1, 2. Wai Yesu angarasi gako abawiriki rogo gu uru ko azingi be kpio ti ni?

GU URU re angia gu uru Yesu azingi be kpio. Gako abawiriki ue guari Yerusarema yo ka ndu ku rogo gu gbaria du nga amairo saba ti Yerusarema. (akirometere wa 11) I na bakere gberãrago tipa pakpio ko na i ainongo ho nga ko ima zingabekpio te. Wakina ikpirogumba, Yesu kuru ki tona ka ndu na yo wa sa. Ko tona ka fu wasa fuyo. Rogo gini gene? “Ko ki tona yugo agu apai fu yo dunduko tona ti ga Mose apai na ga anebi, na rogo Ziazia Kekeapai dunduko nga gu du tipa ko.” (Rk. 24:13-15, 27) Ho i agi agi apai re ni, ngbaduyo ki tona ka kuadi mbiko ‘wa ko ayugo’ Ziazia Kekeapai fuyo.—Rk. 24:32.

² Rogo kina gu bangisa nyemu re, agi abawiriki ue re akaragatiyo ku Yerusarema yo. Fuo i gbia amokedi, i ape gupai namangi fuyo. Wa i afura, Yesu ki yugu tiko berewe fuyo. Ono tie, agi amokedi re adu na gunde. I atona ka tikö kpotoyo yo. Yesu angarasi yo wai? Ziazia Kekeapai naya: “Ko ki uru gayo berã, i ki rugu tiyo na Ziazia Kekeapai.”—Rk. 24:45.

3. Gini akpakarapai rengbe ani ka gbiatirani na ni, na ginipai rengbe ka undo rani ani du na wene bipai tipa gaani sunge tungusapai?

³ A wa si adu tipa agu abawiriki re, ani ima rengba kadu na gberãrago a ti kura aregbo. Si rengbe kadu nga ani namanga ga Gbia sunge kakaka, ono ani kidu na gberãrago mbiko  wene surungbaha ti ni te. (1 Kor. 15:58) Watadu si rengbe kadu nga agu aboro ani ayugopai fuyo i amanganga wene sono ku mbatayo te. Watadu agu aboro ani naundo yo i aidanga na Yekova berewe te. Ginipai rengbe ani ka mangaha kadu na wene bipai tipa gaani sunge tungusapai? Gupai rengbe ka undo rani nga ruga ani tirani wenengai na gu ga Yesu akpiapai du rogo Ziazia Kekeapai yo. Ani wisigingo akpiapai biata dagba agu akpiapai re na ki bingo gupai rengbe ani ka wirikaha behe.

4. Rogo gu ga Yesu kpiapai nga ga gu bamitunga nati ni rame nga gine?

⁴ Oni gedi Marako 4:26-29. Rogo gu ga Yesu kpiapai yo nga ga gu bamitunga nati ni rame nga gine? Gu kumba du rogo gu kpiapai re narukuba abatakipande pa Kindo ni basasa. Gu tunga re narukuba gu wene pangbanga i atungusaha fu agu aboro du na wene ngbaduyo yo. A wa sino aboro nidu, bamitunga ‘nara yuru’ na ki nizingi uru rameyo. Si nadia regbo adia tipa guhe re sono, tona ti gu regbo i narũhe na ki dati gu regbo ni nika kehe ti ni. Vuru gu regbo re, gu ‘tunga re nakura ki nisono.’ Gu tunga he re nasona gaha “ni sa ha” yeye. Wakina gure a, boro nasona rogo toro yo yeye. Ho boro asona ni ki dati gupai nga ni naida ka mangasunge fu Mbori, ni nakusa zuzuhe rogo gu gene nga ka kpara gani raka fu Yekova na ki zi bapatiza.

5. Tipagine Yesu ape gu kpiapai ti ni nga ga gu bamitunga nati ni rame?

⁵ Tipagine Yesu ape gi kpiapai re ti ni? Yesu aundo rani ani bi gupai nga Yekova du nasa rengo si sono ngbadu agu aboro yo “i aima ringbisa yo sa nyenye unga.” (Amo. 13:48; 1 Kor. 3:7) Ani narũhe na kini tudihe, ono ani asananga si sono te. Ani arengbanga ka mangaha ngbaome si sono watadu ka ipiso te. A wa duhe tipa gu kumba du pako rogo gu kpiapai re, ani ainongo wai guhe re asona te. Si nasona zanga ani inihe. Ono fuo bete regbo, gu tunga nga ga Kindo re nakusa zuzuhe. Gi vovo bawiriki re nakoda ti ni na ani gene sunge ke ahe yo, na ani kini gbia undo ti gu undo ni afuhe.—Yo. 4:36-38.

