1, 2. Akapeea a Iesu i te akamaroiroi anga i tana au pipi i te rā o tona tuakaouanga?

TE AERE ra tetai nga pipi a Iesu ki tetai oire e 11 kiro mita te mamao mei Ierusalema. Taitaia tikai to raua ngakau no te mea kua mate a Iesu e kare raua i kite e kua akatuakaouia aia. Poitirere ua ake, kua mama mai a Iesu kia raua e kua aere kapiti ratou. I reira kua “akakite maira aia kia raua i te au tuatua katoa nona, i tataia ra, mei ia Mose e tae rava akera ki te au peroveta katoa.” (Luka 24:13-15, 27) Tei tupu, kua pumaana te nga pipi e kua maana rava to raua ngakau no te mea kua “akataka mai,” me kore kua akamārama meitaki a Iesu i te au irava kia raua.—Luka 24:32.

² I taua aiai ra, kua oki nga pipi ki Ierusalema. Te kite anga raua i te au apotetoro, kua akakite raua i tei tupu kia raua. Ia raua e tuatua ra, kua mama mai a Iesu kia ratou katoatoa. Kua mataku tikai te au apotetoro e kua ekoko e me ko Iesu rai teia. Te akakite maira te Pipiria e i akapeea a Iesu i te akamaroiroi anga ia ratou: “Akamārama atura aia i to ratou ngakau, kia kite ratou i te tuatua i tataia.”—Luka 24:45.

3. Eaa te tumu ka taitaia ai tatou i roto i te angaanga a Iehova, inara akapeea tatou e vai mataora ua ai?

³ I tetai au taime penei ka taitaia katoa tatou, mei te au pipi rai. Noatu e te tavini maroiroi ra tatou ia Iehova, penei ka taitaia tatou me kare te tangata e ariu mai ki ta tatou angaanga  tutuanga. (1 Kori. 15:58) Me kore ka manako tatou e kare ta tatou aronga apii Pipiria e tere ana ki mua. Penei ka akaruke tetai pae ia Iehova. Akapeea tatou e vai mataora ua ai i roto i ta tatou angaanga orometua? Tetai apinga ka tauturu ia tatou, ko te mārama pu tikai anga i te aiteanga o ta Iesu au akatutuanga. I teianei ka akara tatou e toru akatutuanga kia kite i te au apiianga no te reira.

4. Eaa te aiteanga o ta Iesu akatutuanga no te tangata ruru ua tei moe?

⁴ E tatau ia Mareko 4:26-29. Eaa te aiteanga o ta Iesu akatutuanga no te tangata ruru ua tei moe? Te akatutu maira te tangata ruru ua i te au aronga tutu aere i te Patireia, e te akatutu ra te ua i te karere ta ratou e tutu aere ra ki te aronga ngakau tae. Te rave ua ra te tangata ruru ua i te au mea noa e raveia ana e te katoatoa, “te moe ua ra aia i te po, e te ara ua ra i te ao.” E pou ana tetai tuatau e tupu ei te ua, mei te rā i tanuia ai ki te rā kokotianga. I taua tuatau ra, “te kao ra e te tupu ua ra taua ua ra.” “Na te one uaorai oki i akatupu ake,” e te tupu marie ua ra. Mei te reira katoa, ka marie rai te tupuanga o tetai tangata i te pae vaerua e te akavaitata anga atu kia Iehova. Me taeria te tuatau e iki ei aia i te tavini i te Atua, ka uua aia na te akatapu anga i tona oraanga kia Iehova e kia papetitoia.

5. Eaa ra a Iesu i akakite mai ei i te akatutuanga o te tangata ruru ua tei moe?

⁵ Eaa ra a Iesu i akakite mai ei i teia akatutuanga? Te tauturu maira a Iesu ia tatou kia mārama e na Iehova e akatupu i te tuatua mou i roto i te ngakau o “te aronga i akonoia no te ora mutu kore.” (Anga. 13:48; 1 Kori. 3:7) Na tatou e tanu e e tamauu ki te vai, inara kare tatou e rauka i te māro atu me kore i te taviviki i te tupu anga o te ua. Mei te tangata rai i roto i te akatutuanga, kare tatou e kite i te tupuanga. Ia tatou e rave ra i te au mea o te oraanga, penei kare roa tatou e kite i te tupuanga o te karere Patireia i roto i tetai tangata. Tera ra, i te tuatau ka aereia, penei ka uua mai, e oti ka angaanga kapiti te pipi ou kia tatou i roto i te angaanga kokotianga.—Ioa. 4:36-38.

