1, 2. Адамларың көпүси Исаның айдан сөзлериниң манысына нәме үчин дүшүнмеди?

БИЗ адам билен гүрлешенимизде онуң сесини эшидип, хатда әхеңини хем сайгарып билйәрис. Эмма онуң айдян затларына дүшүнмек үчин сөзлериниң манысына дүшүнмели (1 Кор. 14:9) Иса мүңлерче адамлар билен оларың дүшүнйән дилинде геплешипди. Муңа гарамаздан, көп адамлар онуң айдан сөзлериниң манысына дүшүнмеди. Шонуң үчин Иса олара: «Хеммәңиз Мени диңләң, дүшүниң» дийди (Мар. 7:14).

² Көп адамлар Исаның айдян сөзлериниң манысына нәме үчин дүшүнмеди? Себәби оларың терс дүшүнҗеси ве эрбет ниетлери барды. Шонуң үчин Иса олара: «Өз адатларыңызы берҗай этмек үчин, Худайың буйрукларындан йүз дөндерйәрсиңиз» дийди (Мар. 7:9). Олар эндиклерини ве гарайышларыны дүзедеси гелмән, Исаның айдан сөзлериниң манысына дүшүнҗегем болмады. Оларың гулагы эшитсе-де, йүреги гатыды (Матта 13:13—15-нҗи аятлары окаң). Биз Исаның таглыматларындан нәме өвренип билерис?

3. Шәгиртлер Исаның айдан сөзлерине нәме үчин дүшүнйәрди?

³ Биз Исаның песгөвүнли шәгиртлериниң гөрелдесине эермели. Ол шәгиртлерине: «Сизиң гөзлериңиз не багтлы, чүнки олар гөрйәр, гулакларыңыз не багтлы, чүнки олар эшидйәр» дийди (Мат. 13:16). Олар нәме үчин Исаның таглыматларына дүшүнйәрдилер? Биринҗиден, олар Исаның айдан сөзлерине дүшүнмек үчин сораг берйәрдилер (Мат. 13:36; Мар. 7:17). Икинҗиден, олар көпрәк билим аласы гелйәрди (Матта 13:11, 12-нҗи аятлары окаң). Үчүнҗиден, олар алан билимини диңе бир дурмушында уланман, эйсем, башгалара хем көмек этмәге җан эдйәрди (Мат. 13:51, 52).

4. Исаның тымсалларына дүшүнмек үчин хайсы үч әдими әтмели?

⁴ Биз Исаның тымсалларына дүшүнер ялы, онуң вепалы шәгиртлериниң гөрелдесине эермели. Мунуң үчин үч әдим әтмели. Илки билен, биз Исаның таглыматларыны өвренмәге ве олар барада ойланмага вагт тапмалы. Шейле-де, сорагларымыза җогап тапмалы. Муңа билим дийилйәр (Сүл. тым. 2:4, 5). Икинҗиден, алан билимимизиң өңки билйән затларымыз билен нәхили багланышыгының бардыгына ве онуң пейдалыдыгына гөз етирмели. Муңа болса, дүшүнҗе дийилйәр (Сүл. тым. 2:2, 3). Үчүнҗиден, алан билимимизи дурмушымызда уланмалы. Муңа пайхаслылык дийилйәр (Сүл. тым. 2:6, 7).

5. Билимиң, дүшүнҗәниң ве пайхаслылыгың нәме тапавуды бар?

⁵ Билимиң, дүшүнҗәниң ве пайхаслылыгың нәме тапавуды бар? Гелиң, бир мысала середелиң. Сен ёлуң ортасында дуркаң, саңа тарап автобусың гелйәндигини гөрйәрсиң. Сен онуң автобусдыгына дүшүнйәрсиң. Муңа билим дийилйәр. Икинҗиден, сен ёлдан айрылмасаң, автобусың какҗакдыгына дүшүнйәрсиң. Муңа дүшүнҗе дийилйәр. Шол себәпли сен ёлдан айрыларсың. Муңа болса пайхаслылык дийилйәр. Мукаддес Язгыларда җаныңы горамак үчин «акыллылыгы горап сакламак» маслахат берилйәр (Сүл. тым. 3:21, 22; 1 Тим. 4:16).

