1, 2. Indi Yesu wayikolesheli ñahi atumbanji twindi hefuku damusañwiluwu?

 ATUMBANJI twaYesu ayedi ayileña kumukala wadiña namakilomita 11.2 kufuma kuYerusalema hefuku damusañwiluwu Yesu. Muloña elukili wanyi nawu Yesu anamusañuli, aneñeli chikupu nayuma yamwekeni. Kukasumuka, Yesu hakuswila kwakwihi nawena nawa hakwenda nawu. Wayikundejeli awa atumbanji. Munjilanyi? “Hakuyilumbulwila munyikanda yajila, kutachika hadi Mosi niatuprofwetu ejima, yuma yatenenuwu yomweni.” (Luka 24:13-15, 27) Chumichi chaletesheli kutiya nyichima yawu mumavumu busu muloña wadiña ‘nakuyilumbulwila chiwahi Nyikanda Yajila.’—Luka 24:32.

² Ana atumbanji ayedi afuntili kuYerusalema dodina ifuku namelela. Chayiwaninuwu apostolu ayilejeli chuma chamwenuwu. Henohu achidi kuhosha, Yesu hakumwekana mukachi kawu. Ilaña, apostolu indi atiyili woma. Atachikili kujinoka munyichima yawu. Indi Yesu wayikolesheli ñahi? Bayibolu yatulejaña nawu: ‘Hakujikula kashinshi kawu kulonda eluki mwalumbulukila Nyikanda Yajila.’—Luka 24:45.

3. Kukalanyi kutunateli kumona nawa chumanyi chikutukwasha kwikala namuzañalu mumudimu wetu wakushimwina?

³ Kufwana ana atumbanji, ninetu twaneñaña chikupu mpinji yikwawu. Hadaha twadikitaña mumudimu waMwanta, ilaña  twaneñaña muloña hitwamonaña yuma yayiwahi yafumañamuku. (1 Kor. 15:58) Hekwawu antu itwadizishaña Bayibolu ayilañaku hambidi swayi wanyi. Amakwawu itwakwashaña anateli nikumufutalela Yehova. Chumanyi chitwatela kwila kulonda twikaleña namuzañalu mumudimu wetu wakushimwina? Chuma chimu chatela kutukwasha hikwiluka chikupu mwatalisha yishimu yaYesu yasonekawu muNyikanda Yajila. Tuhanjekenu haniyi yishimu yisatu kulonda tumoni yuma yitunateli kudizilaku.

4. Indi chishimu chaYesu chamukwakukuwa wakamaña chatalisha mudihi?

⁴ Tañenu Maku 4:26-29. Indi chishimu chaYesu chamukwakukuwa wakamaña chatalisha mudihi? Muntu wamunichi chishimu wemenañaku akwakushimwina nsañu yaWanta. Mbutu hinsañu yaWanta yitwashimwinaña kudi antu akweti nyichima yayiwahi. Neyi chochitwazataña nyidimu yamafuku ejima mukwakukuwa ‘wakamaña nawufuku nakuhinduka namwaana.’ Hahitaña mpinji hakwila mbutu jikuli kufuma hampinji yakutumba nakushika hakumuna. Haniyi mpinji “mbutu hijikubaluka, hijikukula.” Jakulaña ‘jajeni’ chovu-chovu. Chochimu, muntu wakulaña kuspiritu chovu-chovu. Neyi muntu nayiluku hambidi nawa nakukeña kumuzatila Nzambi, wasoñaña nyikabu chakwila nateli kudihana kudi Yehova nikupapatishewa.

5. Muloñadi Yesu chazatishililiyi chishimu chamukwakukuwa wakamaña?

⁵ Muloñadi Yesu chazatishililiyi ichi chishimu? Yesu watukwashaña kwiluka netu Yehova diyi wakulishaña chalala mudi antu akweti nyichima ‘yayiwahi.’ (Yil. 13:48; 1 Kor. 3:7) Twatumbaña nikutukumwina, ilaña hitukweti wuswa wakuyikulishaku. Hitwatela kuyikanjikija kukula swayi-swayuku. Kufwana muntu wamuchishimu ichi, tweluka wanyi chakulañawu antu kuspiritu. Kakavulu twelukaña wanyi chakulañayi muntu wunakudiza nsañu yaWanta. Mukuhita kwampinji, mbutu yaWanta yinateli kusoña nyikabu. Kuhiñahu kambanji wamuha wazataña nanetu mumudimu wakumuna nawa twahetelañamu hakuzata nindi.—Yow. 4:36-38.