6. Ginipai si aida ani inihe tipa sonakumbatayo rogo toro yo?

⁶ Ginipai rengbe ani ka wirikaha ti gi kpiapai re? Bambataha nga, si naida ani inihe nga pai ho rengbe ani ka mangaha tipa ga gu Bawiriki Ziazia Kekeapai re sonakumbatayo te. Ka ani du na ruru bipai, ani amanganga ni ngbaome watadu ka sosoda ni ni zi bapatiza te. Ani namanga ome nyanyaki tipa ka undo ni, ono si naida ani inihe nga ni du si aida ni diberã tipa ka kpara gani raka fu Mbori. Kparatise fu Mbori nga guhe si aida si ye kina kpoto boro yo mbiko nyemuse du fõngbaduniyo. Ka si aadunga wo ya, Yekova arengbanga ka ida na gani pai te.—Tam. 51:12; 54:6; 110:3.

7, 8. (a) Gini kurapai ani awirikaha ti gu ga Yesu kpiapai nga ga gu bamitunga nati ni rame? Oni funga kpiapai. (b) Ginipai gipai re ayugoho furani tipa Yekova na Yesu?

⁷ Uehe nga, ka ani rugatirani na gupai gu kpiapai re ayugoho, si nika undo rani ka ani dunga na gberãrago mbiko wa adu nga wene surungbaha gaani sunge ti ni ya. Si naida ani du na hipai. (Yak. 5:7, 8) Ka si vura du nga gu tunga re akusanga zuzuhe te, na si ki du nga ani ima manga ome ki undo ni, gaani ingahe ngaha te. Yekova nasa gu tunga nga ga rengo si sono kina rogo gu ngbaduse du na umbasitise ka manga ariapai. (Mt. 13:23) Sidu, si aidanga ani bihe nga padu ani na diabese nayugoho nga ani  namangasunge wenengai te. Yekova abingo gaani diabese gene sunge tungusapai yo kuti wai aboro amangapai kutini te. Kuba gure, ko nabi gu ome ani amangaha ka du ni ruru rani na nyanyakipa ha kisusi surungba gaani sunge.—Oni gedi Ruka 10:17-20; 1 AKorindo 3:8.

⁸ Biataha nga, ani naabingo agu ariapai namanga dedede rogo boro yo te. Ni kpiapai, arogotise sa wirinarani ni mokedi anaawisigo Ziazia Kekeapai na yo aye fuoko ki ya i naida kada ni abatungusipai. Ko aya fuyo ka i aida kada ni abatungusipai, i duwa ka i mbu vugundö. Kina ngbako nazere ka gia gupai ngbayo nga i aima mbu vugundö bete adiwi kusayo. Tipagine i mbuhe ti ni? I aye ka ino gupai nga Yekova ima rengba ka biyo na ni, ko aidanga na agu aboro namangapai ni biriki te. Sidu, ngbaduyo yo afõyo i mangi diaberã, singia ka vugundö ku bangiri gu mokedi re watadu ka mbuhe. Gu nyemuse i asonosihe tipa Yekova re naaundo yo i mangi ruru diaberã. I aima sona rogo toro yo wa si vura du nga gu mokedi re ainongo pai tipa gu ariapai namangi te.

9. Rogo gu ga Yesu kpiapai nga ga pio atĩo nga gine?

⁹ Oni gedi Matayo 13:47-50. Rogo gu ga Yesu kpiapai nga ga pio atĩo nga gine? Yesu aringbisi tungusa gu pangbanga nga ga Kindo fu rikaaboro dunduko kuti gu pio atĩo i abaha ku ime yo. A wa pio nazio “ngbatunga atĩo dunduko,” gaani sunge tungusapai nangba ti ngbatunga aboro dunduko a. (Yes. 60:5) Gu dungu aboro ninaaye tipa gaani kikindigi adunguratise gbiati Tingida Pakpio Yesu rogo agarã nibasa nayugo gipai re. Bete agu aboro du wa atĩo re ni “wene” yo na i nadungura yo ku rogo gu dungurati nga ga aKristano. Ono agu akurayo ni “gbegberẽ” yo mbiko agu aboro dunduko i adungura yo anga i dunduko ngba ti Yekova te.

10. Tipagine Yesu ape gu kpiapai ti ni nga ga pio atĩo?

¹⁰ Tipagine Yesu ape gi kpiapai re ti ni? Gu sanza du tipa kparaka atĩo afuranga tipa gu yangara sapangbanga nika du ti regbo bakere gberãngbi te. Kuba gure, si nayugo gupai nika manga ti gu yangara arame nga ga gi gbegberẽ sino raka re. Yesu ape gupai nga anga, agu aboro dunduko naye ku rogo rengo nika kakuti Yekova te. Dungu aboro ninaaye tipa gaani adunguratise. Aguyo nidu na nyemu ka wirika Ziazia Kekeapai na ani ono i aidanga ka fu tiyo wenengai tipaha te. (1 Aba. 18:21) Wa vura duhe wo, agu akurayo ayengo berewe tipa gaani adunguratise te. Kura paranga aboro du avunguyo nga aKristano, i akpingo nyemu ga Yekova arugute te. Ka si vurangia kina ginipai du, Yesu anyakasi gupai nga boro na boro si aida ni mangi gani diaberã nitini. Agu aboro namangaha, ko nabiyo nga “agu ahe ngba bangiri arikaaboro dunduko.”—Agai 2:7.

