1, 2. ¿Kasa naainjaka Jesuu süchikijee süsoʼiraain naaʼin süpüla nütütüleʼerüin naaʼin na nikirajüinkana?

OʼUNÜSHII piamashii nikirajüin Jesuu suluʼumüin wanee pueulo pejeka sünain Jerusalén, alatüsü suulia 11 kiloometüro suʼunia yalajee Jerusalénjee. Mojushaatasü maʼin naaʼin naya anoujüshiikana sutuma ouktüin Jesuu; nnojotpajaʼa natüjaain aaʼu süsoʼiraaitpain naaʼin Jesuu. Shiasaʼa nürütkaakalaka Jesuu nanainmüin süpüla waraittaa namaa. «Nüküjakalaka namüin tü ashajünakat nüchiki suluʼu tü karaloukta nüchikimaajatkat Maleiwa, oʼttüin sünainjee tü ashajuushikat nütüma Moisés je suluʼupünaa tü ashajuushikat natüma na nünüikimaajanakana Maleiwa.» (Luc. 24:13-15, 27.) Sutuma nikirajüin naya Jesuu sünain tü Nüchikimaajatkat Maleiwa, talatashaanasü naaʼin naya anoujüshiikana (Luc. 24:32).

² Aleʼejaatüjülia naya wayuukana Jerusalénmüin soʼuleʼeya aikat tia. Naküjüinjeseʼe namüin na aluwataaushiikana tü alatakat namüin wopuluʼu. Shiasaʼa nnojoluiwaʼaya kettaain nanüiki, eeʼiyataʼalaa müshi Jesuu yaa pasanain nanain. Shiyoʼujaakalaka maʼin naaʼin nayakana. Epeinjaayaashi Jesuu naaʼinruʼu. Shiasaʼa süpüla nütütüleʼerüin Jesuu naaʼin na nikirajüinkana, nükaaliinjüin naya «sünain ayaawataa saaʼu tü ashajünakat paala suluʼu tü karaloukta nüchikimaajatkat Maleiwa» (Luc. 24:45).

3. (1) ¿Kasa eeka süpüla mojuin atuma waaʼin sünain aʼyatawaa nümüin Jeʼwaa? (2) ¿Kasakaʼa waaʼinrüinjatüin süpüla nnojoluinjatüin mojuin waaʼin sutuma tia?

³ Eesüjaʼa mojuirüle waaʼin maʼaka mojuin naaʼin na nikirajüinkana  Jesuu. Eeshii waʼyataale maʼin nümüin Jeʼwaa sümaa nnojoluin weʼrayaain kojutüin sümüin wayuu tü pütchi waküjakat namüin (1 Cor. 15:58). Eeshii nnojoliire nanoukteʼeramaatüin nakuwaʼipa na wayuu wekirajakana sünain tü Wiwüliakat otta eeshii eekai nayouktüin Jeʼwaa. ¿Kasakaʼa waaʼinrüinjatüin süpüla nnojoluinjatüin mojuin waaʼin sutuma tia? Wanee kasa waaʼinrajatka shia wayaawatüin saaʼu tü nikirajeekalü anain Jesuu sükajee tü kasa eʼnnaajünakat sainküin mma. Wekirajaa sünain apünüinsü kasa nikirajeekalü anain Jesuu. ¿Kasa apüla? Süpüla watüjaain saaʼu kasain shikirajüin anain waya tia.

4. ¿Jamaluʼutche eera tü nümakat Jesuu nüchiki wanee apünajüi atunkakai?

