1, 2. Ngapi omu Jesus ga nkondopekere varongwa vendi mezuva eli va mu vhumbwire?

VARONGWA vavali vaJesus kwa zire ugenda komukunda gwa likara naJerusarema nokilometa dokupitakana 11. Awo kwa kere guvire unene morwa Jesus kwa fire ntani kapi va divire asi ana vhumbuka. Hararasi, Jesus ta va monekere makura ta gendi kumwe nawo. Age ga vhulire kuhengagwida varongwa vena. Monkedi musinke? “Age ta tameke kuvafwatwilira momatjangwa nagenye yininke eyi ya mu hamena, kutundilira kwaMosesa dogoro kovaporofete navenye.” (Ruk. 24:13-15, 27) Kutunda opo, nomutjima dawo tadi hwama morwa ‘nondunge dawo kwa mahukire’ kweyi ga va fatwililire Matjangwa.—Ruk. 24:32.

² Ngurova zoozo, varongwa owo vavali kwa tengwire koJerusarema. Tava ka gwana vapositoli nokuvasimwitira eyi yina va horokere. Hava za mokuuyunga, Jesus tava monekere navenye. Makura vapositoli tava tukuka nokukara nesinganyeko kuhamena Jesus. Ngapi omu Jesus ga va nkondopekere? Bibeli kutanta asi: “Age makura ta mahura nondunge dawo va zuvhe matjangwa.”—Ruk. 24:45.

3. Maudigu musinke natu vhura kuligwanekera nago, ntani yisinke nayi tu vatera tu kare ngorooro noruhafo mosirugana setu sokuzuvhisa?

 ³ Ngwendi varongwa vena, nose poyiruwo yimwe kuguva unene. Nampili ngomu tuna kulitura mo unene mosirugana saJehova, kuvhura tu dompe mutjima nsene vantu kapi vana kupurakena kezuvhiso lyetu. (1 Kol. 15:58) Ndi kuvhura tu lizuvhe asi ava atu lirongo nawo Bibeli kapi vana kutura po ezokomeho. Vamwe ava twa vatera kuvhura va nyoke kukarera Jehova. Yisinke nayi tu vatera tu kare ngorooro noruhafo mosirugana setu sokuzuvhisa? Sininke simwe esi nasi tu vatera kuna kara mokukwata egano yifanekeso yaJesus eyi va tjangwa moMatjangwa. Ngesi tatu ka konakona yifanekeso yitatu ntani neyi natu vhura kulirongera ko.

4. Yisinke asi tanta sifanekeso saJesus somukuni ogu ga rere?

⁴ Resa Marukusa 4:26-29. Yisinke asi tanta sifanekeso saJesus somukuni ogu ga rere? Mugara gomosifanekeso kwa fanekesa vazuvhisi woUhompa. Mbuto kuna kara mbudi zoUhompa ezi atu zuvhisire vantu wonomutjima donongwa. Ngamoomu tupu mukuni a kunu makura ‘masiku ta rara, ano mutenya ta pinduka,’ ekuro lyombuto kugusa siruwo mokukura dogoro komuzangu. Mwaza siruwo ‘mbuto kumena tazi kuru.’ Ekuro eli kuhoroka kanunu-kanunu. Mokulifana, ekuro lyopampepo kuhoroka nalyo kanunu-kanunu. Apa muntu a tura po ezokomeho, ayo kumutumangeda a tokore kukarera Karunga, makura ta ligava kwendi nokugwana ekuho.

5. Morwasinke Jesus ga ruganesere sifanekeso esi?

⁵ Morwasinke Jesus ga ruganesere sifanekeso esi? Jesus kutuvatera tu dimburure asi Jehova yige a ninkisa usili u kure monomutjima dava “gwa tumbukira mwenyo gwanarunye.” (Yirug. 13:48; 1 Kol. 3:7) Ose kutapeka nokutekera, nye kapi twa diva omu ayi kuru. Kapi tatu vhuru kugenderesa ekuro. Ngwendi mugara gomosifanekeso, ose kapi twa diva omu ali horoka ekuro. Alyo kuhoroka nkenye ezuva, nye kapi atu li dimburura omu lina kuhoroka momuntu. Mwaza siruwo, murongwa gomupe ta yimi yiyimwa pokutameka kuza nose mokuzuvhisa, sirugana somuzangu.—Joh. 4:36-38.