6. Chumanyi chitwatela kwiluka hadi kadizi waBayibolu kutalisha hakuyilaku hambidi?

⁶ Yumanyi yitwadizilaña kunichi chishimu? Chatachi twatela kwiluka netu hitukweti wuswa wakukanjikija kadizi waBayibolu kuyilaku hambidi muchalalaku. Neyi twikala adizoza chikutukwasha kubula kukanjikija atudizi etu netu apapatishewi. Twazataña hakumina ñovu yetu hakumukwasha muntu, ilaña tweluka netu yomweni diyi wunateli kufuukulahu kudihana. Kudihana hichuma chafumaña hamuchima wamuntu muloña wamukeña Nzambi. Neyi muntu hakweti kukeñaku, Yehova hakwiteja kudihana kwinduku.—Mas. 51:12; 54:6; 110:3.

7, 8. (a) Yumanyi yikwawu yitwadizilaña kuchishimu chaYesu chamukwakukuwa wakamaña? Shimunenu chakutalilahu. (b) Indi ichi chishimu chatudizishaña chumanyi hadi Yehova niYesu?

⁷ Chamuchiyedi, kwiluka chuma chitwadizilaña kunichi chishimu chikutukwasha kubula kuzeya neyi tumona netu hakusambila kwosi yuma yayiwahi yinafumi mumudimu wetuku. Twatela kudiwunjika. (Yak. 5:7, 8) Hela chakwila mbutu yinasoñi nyikabu wanyi, neyi tuzata nañovu hakumukwasha kadizi ilaña nakuyilaku hambidi wanyi, hichinayi mukwila nawu tudi antañishi atamaku. Yehova wetejaña hohu mbutu yachalala kusoña munyichima yawantu adizoza nawa etejaña kuhimpa yililu yawu. (Mat. 13:23) Dichi bayi tumona netu tunakuzata chiwahi mumudimu wakushimwina muloña wayuma yayiwahi yinakufumamuku. Yehova hamonaña nindi twazataña chiwahi mumudimu  wakushimwina neyi antu itwatañishaña eteja nsañuku. Ilaña walemesha chitwazataña nañovu kubadika yuma yafumañamu.—Tañenu Luka 10:17-20; 1 Akorinda 3:8.

⁸ Chamuchisatu, hitwelukaña muntu chahimpañayi mukachi kamuchimaku. Chakutalilahu, antu adisumbula adizileña nakamishonali wumu amulejeli nawu anakukeña kwikala akwakushimwina abula kupapatishewa. Wayilejeli nindi hakwila ashikuhu atela kuleka kunwa makanya. Kamishonali wahayamini chikupu chamulejeluwu nawu munahiti tukweji twatuvulu kufuma halekeluwu kunwa makanya. Muloñadi chalekeleluwu? Elukili nawu Yehova nateli kuyimona chinakunwawu makanya nawa wahela wunfwikiji. Dichi adikasili munyichima yawu kufuukulahu, kunwa makanya hamesu akamishonali hela kuleka chikupu. Kukeña kwamukeñeluwu Yehova kwayikwashili kufuukulahu chuma chachiwahi. Apamini kuspiritu hela chakwila kamishonali welukili wanyi yuma yahimpiluwu muchihandilu chawu.

9. Indi chishimu chaYesu chakaleñi chatalisha mudihi?

⁹ Tañenu Matewu 13:47-50. Indi chishimu chaYesu chakaleñi chatalisha mudihi? Yesu wafwanishili mudimu wakushimwina nsañu yaWanta kudi antu ejima nakulalumwina kaleñi mukaluñalwiji. Chochikakwataña kaleñi ‘inshi yanyichidi yejima’ yayivulu, mudimu wetu wakushimwina Wanta niwena wakokaña antu amavulu akunyuza yejima. (Isa. 60:5) Antu apompaña kukupompa kwetu kweneni nihaChanukishu hachaaka hachaaka amwekeshaña walala wanichi chishimu. Inshi yikwawu yachifwikija yekalaña “yayiwahi” nawa ayipompeshelaña muchipompelu chawakwaKristu. Hela chochu, yikwawu yekalaña “yatama”; bayi neyi yejima yapompeshañawu ayitejaña kudi Yehovaku.