⁴ (Paashajeʼera Marcos 4:26-29.) ¿Jamaluʼutche eera tü nümakat Jesuu nüchiki wanee apünajüi atunkakai? Chi apünajüi nüküjakai achiki Jesuu, naya napüshuaʼa na aküjakana pütchi süchiki Nuluwataaya Maleiwa. «Tü nüpünajüinkat» chia wayuukai, shia tü pütchi süchikikat Nuluwataaya Maleiwa, tü aküjünakat namüin na wayuu anamiakana. Chia apünajüikai, atunküshi saʼwai jee atamaashi watta maalü. Müsia joo tü nüpünajüinkat nnojotsü miyoʼumaatüin shia, kakalia süpüla miyoʼuinjatüin shia otta süpüla sütpajünüinjatüin tü süchonkat. Osotüsia neʼe nujuuna tü nüpünajüinkat jee miyoʼusü shiaʼaya sümaa nnojoluin nütüjaain saaʼu jamakuwaʼipalüin. Müsia neʼe sukuwaʼipa nunoula wanee wayuu, nnojoishi nia kanoulamaatüin, akooʼomüinraasü nunoula shiʼipaʼaya nikirajaain sünain tü Wiwüliakat. Shiasaʼa kooʼomüinpa nunoula, aʼyataweejaasü naaʼin nümüin Maleiwa. Sutuma tia, naapüin naaʼin nümüin Jeʼwaa jee woutiisashi nia.

5. ¿Jamüshi nikirajaka Jesuu sükajee nukuwaʼipa wanee apünajüi atunkakai?

⁵ ¿Jamüshi nikirajaka Jesuu sükajee nukuwaʼipa wanee apünajüi atunkakai? Süpülajatü wayaawatüin saaʼu niain Jeʼwaa kooʼomüinka atuma nanoula na wayuu kojutükana amüin tü shiimainkat (Aluw. 13:48; 1 Cor. 3:7, TNM). Wanaa sümaa waküjüin tü pütchi anasükat sümüin wayuu jee wekirajüin naya, müshii aka waya naaʼin chi wayuu apünajüikai. Jamüshijaʼa wanee apünajüi, nüpünajüin neʼe tü waüyeekat, nnojotpejeʼe nütüjaain aaʼu jamüin sukuwaʼipa süpüla miyoʼuinjatüin shia. Müshiʼiya wayakana, waküjüin tü pütchi anasükat namüin na wayuukana sümaa wekirajüin naya, nnojotpejeʼe watüjaain saaʼu jamüin sukuwaʼipa süpüla kooʼomüinjatüin nanoula. Ainküsü neʼe waaʼin nüküjapa wamüin wanee wekirajüin niʼyataweein nümüin Jeʼwaa wanaa wamaa (Juan 4:36-38).

6. ¿Jara kooʼomüinka atuma nunoula wanee wayuu?

⁶ ¿Kasa shikirajaka anain waya tü nümakat Jesuu nüchiki wanee apünajüi atunkakai? Nia Jeʼwaa akooʼomüinraaka atuma nunoula wanee wekirajüin. Nnojotsü watumasirüin shia. Jülüjüle waaʼin tia, nnojoleerü wapüleeruain naaʼin chi wekirajüinkai süpüla woutiisainjachin nia otta wachajaajeerü sukuwaʼipa süpüla wakaaliinjüin nia. Niapejeʼe neʼe nümüiwaʼa atüjaain saaʼu müleka naapüinjachire naaʼin nümüin Jeʼwaa. Talatüsü maʼin naaʼin Jeʼwaa nümaa wanee wayuu eekai naapüin naaʼin nümüin sutuma alin maʼin nia nüpüla (Sal. 51:12; 54:6; 110:3).

7, 8. (1) ¿Kasa amaa watüjaka sünainjee tü nümakat Jesuu nüchiki wanee apünajüi atunkakai? Püküja süchiki wanee kasa alataka nümüin wanee misioneero. (2) ¿Kasa shikirajaka anain waya tia nüchiki Jeʼwaa otta nüchiki Jesuu?

