1, 2. Kay ano nga damu an waray makasabot han kahulogan han mga ginsiring ni Jesus?

KON may nakikiistorya ha aton, nababatian naton an iya ginsisiring ngan bangin naoobserbaran pa ngani naton an tono han iya tingog. Kondi ano an pulos hito kon diri naton nasasabtan an kahulogan han iya ginsisiring? (1 Cor. 14:9) Ha pariho nga paagi, yinukot an nakabati han mga ginsiring ni Jesus. Gumamit pa ngani hiya hin yinaknan nga nasasabtan nira. Pero damu an waray makasabot han kahulogan han iya mga ginsiring. Salit hi Jesus nagsiring: “Pamati kamo ha akon, ngan sabota niyo an kahulogan hini.”—Mar. 7:14.

² Kay ano nga damu an waray makasabot han kahulogan han mga ginsiring ni Jesus? An pipira ha ira may kalugaringon na nga mga opinyon ngan may sayop nga mga motibo. Hi Jesus nagsiring ha ira: “Listo kamo magbalewaray han sugo han Dios basi matuman an iyo tradisyon.” (Mar. 7:9) Waray hira mangalimbasog nga masabtan an kahulogan han iya mga ginsiring. Diri nira karuyag bag-uhon an ira mga kustomre ngan mga opinyon. Bangin namati hira, pero sarado gud an ira kasingkasing! (Basaha an Mateo 13:13-15.) Paonan-o naton masisiguro nga abrido an aton kasingkasing basi kita magpahimulos han mga igintutdo ni Jesus?

3. Kay ano nga nasabtan han mga disipulo an mga ginsiring ni Jesus?

³ Kinahanglan naton sundon an ehemplo han mapainubsanon nga mga disipulo ni Jesus. Hi Jesus nagsiring ha ira: “Malipayon kamo kay an iyo mga mata nakakakita, ngan an iyo mga talinga nakakabati.” (Mat. 13:16) Kay ano nga nakasabot hira samtang an iba waray? Siyahan, andam hira magbangon hin mga pakiana ngan magsaliksik basi masabtan kon ano gud an kahulogan han mga ginsiring ni Jesus. (Mat. 13:36; Mar. 7:17) Ikaduha, andam hira mahibaro hin bag-o nga mga butang. (Basaha an Mateo 13:11, 12.) Ikatulo, andam nira gamiton an ira hinbaroan ngan nasabtan, diri la ha ira personal nga pagkinabuhi kondi ha pagbulig liwat ha iba.—Mat. 13:51, 52.

4. Basi masabtan an mga ilustrasyon ni Jesus, ano an tulo nga paagi nga kinahanglan naton buhaton?

⁴ Pariho ha mga disipulo, kinahanglan liwat naton buhaton an tulo nga paagi kon karuyag naton masabtan an mga ilustrasyon ni Jesus. Siyahan, kinahanglan andam kita maggahin hin panahon ha pag-aram ngan pagpamalandong ha mga ginsiring ni Jesus, ha pagsaliksik, ngan ha pagbangon hin angayan nga mga pakiana. Magriresulta ito ha kahibaro. (Prob. 2:4, 5) Ikaduha, kinahanglan naton kitaon kon ano an koneksyon hito nga kahibaro ha mga butang nga hinbabaroan na naton, ngan kon paonan-o kita magpapahimulos hito. Magriresulta ini ha pagsabot. (Prob. 2:2, 3) Ikatulo, sadang naton gamiton an aton hinbaroan ngan iaplikar ito ha aton kinabuhi. Iginpapakita hini nga may kinaadman kita.—Prob. 2:6, 7.

5. Iilustrar an kaibahan han kahibaro, pagsabot, ngan kinaadman.

⁵ Ano an kaibahan han kahibaro, pagsabot, ngan kinaadman? Mahimo ito iilustrar hini nga paagi: Hunahunaa nga aada ka ha butnga han usa nga kalsada, ngan may nakita ka nga bus nga nagtitikahirani ha imo. Siyahan, hinbaroan mo nga usa ito nga bus—kahibaro ito. Sunod, nasantop mo nga kon magpapabilin ka ha kalsada, maliligis ka han bus—pagsabot ito! Salit umiwas ka dayon ha butnga han kalsada—kinaadman ito! Diri urusahon nga an Biblia nagsiring nga kinahanglan naton ‘tipigan an hingpit nga kinaadman,’ tungod kay magtatalwas ito han aton kinabuhi!—Prob. 3:21, 22; 1 Tim. 4:16.

