1, 2. Ngera uchul me a rebetok a dimlak lomtab a tekingel a Jesus?

 SEL longedecheduch er kid a chad, e nglocha sebeched el rongesii a oto er a ngerel me a tekoi el ledung. Engdi ngkired el mo medengei a belkul a tekingel me bo el sebeched el medengei a tekoi el losaod. (1 Ko. 14:9) A Jesus a milengedecheduch er a rebetok el telael el chad el ousbech a omelekingir, engdi a rebetok er tir a dimlak lodengei a belkul a tekingel. Sei a uchul me ngdilu el kmo: “Morrenges er ngak el rokui, e momtab a kulekoi.”​—Mk. 7:14.

² Ngera uchul me a rebetok a dimlak lomtab a tekingel a Jesus? A rebebil er tir a mle ngodech a uldesuir, me a lechub e ngkuk di mle chetirir el orrenges er ngii. Me a Jesus a dilu er tir el kmo: “Kom meral medecha el mengoit a llechul a Dios el leko di moltirakl osisechekliu.” (Mk. 7:9) Tirkang a dimlak lolasem el omtab a tekingel, e mle chetirir el melodech a omerellir me a uldesuir. Me alta e ngmle sebechir el orrenges er a ngerel a Jesus, engdi a tekingel a dimlak lemedalem er a rengrir. (Monguiu er a Mateus 13:13-15.) Me ngkired el mekerang me bo el sebeched el ngmai a klungioled er a osisecheklel a Jesus?

3. Ngera uchul me a redisaiplo er a Jesus a mle sebechir el omtab a tekingel?

³ Ngkired el oukerebai er a rengariou a rengrir el disaiplo er a Jesus. Ngdilu er tir el kmo: “Ngdi kemiu a kmal ngeltengat! A medemiu omes ma dingemiu orrenges!” (Mt. 13:16) Ngera uchul me ngmle sebechir el omtab a tekingel a Jesus e a rebebil a dimlak el sebechir? Ngmla er ngii a edei el tekoi el lurruul er ngii. A kot, e te uleker a ker e le ngmle sorir el mo medengei a belkul a tekingel. (Mt. 13:36; Mk. 7:17) A ongerung, te kilengei el mesuub a beches el uldasu, el mlo dechelel aike el di mla klemedengei er tir. (Monguiu er a Mateus 13:11, 12.) Me a ongedei, te kilengei el oltaut a tekoi el lulsuub er a klengar er tir e dirrek el uluusbech el olengeseu er a rebebil.​—Mt. 13:51, 52.

4. Ngera el edei el tekoi a kired el meruul me bo el sebeched el omtab a belkul aike el okesiu er a Jesus?

⁴ Kid a di ua redisaiplo er a Jesus el ngar er ngii a edei el tekoi el kired el meruul me bo el sebeched el omtab a belkul aike el okesiu er a Jesus. A kot, ngkired el mengoit a taem el mesuub e melebedebek er a tekingel a Jesus, e merriter a suobel, e dirrek el di kid el oker a ungil el ker. Tiaikid a meskid a klemedengei. (Osi. 2:4, 5) A ongerung, ngkired el dochel a tekoi el dosuub el mo er aike el di mla klemedengei er kid e omtab a rolel e ngmo uchul a klungioled. Tiang a mo meskid a sekutaberreng. (Osi. 2:2, 3) Me a ongedei, ngkired el oltaut aika el tekoi er a klengar er kid. Tiang a rolel a llomeserreng.​—Osi. 2:6, 7.

5. Mosaod a klekakerous er a klemedengei me a sekutaberreng me a llomeserreng.

⁵ Ngera klekakerous er a klemedengei me a sekutaberreng me a llomeserreng? Ka molatk er tia el okesiu: Oleko ke dechor er a belngel a rael e mesa bas el merael el bedul kau el kmal bekerurt. A kot e ke mo medengei el kmo tiang a bas​—tiaikid a klemedengei. A ongerung e ke mtebengii el kmo, a di mdechor er a belngel a rael e ke mo merot​—tiaikid a sekutaberreng! Me ke di mereched el remurt el mo er a tkul a rael​—tiaikid a llomeserreng! A Biblia a mengelechel er kid el mo omekeroul er a llomeserreng, e le ngsebechel el omekerreu er a klengar er kid!​—Osi. 3:21, 22; 1 Ti. 4:16.