⁷ Wanee kasa watüjaka sünainjee tü nümakat Jesuu shia nnojoluinjatüin mojuin waaʼin sutuma nnojoluin saapaamaatüin wayuu sümaa tü pütchi anasükat. Nnojoishii waya ashapajaainjanain aaʼin saaʼujee tia (Sant. 5:7, 8). Eesü wachajaale maʼin sukuwaʼipa süpüla wakaaliinjüin wanee wekirajüin süpüla naapaain sümaa tü shiimainkat. Ayatülejeʼe nia sünain nnojoluin naapaain sümaa, nnojotsü mojuinjatüin waaʼin saaliijee tia. Süka jamüin, niain Jeʼwaa kooʼomüinkai atuma nanoula na wayuu nnojoliikana yaletayaain aaʼin otta na wayuu anoukteʼereekana nakuwaʼipa (Mat. 13:23). Nnojoliire wainmain na wekirajüin woutiisakana, «mojusü sukuwaʼipa waʼyataain nümüin Jeʼwaa», nnojoishii müinjanain waya. Süka jamüin, tü kojutükat maʼin nümüin Jeʼwaa shia wachajaale sukuwaʼipa süpüla waküjüin tü pütchikat jaʼitairü  nnojoluin saapaain amaa shia wayuu ( paashajeʼera Lucas 10:17-20 otta 1 Corinto 3:8).

⁸ Eesü nnojorüle wayaawatüin saaʼu müleka nunoukteʼerüle nukuwaʼipa wanee wayuu wekirajüin. Jamüshijaʼa wanee misioneero, nikirajapuʼuin wanee wayuu sümaʼaleʼeya nuʼwayuuse. Soʼu wanee kaʼi, naküjaka nümüin chi misioneerokai sünain keeʼireein naaʼin naküjüliinjanain pütchi sümaa nnojoluin woutiisain naya. Nüküjaka chi wawalakai namüin na nikirajüinkana sünain choʼujaain namüin nooʼulaainjanain suulia akaijaa. Anuuka nanüiki nümüin chi wawalakai: «Alatüirü kojuya kashi süchikijee wooʼulaain suulia akaijaa». Nayaawata aaʼu naya wayuukana nnojoluin süpüla nounjulajüin nuulia Jeʼwaa sünain nakaijüin otta nayaawata aaʼu wattaluʼuin Jeʼwaa noulia na piamakana oʼupünaa. Süpüla nnojoluinjanain piamain oʼupünaa naya nuʼupala chi wawalakai, ooʼulaaleeshiʼiya naya suulia akaijaa. Jee müsia naainjüin tia sutuma alin Jeʼwaa napüla. Akooʼomüinraasü nanoula sümaa nnojoluin nütüjaain saaʼu chi wawalakai jamakuwaʼipalüin tia.

9. ¿Jamaluʼutche eera tü nümakat Jesuu süchiki wanee kusu?

⁹ ( Paashajeʼera Mateo 13:47-50.) ¿Jamaluʼutche eera tü nümakat Jesuu süchiki wanee kusu? Naashin Jesuu, tü aküjaakat pütchi süchiki Nuluwataaya Maleiwa sainküin mma müsü aka saaʼin tü kusu ojutünakat shiroku tü palaakat. Jamüsüjaʼa tü kusukat, kasitsü «jime eekai shikaajünüin ooʼulaka eekai mekaajuuin». Akaʼaya sutuma waküjüin pütchi sümüin wayuu süpüshuaʼa, wainma na wayuu kacheʼejakana sümüin tü pütchikat (Is. 60:5). Weʼrüin tia sünain tü outkajawaa miyoʼu apünüinkat kaʼi jee sünain tü outkajawaakat eere Sotuin Waaʼin Ouktüin Jesuu waaʼu, wainma wayuu oʼunaka sünain tia outkajawaakalüirua. Naʼakajee naya wayuukana, eeshii na aneekünakana sutuma anain nakuwaʼipa maaʼaya aka saaʼin tü jime aneekünakat süka «shikaajünüin». Jee müshiʼiya, eeshii na akatannakana süka müin naya aka saaʼin jime «eekai mekaajuuin». Süka jamüin, mojuin nakuwaʼipa noʼuluʼu Jeʼwaa.

