1, 2. UJesu wabakhuthaza njani abafundi bakhe ngelanga avuswa ngalo?

 KWAKULILANGA uJesu avuswa ngalo. Abafundi bakhe ababili babesiya komunye umuzi owawukhatshana leJerusalema ngamakhilomitha angaba yi-11. Babehlulukelwe ngenxa yalokho okwakwenzakele njalo babengakwazi ukuthi uJesu wayesevusiwe. Bathi besazihambela uJesu wathutsha wasebambisana labo indlela. Wabaduduza abafundi laba. Njani? ‘Wasukela kuMosi kanye labaPhrofethi bonke wabachazela okwakutshiwo eMibhalweni mayelana laye.’ (Luk. 24:13-15, 27) Izinhliziyo zabo zaqala ukuvutha ngenxa yokuthi ‘wayebavulela iMibhalo,’ okutsho ukuthi wayebachazela ngokucacileyo ukuthi itshoni.​—Luk. 24:32.

² Kwathi sekuntambama abafundi laba babuyela eJerusalema. Bafika baxoxela abaphostoli okwakwenzakele. Ingxoxo yathi isatsha uJesu wabonakala sephakathi kwabo, kodwa abaphostoli bakhe besaba kakhulu. Baqala ukuzibuza ukuthi kambe nguye yini uJesu lo. UJesu wabakhuthaza njani? IBhayibhili lithi: “Wasebavula izingqondo zabo ukuze bakwazi ukuzwisisa iMibhalo.”​—Luk. 24:45.

3. Yibuphi ubunzima esingahlangana labo, njalo singenzani ukuze siqhubeke sitshumayela?

³ Kwezinye izikhathi lathi singahlulukelwa. Mhlawumbe sisebenza gadalala emsebenzini weNkosi kodwa sidaniswa yikuthi kukhanya angani sithela amanzi emhlane wedada.  (1 Khor. 15:58) Mhlawumbe abantu esifunda labo bakhanya bengathuthuki kangako. Kanti njalo abanye bangacina beyekela ukufunda ngoJehova. Manje singenzani ukuze singadinwa, siqhubeke sitshumayela? Okunye okungasinceda yikuzwisisa ukuthi imizekeliso kaJesu eseMibhalweni eNgcwele itshoni sibisibili. Kasihloleni eminye imizekeliso yakhe emithathu sibone ukuthi isifundisani.

4. Umzekeliso kaJesu womhlanyeli olalayo utshoni?

⁴ Bala uMakho 4:26-29. Umzekeliso kaJesu womhlanyeli olalayo utshoni? Indoda okukhulunywa ngayo emzekelisweni lo imela ummemezeli woMbuso munye ngamunye. Inhlanyelo ngumlayezo woMbuso otshelwa labo abafuna ukuzwa iqiniso. Amazwi athi “ebusuku lemini, ingabe ilele loba ikhangele,” atshengisa ukuthi indoda le yenza ngendlela wonke umuntu enza ngayo. Lokho okuyabe kuhlanyelwe kuthatha isikhathi ukuthi kukhule, kusukela lapho kuhlanyelwa kuze kuyefika ekuvuneni. Ngesikhathi leso inhlanyelo “iyamila ikhule.” Ikhula ‘yodwa’ kancane kancane njalo ngezigaba ngezigaba. Lokhu kufanana lokuthuthuka komuntu esimfundisayo. Uthuthuka kancane kancane njalo ngezigaba ngezigaba. Nxa angathuthuka aze afike esigabeni sokuthi usefuna sibili ukukhonza uNkulunkulu, uthela izithelo okutsho ukuthi unikela ukuphila kwakhe kuJehova, abesebhaphathizwa.

5. UJesu wawusebenziselani umzekeliso womhlanyeli olalayo?

⁵ UJesu wawusebenziselani umzekeliso lo? UJesu usinceda ukuthi sibone ukuthi uJehova nguye oyenza ukuthi iqiniso likhule ezinhliziyweni ‘zabamiselwe’ ukuphila. (ImiSeb. 13:48; 1 Khor. 3:7) Thina siyahlanyela siphinde sithelele, kodwa kayisithi esikhulisayo. Asingeke sikwenze kukhule masinyane ngendlela esiyifunayo. Lathi sifanana lendoda esemzekelisweni, kasikwazi ukuthi kuyini okwenzakalayo nxa esikuhlanyeleyo kukhula. Siyabe sizenzela imisebenzi yethu yansuku zonke nje kodwa khona kuyabe kukhula singananzeleli. Ngokuya kwesikhathi umlayezo woMbuso ungacina usuthela izithelo. Besekusithi umfundi lo omutsha aqale ukuncedisana lathi ukwenza umsebenzi wokuvuna futhi lokhu kuyasisiza kakhulu.​—Joh. 4:36-38.