10. Muloñadi Yesu chazatishililiyi chishimu chakaleñi?

¹⁰ Muloñadi Yesu chazatishililiyi ichi chishimu? Kwambula inshi muchifwikija hikwatalisha kukusompesha kwakukumishaku kukekalaku hampinji yalukadi lwenenuku. Ilaña hikwambula kunakumwekesha yuma yikamwekana mumafuku akukuminina amuyinu mpinji yitunakushakamamu. Yesu wahosheli nindi bayi neyi antu ejima adizaña chalala akekala ambuña Yehovaku. Antu amavulu enzaña kukupompa kwetu. Antu amakwawu akeñaña kudiza Bayibolu nanetu ilaña hiyatondañahu kudihana kudi Yehovaku. (1 Anya. 18:21) Amakwawu niwena aleka dehi kudikunda nachipompelu chawakwaKristu. Atwansi amakwawu ayikulisha kudi anvwali akwaKristu ilaña hiyakeña nshimbi jaYehovaku. Yesu wakonkomweneni nindi muntu wejima watela kufuukulahu. Antu elaña mwenimu wayimonaña nindi hiyuma ‘yayiwahi yamunyunza yejima.’—Hag. 2:7.

11, 12. (a) Tunateli kuhetelamu ñahi muchishimu chakaleñi? (b) Indi ichi chishimu chatudizishaña chumanyi hadi Yehova niYesu?

¹¹ Tukuhetelamu ñahi muchishimu chakaleñi? Neyi twiluka yuma yitwadizilaña kunichi chishimu chikutukwasha kubula kuzeya hela kuneña neyi kadizi waBayibolu hela mwanetu natonduhu wanyi kumuzatila Yehova. Chumichi chinateli kumwekana chili tunazati hakumina ñovu jetu. Bayi neyi muntu nateli kushikena kwikala nawubwambu wakola naYehova neyi yeteja kudiza Bayibolu hela wakulila muchalalaku. Antu akaanaña kwovwahila chiyuulu chaYehova akayaambula hadi antu jaNzambi.

¹² Komana chumichi chinayi mukwila nawu antu afumaña dehi muchalala  akayiteja wanyi kufunta muchipompelu? Indi neyi muntu yakañanya kudihana kudi Yehova komana chumichi chinayi mukwila nawu himuntu ‘watama’? Inehi. Antu wenawa achidi nakukooleka kwakwikala amabwambu jaYehova henohu yihuñu yamaneni kanda yitachiki. Chidi neyi kwiji Yehova nakuyitambika nindi: “Funtenu cheñi kudami, ami nawa nifunti kudenu.” (Mal. 3:7) Ichi chikuma achikonkomwena cheñi muchishimu chikwawu chahosheliyi Yesu hadi mwana wajimbeli.—Tañenu Luka 15:11-32.

13. Indi chishimu chaYesu chamwana wajimbeli chatalisha mudihi?

¹³ Indi chishimu chaYesu chamwana wajimbeli chatalisha mudihi? Tata yawantu wukweti wushona munichi chishimu wemenañaku Tata yetu wamwiwulu Yehova wekala nakukeña. Mwana walombeli mahetindi kuhiñahu hakuyikisañana wemenañaku antu afumaña muchipompelu. Chafuminiyi hetala chidi neyi kwiji wayili “kwituña dakwakulehi,” mukaayi kaSatana, kambuka kudi Yehova. (Efwes. 4:18; Kol. 1:21) Hela chochu, chimwahita mpinji atoñojokaña nawu aluwañesheli nankashi, dichi afuntaña mukuloñesha kwaYehova. Awa antu adizoza abalumukaña mumuchima ayitambwilaña cheñi kudi Tata yetu wanakenaña.—Isa. 44:22; 1 Pet. 2:25.

