ʼE Ke “Mahino” Koa Ki Te Tohi-Tapu?
“Nee ina avahi . . . onatou atamai, ke natou mahino ki te Tohi tapu.”—LUKA 24:45.
1, 2. Neʼe fakalotomalohiʼi feafeaʼi e Sesu ʼana tisipulo ʼi te ʼaho ʼo tona fakatuʼuake?
KO TE ʼu tisipulo ʼa Sesu ʼe toko lua neʼe nā fagona ki te kolo ʼe tuʼu ia teitei kilometa ʼe 11 ki Selusalemi. Neʼe nā lotomamahi ʼuhi ko te mate ʼa Sesu pea neʼe mole heʼeki nā iloʼi ia te kua fakatuʼuake ʼo Sesu. Kaʼe fokifa pe kua ha ia Sesu ʼo natou haʼele fakatahi. Pea neʼe kamata leva e Sesu ia tana fakamahino kia naua te ʼu meʼa ʼo ʼuhiga mo ia, ʼi te Tohi-Tapu katoa, ʼo kamata “maia Moisese pea mo te kau polofeta fuli.” (Luka 24:13-15, 27) Neʼe nā lotofimalie ai pea neʼe kamata vela ʼonā loto, koteʼuhi neʼe “fakamahino” lelei age e Sesu ia te Tohi-Tapu kia naua.—Luka 24:32.
2 ʼI te afiafi pe ʼaia, neʼe toe liliu ia te ʼu tisipulo ʼe toko lua ki Selusalemi. ʼI te temi ʼae neʼe nā maʼu ai te kau apositolo, neʼe nā fakamatala kia natou ia te aluʼaga ʼae neʼe hoko. Pea ʼi te kei lolotoga ʼo tanā palalau, neʼe ha ia Sesu kia natou fuli. Neʼe matataku ai ia te kau apositolo pea neʼe natou feʼekeʼaki pe neʼe ko Sesu moʼoni. ʼE fakaha fenei ʼi te Tohi-Tapu pe neʼe ina fakalotomalohiʼi feafeaʼi ia natou: “Nee ina avahi . . . onatou atamai, ke natou mahino ki te Tohi tapu.”—Luka 24:45.
3. He koʼe ʼe feala ke tou lotovaivai ʼi tatatou tauhi ʼae kia Sehova? Kaʼe ʼe tou lava taupau feafeaʼi ia tatatou fiafia?
3 ʼI ʼihi temi, ʼe feala ke tou lotomamahi ʼaupito, ohage pe ko te kau tisipulo. Tatau aipe pe ʼe tou maʼumaʼua ʼi te tauhi ʼae kia Sehova, kaʼe ʼe feala ke tou lotovaivai mo kapau ʼe mole tali leleiʼi e te hahaʼi ia tatatou faifakamafola. (1 Kolinito 15:58) Peʼe lagi tou manatu ʼe mole tuputupu ʼatatou ako Tohi-Tapu. Pea lagi ko ʼihi kua natou liʼaki ia Sehova. Kaʼe ʼe tou lava taupau feafeaʼi koa ia tatatou fiafia ʼi tatatou minisitelio? Ko te faʼahi ʼae ka tokoni mai anai, ʼe ko tatatou mahino katoa ki te fakaʼuhiga ʼo te ʼu lea fakatata ʼa Sesu. ʼE tou vakaʼi anai ia lea fakatata ʼe tolu pea mo te ʼu ako ʼae ʼe feala ke tou taʼofi mai ai.