6. Kuyini okumele sikwazi nxa sifundisa othile iBhayibhili?

⁶ Umzekeliso lo usifundisani? Okokuqala, kumele sikwazi ukuthi kayisithi esenza ukuthi umuntu esifunda laye iBhayibhili athuthuke. Nxa singakunanzelela lokhu kuzasinceda ukuthi singambambi ngamandla kumbe simfuqe ukuthi abhaphathizwe. Thina esingakwenza yikuzama ngamandla onke ukumncedisa lokumsekela kodwa kumele sizithobe, sivume ukuthi nguye okumele azikhethele ukuzinikela kuNkulunkulu. Ukuthanda uNkulunkulu ngenhliziyo yonke yikho okumele kwenze umuntu akhethe ukuzinikela kuye. Kuyacaca-ke ukuthi uJehova uthokoziswa kuphela ngumuntu ozinikela kuye ngenxa yokuthi uyamthanda.​—Hubo. 51:12; 54:6; 110:3.

7, 8. (a) Kuyini okunye esikufunda emzekelisweni kaJesu womhlanyeli olalayo? Landisa okwake kwenzakala. (b) Umzekeliso lo usifundisani ngoJehova langoJesu?

⁷ Okwesibili, ukuzwisisa izifundo esizithola emzekelisweni lo kuzasinceda ukuthi singalahli ithemba nxa ekuqaliseni singaziboni izithelo zomsebenzi wethu wokutshumayela. Kumele sibekezele. (Jak. 5:7, 8) Lanxa singenza konke esingakwenza ukuze sincede umuntu esifunda laye kodwa angantshintshi, akumelanga sizisole sibone angani thina yithi esehlulekayo. UJehova uvumela ukuthi inhlanyelo yeqiniso ikhule kuphela enhliziyweni yomuntu othobekileyo njalo ozimisele ukuntshintsha. (Mat. 13:23) Yikho-ke akumelanga sibone angani  ukuphumelela komsebenzi wokutshumayela kuya ngokuthi kubhaphathizwa abantu abangaki. LakuJehova akuyi ngokuthi abantu esibatshumayezayo bathini kumbe benzani. Kodwa yena uqakathekisa umzamo esiwenza ngenhliziyo yethu yonke, kungelani lokuthi kulezithelo kumbe hatshi.​—Bala uLukha 10:17-20; 1 KwabaseKhorinte 3:8.

⁸ Okwesithathu, umzekeliso lo usifundisa ukuthi kwezinye izikhathi siyabe singananzeleli ukuthi kulontshintsho olwenzakalayo enhliziyweni yomuntu. Ngokwesibonelo omunye umfowethu ongumnali wayefunda lenye indoda lomkayo. Ngelinye ilanga bamlanda basebemtshela ukuthi sebefuna ukuba ngabamemezeli abangabhaphathizwanga, kodwa umfowethu lo wabatshela ukuthi kwakumele baqale bayekele ukubhema. Wamangala kakhulu bemtshela ukuthi kwasekulezinyanga betshiye ukubhema. Kuyini okwabenza bayekela ukubhema? Basebenanzelele ukuthi uJehova uyababona lanxa bebhema ngudlu, kanye lokuthi uyabuzonda ubuzenzisi. Yikho babona ukuthi kungcono bahle bayekele kulokuthi babheme becatshela umzalwane lo. Kuyakhanya ukuthi bakhetha ukwenza lokhu ngenxa yokuthi basebemthanda uJehova. Basebelobuhlobo obuhle laye lanxa umnali lo yena wayelokhu esemnyameni engakwazi ukuthi kwakulontshintsho olwenzakalayo.

9. Umzekeliso kaJesu wombule utshoni?

⁹ Bala uMathewu 13:47-49. Umzekeliso kaJesu wombule utshoni? UJesu wafanisa ukutshunyayelwa komlayezo woMbuso lokwehliselwa kombule omkhulu echibini kumbe olwandle. Umbule kawukhethi, uhuquluza “zonke izinhlobo zezinhlanzi.” Lomsebenzi wethu wokutshumayela uhuga yonke imihlobo yabantu. (Isaya. 60:5) Kuyazikhanyela ukuthi lokhu yikho okwenzakalayo ngoba banengi ababuya emihlanganweni yethu emikhulu kanye laseSikhumbuzweni umnyaka ngomnyaka. Abanye babo banjengezinhlanzi “ezilungileyo,” futhi bayabuthwa bafakwe ebandleni lobuKhristu. Kodwa abanye kucina kucaca ukuthi bazinhlanzi “ezimbi” njalo uJehova kabemukeli.