14. Muloñadi Yesu chazatishililiyi chishimu chamwana wajimbeli?

¹⁴ Muloñadi Yesu chazatishililiyi ichi chishimu? Munjila yekoku, Yesu washimwini nindi Yehova wakeñaña antu apwapukaña afunti cheñi kudi Nzambi. Tata yawantu wamunichi chishimu wakuhweleleli chikupu nindi mwanindi wakafunta. Tata yawantu chamweniyi mwanindi hakufunta, hela chakwila ‘wachidiña maaya,’ wanyakeli kumutambwila. Iyi nsañu yatela kuyikolesha chikupu antu afuma muchipompelu kulonda afunti cheñi kudi Yehova chakubula kulaba. Wubwambu wawu naYehova wazeya, dichi anateli kutiya nsonyi nawa chayikalilaña hakwila afunti. Ilaña dichi chuma chalema chatela kwilawu, neyi afunta nimwiwulu mwekalaña muzañalu.—Luka 15:7.

15, 16. (a) Yumanyi yitwadizilaña kuchishimu chaYesu chamwana wajimbeli? Shimunenu yakutalilahu yikwawu. (b) Indi ichi chishimu chatudizishaña chumanyi hadi Yehova niYesu?

¹⁵ Tunateli kuhetelamu ñahi muchishimu chamwana wajimbeli? Twatela kulondela chakutalilahu chaYehova. Bayi tudimona ‘kusweja kuloñaku’ chakwila tukañanyi  nikutambwila antu anabalumuki mumuchima nakufunta. Chumichi chikuletesha ‘tukisañani’ wubwambu wetu naYehova. (Mukwa. 7:16) Tunateli kudizilaku chuma chikwawu kunichi chishimu. Twatela kumumona muntu wafumaña muchipompelu neyi “mukoku wajimbala,” bayi neyi ntamba yaheñaku. (Mas. 119:176) Neyi tuwana muntu wafuma muchipompelu, komana tunateli kumukwasha munjila yayiwahi kulonda yafunti? Komana tunateli kunyakala kuyileja aeluda kulonda amukwashi? Tunateli kwila mwenimu neyi chakwila tuzatisha chiwahi yuma yitunadizi muchishimu chaYesu chamwana wajimbeli.

¹⁶ Shinshikenu antu amakwawu amakonu ajimbeli chiyasakililañawu haluwi nikukeña kwaYehova kwayimwekesheleliyi nichayikwashiluwu muchipompelu. Mana kwetu wahañiluwu muchipompelu hadi yaaka 25 wahosheli nindi: “Kufuma tuhu hiyafuntishiluwu natwalekañahu nakuzañalala chineli natambwili dehi ‘yilaaka yakuhizumwisha’ yakufuma kudi Yehova. (Yil. 3:19) Muntu wudi wejima wankwashaña nikunkeña! Chayinu mpinji, nikweti chisaka chakuspiritu chamuzañalu.” Muhela wakansi wafumini kudi Yehova hadi yaaka yitanu chafuntiliyi wahosheli nindi: “Nukutwesha kuyilumbulula wanyi chinatiyili hakumona chanmwekesheleluwu chikupu kukeña kwahosheliyi Yesu. Kwikala mukuloñesha kwaYehova hichuma chabadika kulema.”

17, 18. (a) Yumanyi yayiwahi yitunadizili kuniyi yishimu yisatu yitunahanjekuhu? (b) Chumanyi chitwatela kufuukulahu?

¹⁷ Yumanyi yayiwahi yitunadizili kuniyi yishimu yisatu? Chatachi, twatela kwiluka chikupu netu hitukweti ñovu yakumukanjikija muntu yakuli muchalalaku. Yehova hohu diyi wukweti iyi ñovu. Chamuchiyedi, hitwatela kukuhwelela chikupu netu antu ejima adizaña nanetu akakeña kumukalakela Yehovaku. Chakukumishaku, twatela kwiluka netu hela chakwila antu anateli kufuma muchalala nakumufutalela Yehova, twatela kukuhwelela chikupu netu akafunta cheñi. Nawa neyi anafunti twatela kuyitambwila munjila yinakumwekesha kukeña kwaYehova.

¹⁸ Dichi wejima wetu twatela kutwalekahu kukeñakeña kwiluka, kashinshi nimaana. Chitukudizaña yishimu yaYesu, dihulenu muyatalisha, chayisonekeleluwu muBayibolu, chitwatela kuzatisha yuma yitwadizilañaku, niyuma yitunateli kudiza hadi Yehova niYesu. Neyi twila mweni tukumwekesha netu tweluka mwatalisha mazu aYesu.