1, 2. Jesusca ¿imashinata pai causarishca punllallata paipa catijcunataca animarca?

JESÚS causarishca punllallatami Jesuspa ishcai catijcunaca Jerusalenmanda shuj carulla llactaman chaquilla rinajurca. Paicunaca Jesús causarishcata na yachashpami llaquilla rinajurca. Shina llaquilla rinajujpimi Jesusca ricurishpa paicunataca animarca. ¿Imashinata animarca? ‘Dios escribichishca Shimipi paimanda tucui imata nijushcatami Moisés escribishca shimicunamanda callarishpa, Dios ima nishcata villajcuna imata villashcatapash tucuita villajurca’ (Luc. 24:13-15, 27). Shina aliguta intindichishpa yarichijpimi paicunaca tucui shunguhuan cushijurca (Luc. 24:32).

² Jesuspa ishcai yachajujcunaca chai chishillata Jerusalenman tigrashpami apostolcunamanga tucui ima pasashcata parlarca. Shina parlanajujpillatami Jesusca paicunamanbash ricurirca. Shinapash apostolcunaca ninanda manllarishpami Jesús ciertopacha chaipi shayajujtaca na cringapaj munarca. Chaimandami Jesusca ‘Dios escribichishca Shimicunapi imata nijushcata yachai ushachun paicunapa yuyaita pascarca’ (Luc. 24:45).

3. a) Huaquinbica ¿imamandata llaquirinchi, desanimarinchi? b) Ama desanimarichunga ¿imata ayudanga?

³ Huaquinbica ¿imamandata ñucanchicunapash llaquirinchi, desanimarinchi? Huaquinbica cutin cutin villachijpipash gentecunaca  na uyangapaj munanllu (1 Cor. 15:58). Bibliata yachajuj gentecunapash huaquinbica Jehovata sirvingapaca na munanllu. Huaquingunacarin Jehovamandaca ñana uyanayachinllu. Chaicunata ricushpa ama desanimaringapaca Jesuspa quimsa chimbapuraicunata aliguta intindishpa yachajushunchi.

4. Tarpuj runa puñushca chimbapuraica ¿imatata ricuchin?

⁴ (Marcos 4:26-29, liingui.) Tarpuj runa puñushca chimbapuraica ¿imatata ricuchin? Tarpuj runaca Diospa Reinomanda villachinajuj huauquipanicunami can. Cutin muyuca Diospa Reinomanda ali villaicunami can. Tarpuj runamanda parlashpaca paica chaishuj gentecunashnallatami ‘tutayajpica puñushpa, punllayajpica jatarishpa causan’. Shinallata tarpushca punllamanda cozechana punllacamanga asha ashami chai tarpushca muyuca viñan, viñana tiempopi hojacunapash ricurin, sisan, fucunbash. Gentecunapash shinallatami can. Asha ashami Jehová Diosmanga quimirin. Viñana tiempopimi paicunapash asha asha viñarishpa Jehovata sirvingapaj munan. Shinami paicunapash shuj plantagu fucunshna Jehová Diosman mingarishpa bautizarin.

5. ¿Imamandata Jesusca tarpuj runamanda parlarca?

⁵ ¿Imamandata Jesusca tarpuj runamanda parlarca? Jehová Diosmi alicachishpa chasquij gentecunapa shungupica Bibliapa ali yachachishcacunataca viñachin. Chaita aliguta intindichingapami Jesusca tarpuj runamanda parlarca (Mat. 5:3; 1 Cor. 3:7). Ñucanchicunapash shuj muyuguta tarpushpa chai muyugupi yacuta churajcunashnami canchi. Shinapash ñucanchi munashca horaspi chai muyuguta viñachitaca na ushanchichu. Imashinami tarpuj runaca muyu imashina viñajtaca na yachan, shinallatami ñucanchicunapash ali villaicuna gentecunapa shungupi imashina viñarijujtaca na yachanchi. Shinapash tiempo yalijpica fucuna tiempo chayajpishnami paicunaca bautizarishpa ñucanchihuan igual villachishpa catin (Juan 4:36-38).