10. UJesu wawusebenziselani umzekeliso wombule?

¹⁰ UJesu wawusebenziselani umzekeliso lo? Lapho ekhuluma ngokwahlukaniswa kwezinhlanzi ezilungileyo lezimbi wayengakhulumi ngokwahlulela kokucina okuzakwenzakala ngesikhathi sokuhlupheka okukhulu. Kodwa wayesitsho okwakuzakwenzakala ezinsukwini zokucina zomhlaba lo omubi. UJesu watshengisa ukuthi kayisibo bonke abavuma ukufunda iqiniso abazakhetha ukuba yizinceku zikaJehova. Abanengi bayabuya emihlanganweni yethu. Kanti njalo abanye bayakufuna sibili ukufunda lathi iBhayibhili kodwa abafuni ukuzinikela kuNkulunkulu. (1 AmaKho. 18:21) Abanye abasalugxobi emihlanganweni yethu yobuKhristu. Abanye bakhuliswa ngabazali abangamaKhristu kodwa abazange bafune ukulandela izimiso zikaJehova. Lanxa kunjalo, umcijo owagcizelelwa nguJesu ngowokuthi wonke umuntu kumele azikhethele. Yikho-ke abakhetha ukuba yizinceku zikaJehova baligugu kuye yikho kuthiwa ‘ngabathandwayo kuzo zonke izizwe.’​—Hag. 2:7.

11, 12. (a) Umzekeliso wombule ungasinceda ngani? (b) Umzekeliso lo usifundisani ngoJehova langoJesu?

¹¹ Umzekeliso wombule usifundisani? Ukuzwisisa izifundo esizithola emzekelisweni lo kuzasinceda ukuthi singadani kakhulu nxa umuntu othile esimfundisa iBhayibhili kumbe umntanethu ekhetha ukungabambeleli eqinisweni. Lokhu kungenzakala lanxa sisenza konke okusemandleni ethu ukuthi sibancedise. Ukuvuma komuntu ukufunda iBhayibhili kumbe ukuthi umuntu ukhuliswe ngabazali abangoFakazi akutsho ukuthi uzahle abe lobuhlobo obuhle loJehova. Kodwa ekucineni bonke  abangafuniyo ukukhokhelwa nguJehova bazehlukaniswa labantu bakhe.

¹² Kodwa lokhu sekusitsho yini ukuthi abatshiya ukukhonza abasoze bafa bavunyelwa ukuphenduka ebandleni? Kumbe nxa othile engazinikeli kuJehova, kungahle kuthiwe unjengenhlanzi ‘embi’ yini? Hatshi. Umnyango ulokhu usavulekile ukuthi abantu laba bangene kungakafiki ukuhlupheka okukhulu. UJehova uthi kubo: “Buyani kimi, lami ngizabuya kini.” (Mal. 3:7) Lokhu kugcizelelwa lakomunye umzekeliso owasetshenziswa nguJesu, owendodana yolahleko.​—Bala uLukha 15:11-32.

13. Umzekeliso wendodana yolahleko utshoni?

¹³ Umzekeliso kaJesu wendodana yolahleko utshoni? Ubaba olesihawu osemzekelisweni lo umela uJehova, uBaba wethu olothando. Indodana ecela ilifa layo ibisilichitha yona imela labo asebephambukile ebandleni. Ukuphambuka kwabo kuyabe kufanana lokuthi baya “elizweni elikude” okutsho umhlaba kaSathane ohlukaniswe loJehova. (Efe. 4:18; Kol. 1:21) Kodwa abanye kusuka kuthi dlwe kubo, besebephenduka enhlanganisweni kaJehova lanxa kungalula ukwenza njalo. UBaba wethu othethelelayo ubemukela ngazo zombili abantu laba abazithobayo baphenduke.​—Isaya. 44:22; 1 Phet. 2:25.