6. Ano an upat nga pakiana nga aton babatunon samtang gin-uusisa an pito nga ilustrasyon ni Jesus? (Kitaa an  kahon.)

⁶ Hini ngan ha masunod nga artikulo, aton uusisahon an pito nga ilustrasyon nga gin-gamit ni Jesus. Samtang ginbubuhat naton ini, babatunon naton an masunod nga mga pakiana: Ano an kahulogan han ilustrasyon? (Nabulig ini ha aton basi magkaada kita kahibaro.) Kay ano nga gin-gamit ni Jesus ini nga ilustrasyon? (Nagriresulta ini ha pagsabot.) Paonan-o naton magagamit ini nga impormasyon ha pagbulig ha aton kalugaringon pati ha iba? (Kinaadman ini.) Ano an igintututdo hini ha aton mahitungod kan Jehova ngan kan Jesus?

7. Ano an kahulogan han ilustrasyon mahitungod han liso han mustasa?

⁷ Basaha an Mateo 13:31, 32. Ano an kahulogan han ilustrasyon ni Jesus mahitungod han liso han mustasa? An liso nagsisimbolo ha mensahe han Ginhadian nga aton iginsasangyaw ngan ha Kristiano nga kongregasyon. Pariho ha liso han mustasa nga amo “an gigutiayi ha ngatanan nga liso,” gutiay gud la an Kristiano nga kongregasyon han nagtikang ito han 33 C.E. Kondi paglabay hin pipira ka dekada, madagmit ito nga nag-uswag tungod han pagsangyaw nga buruhaton. Nag-uswag ito labaw pa han ginlalaoman. (Col. 1:23) Mapulsanon ini nga pag-uswag o pagtubo tungod kay hi Jesus nagsiring nga “an katamsihan nakakahapon ngan nakakasirong ha mga sanga hito.” Ini nga  katamsihan nagsisimbolo ha mga tawo nga may matadong nga kasingkasing nga nakabiling hin espirituwal nga pagkaon, sirongan, ngan arayopan ha sulod han Kristiano nga kongregasyon.—Itanding an Esekiel 17:23.

8. Kay ano nga gin-gamit ni Jesus an ilustrasyon mahitungod han liso han mustasa?

⁸ Kay ano nga gin-gamit ni Jesus ini nga ilustrasyon? Gin-gamit niya an urusahon nga pagtubo han liso han mustasa ha pag-ilustrar han nahihimo han Ginhadian han Dios ha pagpauswag, pagpanalipod, ngan ha paglampos ha ngatanan nga ulang. Tikang han 1914, makatirigamnan gud an pag-uswag han nakikita nga bahin han organisasyon han Dios! (Isa. 60:22) Adton nakikig-upod hini nga organisasyon nagpapahimulos hin espirituwal nga panalipod. (Prob. 2:7; Isa. 32:1, 2) Dugang pa, waray pagkontra nga makakapaundang ha pag-uswag han kongregasyon.—Isa. 54:17.

9. (a) Ano an leksyon nga aton hibabaroan ha ilustrasyon mahitungod han liso han mustasa? (b) Ano an igintututdo hini ha aton mahitungod kan Jehova ngan kan Jesus?

⁹ Ano an aton hibabaroan ha ilustrasyon mahitungod han liso han mustasa? Bangin nag-uukoy kita ha lugar nga gutiay la an Saksi o diri dayon naton nakikita an mga resulta han aton pagsangyaw nga buruhaton. Kondi an paghinumdom nga malalamposan han Ginhadian an ngatanan nga ulang magpaparig-on ha aton nga magpadayon. Pananglitan, han umabot ha India hi Bugto Edwin Skinner han 1926, gutiay la an Saksi didto. Ha tinikangan, makuri gud an buruhaton tungod kay mahinay an pag-uswag. Kondi padayon hiya nga nagsangyaw ngan nakita niya kon paonan-o nalamposan han mensahe han Ginhadian an dagku nga ulang. Yana, sobra 37,000 na an Saksi ha India, ngan sobra 108,000 an tinambong ha Memoryal han 2013. Tagda an usa pa nga ehemplo. Ha amo gihapon nga tuig han pag-abot ha India ni Bugto Skinner, gintitikangan pa la an buruhaton ha Zambia. Yana, sobra 170,000 na an magwarali didto, ngan 763,915 an tinambong ha Memoryal han 2013. Karuyag sidngon, 1 ha kada 18 nga umurukoy ha Zambia an tinambong hito. Urusahon gud ini nga pag-uswag!