6. Bibliamanda yachajuj gentecunamandaca ¿imatata intindina capanchi?

⁶ ¿Imatata tarpuj runamandaca yachajunchi? Pundapica intindinami canchi, Bibliata yachajujcunaca na ñucanchi munashca tiempopichu fucurin. Ali ayudashca jahuapash Bibliata yachajujcunataca bautizarinami cangui nishpaca na atichijunachu canchi. Ashtahuangarin, ñucanchicuna humilde caimandami Jehovata sirvinata o na sirvinataca paicunallata agllachun saquina canchi. Jehovata tucui shunguhuan juyaimandami Jehovaman mingarina can. Jehová Diosca paita tucui shunguhuan juyashpa paiman mingarijpillami chasquin (Sal. 51:12; 54:6; 110:3).

7, 8. a) Tarpuj runamandaca ¿imacunatallata yachajupanchi? Shuj ejemplota nipai. b) Tarpuj runapa chimbapuraipica ¿imatata Jehová Diosmandapash Jesusmandapash yachajupanchi?

⁷ Shinallata tarpuj runamandaca ¿imatata yachajunchi? Bibliata yachajujcuna na ucha ñaupaman catijpica na desanimarishpami pacienciata charina canchi (Sant. 5:7, 8). Yachachijpipash na bautizarijpica na pensanachu canchi, ñuca nali yachachijpimi na bautizarin nishpa. Jehová Diosca cambiangapaj munaj gentecunapa shungupillami ali villaicuna viñachunga ayudan (Mat. 13:23). Shinaca, ali villachijcuna cajta ricungapaca mashna gentecunata bautizarichun ayudashcataca na ricunachu canchi. Jehová Diosca gentecunata ali ayudangapaj imashina esforzarijujtami ricun (Lucas 10:17-20; 1 Corintios 3:8, liingui).

⁸ Tarpuj runamandaca ¿imatata ashtahuan yachajunchi? Gentecuna paicunapa shungupi imashina cambianajujtaca na ricui ushanchichu. Shuj ejemplota ricupashun.  Shuj misioneroca shuj cusahuarmimanmi Bibliata yachachi callarirca. Paicunaca congregacionhuan villachinaman llujshingapami munarca. Chaimandami misioneroca nirca, pundapica tabacota chupanatami saquina canguichi nishpa. Chaipimi paicunaca nirca, tabacota chupanataca ñami unaillata saquishcanchi nishpa. Paicuna shina nijpimi misioneroca manllarishca uyajurca. Shinapash ¿imamandata paicunaca tabacota chupanata saquishcarca? Paicunaca Jehová Dios tucuita ricujujtami ali intindishcarca. Chaimandami pensarca, misioneromanda pacalla tabacota chupajunaca nalichu can. Pacalla chupajunapa randica misioneropa ñaupajpipash chupashpa catishun o tabacota chupanataca saquitapacha saquishun nishpami pensarishcarca. Misionero na cuenta japijpipash chai cusahuarmica Jehová Diosta tucui shunguhuan juyanatami yachajushcarca.

9. Linllimanda chimbapuraica ¿imatata ricuchin?

⁹ (Mateo 13:47-50, liingui.) Linllimanda chimbapuraica ¿imatata ricuchin? Jesusca nircami, linllita yacuman shitanaca, Diospa Reinomanda tucui llactacunapi villajuj cuendami can nishpa. Shinaca, imashinami linllita yacuman shitajpica tucui imalla tiashca ashtaca pescadocuna japirin, shinallatami ali villaicunata villachijpica tucui clase gentecuna alicachin (Is. 60:5). Chaimandami ashtaca gentecunaca Jatun Tandajuicunamanbash, Jesús Huañushcata Yarina Tandanajuicunamanbash cada huata rin. Huaquingunaca ali pescadocunashna caimandami congregacionbi huauquipanicuna tucun. Cutin, nali pescadocunashna cajpica Jehová Diosca na chasquinllu.

10. ¿Imamandata Jesusca linllimanda parlarca?