6. Биз Исаның еди тымсалына середип хайсы дөрт сорагың җогабыны билерис? ( Чарчува середиң).

⁶ Биз шу ве индики макалада Исаның айдан еди тымсалына середип, шу сорагларың җогабыны билерис. Тымсал нәмәни аңладяр? (Муңа билим дийилйәр). Иса нәме үчин шу тымсалы гетирди? (Бу — дүшүнҗедир). Биз тымсалдан нәме өвренйәрис? (Муңа пайхаслылык дийилйәр). Тымсалдан Ехова ве Иса барада нәмәни билдик?

7. Горчица тохумы барадакы тымсал нәмәни аңладяр?

⁷ Матта 13:31, 32-нҗи аятлары окаң. Исаның айдан горчица тохумы барадакы тымсалы нәмәни аңладяр? Горчица тохумы Патышалык барадакы хабары ве месихчилер йыгнагыны аңладяр. Б. э 33-нҗи йылында месихчилер йыгнагы «тохумларың иң овнугы» горчица тохумы ялы кичиди. Эмма онларча йылың довамында ол чалт өсүп, көплери хайран галдырды (Кол. 1:23). Иса хем бу барада: «гөгүң  гушлары... онуң шахаларында хөвүртгелейәрлер» дийди. Бу болса акйүрекли адамларың месихчилер йыгнагында рухы иймит, пена ве гораг тапҗакдыгыны аңладяр (Эзекиел 17:23-и деңешдириң).

8. Иса горчица тохумы барадакы тымсалы нәме үчин гетирди?

⁸ Иса нәме үчин бу тымсалы гетирди? Ол тымсал аркалы Патышалык ишиниң горчица тохумы ялы тәсин өсүшини ве оңа хич кимиң пәсгел берип билмеҗекдигини гөркезди. 1914-нҗи йылдан бәри Худайың гурамасының ердәки бөлеги хасам улалды! (Иш. 60:22). Гурама гелйән адамлар рухы тайдан гораг тапяр (Сүл. тым. 2:7; Иш. 32:1, 2). Йыгнакларың көпелмегине хич ким пәсгел берип билмейәр (Иш. 54:17).

9. a) Биз горчица тохумы барадакы тымсалдан нәме өвренйәрис? б) Бу тымсалдан Ехова ве Иса барада нәмәни билдик?

⁹ Биз горчица тохумы барадакы тымсалдан нәме өвренйәрис? Белки, бизиң яшаян еримизде Ехованың Шаятлары аздыр я-да көп вагыз эдилсе-де, нетиҗеси кән бир гөрүнйән дәлдир. Эмма Патышалык ишине хич задың пәсгел бермейәндигини унутмаң. Мысал үчин, 1926-нҗы йылда Эдвин Скиннер доган Хиндистана геленде, ол ерде Ехованың Шаятлары азды. Хиндистанда кән бир өсүш болмаяндыгы себәпли, вагыз этмек кынды. Эмма Эдвин Скиннер вагыз этмегини довам эдип, хош хабарың яйрамагына хич задың пәсгел бермейәндигине гөз етирди. Хәзир Хиндистанда 37 мүң Шаят бар ве Ятлама агшамына 108 мүң адам гелди. Инди Патышалык ишиниң өсүшине середелиң. Скиннер доганың Хиндистана гелен йылы Замбияда яңы вагыз эдилип башланыпды. Шу гүнлер Замбияда 170 мүң вагызчы бар ве 2013-нҗи йылда Ятлама агшамына илатың 18 адамындан бири, ягны 763 915 адам гелди. Гөр, нәхили тәсин өсүш!