TE TAGATA NUNUSI PULAPULA ʼAE ʼE MOE
4. Kotea te fakaʼuhiga ʼo te lea fakatata ʼa Sesu ʼo ʼuhiga mo te tagata nunusi pulapula ʼae ʼe moe?
4 Lau ia Maleko 4:26-29. Kotea te fakaʼuhiga ʼo te lea fakatata ʼa Sesu ʼo ʼuhiga mo te tagata nunusi pulapula ʼae ʼe moe? Ko te tagata nunusi pulapula ʼe ina fakatata ia te kau faifakamafola ʼo te Puleʼaga. Pea ko te pulapula ʼe ina fakatata ia te logo ʼae ʼe natou fakamafola ki te hahaʼi fakamalotoloto. ʼE fai pe e te tagata nunusi pulapula ia te ʼu meʼa mahani ʼae ʼe fai e te hahaʼi fuli, ‘ʼe moe peʼe ʼalaʼala ʼi te poʼuli mo te ʼaho.’ ʼI te temi ʼae neʼe nunusi ai te pulapula ʼo aʼu ki te taʼukai, ʼe ʼaoga he temi ke tuputupu ai. Lolotoga te temi ʼaia, “e homo te pulapula pea mo tupu lelei.” ʼE tuputupu “toko tahi” ia te pulapula pea mo mamalie. ʼO toe feia pe, ʼe mamalie ia te tuputupu ʼa he tahi ʼi te faʼahi fakalaumalie peʼe ko tana fakaovi ʼae kia Sehova. ʼO kaku ki te temi ʼae kua fia tauhi ai ki te ʼAtua, ʼe ʼi ai tona fua ʼaki ia tana foaki ia tona maʼuli kia Sehova pea mo papitema.
Ko Sehova ʼae ʼe ina fakatuputupu ia te moʼoni ʼi te loto ʼo te hahaʼi lotolelei
5. He koʼe neʼe fai e Sesu ia te lea fakatata ʼo te tagata nunusi pulapula ʼae ʼe moe?
5 He koʼe neʼe fai e Sesu ia te lea fakatata ʼaia? ʼE loto e Sesu ke tou mahino, ʼe ko Sehova tokotahi pe ʼae ʼe ina fakatuputupu ia te moʼoni ʼi te loto ʼo te hahaʼi lotolelei. (Gaue 13:48; 1 Kolinito 3:7) ʼE tou to pea mo fakavai, kaʼe ʼe mole feala hatatou fakamalohiʼi pea mo fakaviliviliʼi ia te tuputupu. Pea ohage pe ko te tagata ʼae ʼi te lea fakatata, ʼe mole tou iloʼi pe ʼe hoko feafeaʼi ia te tuputupu. ʼI tatatou fakahoko ʼatatou gaue ʼi te ʼaho fuli, ʼe lagi mole tou tokagaʼi ia te tuputupu ʼo te pulapula ʼo te Puleʼaga ʼi he tahi. Kaʼe ʼaki te temi, ʼe feala ke fua ia te pulapula ʼaia, pea ʼe tou gaue fakatahi anai mo te tisipulo foʼou ʼaia ʼi te tanaki ʼo te taʼukai.—Soane 4:36-38.
6. Kotea ʼae ʼe tonu ke tou mahino ʼo ʼuhiga mo te tuputupu ʼa he ako Tohi-Tapu?
6 Kotea ʼae ʼe feala ke tou ako mai te lea fakatata ʼaia? ʼUluaki, ʼe tonu ke tou mahino ʼe mole feala hatatou puleʼi ia te tuputupu ʼa he ako Tohi-Tapu ʼi te moʼoni. Tatau aipe pe ʼe tou fai ia meʼa fuli moʼo tokoni pea mo lagolago ki ai, kaʼe ʼaua tatatou fakakinauʼi ia ia ke papitema. ʼE tonu ke tou mahino ʼaki he agavaivai, ʼe ko ia totonu pe ʼae ka ina filifili pe ʼe ina foaki anai tona maʼuli ki te ʼAtua. ʼE tali e Sehova ia tatatou foaki ia totatou maʼuli kia te ia, mo kapau ʼe tou ʼoʼofa moʼoni kia te ia.—Pesalemo 51:14; 54:8; 110:3.
7, 8. (1) Kotea te tahi ʼu ako ʼe feale ke tou taʼofi mai te lea fakatata ʼa Sesu ʼo ʼuhiga mo te tagata nunusi pulapula ʼae ʼe moe? Tuku mai he faʼifaʼitaki. (2) Kotea ʼae ʼe tou ako mai ai ʼo ʼuhiga mo Sehova pea mo Sesu?