10. ¿Jamüshi nikirajaka Jesuu süchiki wanee kusu?

¹⁰ ¿Jamüshi nikirajaka Jesuu süchiki wanee kusu? Nüküjüin Jesuu sükatajünüin tü jimekalüirua, nnojotpejeʼe shiyaawasein tü alatajatkat suʼunnaa tü müliaa miyoʼusükat, süsalapa saainjala wayuu sümüin. Ekeraajüsü tia maaʼutpünaa, süpülapünaa sajaʼttüin kasa mojusü. Sükajee tü nümakat Jesuu, niiʼiyatüin sünain nnojoleenain naʼyataain nümüin Jeʼwaa napüshuaʼa na wayuu aküjünakana amüin pütchi. Jamüshiijaʼa na wayuu outkajaainnakana wamaa jee ekirajaainnakana wamaa sünain tü Wiwüliakat, watta naalii, akanasaʼa nnojoluin naapeein naaʼin nümüin Jeʼwaa (1 Rey. 18:21). Eetaashii joo na ooʼulaakana suulia oʼunaa sünain tü outkajawaakat. Eeshii na jimaʼalii jee na majayünnüü maaliinkana apüla Jeʼwaa mayaapejeʼe nunoujüin nashi jee nei. Nüküjapajaʼa Jesuu nüneeküinjachin wanee wayuu nümüiwaʼa müleka niʼyataainjachire nümüin Jeʼwaa. Saashin tü Wiwüliakat, kojutüshi maʼin nümüin Jeʼwaa wanee wayuu eekai niʼyataain nümüin (Ageo 2:7; noota).

11, 12. (1) ¿Kasa shikirajaka anain waya tü nümakat Jesuu süchiki wanee kusu? (2) ¿Kasa shikirajaka anain waya tia nüchiki Jeʼwaa otta nüchiki Jesuu?

¹¹ ¿Kasa shikirajaka anain waya tü nümakat Jesuu süchiki wanee kusu? Shikirajüin waya sünain nnojoluinjatüin shapaain maʼin waaʼin jee nnojoluinjatüin mojuin maʼin waaʼin sutuma nnojoluin niʼyataweein nümüin Jeʼwaa wanee wekirajüin jee niale wanee wachon. Soto waaʼin nnojoluin naʼaleewajaamaatüin nümaa Jeʼwaa wanee wayuu eekai nikirajaain sünain tü Wiwüliakat otta eekai nikirajünüin nünain Maleiwa joʼuuiwaʼaya nia. Na wayuu ayouktakana Jeʼwaa süpüla niain aluwataain naaʼu, akatanneena noulia na wayuu suluʼukana tü nupueulosekat Jeʼwaa.

¹² ¿Nnojoleenache ooʼulaanüin naleʼejüin nachikuaʼa suluʼumüin tü nupueulosekat Jeʼwaa na wayuu akatalaakana nuulia? ¿Jama nnojoire naapüin naaʼin wanee wayuu nümüin Jeʼwaa? ¿Müshiche maʼaka saaʼin wanee jime «eekai mekaajuuin» sutuma nnojoluin naapüin naaʼin nümüin Jeʼwaa? Nnojo. Eeyülia süpüla naapüin naaʼin nümüin Jeʼwaa naya wayuukana süka nnojoyülüin  suʼttüin tü müliaa miyoʼusükat. Anuu nünüiki Jeʼwaa namüin: «Jüleʼeja tanainmüin otta shiimainshaata taleʼejeechin jünainmüin» (Mal. 3:7, TNM). Tia, shiaʼaya neʼe tü nikirajeekalü anain Jesuu wanaa sümaa nikirajüin nüchiki wanee emüliee maaʼinsai ( paashajeʼera Lucas 15:11-32).

13. ¿Jamaluʼutche eera tü nümakat Jesuu nüchiki wanee emüliee maaʼinsai?