6. Yisinke twa hepa dimburura kuhamena ekuro lyopampepo lyomurongwa?

⁶ Yisinke natu vhura kulirongera ko kosifanekeso esi? Sokuhova, twa hepa kuyitambura asi kapi tatu vhuru kugenderesa ekuro lyopampepo lyomurongwa gwetu goBibeli. Nampili ngomu natu kondja mokumuvatera, nye twa ha mu sininika asi a gwane ekuho. Kuvhura tu rugane paapa twa hulira mokumuvatera, nye mwene ga hepa kutokora mokuligava nokugwana ekuho. Eligawo lya hepa kutunda momutjima gwendi, morwa eharo lyendi kwaKarunga. Jehova kutambura tupu eligawo lyetu nsene asi sili twa mu hara.—Epis. 51:12; 54:6; 110:3.

7, 8. (a) Yirongwa musinke yimwe natu lirongera ko kosifanekeso saJesus somukuni ogu ga rere? Gava sihonena. (b) Yisinke ayi tu rongo eyi kuhamena Jehova ntani Jesus?

⁷ Sauvali, kukwata egano sifanekeso esi ngayi tu vatera tu dire kudompa mutjima nsene kapi tuna kumona yitundwamo yoyirugana yetu. Twa hepa kulididimikira. (Jak. 5:7, 8) Nsene twa kondja unene mokuvatera murongwa nye simpe kapi ana kutambura usili, twa ha gazara asi ose kapi twa yi diva kuronga. Jehova kupulisira usili u kure monomutjima dava va kara neharo lyokutura po marunduruko. (Mat. 13:23) Yipo nye, etompoko lyetu lyoyirugana  yokuzuvhisa kapi lya korera kosivaro sovantu ava atu reta mousili. Jehova kapi a tara asi etompoko lyetu kwa korera monkedi omu vantu ava tambura mbudi ezi atu va zuvhisire. Nye, age kutara elituromo lyetu asi mulyo.—Resa Rukasa 10:17-20; 1 Vakolinte 3:8.

⁸ Sautatu, ose kapi atu vhuru kumona marunduruko aga aga horoka momutjima gomuntu. Pasihonena, valikwali ava ga rongere mutumwa kwa mu hederere nokumutantera asi awo vana hara kukara vazuvhisi wokudira kugwana ekuho. Age kwa diworokesere valikwali asi va hepa tanko kuhageka kukoka makanya. Apa va mu tanterere asi va hageka nare makwedi gongandi gana ka pita, ayo kwa mu tetukisire. Morwasinke va hagekerere kukoka? Awo va yi dimbwilire asi Jehova kuvamona apa ava koko makanya mokahore-hore ntani ga nyenga vayilipaki. Nomutjima dawo kwa va tumangedere va tokore asi tava koko komeho zomutumwa ndi va hepa kuhageka? Eharo lyawo kwaJehova kwa va vaterere va ture po etokoro lyouhunga. Awo va kulire pampepo nampili ngomu mutumwa ga dilire kudiva ekuro olyo.

9. Yisinke asi tanta sifanekeso saJesus sekwe?

⁹ Resa Mateusa 13:47-50. Yisinke asi tanta sifanekeso saJesus sekwe? Jesus kwa uyungire asi kuzuvhisa mbudi zoUhompa kwa fana ngwendi kuna kutega ekwe mefuta. Ngamoomu tupu ekwe ali kwata nomfi dononzi ‘dankenye rudi,’ yirugana yetu yokuzuvhisa nayo kukoka vantu womarudi nagenye. (Jes. 60:5) Eyi kuyimonenena mosivaro sovantu ava ava wiza koyigongi nokoMurarero gwaHompa nkenye mvhura. Vantu vamwe kwa fana ngwendi nomfi “donongwa,” ntani awo kuyalikapera kumwe nose mombungakriste. Nye vamwe kwa fana ngwendi nomfi “donondona,” ano Jehova kapi ava tambura.

