1, 2. Oñgeni Jesus apamekele ovalongwa vae monthiki atutiliswa?

 OVALONGWA vevali va Jesus, ankho vekahi nokuenda nokepundaumbo limwe likala onokilometu 11 okutunda ko Jelusalei. Ankho vanumana mokonda Jesus wankhia, iya ankho nkhele kavetyii okuti watutilisua. Liwa-liwa, Jesus amoneka iya avaendela kumwe. Iya “okuhimbikila ku Moisesi Novauli aveho, evehangununina ovipuka viapopiwa konthele yae muene, Movihonekwa aviho.” (Lucas 24:13-15, 27) Velitehelelele okuti vapamekwa iya avahambukwa unene mokonda “vahangununinwa nawa” Ovihonekwa.​—Lucas 24:32.

² Motyinthiki tyatyo otyo, ovalongwa ovo vevali avakondoka ko Jelusalei. Etyi vavasa ono apostolu, avevepopila etyi vamona. Putyina ankho nkhele vekahi nokupopia, Jesus evemonekela aveho. Ono apostolu vakalele unene nowoma, avahimbika okulipula inkha o Jesus umwe. Ombimbiliya ipopia oñgeni evepamekele, yati: “Waikula nawa omitima viavo opo vanoñgonoke ehangununo Liovihonekwa.”​—Lucas 24:45.

3. Omokonda yatyi pamwe tusoyela movilinga via Jeova, mahi oityi matyitukuatesako okutualako nehambu?

 ³ Nonthue pamwe tupondola okunumana unene, ngetyi ovalongwa ovo vanumanene. Namphila tukahi nokuumbila Jeova nombili, tupondola okusoya inkha ovanthu kavetavela tyina tuveivisa. (1 Coríntios 15:58) Ine hamwe tusoka okuti ovalongwa vetu Vombimbiliya kavekahi nokukula motyili. Vamwe puvo, pamwe kavetavela ku Jeova. Oñgeni tupondola okutualako nehambu movilinga viokuivisa? Otyipuka matyitukuatesako, okunoñgonoka nawa etyi onongeleka mba Jesus mbuhangununa. Pahe matulilongesa onongeleka ononthatu, iya atutale oityi tupondola okulilongesilako.

4. Ongeleka ya Jesus yomukuni ulele ihangununa tyi?

⁴ Tanga Marcos 4:26-29. Ongeleka ya Jesus yomukuni ulele ihangununa tyi? Omukuni, ulekesa ovaivisi Vouhamba, ombuto, ilekesa onondaka ovaivisi ovo vaivisa kovanthu vomutima waviuka. Omukuni ulinga etyi ovanthu aveho valinga ononthiki ambuho, “okulangalapo kounthiki, komuhuka apindukapo.” Opo ombuto ikule palamba omuvo, okupolelela monthiki ikunwa alo pokuteya. Mokueenda kuomuvo oo, “ombuto aimene aikulu unene.” Ombuto ‘muene ikula aike,’ katutu-katutu. Tupu, omunthu upameka oupanga wae na Jeova katutu-katutu, ine ufuena ku Jeova katutu-katutu. Tyina ekula motyili atokola okuumbila Huku, “wava ovinyango” pokupakula omuenyo wae ku Jeova, ambatisalwa.

5. Omokonda yatyi Jesus apopila ongeleka yomukuni ulele?

⁵ Omokonda yatyi Jesus apopila ongeleka oyo? Jesus uhanda tunoñgonoke okuti o Jeova ukulisa otyili momitima viovanthu vetyitavela. (Atos 13:48; 1 Coríntios 3:7) Onthue tukuna, atutapelela, mahi katupondola okukuluminya ovanthu okukula motyili. Ngomunthu wokuapopiua mongeleka, onthue katutyii oñgeni ovanthu vekula motyili. Mokonda tuasukalala vala nomuenyo wetu, tupondola olo umwe okuhetyimono tyina ombuto  Youhamba ikula momunthu. Mokueenda kuomuvo, ombuto oyo ipondola okuava ovinyango, iya omunthu ahimbika okuundapa nonthue movilinga viokuteya.​—João 4:36-38.

6. Oityi tuna okutavela konthele yokukula kuomulongwa umwe Wombimbiliya?

⁶ Oityi tupondola okulilongesila kongeleka oyo? Tete, tuesukisa okutavela okuti katutyii oñgeni omulongwa Wombimbiliya ekula motyili. Namphila tulinga atyiho tuvila opo tukuateseko omulongwa, katupondola okumukuluminya opo ambatisalwe. Mahi, nomutima weliola, tuimbuka okuti oe muene matokola inkha mapakula omuenyo wae ku Huku. Jeova utavela vala elipakulo lietu inkha tyilityili tumuhole.​—Salmo 51:12; 54:6; 110:3.

7, 8. (a) Oityi vali tulilongesila kongeleka ya Jesus yomukuni ulele? Ava ongeleka. (b) Oityi ongeleka oyo itulongesa konthele ya Jeova na Jesus?

