian Jehova leh Isua chungchâng eng nge min zirtîr?

¹⁸ Hêng tehkhin thu pahnihte hi engtin nge kan hlâwkpui theih? (Mt. 6:​19-21) Heti hian inzâwt rawh: ‘Hêng mite neih ang rilru put hmang ka nei em? Anmahni angin thutak ka ngaihlu em? Chu mi nei thei tûr chuan inhuam takin ka inpe nge ni a, chu mi aṭanga min la pêng thei nî tin khawsak dân ngaihtuahna ang chi thil dangte tân ka inpe zâwk?’ tiin. (Mt. 6:​22-24, 33; Lk. 5:​27, 28; Phil. 3:⁠8) Thutak kan hmuh avânga kan lâwmna a nasat zawh poh leh kan nuna dah pawimawh ber kan tumna chu a nghet zual sauh vang.

19. A dawta thuziakah eng nge kan sawiho vang?

¹⁹ Hêng Lalram tehkhin thute hi kan ngaithlain, kan hre thiam tak zet tih i lantîr ang u. Hre thiam tih chu a awmzia hriatna mai ni lovin, kan thil zirte nunpui tihna a ni tih hre reng ang che. A dawta thuziakah chuan, tehkhin thu dang pathum kan ngaihtuah belh ang a, chuta ṭanga kan thil zir theihte kan hmu bawk ang. (w14-E 12/15)