10. Ano an kahulogan han ilustrasyon mahitungod han libadura?

¹⁰ Basaha an Mateo 13:33. Ano an kahulogan  han ilustrasyon mahitungod han libadura? Ini nga ilustrasyon nagtutudlok liwat ha mensahe han Ginhadian ngan kon paonan-o ito nakakagbag-o han kinabuhi han mga tawo. “An bug-os nga minasa” han harina nagsisimbolo ha ngatanan nga nasud, ngan an proseso han pagtubo nagsisimbolo ha pagsarang han mensahe han Ginhadian pinaagi han pagsangyaw. An pagtubo han liso han mustasa matin-aw nga nakikita, kondi an pagsarang han libadura diri dayon nakikita. Nalabay anay an pipira ka panahon antes makita an epekto hito.

11. Kay ano nga gin-gamit ni Jesus an ilustrasyon mahitungod han libadura?

¹¹ Kay ano nga gin-gamit ni Jesus ini nga ilustrasyon? Iginpakita ni Jesus nga an mensahe han Ginhadian makakaabot ha “pinakahirayo nga lugar ha tuna” ngan makakagbag-o ha kinabuhi han damu nga tawo. (Buh. 1:8) Kondi ini nga mga pagbag-o bangin diri dayon nakikita. Pero sigurado nga may pagbag-o—diri la ha kadamu han nakarawat han mensahe kondi pati ha personalidad hito nga mga tawo.—Roma 12:2; Efe. 4:22, 23.

12, 13. Paghatag hin mga ehemplo kon paonan-o nag-uswag an pagsangyaw han Ginhadian sugad la han iginhulagway ha ilustrasyon mahitungod han libadura.

¹² Bangin lumabay anay an mga tuig antes makita an epekto han pagsangyaw nga buruhaton. Pananglitan hira Franz ngan Margit, nga nag-aalagad yana ha iba nga sanga opisina, nag-alagad ha sanga nga opisina ha Brazil han 1982. Nagsangyaw hira ha usa nga gutiay nga bungto. Natikangan nira hin pag-aram ha Biblia an usa nga nanay ngan an upat nga anak hito. An suhag nga lalaki, nga 12 anyos pa la hito nga panahon, awdanon hinduro salit kasagaran nga natago ito antes han pag-aram. Tungod kay nabag-o an toka han mag-asawa, waray na nira maipadayon an pag-aram. Paglabay hin 25 ka tuig, nakabisita hira utro hito nga bungto. Hunahunaa la an ira kalipay han nakita nira an usa nga kongregasyon nga 69 an magwarali, 13 hini an regular payunir, ngan nagkakatirok ito ha bag-o nga Kingdom Hall! Kumusta man an awdanon nga bata? Hiya na an koordinetor han lawas han mga tigurang hito nga kongregasyon! Pariho han libadura ha ilustrasyon ni Jesus, tumubo an mensahe han Ginhadian ngan nakagbag-o han kinabuhi han damu.

¹³ An nahihimo han mensahe han Ginhadian ha pagbag-o han kinabuhi han mga tawo nakikita bisan ha mga nasud nga igindidiri an pagsangyaw nga buruhaton. Makuri hibaroan kon mationan-o kahirayo nakakaabot an mensahe dida hito nga mga nasud, ngan agsob kita mahipausa han mga resulta han buruhaton. Tagda pananglitan ha Cuba. An mensahe han Ginhadian nakaabot didto han 1910, ngan binisita didto hi Bugto Russell han 1913. Ha tinikangan, mahinay an pag-uswag. Pero kumusta naman yana an Cuba? May-ada na ito sobra 96,000 nga magwarali han maopay nga sumat, ngan 229,726 an tinambong ha Memoryal han 2013—karuyag sidngon, 1 ha kada 48 nga umurukoy hito an tinambong. Bisan ha mga nasud nga diri igindidiri an aton buruhaton, an mensahe han Ginhadian bangin nakakaabot ha mga lugar nga ginhuhunahuna han lokal nga mga Saksi nga diri nasasangyawan. *—Ekles. 8:7; 11:5.

14, 15. (a) Paonan-o kita personal nga nagpapahimulos tikang ha leksyon han ilustrasyon mahitungod han libadura? (b) Ano an igintututdo hini ha aton mahitungod kan Jehova ngan kan Jesus?

