1, 2. Ifa usun Jesus a apéchékkúla néún kewe chón káé lón ewe rán a manawsefál?

 LÓN ena ránin Jesus a manawsefál, rúúemén néún kewe chón káé ra fetál ngeni ewe sóópw órun fisu mwail towauan seni Jerusalem. Nge iir rese silei pwe Jesus a fen manawsefál, ina popun ra letipechou ren met a kerán fis. Iwe, Jesus a pwá ngeniir me etiir le fetál. Iwe a oururuur. Ifa usun? “Jesus a awewe ngeniir met a mak lon ekewe Puk mi Pin usun püsin i. A popuetä seni ekewe puken Moses tori ekewe puken soufos meinisin.” (Luk. 24:13-15, 27) Iwe, pokiten ena, leluker a ngetenget usun eú ekkei ren án Jesus “afata” ngeniir ekkewe wokisin lón án Kot we Kapas.​—Luk. 24:32.

² Lón pwal ena chék pwinin, ekkewe rúúemén chón káé ra liwiniti Jerusalem. Lupwen ra kúna ekkewe aposel, ra apwóróusa ngeniir met a fis. Lupwen ra chúen fóffós, Jesus a pwá ngeniir. Iwe nge, ekkewe aposel ra niwokkus me ra tipemwaramwar ika pwe i wesewesen Jesus. Ifa usun Jesus a apéchékkúler? Ewe Paipel a apasa: “A suki letiper, pwe repwe tongeni weweiti masouen ekewe Toropwe mi Pin.”​—Luk. 24:45.

3. Met sia tongeni letipengaw ren lón ach angangen afalafal? Met a tongeni álisikich le eáni ekiek pwúng usun ach ei angang?

³ Eli fán ekkóch sipwe meefi letipechou usun chék ekkena chón káé. Eli sia letipengaw pún inaamwo ika sia fókkun  achocho lón ach angang ngeni Kot nge ese kon uwaaéch ach angang. (1 Kor. 15:58) Are usun itá néúch kewe chón káé rese feffeitá. Ekkewe ekkóch sia kan ákkálisiir ra fen mwo nge likitaló Jiowa. Met sia tongeni féri pwe sipwe eáni ekiek pwúng lón ach angangen afalafal? Eú mettóch a tongeni álisikich, ina ach weweéchúti weween án Jesus kewe kapas áwewe lón Paipel. Sipwe káé úlúngát me leir me ppii ekkewe lesen sia tongeni káé seniir.

4. Met weween án Jesus we kapas áwewe usun ewe chón amwora pwikil mi méúr?

⁴ Álleani Markus 4:26-29. Met weween án Jesus kapas áwewe usun ewe chón amwora pwikil mi méúr? Ewe mwán lón ewe kapas áwewe a liosuetá ekkewe chón afalafala ewe Mwú. Nge ewe pwikil, ina ewe pwóróus usun ewe Mwú ra afalafala ngeni ekkewe mi letip wenechar. Ewe chón amwora pwikil a kan féri minne aramas ra kan féfféri, a “möür lepwin o pwäta lerän.” Máárin ewe irá epwe fis ekis me ekis, seni ewe atun an a kerán ffót tori fansoun rás. Lón ekkena fansoun, “ewe pwükil a kinoputä o mämäritä.” Máárin a “püsin” fis ekis me ekis. Pwal ina chék usun, án emén mááritá lón an riri ngeni Kot a fis ekis me ekis. Lupwen emén a feffeitá tori an a mochen angang ngeni Kot, iwe a usun itá a uwa ren an a fangóló manawan ngeni Jiowa me papatais.

5. Met popun Jesus a eáni ewe kapas áwewe usun ewe chón amwora pwikil mi méúr?

⁵ Pwata Jesus a eáni ei kapas áwewe? Jesus a álisikich le mirititi pwe Jiowa, i a wisen ámááraatá ewe enlet lón letipen “chókkewe mi fich ngeni manaw esemuch.” (Föf. 13:48, NW; 1 Kor. 3:7) Sia fótuki, achéchénú nge sise tongeni nemeni mááritáán ewe enlet, sise pwal tongeni eriáni. Pwal ina chék usun ewe chón amwora lón ewe kapas áwewe, ese silei ifa usun ewe pwikil a mááritá. Atun sia féri ach angang iteiten rán, fán chómmóng sise fen esilla mááritáán pwikilin ewe Mwú lón letipen ewe emén, nge ló ló ló epwe tongeni uwa. Iwe ewe mineféén chón káé epwe fiti ewe angangen rás, me sipwe feiéch seni an álillis.​—Joh. 4:36-38.