7 Lua, ko tatatou mahino ki te ako ʼo te lea fakatata ʼaia, ʼe tokoni mai anai ke mole tou lotovaivai moka ʼe mole tou sisio ʼi te kamata, ki te ʼu fua ʼo tatatou faiako. ʼE ʼaoga ke tou kataki fualoa. (Sakopo 5:7, 8) Kapau neʼe tou faiga malohi moʼo tokoni ki he ako, kaʼe ʼe mole tuputupu te moʼoni ʼi tona loto, ʼe mole fakaʼuhiga leva ʼe mole lelei ia tatatou faʼahiga faiako. ʼE fakagafua e Sehova ke tuputupu pe ia te pulapula ʼo te moʼoni ʼi te loto ʼo he tahi ʼe lotolelei ke ina fai ni fetogi. (Mateo 13:23) Koia, ʼe mole tonu ke tou valoki ia te lelei ʼo tatatou minisitelio ʼaki pe te ʼu fua ʼo tatatou gaue. Pea tahi, ʼe mole fakafuafua e Sehova ia te ʼu fua ʼo tatatou minisitelio ki te faʼahiga tali e te ʼu ako ia tatatou faʼahiga faiako. Pea ʼe maʼuhiga kia Sehova ia tatatou gaue kinakina.—Lau ia Luka 10:17-20; 1 Kolinito 3:8.
ʼE mole fakafuafua e Sehova ia te ʼu fua ʼo tatatou minisitelio, ki te faʼahiga tali e te ʼu ako ia tatatou faʼahiga faiako
8 Tolu, ʼe mole feala ke tou sisio tuʼumaʼu ki te ʼu fetogi ʼi te loto ʼo he tahi. Ohage la, ko te taumatuʼa neʼe nā ako ia te Tohi-Tapu mo te tehina misionea. Neʼe nā ui age ki te misionea, kua nā fia faifakamafola. Neʼe ina fakamanatuʼi age kia naua, ʼe tonu muʼa ke nā tuku tanā suluka. Kaʼe neʼe punamaʼuli ia te misionea ʼi tanā ui age ʼae neʼe kua tuku ia tanā suluka ʼi ni mahina ki muʼa atu. Koteʼuhi neʼe kua mahino kia naua kapau ʼe nā suluka fakafufu, ʼe feala pe ke sio mai ia Sehova pea ʼe fehiʼa ia ki te malualoi. Koia neʼe nā fai ai te tonu ʼaeni: Peʼe nā suluka ʼi muʼa ʼo te tehina misionea peʼe nā tuku fakahagatonu ia tanā suluka. Neʼe toʼo e te taumatuʼa ʼaia ia te tonu ʼae ʼe lelei ʼuhi ko tanā ʼoʼofa ʼae kia Sehova, kaʼe neʼe mole iloʼi e te misionea ia te toe fetogi ʼae neʼe nā fai.
TE KUPEGA
9. Kotea te fakaʼuhiga ʼo te lea fakatata ʼo te kupega?
9 Lau ia Mateo 13:47-50. Kotea te faka ʼuhiga ʼo te lea fakatata ʼa Sesu ʼo ʼuhiga mo te kupega? Neʼe ui e Sesu, ʼe hage ia te fakamafola ʼo te logo ʼo te Puleʼaga ko he kupega neʼe ʼaʼau ʼi te tai. Ohage ko te tanaki e te kupega ia he ʼu tuʼuga “ika i te u faahiga kehekehe,” ko tatatou gaue faifakamafola ʼe ina taki mai ia te toko lauʼi miliona hahaʼi kehekehe. (Esaia 60:5) Pea ʼe fakamoʼoni ki ai ia te toko lauʼi miliona hahaʼi ʼae ʼe kau ʼi te taʼu fuli ki ʼatatou fakatahi lalahi pea mo te ʼAho Fakamanatu. Ko ʼihi ia natou ʼaia ʼe hage ko te ʼu ika “lelei,” pea ʼe natou liliu ʼo kau ki te kokelekasio Fakakilisitiano. Kaʼe ko ʼihi ʼe natou hage ko te ʼu ika “kovi,” pea ʼe mole tali natou e Sehova.