⁷ Vali, okunoñgonoka etyi ongeleka oyo itulongesa, matyitukuatesako okuhasoyo inkha tutala okuti ovanthu tulongesa Ombimbiliya ngoti kavekahi nokukula motyili. Tuesukisa okupwa elundo. (Tiago 5:7, 8) Inkha tualinga atyiho tuvila opo tukuateseko omulongwa, mahi otyo ehekulu motyili, katyilekesa okuti onthue katutyivili okulongesa. Jeova uyeka ombuto yotyili ikulile momunthu weliola omutima, wafuapo pala okupiluluka. (Mateus 13:23) Ngotyo, katupondola vala okupopia okuti tuvanongo movilinga viokuivisa mokonda ovanthu tulongesa vekahi nokumbatisalwa. Jeova katale apa pelifwe ovanthu tualongesa opo apande ovilinga vietu viokuivisa. Mahi upanda ononkhono ononene tulinga.​—Tanga Lucas 10:17-20; 1 Coríntios 3:8.

⁸ Tatu, katutyivili okumona omapiluluko omunthu alinga momutima. Mongeleka, ovalinepi vamwe ankho valongeswa Ombimbiliya nomisionaliu, vemupopilile okuti vahanda okukala ovaivisi. Omisionaliu evepopila okuti tete vena okuyekapo okupuena. Ahuvu etyi vemupopila okuti apa vetyiyekapo palambale onohanyi ononyingi. Ankho vetyii okuti inkha vapuenena pokamphengi, Jeova uvemona, iya uyele ounkhembi. Ngotyo, avelipakelamo okuti inkha tuhanda okupuena, opo tupuenene pomisionaliu yatyo, ankho katyitavela, opo tutyiyekepo. Namphila omisionaliu ankho ketyii okuti ovalinepi ovo valinga epiluluko enene, ohole yavo onene na Jeova yevekuatesileko okulinga etokolo liaviuka.

9. Ongeleka yowanda wokufua ihangununa tyi?

⁹ Tanga Mateus 13:47-50. Ongeleka ya Jesus yowanda wokufua ihangununa  tyi? Jesus wapopia okuti ovilinga viokuivisa onondaka Mbouhamba vielifwa nokuyumba melunga owanda omunene wokufua. Ngetyi owanda wokufua ukuata “omihoko aviho vio nombisi,” novilinga vietu viokuivisa vieta mewaneno ovanthu vomihoko viatyo aviho. (Isaías 60:5) Otyo tyitalelwa kovanthu ovanyingi veya kovionge, no Pehinangelo omanima aeho. Vamwe povanthu ovo vekahi ngombisi “ongwa,” iya avakala mewaneno Liovakristau. Ovakuavo vekahi ngombisi “yehesilivila,” iya Jeova kevetavela.

10. Omokonda yatyi Jesus apopila ongeleka yowanda wokufua?

¹⁰ Omokonda yatyi Jesus apopila ongeleka oyo? Ngetyi tyapopiwa mongeleka oyo, okuyapula ombisi katyilekesa ekoyeso liahulililako mokueenda kuononkhumbi ononene. Mahi, tyilekesa etyi tyikahi nokumoneka mononthiki mbahulililako mbouye uno. Jesus walekesile okuti ha aveho vetavela onondaka Mbouhamba mavahande okukala ovaumbili va Jeova. Ovanyingi veya komaliongiyo etu ine ava tulongesa Ombimbiliya kavahande okupakula omuenyo wavo ku Jeova. (1 Reis 18:21) Ovakuavo alo umwe vayekapo okuya komaliongiyo. Ovakuendye vamwe, vena ovohe Ovakristau, mahi kavahande okufenda Jeova. Jesus wapopia okuti kese omunthu wesukisa okulinga etokolo liae muene. Inkha tulinga etokolo liaviuka, Jeova “metupande.”​—Ageu 2:7.

11, 12. (a) Oñgeni matupolo ouwa kongeleka yowanda wokufua? (b) Oityi ongeleka oyo itulongesa konthele ya Jeova na Jesus?

¹¹ Oñgeni matupolo ouwa kongeleka yowanda wokufua? Okunoñgonoka etyi ongeleka oyo ilongesa, matyitukuatesako okuhasoyo ine okunumana inkha omulongwa Wombimbiliya ine umwe povana vetu kahande okuumbila Jeova. Hamwe tualinga atyiho tuvila opo tumulongese. Omunthu kakala epanga lia Jeova mokonda wetavela vala okulongeswa Ombimbiliya ine mokonda ovohe veli motyili. Inkha kahande okutuminwa na Jeova, kapondola okukala omuumbili wae.

¹² Okuti otyo tyilekesa okuti vana  vayekapo otyili kamavakondoka vali mewaneno? Okuti tyilekesa okuti petupu vali ekevelelo pala una nkhele wehenepakule omuenyo wae ku Jeova? Au, mokonda putyina ononkhumbi ononene nkhele mbehenehimbike, ovanthu vena omphitilo yokukala omapanga a Jeova. Jeova uvepopila okuti: “Kondokei kuame, iya naame andyikondoka kuonwe.” (Malaquias 3:7) Otyo, tyapopiwa nawa mongeleka ya Jesus yomona omupeseli.​—Tanga Lucas 15:11-32.