14. Kungani uJesu wasebenzisa umzekeliso wendodana yolahleko?

¹⁴ UJesu wawusebenziselani umzekeliso lo? Emzekelisweni lo, uJesu wakubeka kwacaca ukuthi uJehova ufuna ukuthi abaphambukayo baphenduke kuye. Ubaba osemzekelisweni lo kazange alahle ithemba lokuthi ngelinye ilanga indodana yakhe yayizaphenduka. Mhla iphenduka wayibona “isebucwala,” kodwa kazange atshone ethikaza, wahle wayigijimela wayihlangabeza. Akuthandabuzwa ukuthi lokhu kuzabakhuthaza kakhulu asebetshiye ukukhonza ukuthi baphenduke masinya kuJehova. Ubuhlobo babo loJehova bungabe sebuphambanisekile njalo ukuphenduka kungabanzimela kumbe kubathelele inhloni. Kodwa kumele bazame sibili ngoba lasezulwini kuba lokuthokoza nxa bephenduka.​—Luk. 15:7.

15, 16. (a) Umzekeliso kaJesu wendodana yolahleko usifundisani? Nika izibonelo. (b) Umzekeliso lo usifundisani ngoJehova langoJesu?

¹⁵ Umzekeliso wendodana yolahleko ungasinceda ngani? Kumele silingisele isibonelo sikaJehova, ‘singalungi sedlulise’ size sale lokwamukela izoni eziphendukayo. Nxa singabemukeli abantu abaphendukayo siyabe ‘sesibulala’ ubuhlobo bethu loNkulunkulu.  (UmTshu. 7:16) Kulesinye futhi isifundo esisitholayo. Umuntu otshiya ibandla kumele simbone “njengemvu elahlekileyo,” hatshi ukuthi sithi asechithekile kawasabutheki. (Hubo. 119:176) Nxa singahlangana lomuntu osephambukile ebandleni kodwa engasuswanga, sizatshengisa yini ukuthi siyamthanda ngokumncedisa ukuthi aphenduke? Sizahle siyebatshela yini abadala ukuze bamsize? Lokhu sizakwenza kuphela nxa sisizwisise kuhle isifundo esisithola emzekelisweni kaJesu wendodana yolahleko njalo nxa sifuna ukusisebenzisa.

¹⁶ Khangela ukuthi abanye abake baphambuka njengendodana yolahleko bathini ngesihawu sikaJehova kanye lothando losizo abaluthola ebandleni. Omunye umfowethu owayeseleminyaka engu-25 esusiwe wathi: “Selokhu ngabuyiselwa, ngiyathokoza kakhulu ngoba ngathola ‘izikhathi zokuhlambulula’ okuvela kuJehova. (ImiSeb. 3:19) Wonke umuntu uyangithanda njalo uyangincedisa! Khathesi ngiyathokoza kakhulu ngokuba semulini yabantu bakaNkulunkulu.” Omunye udadewethu osakhulayo owaseleminyaka emihlanu ephambukile kodwa owacina ebuyele kuJehova wathi: “Ngiyaswela ukuthi ngiyichaze njani intokozo engaba layo lapho ngiphathwa ngothando uJesu akhuluma ngalo. Akulanto enhle ukwedlula ukuba senhlanganisweni kaJehova!”

17, 18. (a) Sifundeni emizekelisweni emithathu esixoxe ngayo? (b) Uzimisele ukwenzani?

¹⁷ Yiziphi izifundo esingazisebenzisa esizithole emizekelisweni le emithathu? Okokuqala, kumele sikwazi ukuthi uJehova nguye owenza ukuthi umuntu esimfundisa iBhayibhili athuthuke, thina ayisithi esikhulisayo. Okwesibili, asingeke sikhangelele ukuthi bonke ababuya emihlanganweni kumbe esifunda labo bazakhetha ukuba yizinceku zikaNkulunkulu. Okokucina, nxa abanye bangatshiya ukukhonza bahlamukele uJehova, akumelanga sihle sizitshele ukuthi abasoze bafa baphenduka. Nxa bangaphenduka, kumele silingisele uJehova, sibemukele ngazo zombili.

¹⁸ Sonke kasiqhubekeni sidinga ulwazi, ukuzwisisa kanye lokuhlakanipha. Ekubaleni kwethu imizekeliso kaJesu, kumele sizibuze ukuthi itshoni, yabhalelwani eBhayibhilini, singazisebenzisa njani izifundo esizitholayo, lokuthi isifundisani ngoJehova langoJesu. Singenza njalo siyabe sitshengisa ukuthi siyakuzwisisa sibili ukuthi amazwi kaJesu atshoni.