10. He koʼe neʼe fai e Sesu ia te lea fakatata ʼo te kupega?
10 He koʼe neʼe fai e Sesu ia te lea fakatata ʼaia? Ko te vaheʼi keheʼi ʼo te ʼu ika ʼi te lea fakatata, ʼe mole fakaʼuhiga ki te fakamau fakaʼosi lolotoga te mamahi lahi. Kaʼe ʼe fakamahino ʼi te lea fakatata ʼaia ia he aluʼaga ʼe hoko lolotoga te ʼu ʼaho fakamuli ʼo te malama ʼaeni. Neʼe fakaha e Sesu ʼe mole fia liliu anai ia te hahaʼi fuli ʼae ʼe natou leleiʼia ia te logo ʼo te Puleʼaga, ko he ʼu kaugana ʼa Sehova. Ko te tokolahi ʼae neʼe kau ki ʼatatou fono pe neʼe natou ako mo tatou ia te Tohi-Tapu, ʼe mole natou fia foaki ia tonatou maʼuli kia Sehova. (1 Hau 18:21) Pea ko ʼihi, ʼe mole kei natou ʼomai ʼo fono. Ko ʼihi kau tupulaga neʼe lalahi ake mo he ʼu matuʼā Kilisitiano, kaʼe neʼe mole natou ako ke natou iloʼi e natou totonu ia Sehova. Koia neʼe fakaha lelei e Sesu, ko tatou totonu pe ʼae ʼe tou toʼo ia te tonu. Kapau ʼe tou toʼo ia te tonu ʼae ʼe lelei, pea ʼe tou hage anai kia Sehova ko te ʼu meʼa ʼae ʼe “manakoʼia” peʼe maʼuhiga “ ʼo te ʼu puleʼaga fuli.”—Akeseo 2:7, MN.
11, 12. (1) ʼE feala ke fua lelei feafeaʼi kia tatou ia te lea fakatata ʼo te kupega? (2) Kotea ʼae ʼe tou ako mai ai ʼo ʼuhiga mo Sehova pea mo Sesu?
11 ʼE feala ke fua lelei feafeaʼi kia tatou ia te lea fakatata ʼo te kupega? Ko tatatou mahino ki te ako ʼo te lea fakatata ʼaia, ʼe tokoni mai anai ke mole tou lotomamahi peʼe lotovaivai fau, mo kapau ʼe mole fia tauhi kia Sehova ia he tahi ʼe ina ako te Tohi-Tapu peʼe ko hatatou fanau. Neʼe lagi tou fai pe ia meʼa fuli moʼo akoʼi ʼo ia. Pea ʼe mole hoʼi liliu feia pe he tahi ʼo kaumeʼa mo Sehova ʼuhi pe he neʼe ina tali ke fai hana ako, pe neʼe lahilahi ake ʼi te moʼoni. Kapau ʼe mole ina fia tali ia te pule ʼa Sehova, pea ʼe mole feala ia ke liliu ko he kaugana ʼa te ʼAtua.
Ko ʼihi ʼae ʼe natou ʼoʼofa ki te moʼoni, ʼe natou tauhi anai kia Sehova (Vakaʼi te palakalafe 9-12)
12 Ko tona fakaʼuhiga koa ʼe mole toe fakagafua anai kia natou ʼae kua mavae ʼi te moʼoni hanatou toe liliu mai ki te kokelekasio? Peʼe mole kei ʼi ai koa he puleʼaki ki he tahi ʼe heʼeki ina fia foaki tona maʼuli kia Sehova? Kailoa ia. ʼE kei feala pe tanatou liliu ko he ʼu kaumeʼa ʼo Sehova, ʼi muʼa ʼo te hoko mai ʼo te mamahi lahi. ʼE kalaga fenei ia Sehova kia natou: “Koutou toe liliu mai kia au, pea e au toe liliu mai anai kia koutou.” (Malakia 3:7) ʼE ha lelei ia te faʼahi ʼaia ʼi te lea fakatata ʼa Sesu ʼo ʼuhiga mo te foha maumau koloa.—Lau ia Luka 15:11-32.