6. Met sipwe mirititi ren feffeitáán emén chón káé lón pekin lúkú?

⁶ Met sia káé seni ei kapas áwewe? Akkomw, mi lamot sipwe mirititi pwe sise tongeni nemeni an ewe chón káé feffeitá lón ewe enlet. Ach tipetekison epwe álisikich le túmúnú ach sisap eriáni emén chón káé pwe epwe papatais. Kich meinisin sia tongeni álisi ewe emén, nge fán tipetekison sipwe mirititi pwe epwe pwisin filien ewe chón káé ika epwe fangóló manawan ngeni Kot. An féri ena kefil epwe itá pokiten letipan a chúng ren an enletin tongei Kot. Ina chék ewe popun Kot epwe tongeni pwapwaiti án eménna fangóló manawan ngeni.​—Kölf. 51:12; 54:6; 110:3.

7, 8. (a) Ikkefa ekkewe pwal ekkóch lesen sia káé seni án Jesus we kapas áwewe usun ewe chón amwora pwikil mi méúr? Áweweei. (b) Met ei mettóch a áiti ngenikich usun Jiowa me Jesus?

⁷ Oruuan, ach weweiti ewe lesen lón ei kapas áwewe epwe álisikich ach sisap letipengaw lupwen sise kúna uwaan ach angang me lepoputáán. Mi lamot sipwe mosonottam. (Jas. 5:7, 8) Ika sia féri úkúkún ach tufich le álisi ewe chón káé nge ese uwa, sipwe mirititi pwe esap weween nge sise tuppwél ngeni Kot. Jiowa a mut ngeni ewe pwikilin enlet an epwe máár lón chék ewe sókkun letip mi tipetekison, ewe mi tipemecheresin féri ekkesiwil. (Mat. 13:23) Ina minne, mi lamot ach sisap alónga lipwákéchúch lón ewe angangen afalafal ren chék uwaan ach angang. Nge me ren Jiowa, sópwéchún ach angangen  afalafal ese lóngólóng wóón án aramas etiwakich are rese. Nge Jiowa a aúcheani ach tuppwél le angang ngeni ese lifilifil minne a fis lón ach angang.​—Álleani Lukas 10:17-20; 1 Korint 3:8.

⁸ Aúlúngátin, fán chómmóng sise tongeni kúna ekkewe ekkesiwil a fiffis lón letipen aramas. Áwewe chék, eú pean pwúpwúlú, néún emén misineri chón káé, ra ereni pwe ra mochen repwe wiliti chón afalafal esaamwo papatais. Ewe misineri a áchema ngeniir pwe ren an epwe fich ngeniir ena wis mi lamot repwe úkútiw le ún suupwa. Nge ewe misineri a máirú lupwen ra ereni pwe a fen fitu maram ar rese chúen ún. Pwata ra úkútiw? Ra mirititi pwe Jiowa a tongeni kúna ar ún suupwa, iwe itá met lamoten ar aopa seni aramas nge Jiowa a oput likótuputup. Ina minne, letiper a chúng le féri eú kefil, ika repwe chék ún mwen mesen ewe misineri are unusen péútaaló. Ar tong ngeni Jiowa mi kerán mááritá a álisiir le féri eú kefil mi pwúng. Ra feffeitá lón ar lúkú inaamwo ika ewe misineri ese tepereni pwe a fen fis ena siwil.

9. Met weween ewe kapas áwewe usun ewe chew?

⁹ Álleani Mateus 13:47-50. Met weween án Jesus kapas áwewe usun ewe chew? Jesus a áweweei pwe ewe angangen afalafala pwóróusen ewe Mwú ngeni aramas a usun chék án chón attau oturatiw eú watteen chew leset. An ena chew liapeni chómmóng “sokopaten ik” ese lifilifil, a usun chék ach angangen afalafal lukeato chómmóng sókkópaten aramas. (Ais. 60:5) A pwúng ena ren chómmóngun ekkewe aramas ra fiti ach kewe mwichelap me Áchechchem iteiten ier. Ekkóch ekkena iik lón kapas áwewe, iir mi “mürina” me ra fiti ewe mwichefelin Chón Kraist. Nge ekkóch iik, iir mi “ngau,” Jiowa ese etiwer.