10. Хамырмая тымсалы нәмәни аңладяр?

¹⁰ Матта 13:33-и окаң. Хамырмая тымсалы нәмәни аңладяр? Бу тымсал Патышалык барадакы хабары ве онуң адамлара тәсир эдишини гөркезйәр. «Бүтин хамыр» әхли миллетлери, онуң туршамагы болса, хош хабарың яйрамагыны аңладяр. Горчица тохумының өсүши гөрүнсе, хамырың туршамагы болса гөзе гөрүнмейәр. Ол вагтың гечмеги билен аян боляр.

11. Иса нәме үчин хамырмая тымсалыны гетирди?

¹¹ Иса нәме үчин бу тымсалы гетирди? Бу тымсал Патышалык барадакы хабарың «Ериң тә соңуна ченли» яйраҗакдыгыны ве көп адамларың дурмушыны үйтгедйәндигини гөркезйәр (Рес. иш. 1:8). Илкибашда, бу өзгеришиклер гөрүнмесе-де, вагтың гечмеги билен аян боляр. Әхли ерде адамларың көпүси хош хабары кабул эдип, дурмушыны үйтгедйәр (Рим. 12:2; Эфес. 4:22, 23).

12, 13. Исаның тымсалындакы хамырмая ялы хош хабарың яйрамагы барада мысаллар гетириң.

¹² Хош хабар вагыз эдилип башлансоң, көпленч бирнәче йылдан онуң нетиҗеси мәлим боляр. Мысал үчин, Франц билен Маргин 1982-нҗи йылда Бразилияның Бейтелинде гуллук эденлеринде, бир кичиҗик шәхерде вагыз эдйәрдилер. Олар бир аял ве онуң дөрт чагасы билен Мукаддес Язгылар окувыны гечйәрди. Онуң улы оглы шол вагт 12 яшындады. Ол өрән чекинҗеңди ве Мукаддес Язгылар окувы башламаздан өң көпленч гизленйәрди. Франц билен Маргин башга ере беллененден соң, олар билен окув гечип билмеди. Эмма олар шол шәхере 25 йылдан соң баранларында нәхили өсүш гөрдүлер? Йыгнакда 69 вагызчы барды, оларың 13 санысы пионерди ве душушыклар тәзе Патышалык залында гечирилйәрди. Чекинҗең оглана нәме болды? Хәзир ол яшулулар маслахатының координаторы болуп гуллук эдйәр! Хош хабар Исаның тымсалындакы хамырмая ялы гиңден яйраяр ве көп адамларың дурмушыны үйтгедйәр. Франц билен Маргин бу өсүши гөрүп өрән бегендилер!

¹³ Хош хабары ачык вагыз эдип болмаян юртларда-да, ол адамларың дурмушына тәсир эдйәр. Шейле юртларда нәдип вагыз эдилйәндигини билмек кын болса-да, көпленч онуң нетиҗесине гең галдыряр. Меселем, хош хабар Кубада 1910-нҗы йылдан бәри яйрап башлады. Расселл доган Куба 1913-нҗи йылда барыпды. Эмма илкибашда өсүш песди. Хәзир болса, ол ерде өсүш нәхили? Кубада 96 мүңден говрак вагызчы бар. 2013-нҗи йылда Ятлама агшамына ерли илатының 48 санысындан бири, ягны 229 726 адам гелди. Гадаган эдилмедик юртларың аз вагыз эдилйән ерлеринде-де адамлар хош хабары эшидйәр (Ваг. 8:7; 11:5).

14, 15. a) Биз хамырмая тымсалындан нәме өвренйәрис? б) Биз бу тымсалдан Ехова ве Иса барада нәмәни билдик?