TE FOHA MAUMAU KOLOA
13. Kotea te fakaʼuhiga ʼo te lea fakatata ʼo te foha maumau koloa?
13 Kotea te fakaʼuhiga ʼo te lea fakatata ʼa Sesu ʼo ʼuhiga mo te foha maumau koloa? Ko te tamai manavaʼofa ʼae ʼi te lea fakatata, ʼe ina fakatata ia tatatou Tamai ʼofa ʼae ʼi selo, ia Sehova. Pea ko te foha ʼae ʼe ina maumauʼi ia tona tofiʼa maʼuhiga, ʼe ina fakatata ia te hahaʼi ʼae ʼe mavae ʼi te kokelekasio. ʼE natou liliu ʼo kau ki te malama ʼa Satana, ʼae ʼe hage ko “he fenua mamao,” ʼe mamaʼo ʼosi mai ia Sehova. (Efeso 4:18; Kolose 1:21) Ki muli age, ʼe mahino ʼihi ia natou ʼaia, neʼe natou faihala pea ʼe natou toʼo te tonu ʼae ke natou toe liliu mai kia Sehova. ʼE mahino ia, ʼe fakamaʼua ki ai he ʼu faiga, kaʼe ʼe natou agavaivai pea mo fakahemala moʼoni ʼo ʼuhiga mo te meʼa ʼae neʼe natou fai. Koia ʼe fakamolemole ai ia Sehova kia natou pea ʼe fakaʼamu ke natou toe liliu mai.—Esaia 44:22; 1 Petelo 2:25.
ʼE loto moʼoni ia Sehova ke toe liliu mai ia natou ʼae neʼe mavae ia te Ia
14. He koʼe neʼe fai e Sesu ia te lea fakatata ʼo ʼuhiga mo te foha maumau koloa?
14 He koʼe neʼe fai e Sesu ia te lea fakatata ʼaia? Neʼe fakaha e Sesu, ʼe loto moʼoni ia Sehova ke toe liliu mai ia natou ʼae neʼe mavae ia te Ia. Ko te tamai ʼae ʼi te lea fakatata, neʼe ʼamanaki tuʼumaʼu pe ʼe toe liliu mai anai ia tona foha. ʼI te temi ʼae neʼe sio ai ki tona foha kaʼe neʼe kei haʼu mai mamaʼo, neʼe lele atu aipe ʼo fakafelaveʼi mo ia. Neʼe loto e te tamai ke iloʼi e tona foha neʼe ina tali leleiʼi ia tana toe liliu mai. ʼAki te lea fakatata ʼaia, ʼe uga ai natou ʼae neʼe mavae ʼi te moʼoni, ke natou toe foimo liliu mai kia Sehova. ʼE lagi mole malohi ʼanatou felogoʼi ʼae mo Sehova, mo ufiufi pea mo faigataʼa ia tanatou toe liliu mai, kaʼe ʼe ʼi ai te ʼaoga ʼo ʼanatou faiga ʼaia. ʼI te temi ʼae ʼe natou toe liliu mai ai, ʼe fiafia anai ia Sehova, mo Sesu pea mo te kau ʼaselo.—Luka 15:7.
15, 16. (1) Kotea ia te ʼu ako ʼe tou taʼofi mai te lea fakatata ʼa Sesu ʼo ʼuhiga mo te foha maumau koloa? Tuku mai he ʼu faʼifaʼitaki. (2) Kotea ʼae ʼe tou ako mai ai ʼo ʼuhiga mo Sehova pea mo Sesu?