6. Ngera el eua el ker a bo donger el kirel a euid el okesiu er a Jesus? (Momes er a  baks.)

⁶ Ngar er tia el suobel me sel ongingil e kede mo merriter a euid el okesiu el luluusbech a Jesus. Kede mo onger aika el ker: Ngera belkul tia el okesiu? (Tiaikid a klemedengei.) Ngera uchul me ngdillii tia el okesiu a Jesus? (Tiaikid a sekutaberreng.) Ngmekerang e mo uchul a klungioled kid me a rebebil? (Tiaikid a llomeserreng.) E ngera kede suubii el kirel a Jehovah me a Jesus?

7. Ngera belkul a okesiu er a Jesus el kirel a tane er a meringel?

⁷ Monguiu er a Mateus 13:31, 32. Ngera belkul a okesiu er a Jesus el kirel a tane er a meringel? A tane er a meringel a omtechei er a klumech er a Renged el domerk er ngii, me a ongdibel er a Rekristiano. Sera lomuchel a ongdibel er a Rekristiano er a rak er a 33, e ngkmal mle kekerei el ua tane er a meringel el ngii a “kot el kekerei er a bek el tane.” Engdi ngdi mle mereched el mo klou el okiu a ureor er a berkel a klumech, alta e a rebetok a dimlak lomdasu el kmo ngmo uaisei a okurulel el kmal mo klou. (Kol. 1:23) A Jesus a dilu el kmo, a “suebek el charm a mo meruul a lukel er a rechelel.” Me tiang a belkul a kmo, a remelemalt a rengrir el chad a mo sebechir el mo er a ongdibel er a Rekristiano el kirel a ulengull, ulekerreu, me a omelisiich el okiu a Tekingel a Dios.​—Momekesiu er a Esekiel 17:23.

8. Ngera uchul me a Jesus a dillii a okesiu el kirel a tane er a meringel?

⁸ Ngera uchul me ngdillii tia el okesiu a  Jesus? A tane er a meringel a kmal mengasireng a okurulel, me a Jesus a ulechotii el kmo a Rengedel a Dios a dirrek el mo mukeroul el mo klou, e mo omekerreu er a rechad, e mo mesisiich er a ngii di el tekoi el sebechel el merrob er a okurulel. Me sera 1914 el mei, e a ongdibel er a Rekristiano a di milleketek me chelechang e ngkmal mla mo klou. (Isa. 60:22) Me tirke el chedal a ongdibel a mongeseu el mo olekes er a deleuill er tir me a Jehovah. (Osi. 2:7; Isa. 32:1, 2) E diak a ngii di el tekoi el sebechel el merrob er a okurulel a ongdibel.​—Isa. 54:17.

9. (a) Ngera kede suubii er a okesiu el kirel a tane er a meringel? (b) Ngera kede suubii el kirel a Jehovah me a Jesus?

⁹ Ngera kede suubii er a okesiu el kirel a tane er a meringel? Kede locha kiei er a beluu el di mekesai a Resioning er ngii me te di mekesai el chad a kongei er a klemerang. Engdi lak dobes el kmo, a Renged a sebechel el mo mesisiich er a ngii di el omelsemai. Tiang a smisichid me ngmo sebeched el outekangel. El ua tiang, a Brother Edwin Skinner er a lekot el mo er a India er a rak er a 1926, e te di mle mekesai a Resioning er sel beluu. Seikid el taem e a ureor er a berkel a klumech a kmal mle meringel, e le te di mekesai el chad a kilengei er a klumech er a Renged. Me nguaisei, engdi ngmillemolem el omerk er a klumech e mlo sebechel el mesang a klou el ildois er a rechad el di milleketek, alta ngmle klou a omelsemai el lechillebangel. Me chelechang e te ngar er ngii a betok er a 37,000 el Sioning er a beluu er a India, e te mla er ngii a 108,000 el chad el mlo er a Chedaol Belsoil er a rak er a 2013. Sel osisiu el taem er a lebo er a India a Brother Skinner, e a ureor er a berkel a klumech a dirrek el ulemuchel er a beluu er a Zambia. Me chelechang e te ngar er ngii a kuk betok er a 170,000 el Sioning er sel beluu, e mla er ngii a 763,915 el chad el mlo er a Chedaol Belsoil er a rak er a 2013. Me ngbelkul a kmo a 1 er a chelsir a 18 el chad er sel beluu a mlo er a Chedaol Belsoil. Ngkmal mengasireng a okurulel a klumech er a Renged!

10. Ngera belkul a okesiu el kirel a omkukel a blauang?

¹⁰ Monguiu er a Mateus 13:33. Ngera belkul a okesiu el kirel a omkukel a blauang? Tia el okesiu a mesaod el kirel a rolel e ngsebechel a klumech er a Renged el ngmodech a klengar er a rechad. A “chimol bek” el merikengko a omtechei  aike el rokui el beluu er a beluulechad. Me a rolel a lobkuuk a omtechei er a berkel a klumech er a Renged. A okurulel a tane er a meringel a di bleketakl el moues, engdi ngmeringel er kid el mtebengii a merikengko sel lobkuuk. Engdi cherengel a taem e ngmo sebeched el mesang el kmo ngmla obkuuk.