¹⁰ ¿Imamandata Jesusca linllimanda parlarca? Linlli chimbapuraipica ali o nali pescadocunata agllanatapashmi parlajun. Chai agllaica na Jatun Manllanai Llaqui Punllacunapichu canga. Cai tucuri punllacunapi ima pasajujtami ricuchijun. Huaquinguna ali villaicunata uyashpapash Jehovata na sirvingapaj munashcata intindichingapami Jesusca linllimanda parlarca. Taucacunaca tandanajuicunaman shamushpapash, Bibliata yachajui callarishpapash Jehovaman mingaringapaca na munanllu (1 Rey. 18:21). Cutin shujcunaca tandanajuicunamanbash ñana shamunllu. Huaquin jovengunacarin, Jehovata rijsishpa viñashpapash Jehovata tucui shunguhuan juyanataca na yachajushcachu. Imashina cajpipash, Jehová Diosta sirvinataca cada unomi ricuna can nishpami Jesusca intindichirca. Jehová Diosta sirvinata agllajcunaca ‘shamuchun munashca’ o alicachishca gentecunashnami canga (Ageo 2:7).

11, 12. a) ¿Imatata linlli chimbapuraimandaca yachajupanchi? b) Chai chimbapuraipica ¿imatata Jehová Diosmandapash Jesusmandapash yachajupanchi?

¹¹ ¿Imatata linllimandaca yachajunchi? Bibliata yachajujcuna o ñucanchi huahuacunaca na Jehovata sirvi callarijpica na llaquirijunachu canchi. Paicuna Jehovata na sirvingapaj munajpi ama desanimarichunmi linllimanda chimbapuraica ayudan. Chaimandami na pensana canchi, Bibliata yachajui callarimanda o Testigo taitamamacunahuan viñaimandaca tucuipimi Jehová Diostaca cazunga nishpa. Jehová Diosta na cazungapaj munajcunataca Jehová Diosllatami paita sirvijcunapuramandaca llujchinga.

¹² Shinaca congregacionmanda caruyashcacunataca ¿nuncachu na congregacionman tigrachun saquinga? ¿O na bautizaringapaj munajcunaca nali pescadocunashna quedashcatachu nijun? Na. Chai gentecunaca Jatun Manllanai Llaqui Punllacuna callaringacamanmi oportunidadta charinga. Chai tiempocamanmi Jehová Diosca ‘ñucapaman tigrarimujpica, ñucapashmi cangunapaman tigrasha’ nishpa  shuyajun (Mal. 3:7). Chai yuyaitallata intindichingapami Jesusca tucuita yanga tucuchishca churimanda parlarca (Lucas 15:11-32, liingui).

13. Tucuita yanga tucuchishca churimanda chimbapuraica ¿imatata ricuchin?

¹³ Tucuita yanga tucuchishca churimanda chimbapuraica ¿imatata ricuchin? Jesús nishca shinaca, shuj churica taitata herenciata mañashpami caru llactaman rishpa tucuilla herenciata tucuchin. Taitaca ñucanchita ninanda juyaj Jehová Diostami ricuchijun. Churica congregacionmanda caruyashcacunatami ricuchijun. “Caru llactaca” Diablopa nali mundotami ricuchijun (Efes. 4:18; Col. 1:21). Congregacionmanda caruyashca cashpapash huaquingunaca aliguta pensarishpami tiempohuanga shinlli cajpipash Jehovapa organizacionman tigramun. Tucui shunguhuan arripintirishpa tigramujpica Jehová Diosca perdonanmi (Is. 44:22; 1 Ped. 2:25).

14. ¿Imamandata Jesusca tucuita yanga tucuchishca churimanda parlarca?