6. Eaa ta tatou ka āriki no runga i te tupuanga o tetai tangata apii Pipiria?

⁶ Eaa ta tatou ka tamou mai mei teia akatutuanga? Te mea mua, ka anoanoia tatou kia āriki e kare e rauka ia tatou i te taviviki i te tupuanga o tetai tangata apii Pipiria i roto i te tuatua mou. Noatu e ka tauta maata tatou i te tauturu e te turuturu i te tangata apii, auraka rava tatou e māro iaia kia papetitoia. Mari ra, kia āriki akaaka ua tatou e nana uaorai te ikianga kia akatapu i tona oraanga ki te Atua. Ka āriki a Iehova i to tatou akatapuanga me inangaro tikai tatou iaia.—Sala. 51:12; 54:6; 110:3.

7, 8. (a) Eaa ta tatou ka tamou mai mei te akatutuanga a Iesu o te tangata ruru ua tei moe? Akakite mai i tetai akaraanga. (e) Eaa ta teia e apii maira ia tatou no runga ia Iehova raua ko Iesu?

⁷ Te rua, me mārama tatou i te apiianga i roto i te akatutuanga, kare tatou e taitaia me kare ta tatou angaanga apii e puapingaia. Ka anoanoia tatou kia akakoromaki. (Iako. 5:7, 8) Me kua rave tatou i ta tatou ka rauka ei tauturu i te tangata apii Pipiria e kare rai te tuatua mou i akaia i roto i tona ngakau, kare te aiteanga e kare tatou i te au puapii meitaki. Ka akatika a Iehova i te ua o te tuatua mou kia tupu i roto i te ngakau o te aronga akaaka anake tei inangaro i te taui. (Mata. 13:23) No reira, auraka tatou e manako e e puapinga kore ta tatou angaanga orometua no te mea kare e maata ana te aronga i papetitoia. I roto i te mata o Iehova, kare te tu e ariu maira te tangata ki ta tatou angaanga tutu aere i te mea puapinga. Mari ra, te akaperepere  ra aia i ta tatou tautaanga maroiroi.—E tatau ia Luka 10:17-20; 1 Korinetia 3:8.

⁸ Te toru, kare e rauka ia tatou i te kite i te au tauianga e tupu ra i roto i te ngakau o tetai tangata. Ei akaraanga, ko tetai nga tokorua e apii ra i te Pipiria ma tetai mitinari, akakite raua kiaia i to raua inangaro kia riro mai ei papuritia kare i papetitoia. Kua akamaara aia kia raua e ka anoanoia raua kia akamutu i te kai avaava na mua. Poitirere aia i te akakite anga raua e kua akamutu takere raua i te kai avaava. Kua mārama raua e te kite ua maira a Iehova ia raua e kai avaava ra, e te rikarika ra aia i te tu pikikaa. No reira, e ikianga ta raua kia kai i te avaava i mua i te mitinari me kore kia akamutu takiri i te kai avaava. Noatu e kare te mitinari i kite ana i te tauianga maata ta teia nga tokorua i rave, no to raua inangaro ia Iehova i tauturu ia raua kia rave i te tukuanga tika meitaki.

9. Eaa te aiteanga o te akatutuanga no te kupenga?

⁹ E tatau ia Mataio 13:47-50. Eaa te aiteanga o ta Iesu akatutuanga no te kupenga? Kua akaaite a Iesu i te tutuanga i te karere Patireia ki tetai kupenga i tukuia ki roto i te tai. Mei tetai kupenga rai me mou “te ika e manganui te tu,” te akaariu maira ta tatou angaanga tutuanga i te mirioni ua atu tangata. (Isa. 60:5) Te akapapuia ra teia e te mirioni ua atu tangata tei tae mai ki ta tatou au uruoaanga e ki te Akamaaraanga i te au mataiti tataki tai. Tetai pae o teia aronga aite ratou ki te ika “memeitaki,” e ka riro ratou ei tuanga no te putuputuanga Kerititiano. Tetai pae ra, kua aite ratou ki te ika “kikino,” e kare a Iehova e āriki ia ratou.