10. Morwasinke Jesus ga ruganesere sifanekeso sekwe?

¹⁰ Morwasinke Jesus ga ruganesere sifanekeso esi? Ehanguro lyonomfi mosifanekeso esi kapi lya tamba kepanguro lyokuhulilira posiruwo soudigu wounene. Nye, kufaturura eyi yina kuhoroka pomazuva aga gopouhura mouzuni ou woudona. Jesus ga likidire asi kapisi navenye ava va hara mbudi zoUhompa ngava kara vakareli vaJehova. Vantu wovanzi ava ava wiza komapongo getu ndi ava atu lirongo nawo Bibeli kapi va hara kuligava kwaJehova. (1 Vah. 18:21) Vamwe va hageka kuwiza komapongo. Vadinkantu vamwe kwa va rerera mousili, nye kapi va tunga po eharo lyokukarera Jehova. Yi kare asi moukaro musinke, Jesus kwa nkondopekere asi nkenye ogu ga hepa kutura po etokoro lyamwene. Nsene tu tulisa po etokoro lyouhunga, Jehova nga tu tara asi ose “emona” lyendi ‘monomuhoko nadinye.’—Hag. 2:7.

11, 12. (a) Ngapi natu gwanena mo uwa mosifanekeso saJesus sekwe? (b) Yisinke ayi tu rongo eyi kuhamena Jehova ntani Jesus?

¹¹ Ngapi natu gwanena mo uwa mosifanekeso saJesus sekwe? Kukwata egano sifanekeso esi ngayi tu vatera tu dire kudompa mutjima ndi tu guve nsene murongwa goBibeli ndi munwetu kapi ana hara kukarera Jehova. Eyi kuvhura kuhoroka nampili ngomu natu litura mo unene mokumuvatera. Muntu kapi a kara nelikwatakano naJehova morwa kulironga nage Bibeli ndi kwa mu rerera mousili. Nsene kapi ana hara kutambura upangeli waJehova Karunga, gwangoso kapi ta vhuru kukara mukareli gwendi.

¹² Eyi kutanta nye asi ava va siga usili  kapi ngava va pulisira hena va tengure mombungakriste ndi? Ndi nsene muntu kapi simpe ga ligava kwaJehova, ngava mu tara nkenye apa asi ‘mudona’ ndi? Hawe. Simpe pana kara nompito kovantu vangoso va ya kare vakaume vaJehova komeho udigu wounene u ka tameke. Jehova kuna kuvazigida asi: “Tengureni kwange, makura name ngani tengwire kweni.” (Mara. 3:7) Eyi yiyo ga nkondopekere Jesus mosifanekeso sendi somumati gokuzumbana.—Resa Rukasa 15:11-32.

13. Yisinke asi tanta sifanekeso saJesus somumati gokuzumbana?

¹³ Yisinke asi tanta sifanekeso saJesus somumati gokuzumbana? Guhya gonkenda gomosifanekeso esi kwa fanekesa Guhyetu gemeguru, Jehova. Munona ogu ga hundilire emona lyendi ntani nokukalihanagura po kwa fanekesa ava ava sigi mbungakriste. Kuza “kosirongo sokoure” kwa fanekesa uzuni waSatana, ou wa linapa naKarunga. (Efe. 4:18; Koros. 1:21) Konyima, vamwe kuyayidimburura asi kwa tulire po etokoro lyepuko makura tava tengura kombunga zaJehova. Ava ava linunupike nokulitezurura, Guhyetu gemeguru kuvagusira po nokuvatambura.—Jes. 44:22; 1 Pet. 2:25.