¹⁴ Paonan-o kita magpapahimulos tikang ha ilustrasyon ni Jesus mahitungod han libadura? Kon ginpapamalandong naton an kahulogan han ilustrasyon ni Jesus, masasantop naton nga diri kita sadang mabaraka hinduro kon  paonan-o makakaabot an mensahe han Ginhadian ha minilyon nga waray pa makabati hito. Kontrolado ni Jehova an mga butang. Kondi ano an aton buruhaton? An Biblia nabaton: “Ha aga pagsabwag han imo liso, ngan ha kulop ayaw hawiri an imo kamot; kay diri ka maaram kon hain in mauswag, kon ini ba o adto, o kon hira ba nga duha magpapariho kamaopay.” (Ekles. 11:6) Syempre, diri gud naton sadang hingalimtan nga ig-ampo an kalamposan han pagsangyaw nga buruhaton, labi na ha mga nasud nga igindidiri ito.—Efe. 6:18-20.

¹⁵ Diri liwat kita sadang manluya kon diri dayon naton nakikita an mga resulta han aton pagsangyaw. Diri gud naton sadang tamayon an “adlaw han gutiay nga mga butang.” (Sak. 4:10) An mga resulta bangin mas daku ngan mas makatirigamnan pa gud kay han aton ginlalaoman!—Sal. 40:5; Sak. 4:7.

16. Ano an kahulogan han ilustrasyon mahitungod han nagbibiyahe nga negosyante ngan han nakatago nga bahandi?

¹⁶ Basaha an Mateo 13:44-46. Ano an kahulogan han ilustrasyon mahitungod han nagbibiyahe nga negosyante ngan han nakatago nga bahandi? Ha panahon ni Jesus, may mga negosyante nga nagbibiyahe hin hirayo hinduro ha pagpinamiling hin mag-opay gud nga perlas. An negosyante hini nga ilustrasyon nagrirepresentar ha mga tawo nga may matadong nga kasingkasing nga nagpipinamiling gud han kamatuoran basi matagbaw an ira espirituwal nga panginahanglan. An “maopay nga klase hin perlas” nagsisimbolo ha presyoso nga kamatuoran han Ginhadian. Tungod kay an negosyante maaram han bili hito nga perlas, andam hiya nga ibaligya “dayon” an ngatanan niya nga panag-iya basi mapalit ito. Gin-unabi liwat ni Jesus an usa nga tawo nga nagtatrabaho ha uma nga nakabiling hin “nakatago” nga bahandi. Diri pariho han negosyante, ini nga tawo waray magpinamiling hin bahandi. Kondi andam liwat hiya nga ibaligya an iya “mga panag-iya” basi magkaada hito.

17. Kay ano nga gin-gamit ni Jesus an ilustrasyon mahitungod han nagbibiyahe nga negosyante ngan han nakatago nga bahandi?

¹⁷ Kay ano nga gin-gamit ni Jesus inin duha nga ilustrasyon? Iginpakita niya nga an kamatuoran nabibilngan ha iba-iba nga paagi. An pipira nagsakripisyo gud basi mabilngan ito. An iba nakabiling hito bisan kon waray hira mamiling—bangin may nagsangyaw hito ha ira. Anoman an kahimtang, an tagsa ha ira maaram han bili han ira nabilngan ngan andam gud hira magsakripisyo basi magkaada hito.

18. (a) Paonan-o kita magpapahimulos tikang hinin duha nga ilustrasyon? (b) Ano an igintututdo hini ha aton mahitungod kan Jehova ngan kan Jesus?

¹⁸ Paonan-o kita magpapahimulos tikang hinin duha nga ilustrasyon? (Mat. 6:19-21) Pakianhi an imo kalugaringon: ‘Pariho ba an akon disposisyon ha disposisyon hinin duha nga lalaki? Ginpapabilhan ko ba an kamatuoran sugad hin bahandi? Andam ba ako magsakripisyo basi magkaada hito, o gintutugotan ko an iba nga butang, sugad han mga kabaraka ha kinabuhi nga makaulang ha akon ha pagkaada hito?’ (Mat. 6:22-24, 33; Luc. 5:27, 28; Fil. 3:8) Kon hinigugma gud naton an kamatuoran, bubuhaton naton an ngatanan basi magin prayoridad ito ha aton kinabuhi.

19. Ano an aton hihisgotan ha sunod nga artikulo?

¹⁹ Hinaot ipakita naton nga namamati kita ngan nasasabtan gud naton an kahulogan hini nga mga ilustrasyon mahitungod han Ginhadian. Hinumdumi, diri igo an basta paghibaro la han kahulogan hito. Kinahanglan iaplikar naton an aton hinbaroan. Ha sunod nga artikulo, hihisgotan naton an tulo pa nga ilustrasyon ngan kitaon naton kon ano nga mga leksyon an aton hibabaroan tikang hito.