¹³ ¿Jamaluʼutche eera tü nümakat Jesuu nüchiki wanee emüliee maaʼinsai? Chi nüshikai chi emüliee maaʼinsaikai, niyaakuayaashi Jeʼwaa, chi washi aipüraikai. Chi emüliee maaʼinsaikai, naya na wayuu akatalaakana noulia na wawalayuukana. Müshii noʼunakai aaʼin «suluʼumüin wane mma wattamüin» saaʼu naʼakainnapain naya na wayuu wattaluʼukana nuulia Jeʼwaa (Éf. 4:18; Col. 1:21). Eepejeʼe na ayaawajaakana suulia naainjala sümaa naleʼejüin nachikuaʼa suluʼumüin tü nupueulosekat Jeʼwaa. Naainjüin tia, mayaapejeʼe kapüleein shia namüin. Motusü naaʼin Jeʼwaa naainjala na aleʼejakana nachikuaʼa nünainmüin. Süka jamüin, nnojotsü yaletayaain naaʼin naya wayuukana otta ayaawajaashii naya suulia naainjala (Is. 44:22; 1 Ped. 2:25).

14. ¿Jamüshi nikirajaka Jesuu nüchiki wanee emüliee maaʼinsai?

¹⁴ ¿Jamüshi nikirajaka Jesuu nüchiki wanee emüliee maaʼinsai? Süpülajatü watüjaain saaʼu keeʼireein naaʼin Jeʼwaa naleʼejüin nachikuaʼa na wayuu akatalaakana nuulia. Nüshi chi emüliee maaʼinsaikai, naʼatapajüin waneepia sünain nüleʼejüinjachin nüchikuaʼa chi nüchonkai. Shiasaʼa niʼraiwaʼaya chi nüchonkai kaʼyatajee, awataashi nia nüpanapajee süpüla nüsaküin nia sümaa talatashaanain naaʼin nümaa. Tia alatakat, sütütüleʼerüin naaʼin na akatalaakana nuulia Jeʼwaa süpüla naleʼejamaatüinjanain nachikuaʼa nünainmüin Jeʼwaa. Mayaapejeʼe seemiajaain maʼin tü nanoulakat otta japülin maʼin naya saaʼujee tü naainjakat, anashaateerü maʼin nakuwaʼipa naleʼejüle nachikuaʼa. Otta müshia, talateechi maʼin Jeʼwaa, Jesuu jee na aapiee chakana iipünaa sutuma tia (Luc. 15:7).

15, 16. (1) ¿Kasa shikirajaka anain waya tü nümakat Jesuu nüchiki wanee emüliee maaʼinsai? Püküja süchiki tü alatakat namüin waneeinnua wawalayuu aleʼejakana nachikuaʼa nünainmüin Jeʼwaa. (2) ¿Kasa shikirajaka anain waya tia nüchiki Jeʼwaa otta nüchiki Jesuu?

¹⁵ ¿Kasa shikirajaka anain waya tü nümakat Jesuu nüchiki wanee emüliee maaʼinsai? Washatüinjatü nukuwaʼipa Jeʼwaa. Jamüshijaʼa Jeʼwaa, talatüshi nia nümaa wanee wayuu eekai nüleʼejüin nüchikuaʼa nünainmüin. Akaʼaya wayakana, talatüinjanaʼaya waya nümaa wanee wayuu eekai niyaawajaain suulia naainjala sümaa nüleʼejüin nüchikuaʼa nünainmüin Jeʼwaa. Nnojoishii waya jashichinjanain nümüin süka eein süpüla mojuin wakuwaʼipa nümaa Jeʼwaa suluʼujee tia (Ecl. 7:16). Sünainjee tü nümakat Jesuu nüchiki chi  emüliee maaʼinsaikai, wayaawata aaʼu eein süpüla nüleʼejüin nüchikuaʼa nünainmüin Jeʼwaa wanee wayuu eekai nükatalaain nuulia. «Amülouichipa nia», nnojoishii müinjanain waya nüchiki (Sal. 119:176). Müleka wantiraale nümaa wanee wayuu eekai nükatalaain noulia na wawalayuukana, ¿wakaaliinjeeiche nia süpüla nüleʼejüinjachin nüchikuaʼa nünainmüin Jeʼwaa? ¿Waküjamaateetche shia namüin na laülaashiikana süpüla nakaaliinjüin chia wayuukai? Waainjeerü tia, müleka weʼitaale suluʼu wakuwaʼipa tü nikirajakalü anain waya Jesuu sükajee nukuwaʼipa chi emüliee maaʼinsaikai.