10. Eaa ra a Iesu i akakite mai ei i te akatutuanga no te kupenga?

¹⁰ Eaa ra a Iesu i akakite mai ei i teia akatutuanga? Ko te akataka anga i te ika i roto i te akatutuanga, kare te reira e tuatua ra no runga i te akavaanga openga i te tuatau o te mate maata. Mari ra, te akaari maira teia i te ka tupu i te tuatau openga o teia akatere anga. Kua akaari mai a Iesu e kare te katoatoa tei reka i te karere Patireia e inangaro i te tavini ia Iehova. E manganui tei tae mai ki ta tatou uipaanga me kore tei apii i te Pipiria, kare ra ratou e inangaro i te akatapu i to ratou oraanga kia Iehova. (1 Ari. 18:21) Tetai pae, kare ratou e oki akaou mai ana ki te au uipaanga. Kua utuutuia tetai aronga mapu e te au metua Kerititiano, inara kare ratou e inangaro ia Iehova. Kua akamārama a Iesu e na tatou tataki tai e rave i ta tatou uaorai tukuanga tika. Me rave tatou i te tukuanga tika meitaki, ka riro mai tatou ei aronga “tei inangaroia” e Iehova.—Haga. 2:7.

11, 12. (a) Eaa te puapinga ka rauka ia tatou mei te akatutuanga o te kupenga? (e) Eaa ta teia e apii maira ia tatou no runga ia Iehova raua ko Iesu?

¹¹ Eaa te puapinga ka rauka ia tatou mei te akatutuanga o te kupenga? Me mārama tatou i te apiianga o teia akatutuanga, kare tatou e taitaia maata roa me kare tetai tangata apii Pipiria me kore ta tatou tamariki e inangaro i te tavini ia Iehova. Penei kua rave tatou i ta tatou i rauka i te tereni iaia. Kare tetai tangata e riro mai ei oa no Iehova no te mea ua nei e kua āriki aia i tetai apii Pipiria me kore kua utuutuia aia i roto i te tuatua mou. Me kare aia e inangaro i te kauraro ki te mana akaaere o Iehova, kare rai e rauka iaia kia riro mai ei tavini no te Atua.

¹² Ko te aiteanga ainei e kare te aronga tei akaruke i te tuatua mou e rauka i te oki akaou mai ki te putuputuanga? Me kore me kare tetai tangata i akatapu ake i tona oraanga kia Iehova, kare ona manakonakoanga? Kare, te vai ra te tuatau nona kia riro mai ei oa no Iehova i mua  ake ka akamata ai te mate maata. Te pati maira a Iehova kia tatou e: “E ariu mai kotou kiaku, e naku e ariu atu kia kotou.” (Mala. 3:7) Te akapapuia ra teia i roto i te akatutuanga a Iesu no te tamaiti kaimoumou apinga.—E tatau ia Luka 15:11-32.

13. Eaa te aiteanga o te akatutuanga o te tamaiti kaimoumou apinga?

¹³ Eaa te aiteanga o ta Iesu akatutuanga no te tamaiti kaimoumou apinga? Te akatutu maira te metua tangi aroa i roto i te akatutuanga i to tatou Metua aroa i te rangi, ko Iehova. Ko te tamaiti kaimoumou apinga, te akatutu ra i te aronga tei akaruke i te putuputuanga Kerititiano. Riro mai ratou ei tuanga no te ao o Satani, tei aite “ki te enua mamao,” koia oki kua mamao mei ia Iehova. (Ephe. 4:18; Kolo. 1:21) Muri mai, kua rako tangata teia aronga e kua oki mai kia Iehova. Te anoanoia ra te tautaanga maata, inara no to ratou tu akaaka e te tataraara tika tikai no ta ratou i rave, ka akakore a Iehova i ta ratou ara e ka āriki akaou ia ratou.—Isa. 44:22; 1 Pete. 2:25.