11. Ngera uchul me a Jesus a dillii a okesiu el kirel a omkukel a blauang?

¹¹ Ngera uchul me ngdillii tia el okesiu a Jesus? A Jesus a mileketeklii el kmo, a klumech er a Renged a kmal mesisiich el sebechel el oberk “el mo lmuut er a bek el beluu er a beluulchad,” e melodech a klengar er a rechad. (Rel. 1:8) A lebebil er a taem e sel lomuchel a klumech er a Renged el melodech a klengar er a rechad, e nglocha diak el bleketakl a olechotel a tekoi el mengedechang er a rengrir. Engdi a rebetok el meliuekl er a beluulechad a kongei er tia el klumech er a Renged e mecherei me ngmesmechokl a blekerdelir.​—Rom 12:2; Efe. 4:22, 23.

12, 13. Mosaod a tekoi el dilubech el ochotii el kmo a klumech er a Renged a mla oberk, el ua sel okesiu er a Jesus el kirel a omkukel a blauang.

¹² A tekoi el meketmokl el okiu a ureor er a berkel a klumech a blechoel el moues el betok el rak er a uriul er a lekot el rongesii a klumech a rechad. El ua tiang, sera rak er a 1982 e a Franz me a bechil er a Margit a milsiou er a Bethel er a Brazil e ulemerk er a klumech er a chelsel a ta el kekerei el beluu. Te ulemuchel a omesubel a Biblia el obengterir a rekakerous el chad, el uldimukl er a ta el chedil me a reteua el ngelekel. Me ngike el kot el klou el ngelekel el sechal a mle 12 a rekil. Ngika el buik a mle sekemerur, e mle blechoel el omart er ngii er a uchei er a lomuchel a omesubir. Engdi a Franz me a Margit a mloterekokl er tir a beches el ngerachel el uchul me ngdimlak el sebechir el melemolem el mesuub el obengterir. Me nguaisei, engdi te liluut el mo oldingel er sel beluu er a 25 el rak er a uriul. Me ka di molatk er a deuil a rengrir er a lebetik er a ongdibel el ngar er ngii a 69 el publisher er ngii, el 13 er tir a regular pioneer, e tir el rokui a mle kldibel er a beches el Blil a Ongdibel! Me ngika el mle sekemerur el buik a mla mo klou e mesiou el tebechelel a chelechad er a remechuodel! Me a klumech er a renged el uleberk e ngmodech a klengar er a rebetok a di ua sel okesiu er a omkukel a blauang el ledillii a Jesus.

¹³ A klumech er a Renged a dirrek el melodech a klengar er a rechad el kiei er aike el beluu el merrob a ureor er a berkel a klumech. Ngkmal mo mechas a rengud sel bo dodengei el kmo a klumech a dirrek el mla oberk el ngar er aika el beluu. El ua tiang, a rechad er a Cuba a mle kot el rongesii a ungil chais er a rak er a 1910, e a Brother Russell a mlo er sel iungs er a rak er a 1913. Sera kot el uchul e te di mle mekesai el chad a kilengei er a klumech er a Renged. Engdi ngera dubechang er sel beluu er chelechang? Te ngar er ngii a betok er a 96,000 el publisher el omerk er a ungil chais, e mla er ngii a 229,726 el mlo er a Chedaol Belsoil er a 2013. Me ngbelkul a kmo, 1 er a chelsir a 48 el chad er sel beluu a mlong. A klumech er a Renged a dirrek el mla oberk er a chelsel aike el beluu el diak lorrob er a ureor, me a lebebil er a taem e a rechad el kiei er aike el mesechesechel a beluu a mla rongesii a ungil chais, alta e a Resioning er sel beluu a omdasu el kmo ngdirkak a rechad el mo omerk er a klumech er isei. *​—Oli. 8:7; 11:5.

14, 15. (a) Kede mekerang e ngmai a klungioled er a okesiu el kirel a omkukel a blauang? (b) Ngera kede suubii el kirel a Jehovah me a Jesus?