¹⁴ ¿Imamandata Jesusca tucuita yanga tucuchishca churimanda parlarca? Congregacionmanda caruyashcacuna Jehová Diosman tigrachun shuyajushcata ricuchingapami Jesusca chai chimbapuraimanda parlarca. Chai chimbapuraimanda parlashpaca, taitaca siempremi ñuca churica tigramungami nishpa shuyajurca. Chaimandami caruta shamujta ricushpallata taitaca churita tuparingapaj calpashpa rirca. Chaita liinami congregacionmanda caruyashcacunataca Jehová Diosman uchalla tigrachun ayudashca. Congregacionmanda caruyashcacunaca espiritualmente shaijushca caimanda, pinganayachimandami tigraitaca na ushashachu yanga. Shinapash tigrashpaca alipachami canga. Tigrajpica Jehová Diospash Jesuspash angelcunapash ninandami cushijunga (Luc. 15:7).

15, 16. a) Tucuita yanga tucuchishca churimanda chimbapuraipica ¿imatata yachajupanchi? Huaquin ejemplocunata nipai. b) Chai chimbapurapica ¿imatata Jehová Diosmandapash Jesusmandapash yachajupanchi?

¹⁵ Tucuita yanga tucuchishca churimanda chimbapuraica ¿imashinata ayudan? Chai chimbapuraica Jehová Diospa ejemplota catichunmi ayudan. Ñucanchicunaca tucuita ali rurajunshnalla tucushpa congregacionman tigramujcunata nali tratangapaca na munanchichu. Ima horapash na pandarinshna tucuita ali rurajcuna tucushpaca ñucanchillatami  Taita Diosmanda caruyanajunchiman (Ecl. 7:16). Shinallata tucuita yanga tucuchishca churimanda chimbapuraica congregacionmanda caruyashcacunata ‘chingashca llamagucunatashna’ ricuchunmi ayudanga (Sal. 119:176). Shinaca congregacionmanda caruyashca cashpapash na expulsai tucushcacunata tarishpaca ¿imatata rurashun? ¿Congregacionman tigramuchun ayudashunllu? Ancianocuna paicunata ayudachunga ¿uchallachu ancianocunaman villashun? Tucuita yanga tucuchishca churimanda chimbapuraita ali intindishca cashpaca uchallami ayudashun.

¹⁶ Congregacionmanda caruyashcacunaca Jehová Dios paicunata llaquishcamanda, congregacionbi huauquipanicuna juyaihuan ayudashcamandami tucui shunguhuanmi agradicin. 25 huatacunata expulsashca cashca huauquica ninmi: “Jehová Dios ayudajpimi congregacionman tigramushpaca ‘samashpa causana’ tiempota charishcani (Hech. 3:19). Congregacionbica tucuicunami llaquishpa ayudahuashca. Tucuicunahuanmi shuj familia cuenda sintirini” nin. Shinallata, congregacionmanda picha huatacunata caruyashpa tigramushca shuj joven paniguca ninmi: “Turicuna, ñañacuna Jesús nishcashna ñucata juyashcamandaca ninandami cushijuni. Jehovapa organizacionbi canaca shuj jatun bendicionmi can” nishpa.

17, 18. a) Jesuspa quimsa chimbapuraicunamandaca ¿imatata yachajupashcanchi? b) ¿Imatata cada uno rurana capanchi?

¹⁷ Jesús yachachishca quimsa chimbapuraicunamandaca ¿imatata yachajunchi? 1) Bibliata yachajujcunaca na ñucanchi munashca tiempopichu fucurin. Jehová Diosllami gentecunataca shuj plantagutashna viñachin. 2) Tandanajuicunaman rijcuna o Bibliata yachajujcunaca na tucuicunachu Jehová Diosta sirvi callaringa. 3) Congregacionmanda caruyashcacunapash Jehovaman tigramuita ushanmi. Tigramujpica cushijushpami chasquina canchi.

¹⁸ Shinaca cada uno ali yachaita mirachijushcata, ali intindishcata, aliguta yarishpa purijushcata ricuchishpa catishunchi. Jesús parlashca chimbapuraicunata Bibliapi liishpaca pensaripashunchi ¿imamandata Bibliapi escribishca tiajun? ¿Imatata yachajuni? Yachajushcataca ¿imashinata pactachisha? ¿Imatata Jehová Diosmanda, Jesusmandaca yachajuni? nishpa. Shinami Jatun Ali Yachachij Jesuspa shimicunataca ali intindi ushashun.