10. Met popun Jesus a eáni ewe kapas áwewe usun ewe chew?

¹⁰ Pwata Jesus a eáni ei kapas áwewe? Ewe angangen káimufesenin ekkewe iik lón kapas áwewe ese weneiti ewe sáingolóón kapwúng atun ewe riáfféú mi lapalap. Nge a menlapei met epwe fis lón ránin le sópwólóón ei ótót mi ngaw. Jesus a pwáraatá pwe esap meinisin mi efich ewe enlet epwe filatá le angang ngeni Jiowa. Chómmóng ra fen fiffitikich lón ach kewe mwich. Ekkóch ra pwapwa le káé rech ewe Paipel nge rese mochen fangóló manawer ngeni Kot. (1 King 18:21) Nge mei pwal wor ekkewe ekkóch rese chúen fiffiti ewe mwichefelin Chón Kraist. Ekkóch ekkewe sáráfé ra mááritá lón ewe enlet fán túmúnúen semer kewe me iner Chón Kraist nge rese pwisin ámááraatá ar tongei Jiowa. Ese lifilifil nónnómun ekkewe aramas nge Jesus a menlapei pwe emén me emén epwe pwisin filatá. Chókkewe ra filiéch, me ren Jiowa iir ‘wöün’ lein “mwün fanüfan meinisin.”​—Ak. 2:7.

11, 12. (a) Ifa usun ewe kapas áwewe usun ewe chew a álisikich? (b) Met ei mettóch a áiti ngenikich usun Jiowa me Jesus?

¹¹ Ifa usun sia tongeni kúna feiéch seni ewe kapas áwewe usun ewe chew? Ach weweiti ewe lesen lón ei kapas áwewe epwe álisikich ach sisap kon letipengaw are lichippúng ika emén chón káé are néúch ese mochen fel ngeni Jiowa. A tongeni fis ena inaamwo ika sia fókkun achocho. Án emén tipeeú ngeni le káé ewe Paipel are án emén mááritá lón ewe enlet esap weween pwe ena emén epwele ámááraatá ewe sókkun riri mi péchékkúl ngeni Jiowa. Chókkewe rese mochen onómuur fán nemenien Jiowa resap tongeni emén néún.

¹² A itá wewe ngeni pwe chókkewe ra  likitaló ewe enlet esap chúen mumu ngeniir ar repwe liwiniti ewe mwichefel? Are ika emén a filatá an esap fangóló manawan ngeni Jiowa, weween i epwe usun chék ewe iik mi “ngau” feilfeiló? Aapw. Mi chúen wor fansoun a suuk ngeni chókkana me mwen ewe riáfféú mi lapalap. A usun itá Jiowa a ké ngeniir: “Oupwe liwinto rei, pwe ngang üpwe liwin ngenikemi.” (Mal. 3:7) Jesus a menlapei ena mettóch lón eú kapas áwewe usun ewe néún mwálecheló i a pwal eáni.​—Álleani Lukas 15:11-32.

13. Met weween ewe kapas áwewe usun ewe néún mwálecheló?

¹³ Met weween án Jesus we kapas áwewe usun ewe néún mwálecheló? Ewe sam mi tong lón ei kapas áwewe a liosuetá Semach we mi tong lón láng, Jiowa. Ewe nau mi ereni seman we pwe epwe angei álemwirian nge mwirin a asolapaaló a liosuetá chókkewe ra towauoló seni ewe mwichefel. Ar ló seni Kot, a usun chék ar feiló lón “eu fanü mi toau,” án Satan ei ótót, ewe mi imuló seni Jiowa. (Ef. 4:18; Kol. 1:21) Mwirin och fansoun, ekkóch leir ra miritiló me filatá ar repwe liwiniti Jiowa, nge a lamot achocho. Ra tipetekison me enletin niamamesini minne ra féri, ina minne Jiowa a omusaaló tipisiir me a pwapwa le etiwasefáliir.​—Ais. 44:22; 1 Pet. 2:25.