13. Ongeleka yomona omupeseli ihangununa tyi?

¹³ Ongeleka ya Jesus yomona omupeseli ihangununa tyi? He wokankhenda wapopiwa mongeleka, ulekesa Tate yetu woluembia, Jeova. Omona wokuapesela epingo liae liakolela, ulekesa ovanthu vayekapo ewaneno Liovakristau. Ovanthu ovo, vokuaya mouye wa Satanasi, vekahi ngatyina veli “kotyilongo tyokokule,” kokule na Jeova. (Efésios 4:18; Colossenses 1:21) Konyima, vamwe vaimbuka okuti valinga onkhali onene, iya avatokola okukondoka ku Jeova. Otyo tyesukisa ononkhono, mahi mokonda veliola omutima, nokuelivela mokonda yetyi valingile, Jeova uveevela, iya uvetambula nawa.​—Isaías 44:22; 1 Pedro 2:25.

14. Omokonda yatyi Jesus apopila ongeleka yomona omupeseli?

¹⁴ Omokonda yatyi Jesus apopila ongeleka oyo? Jesus walekesa okuti Jeova tyilityili uhanda vana vayekapo okumufenda vakondoke. He wapopiwa mongeleka, ankho una onthumbi yokuti omona wae makondoka. Etyi he amonena omona wae “kokule” ukahi nokuya, emuhatekela. He ankho uhanda omona wae anoñgonoke okuti watambulua nawa. Ongeleka oyo  ilunda vana vayekapo otyili opo vakondoke liwa ku Jeova. Oupanga wavo na Jeova hamwe watenda, vapondola okulimbililwa, iya otyo tyipondola okuvepuiya unene okukondoka, mahi otyiwa okulinga ononkhono. Tyina vamakondoka, Jeova, na Jesus, no noandyu vahambukua.​—Lucas 15:7.

15, 16. (a) Oityi tulilongesila kongeleka ya Jesus yomona omupeseli? Ava onongeleka mbumwe. (b) Oityi ongeleka oyo itulongesa konthele ya Jeova na Jesus?

¹⁵ Oñgeni matupolo ouwa kongeleka yomona omupeseli? Tuna okuhetekela ongeleka yoluembia lwa Jeova. Tyina umwe amakondoka mewaneno, tuhakalei “ovaviuki unene” iya atuhemutambula nawa. Otyo tyipondola okunyona oupanga wetu na Jeova. (Eclesiastes 7:16) Otyipuka otyikuavo tupondola okulilongesila kongeleka oyo, okutala una wayekapo ewaneno ngatyina “ongi yavomba,” ipondola okukondoka. (Salmo 119:176) Mahi inkha tumona omunthu watunda mewaneno, okuti matulingi atyiho tuvila opo tumukuateseko okukondoka? Okuti matukapopia liwa novakulu vewaneno opo vemukuateseko? Matulingi ngotyo inkha tunoñgonoka nawa ongeleka ya Jesus, nokuendelamo.

¹⁶ Vana vakondoka, vapandula unene okankhenda ka Jeova, nohole, nombatelo yewaneno. Omukuatate umwe wakalele kondye yewaneno omanima 25, wati: “Etyi nakondoka mewaneno, ehambu liange liatuaileko nokuliyawisa putyina Jeova ampha ‘ononthiki mbomapole.’ (Atos 3:19) Aveho vena ohole, iya velikuatesako! Pahe ndyikahi pokati kombunga imwe ikahi nawa, ina oupanga omuwa na Huku.” Omphange umwe wakalele kondye yewaneno omanima etano, wati: “Nahuvile unene etyi namona ovakuatate vandekesa oluembia ngoolu Jesus apopile. Okukala meongano lia Jeova otyiwa unene!”

17, 18. (a) Oityi tuelilongesila konongeleka ombo ononthatu? (b) Oityi tuatokola okulinga?

¹⁷ Oityi tuelilongesila konongeleka ombo ononthatu? Tete, tuanoñgonoka okuti katutyii oñgeni omulongwa Wombimbiliya ekula motyili. O Jeova vala utyii. Vali, tuhasokei okuti aveho veya komaliongiyo etu, na vana tulongesa Ombimbiliya mavahande okuumbila Jeova. Tatu, namphila vamwe vayekapo okuumbila Jeova, tuhasokei okuti kamavakondoka vali. Tyina vamakondoka, tuvetambulei nawa, monkhalelo ilekesa oluembia lwa Jeova.

¹⁸ Kese omunthu atualeko okuovola enoñgonoko, nekungunyiko, nonondunge. Tyina utanga onongeleka mba Jesus, lipula okuti: ‘Oityi ongeleka ei ihangununa? Omokonda yatyi yapakelwa Mombimbiliya? Oñgeni ndyipondola okuendela muetyi ilongesa? Oityi indongesa konthele ya Jeova na Jesus? Inkha tulinga ngotyo, matulekesa okuti tuanoñgonoka etyi onondaka mba Jesus mbuhangununa.