15 ʼE feala ke fua lelei feafeaʼi kia tatou ia te lea fakatata ʼo te foha maumau koloa? ʼE tonu ke tou faʼifaʼitakiʼi te ʼofa ʼo Sehova. Moka toe liliu mai he tahi ki te kokelekasio, ʼaua naʼa tou fia “maonioni” fau ʼo mole tou tali leleiʼi ia ia. He ʼe fakatupu kovi ki tatatou fakakaumeʼa ʼae mo Sehova. (Ekelesiasi 7:16) ʼE ʼi ai te tahi ako ʼe tou lava taʼofi mai te aluʼaga ʼaia. Ko he tahi neʼe mavae i te kokelekasio ʼe tonu ke fakaʼuhiga ki “he ovi nee puli,” pea ʼe feala ke toe liliu mai. (Pesalemo 119:176) Kapau ʼe tou felaveʼi mo he tahi neʼe mavae ʼi te kokelekasio, ʼe tou faiga anai koa ke tou tokoni ki ai ke toe liliu mai? ʼE tou foimo fakaha anai koa ki te kau tagata ʼafeā ke feala hanatou tokoni ki ai? ʼE feala anai, mo kapau ʼe tou mahino pea mo maʼuliʼi ia te ako ʼae mai te lea fakatata ʼa Sesu ʼo te foha maumau koloa.
“Ko takita kau ki te kautahi a Sehova ʼe maʼuhiga”
16 ʼE loto fakafetaʼi ia natou ʼae kua toe liliu mai, ki te manavaʼofa ʼo Sehova pea mo te ʼofa mo te tokoni ʼa te kokelekasio. ʼE ui fenei e he tehina neʼe fakamavae lolotoga taʼu ʼe 25: “I taku toe hu ki te kokelekasio, neʼe haga tuputupu aipe toku fiafia ʼi taku maʼu mai ia Sehova he ʼu ‘temi mokomoko.’ (Gaue 3:19, 20) Neʼe lagolago mai mo ʼoʼofa mai te ʼu tehina mo tuagaʼane. Kua ʼi ai toku famili fakalaumalie ʼe fakaofoofo.” Ko he tuagaʼane kei finemui neʼe mavae ʼi te kokelekasio lolotoga taʼu ʼe nima, ʼe ina ui fenei ʼo ʼuhiga mo tana toe liliu mai: “ʼE mole au maʼu he ʼu kupuʼi palalau moʼo fakamahino pe kotea ʼae ʼe tou logoʼi moka fakaha mai e ʼihi, ia te ʼofa ʼae neʼe palalau ki ai ia Sesu. Ko takita kau ki te kautahi ʼa Sehova ʼe maʼuhiga.”
17, 18. (1) Kotea te ʼu ako ʼae neʼe tou maʼu mai te ʼu lea fakatata ʼaia ʼe tolu? (2) Kotea ʼae kua tou fakatotonu ke tou fai?
17 Kotea te ʼu ako ʼae neʼe tou taʼofi mai te ʼu lea fakatata ʼaia ʼe tolu? ʼUluaki, ʼe tonu ke tou mahino ʼe mole feala hatatou puleʼi ia te tuputupu ʼa he ako Tohi-Tapu ʼi te moʼoni. Tou tuku te faʼahi ʼaia kia Sehova. Lua, ʼe mole fakapotopoto hakita ʼamanaki ʼe tauhi anai kia Sehova ia natou fuli ʼae ʼe fakatahi pea mo ako mo tatou. Tolu, logo la ʼe feala ke mavae ʼihi mai ia Sehova, kaʼe ʼaua naʼa tou ui ʼe mole natou toe liliu mai anai. Pea moka natou toe liliu mai, tou faʼifaʼitakiʼi ia te ʼofa ʼo Sehova ʼo tou tali leleiʼi ia natou.
18 Koia tou haga kumi takitokotahi ia te ʼatamai malama, mo te mahino pea mo te poto. Moka ʼe ke lau ia te ʼu lea fakatata ʼa Sesu, fai te ʼu fehuʼi ʼaeni: ‘Kotea te fakaʼuhiga ʼo te lea fakatata ʼaeni? He koʼe neʼe tohi ia te lea fakatata ʼaeni ʼi te Tohi-Tapu? ʼE feafeaʼi haku maʼuliʼi ia te ʼu ako ʼo te lea fakatata ʼaeni? Kotea ʼae ʼe au ako mai ai ʼo ʼuhiga mo Sehova pea mo Sesu?’ Kapau ʼe tou fai ia te faʼahi ʼaia, ʼe tou fakaha ai ʼe tou mahino ki te fakaʼuhiga ʼo te ʼu palalau ʼa Sesu.