14. Pwata Jesus a eáni ewe kapas áwewe usun ewe néún mwálecheló?

¹⁴ Met popun Jesus a eáni ei kapas áwewe? Jesus a pwáraatá pwe Jiowa a mochen chókkewe mi mwálecheló repwe liwiniti. Ewe sam a chék ápilúkúlúk pwe néún we epwe liwiniti. Lupwen ewe sam a kúna néún we an a fetáleto, inaamwo ika “a chüen toau seni” nge a mwittir ssá ngeni pwe epwe etiwa. Ei kapas áwewe itá epwe fókkun achchúngú chókkewe mi likitaló ewe enlet ar repwe mwittir liwiniti Jiowa. Neman a kon apwangapwang ar riri ngeni Jiowa, me epwe áweires me ássáw ar liwiniti. Nge epwe fókkun éch ar liwin pún pwal mwo nge chón lón láng repwe chengel.​—Luk. 15:7.

15, 16. (a) Ikkefa ekkewe lesen sia káé seni án Jesus kapas áwewe usun ewe néún mwálecheló? Áweweei. (b) Met ei mettóch a áiti ngenikich usun Jiowa me Jesus?

¹⁵ Ifa usun ei kapas áwewe usun ewe néún mwálecheló epwe álisikich? Mi lamot sipwe áppirú án Jiowa leenien áppirú. Sisap usun emén mi “kon öch,” pwe sisap fókkun mochen etiwasefáli emén chón tipis  mi aier. Ei mettóch epwe tongeni atai ach ririéch ngeni Kot. (SalAf. 7:16, Kapasen God) Sia tongeni káé pwal eú lesen seni. Mi lamot sipwe eáni ewe ekiek pwe emén mi towau seni ewe mwichefel, i “eman sip mi mwälechela,” nge a chúen tongeni liwinsefál. (Kölf. 119:176) Ika sia chuuri emén mi fen riki seni ewe mwichefel, nge esap i emén mi katowu, itá sipwe achocho le álisi i fán tong pwe epwe liwin? Sipwe itá mwittir esile ngeni ekkewe mwán mi ásimaw pwe repwe tongeni awora ewe álillis ngeni ekkewe mi mwálecheló usun minne mi fich ngeniir? Sipwe féri ena ika sia weweéchúti me apwénúetá ewe lesen sia káé seni án Jesus we kapas áwewe usun ewe néún mwálecheló.

¹⁶ Nengeni alon chókkewe ra liwiniti Jiowa, ra meefi kilisou ren án Jiowa úméúméch me tong, me pwal an ewe mwichefel álillis. Iei alon emén mwán mi fen katowu úkúkún 25 ier: “Seni ewe fansoun ua tolongsefál, a chék lallapóló ai pwapwa ren ekkewe fansoun ua ‘küna pöchökül’ seni Jiowa. (Föf. 3:19, 20) Meinisin ra chék álilliséch me tongeei, iei a wor ai famili lón pekin lúkú mi fókkun múrinné.” Iei met emén fépwúl mi fen likitaló Jiowa úkúkún nimu ier a erá usun an liwin: “Use tongeni áweweei meefiei ren ar ra fókkun pwáraatá ngeniei ewe sókkun tong Jesus a fós usun. Ese wor aúkúkún aúchean án emén epwe chóni án Jiowa mwicheich!”

17, 18. (a) Ikkefa ekkewe lesen mi álilliséch sia káé seni ekkewe úlúngát kapas áwewe sia fen pwóróus wóón? (b) Sia tipeppós le féri met?

¹⁷ Ikkefa ekkewe lesen mi álilliséch sia káé seni ekkena úlúngát kapas áwewe? Áeúin, mi lamot sipwe mirititi pwe sise tongeni nemeni feffeitáán emén lón pekin lúkú, sia chék likiti ena ngeni Jiowa. Oruuan, sisap tongeni ekieki pwe meinisin chókkewe ra chiechi ngenikich lón ewe enlet me káé ewe Paipel repwe mochen angang ngeni Jiowa. Sáingolóón, inaamwo ika ekkóch ra likitaló ewe enlet me péútaaló Jiowa, sisap fangetá lón ach ápilúkúlúk pwe repwe tongeni liwin. Nge ika ra liwin, sipwe etiwer lón napanapen án Jiowa tongeer.

¹⁸ Amwo kich meinisin sipwe akkachocho le kútta sile, weweéch me tipachem. Atun sia álleani án Jesus kewe kapas áwewe, pwisin eisinuk ika met weween, met popun ra mak lón Paipel, ifa usun sipwe tongeni apwénúetá ekkewe lesen me met sia tongeni káé usun Jiowa me Jesus. Ach féri ena epwe pwáraatá pwe kich sia weweiti weween alon Jesus kewe.