14. Eaa ra a Iesu i akakite mai ei i te akatutuanga o te tamaiti kaimoumou apinga?

¹⁴ Eaa ra a Iesu i akakite mai ei i teia akatutuanga? Te akaari maira a Iesu e e inangaro maata to Iehova kia oki mai te aronga tei akaruke Iaia. Kare roa te metua i roto i te akatutuanga i akakore ana i tona manakonakoanga e ka oki mai tana tamaiti. Te kite anga i tana tamaiti “tei te ngai mamao rai aia,” kua oro atu aia ki tana tamaiti. Kua inangaro te metua i tana tamaiti kia kite e kua āriki akaouia aia. Ka riro teia akatutuanga ei akakeu i te aronga tei akaruke i te tuatua mou kia oki viviki mai kia Iehova. Penei e paruparu tikai to ratou pirianga kiaia, e akama ratou, e penei e ngata roa ia ratou kia oki mai, tera ra ka puapingaia ta ratou tautaanga! Me oki mai ratou, ka rekareka maata a Iehova, a Iesu e te au angera.—Luka 15:7.

15, 16. (a) Eaa te au apiianga ta tatou ka tamou mai mei ta Iesu akatutuanga o te tamaiti kaimoumou apinga? Akakite mai i tetai nga akaraanga. (e) Eaa ta teia e apii maira ia tatou no runga ia Iehova raua ko Iesu?

¹⁵ Eaa te puapinga ka rauka ia tatou mei te akatutuanga o te tamaiti kaimoumou apinga? Ka anoanoia tatou kia aru i te akaraanga aroa o Iehova. Me oki mai tetai tangata ki te putuputuanga, kare tatou e inangaro kia “maata ua i te ketaketa kia tika” e kia kore e āriki iaia. Me pera tatou, ka akakinoia to tatou pirianga  kia Iehova. (Kohe. 7:16) Tetai atu apiianga ta tatou ka tamou mai mei te akatutuanga koia oki, kia āriki i tetai tangata tei akaruke i te putuputuanga ei “mamoe i ngaro,” penei ka oki mai aia. (Sala. 119:176) E me aravei tatou i tetai tangata tei akaruke i te putuputuanga, ka tauturu ainei tatou iaia kia oki mai? Ka akakite ainei tatou ki te aronga pakari kia rauka ia ratou te tauturu iaia? Ka akapera tatou me mārama e me taangaanga tatou i te apiianga mei ta Iesu akatutuanga.

¹⁶ Te aronga tei oki mai, te āriki rekareka ra ratou i to Iehova aroa ua e te tauturu a te putuputuanga. Tetai taeake tei akaateaia mei te putuputuanga no te 25 mataiti, karanga aia e: “Kua maata roa toku rekareka i te ārikiia anga au ki roto i te putuputuanga e kua kiteaia e au ‘te tuatau rekareka’ no ko ia Iehova. (Anga. 3:19) E tauturu maata taku i rauka mai mei te katoatoa! I teianei, e pamiri meitaki tikai toku i te pae vaerua.” Karanga tetai tuaine tei oki mai ki te putuputuanga i muri ake i te rima mataiti e: “Kare e rauka iaku i te akataka i toku manako i te kite anga i te aroa ta Iesu i tuatua, tei akaari pu tikaiia mai kiaku. E akameitakianga tikai kia riro ei tuanga no te akaaerenga a Iehova!”

17, 18. (a) Eaa ta tatou i tamou mai mei teia akatutuanga e toru? (e) Eaa ta tatou ka rave?

¹⁷ Eaa te au apiianga ta tatou ka tamou mai mei teia au akatutuanga e toru. Te mea mua, ka anoanoia tatou kia mārama e kare e rauka ia tatou i te taviviki i te tupuanga o tetai tangata apii Pipiria i roto i te tuatua mou. Na Iehova anake e akatupu i te reira. Te rua, e mea tau kore kia tapapa atu e ka inangaro te katoatoa tei kapiti mai kia tatou e tei apii i te Pipiria kia tavini ia Iehova. Te mea openga, noatu e ka akaruke tetai pae ia Iehova, auraka rava tatou e akakore i te manakonakoanga e ka oki mai ratou. Me oki mai ratou, ka tau tatou kia āriki ia ratou mei te Atua aroa rai, ko Iehova.

¹⁸ Ka tau tatou tataki tai kia kimi i te kite, te mārama, e te pakari. Me tatau koe i ta Iesu au akatutuanga, ui kia koe uaorai e: ‘Eaa te aiteanga o teia akatutuanga? Eaa ra te reira i tataia ai i roto i te Pipiria? Akapeea au me taangaanga i te apii taku i tamou mai? Eaa ta teia e apii maira iaku no runga ia Iehova raua ko Iesu? Me akapera tatou, te akaari ra te reira e kua mārama tatou i te aiteanga o ta Iesu i tuatua.