14. Morwasinke Jesus ga ruganesere sifanekeso somumati gokuzumbana?

¹⁴ Morwasinke Jesus ga ruganesere sifanekeso esi? Jesus kwa likidire asi Jehova ana hara ava va siga mbungakriste va tengure kwendi. Guhya gomosifanekeso ga kere nehuguvaro asi munwendi nga tengura. Guhya apa ga mwene munwendi kuna kuwiza, nye “age simpe ure” ta duka a ka gwanekere nendi. Sifanekeso esi kuvhura kutumangeda ava va siga usili va tengure usimbu kwaJehova. Morwa nampo kwa zumbanesa elikwatakano lyawo naJehova, kuvhura va lizuvhe nomuga ntani yi va digopere kutengura. Nye nsene va tengura, Jehova naJesus ntani novaengeli ngava hafa.—Ruk. 15:7.

15, 16. (a) Ngapi natu gwanena mo uwa mosifanekeso saJesus somumati gokuzumbana? Gava yihonena. (b) Yisinke ayi tu rongo eyi kuhamena Jehova ntani Jesus?

¹⁵ Ngapi natu gwanena mo uwa mosifanekeso saJesus somumati gokuzumbana? Twa hepa kutemwinina sihonena saJehova. Nsene gumwe ta tengura kombunga,  twa ha ‘pitakanesa mokuligazara nyamwetu’ pokunyoka kumutambura. Eyi ngayi zonagwisa elikwatakano lyetu naJehova. (Rom. 12:3a) Eyi natu lirongera ko hena kweyi kuna kara asi tu tare ogu va gusa mombunga ‘ngonzwi zokuzumbana,’ ezi ngazi vhura kutengura kombunga. (Epis. 119:176) Nsene tu ligwanekera nomuntu ogu ga siga mbungakriste, ngatu mu likida eharo nokumuvatera a tengure kombunga ndi? Ngatu pukurura usimbu vakuronambunga yipo va mu vatere ndi? Nsene tu kwata egano sifanekeso saJesus somumati gokuzumbana, ngatu yi rugana.

¹⁶ Ava ava tengura kulikida asi va kara norupandu konkenda zaJehova ntani keharo nekekwateseko lyombungakriste. Munazinyetu ogu va gusire mombunga ure wonomvhura 25 kwa tanta asi: “Kutunda tupu apa va tengwidira nge mombunga, ruhafo rwange kuna kuligwederera ngwendi ‘epeperero’ lyokutunda kwaJehova. (Yirug. 3:19, 20) Nkenye ogu kuna kukwatesa nge ko ntani kuna kulikida nge eharo. Ngesi nina kara nepata lyewa lyopampepo.” Munazinyetukadi ogu ga tengura mombunga konyima zonomvhura ntano, kwa tanta asi: “Nokuvhura si kufaturura omu na lizuvhire mokumona eharo eli ga likida nge Jesus. Kukara ruha rombunga zaJehova mulyo unene!”

17, 18. (a) Yirongwa musinke tuna lirongere ko koyifanekeso eyi yitatu? (b) Yisinke twa hepa kutokomena kurugana?

¹⁷ Yirongwa musinke tuna lirongere ko koyifanekeso eyi yitatu? Sokuhova, ose tuna kwata egano asi kapi tatu vhuru kugenderesa ekuro lyopampepo lyomurongwa goBibeli. Twa hepa kuyisigira Jehova. Sauvali, ayo epuko kugazara asi navenye ava ava pongo kumwe nose nava ava lirongo nose ngava karera Jehova. Sautatu, nampili vamwe va sige usili, twa ha zumbanesa ehuguvaro asi kapi ngava tengura hena. Ano nsene vana tengura, twa hepa kuvatambura monkedi zeharo, ngwendi Jehova.

¹⁸ Ngano natuvenye tu twikire kupapara ediwo nounongo ntani nokukwata egano yininke. Ngomu ono kuresa yifanekeso yaJesus, lipura asi: ‘Yisinke asi tanta sifanekeso esi? Morwasinke va si tjangera moBibeli? Yisinke nani lirongera ko? Yisinke sina kuronga nge kuhamena Jehova ntani Jesus?’ Pokurugana ngoso, ngayi likida asi ose tuna kwata egano nonkango daJesus.