¹⁶ Wainmainna na wayuu aleʼejakana nachikuaʼa nünainmüin Jeʼwaa. Talatüsü maʼin naaʼin sutuma sümülialaain naaʼin Jeʼwaa naaliin, sutuma kaaliin naya napüla na wawalayuukana otta sutuma neeʼiyatüin na wawalayuukana alin naya napüla. Eeshi wanee wawala aleʼejakai nüchikuaʼa nünainmüin Jeʼwaa 25 juya süchikijee nujuʼitinnüin, anuu nünüiki: «Süchikijee taleʼejüin tachikuaʼa nünainmüin Jeʼwaa, talataleeshia maʼin taya sümaa müin tasanatkai aaʼin nutuma Jeʼwaa (Aluw. 3:19). Kaaliinshi taya napüla napüshuaʼa na tawalayuukana otta aishi taya napüla. Anasü taaʼin namaa na tawalayuukana, maaʼatshi saʼakakai taya tapüshi». Anuu sünüiki wanee wawala aleʼejaka süchikuaʼa nünainmüin Jeʼwaa jaʼrai juya süchikijee sükatalaain nuulia: «Shiaʼaya maʼin naaʼinraka na tawalayuukana tü nümakat Jesuu süka neeʼiyatüin sünain alin maʼin taya napüla. Shia analeeka sümüin wayuu suluʼule shia tü nupueulosekat Jeʼwaa».

17, 18. (1) ¿Kasa shikirajaka anain waya tü apünüinsükat shiyaawase nikirajia Jesuu? (2) ¿Kasa tü ayatüinjatkat waaʼinrüin?

¹⁷ ¿Kasa shikirajaka anain waya tü apünüinsükat shiyaawase nikirajia Jesuu? Wekirajaaitpa anain niain Jeʼwaa kooʼomüinkai atuma nunoula wanee wayuu. Nnojotsü watumasirüin shia. Wanee kasa watüjaka sünainjee tü nümakat Jesuu, shia nnojoleenain naapaain sümaa tü shiimainkat napüshuaʼa na wayuu wekirajakana sünain tü Wiwüliakat jee na oʼunakana sünain tü outkajawaakat. Tü wanee kasa watüjakat shia eein süpüla naleʼejüin nachikuaʼa nünainmüin Jeʼwaa na wayuu akatalaakana nuulia. Naaʼinrüle tia, talatüinjana waya namaa maʼaka talatüin naaʼin Jeʼwaa namaʼaya.

¹⁸ Ayata wachajaain sukuwaʼipa süpüla watüjüinjanain maʼin, süpüla wayaawatüin saaʼu wanee kasa jee kekiinjanain waya. Jamüsüjaʼa waashajeʼerapa suluʼu tü Wiwüliakat tü nümakat Jesuu süchiki wanee kasa eʼnnaajünaka sainküin mma, anashii wasakireʼerüle waaʼin sünain jamaluʼuluin shia, jamüin süshajünaka suluʼu tü Wiwüliakat, kasain shikirajüin anain waya otta kasain shikirajüin anain waya nüchiki Jeʼwaa otta Jesuu. Waaʼinrüle tia, weeʼiyateerü sünain wayaawatüin saaʼu tü nikirajeekalü anain waya Jesuu, chi Atüjakai maʼin Ekirajaa.