¹⁴ Kede mekerang e ngmai a klungioled er a okesiu er a Jesus el kirel a omkukel a blauang? Sel dolebedebek er tia el okesiu er a Jesus, e ngmo diak el sebek a rengud el kmo ngmekera  tia el klumech er a Renged e oberk el mo er tirke el betok el miliol el chad el dirkak lerengesii. A Jehovah a ungil el medengei a tekoi el meketmeklang. Me ngera kired el meruul er ngii? A Tekingel a Dios a kmo: “Molalem a dellemelem a le tutau e dirrek a le kebesengei. Ng kmal diak modengei el kmo ng mo rokui el di mo ungil a dbechel, ma lechub e a tar a omelalem a kuk mo ungil er a tang.” (Oli. 11:⁠6) Ngdirrek el kired el olengit er a Jehovah me lomekngeltengat er a ureor er a berkel a klumech, el ileakl er a chelsel aike el beluu el merrob er tia el ureor.​—Efe. 6:18-20.

¹⁵ Me a lmuut el tang, e ngdiak el kired el mo mechitechut a rengud a lsekum “ng diak lesal ungil merael” a ureor er a berkel a klumech. (Sek. 4:10) E le cherengel a taem e ngsebechel el mo uchul a betok el ungil el tekoi, el kuk ungil er aike el dulemdasu er a kot el uchul!​—Psa. 40:5; Sek. 4:7.

16. Ngera belkul a okesiu el kirel a ngisel a chesiuch me a berrotel el mekreos el klalo?

¹⁶ Monguiu er a Mateus 13:44-46. Ngera belkul a okesiu el kirel a ngisel a chesiuch me a berrotel el mekreos el klalo? Sera taem er a Jesus e a rebebil er a rechad a mlo mesarech a cheroid el beluu el osiik a ngisel a chesiuch e omechar. Sel chimo el “kmal meringelchad” el ngisel a chesiuch er tia el okesiu a omtechei er a klumech er a Renged el ngii a kmal mekreos, me ngika el chad a omtechei er tirke el melemalt a rengrir el chad el blak a rengrir el osiik er a klemerang. Me ngika el chad a di mle mereched el oterau a rokui el kloklel me bo el sebechel el mecherar tia el ngisel a chesiuch. A Jesus a dirrek el milsaod er a okesiu el kirel a chad el oureor er a sers e miltik er a “berrotel” el mekreos el klalo. Me ngikang a kuk ngodech a blekerdelel er ngike el miltik er a ngisel a chesiuch, e le ngika el chad a dimlak losiik a mekreos el klalo. Engdi sera bo lodengelii a kerresel tia el klalo, e ngdirrek el kilengei el oterau “a rokui el kloklel” me bo el sebechel el nguu sel klalo el mo kloklel.

17. Ngera uchul me a Jesus a milsaod aika el okesiu el kirel a ngisel a chesiuch me a berrotel el mekreos el klalo?

¹⁷ Ngera uchul me a Jesus a milsaod aika el eru el okesiu? Ngmileketeklii el kmo ngokiu a kakerous el rolel e ngsebechir a rechad el metik er a klemerang. A rebebil a blak a rengrir el osiik er a klemerang. E a rekuk bebil a diak losiik er ngii, engdi te mo metik er ngii el okiu a rechad el omerk er a klumech el mo er tir. Me tirka el chad er aika el okesiu a di diul mlo medengelii a kerresel a tekoi el lebiltik er ngii, e kilengei el melodech a meklou el tekoi er a klengar er tir me bo el sebechir el nguu.

18. (a) Kede mekerang e ngmai a klungioled er aika el eru el okesiu? (b) Ngera kede suubii el kirel a Jehovah me a Jesus?

¹⁸ Kede mekerang e ngmai a klungioled er aika el eru el okesiu? (Mt. 6:19-21) Ngungil a di le kau el oker el kmo: ‘A uldesuek el kirel a klemerang, ngdi osisiu ngii me a uldesuir tirka el chad? A kumes er ngii el ua mekreos el klalo? Ngak ak kongei el melodech a meklou el tekoi er a klengar er ngak me bo el sebechek el nguu, me a lechub e ak mechei a tekoi er a bek el sils me a lmuut el bebil er a tekoi me ngmengesang er ngak?’ (Mt. 6:22-24, 33; Lk. 5:27, 28; Fil. 3:8) A lsekum ngmera el betik a rengud er a klemerang, e kede mo kongei el melodech a meklou el tekoi er a klengar er kid me bo el sebeched el nguu a Renged el mo kot.

19. Ngera kede mo mesuub er a ongingil el suobel?

¹⁹ Me kid el rokui bo dochotii el kmo kede mla remenges e mtab a okesiu er a Jesus. Lak dobes, ngdiak di el klemedengei er kid er a belkul aikang a ungiang. Ngdirrek el kired el oltaut a tekoi el dosuub er a chelsel a klengar er kid. Me ngar er a ongingil el suobel e kede mo mesaod a lmuut el edei el okesiu me a klubeled el dengai er ngii.