¹⁴ Биз хамырмая тымсалындан нәме өвренйәрис? Биз Исаның тымсалы барада ойлансак, миллионларча адамларың хош хабары нәдип эшитҗекдиги барада  ченденаша алада этмерис. Ехова әхли зада гөзегчилик эдйәр. Биз барада нәме дийсе болар? Худайың Сөзүнде: «Тохумыңы ирден сеп, агшам-да элиң бош дурмасын. Чүнки сен хайсы ишиң бәхбитли болҗакдыгыны билйән дәлсиң» дийилйәр (Ваг. 11:6). Элбетде, биз хош хабарың, эсасанам, гадаган эдилен юртларда үстүнликли вагыз эдилмеги барада дога этмеги хич хачан унутмалы дәл (Эфес. 6:18—20).

¹⁵ Биз вагыз ишиниң нетиҗесини илкибада гөрмесек-де, рухдан дүшмели дәл. Биз хич хачан «еңил ишлер эден гүнүмизи әхмиетсиз хасапламалы дәл» (Зак. 4:10). Иң соңы онуң нетиҗеси бизиң гарашанымызданам хас улы ве хайран галдырыҗы болмагы мүмкин (Зеб. 40:5; Зак. 4:7).

16. Дүрдәне ве гизлин хазына барадакы тымсаллар нәмәни аңладяр?

¹⁶ Матта 13:44—46-нҗы аятлары окаң. Дүрдәне ве гизлин хазына тымсаллары нәмәни аңладяр? Исаның гүнлеринде тәҗирлер дүрдәнәни тапмак үчин Юваш океан ялы узак ерлере гидйәрдилер. Тәҗир бу рухы зерурлыкларыны канагатландырмак үчин узак ёла гидйән акйүрекли адамлары аңладяр. «Дүрдәне» болса Худайың Патышалыгы барадакы гымматлы хакыкаты аңладяр. Тәҗир дүрдәнәниң гымматдыгыны билип, оны сатын алмак үчин деррев әхли задыны сатяр. Шейле-де Иса экин мейданында ишлән адамың «гизленги хазына» тапандыгы хакында гүррүң берйәр. Ол тәҗир ялы хазынаны агтармаса-да, оны тапанда, сатын алмак үчин деррев «әхли задыны» сатяр.

17. Иса нәме үчин дүрдәне ве гизлин хазына барадакы тымсаллары гетирди?

¹⁷ Иса нәме үчин бу ики тымсалы гетирди? Ол хакыкаты дүрли ёл билен тапып боляндыгыны гөркезди. Кәбир адамлар оны гөзләп, тапмак үчин көп ёл йөрейәрлер. Кәбирлер болса хакыкаты гөзлемесе-де, оны тапярлар. Шу ики тымсалдакы адамлар тапан задының гымматыны билип, бар задындан гечйәрлер.

18. a) Бу ики тымсалдан нәме өвренйәрис? б) Биз бу тымсаллардан Ехова ве Иса барада нәмәни билдик?

¹⁸ Бу ики тымсалдан нәме өвренйәрис? (Мат. 6:19—21) Биз өзүмизе шейле сораглар бермели: Мениң гарайшым шу тымсаллардакы адамларыңкы ялымы? Мен хем хакыкат хазынасыны шейле ёллар билен гөзлейәринми? Мен оны сатын алмак үчин бар задымдан гечйәринми я-да гүндеки аладалар ялы башга затлара үнсүми совярынмы? (Мат. 6:22—24, 33; Лука 5:27, 28; Флп. 3:8). Хакыкаты тапандыгымыза йүрекден бегенсек, оны дурмушымызда биринҗи орунда гоймагы берк йүрегимизе дүверис.

19. Биз индики макалада нәмә середерис?

¹⁹ Биз Худайың Патышалыгы барадакы бу тымсаллары диңләп, олара дүшүнмели. Йөне оларың манысына дүшүнмегиң етерликли дәлдигини унутмаң. Биз олардан өвренен затларымызы дурмушымызда уланмалы. Индики макалада биз ене-де үч тымсала ве олардан нәме өвренип боляндыгына середерис.