11, 12. (a) Wai rengbe ani ka gbia undo ti gu kpiapai nga ga pio atĩo? (b) Ginipai gipai re ayugoho furani tipa Yekova na Yesu?

¹¹ Wai rengbe ani ka gbia undo ti gu kpiapai nga ga pio atĩo? Pa ruga ani tirani na gupai gi kpiapai re ayugoho naundo rani ka ani du nga na gberãrago ya ka si du nga gu boro ani awirika Ziazia Kekeapai na ni watadu wirani ni adianga rengo kugume te. Gipai re ima rengba ka manga si ki vura du nga ani ima manga bakere ome vurũ. Pa ida boro ka wirika Ziazia Kekeapai watadu sonosa boro ku rogo rengo ayugongo gupai nibasa nga ni nika sonosa wene ­pagume na Yekova te.  Agu aboro aidanga na ga Yekova zogarago ya, ko nika kparayo kusayo ti gako aboro.

¹² Ya mo gere nayugo gupai nga agu aboro mbu rengo i akaraganga tiyo berewe ku rogo dungurati te? Watadu ka boro akparanga gani raka fu Yekova ya, ni ima da nga “gbegberẽ” tĩo? Oó. Gu ngbatunga aboro re na kina momu beyo mbata fu ye bakere gberãngbi. Gure wa ka i ya Yekova nayamba yo niya: “Oni káraga tironi kono du mi ni, mi ki karaga tire koyo du oni ni a.” (Mara. 3:7) Gu kura kpiapai Yesu apehe nga ga ingiingi paranga nanyakasa gipai re.—Oni gedi Ruka 15:11-32.

13. Rogo gu kpiapai nga ga ingiingi paranga nga gine?

¹³ Rogo ga Yesu kpiapai nga ga ingiingi paranga nga gine? Gu baagude du na nunga wiriko rogo gi kpiapai re narukuba gu Barani du ngbangbaturũ yo nga Yekova. Gu gude naasanahe tipa gako ũkumbo na ki gbarasihe narukuba agu aboro nakparatiyo kusayo ti dungurati. Pa mbuyo ho wa ka i ya i ga ku rogo “tuturũ ringara” nga ga Satana zegino, du ni kparakparaha ti Yekova. (Ef. 4:18; Koro. 1:21) Ono tie, aregbo kinaho aguyo abihe nga i karagatiyo ku rogo dungurati, na i ki katawara tiyo be akpakarapai ka yego ku rogo ga Yekova riigbu. Agu aboro naumbasi tiyo na ki saberã re, Barani nadia yo kugume na ki mbupai fuyo.—Yes. 44:22; 1 Pet. 2:25.

14. Tipagine Yesu ape gu kpiapai ti ni nga ga ingiingi paranga?

¹⁴ Tipagine Yesu ape gi kpiapai re ti ni? Ko amangisunge na ni ka nyakasa gupai nga Yekova naida agu aboro kparatiyo kusayo karagatiyo fuoko. Gu bagude du rogo gu kpiapai re ko aima inoho nga wiriko ayego ayego. Ho ko abi wiriko ni ko niyego, si ki vura du nga “ko adu tuturũ,” ko aguari niipo ka diako kugume. Nangba wai gipai re ngarasa agu aboro mbu rengo nga i karagatiyo fuo Yekova niipo. Si rengbe kadu nga i anyakanga rogo toro yo te, na si fuyo ni pa zee watadu ni kpakarapai ka karagatiyo. Ono si nga gu wenepai si aida i mangihe mbiko zavura agu aboro du ngbangbaturũ yo, i na ngbarago ka biyo i nikaraga tiyo.—Rk.15:7.

15, 16. (a) Ginipai ani awirikaha ti gu ga Yesu kpiapai nga ga ingiingi paranga? Oni funga kpiapai. (b) Ginipai si ayugoho furani tipa Yekova na Yesu?

¹⁵ Wai rengbe ani ka gbia undo ti gu  kpiapai nga ga ingiingi paranga? Si naida ani wiriki ga Yekova kpiapai. Si aidanga ani bi tirani nga ani ‘ni ruru aboro susi’ ki zanga dia agu aboro nasa gayo berã kugume te. Gipai re rengbe ka ‘gbarasa’ rani rogo toro yo. (Batu. 7:16) Ani rengbe ka wirika kurapai ti gipai re. Agu aboro mbu dungurati, si naida ani biyo wa “ingiingi kandoro” na ni agu aboro nika yego ayego. (Tam. 119:176) Ka ani gbia gu boro kpara ti ni kusayo ti dungurati, ya mo ani rengbe kafu wene undo funi ni karaga ti ni? Ya mo ani apehe fu abaakumba niipo tipa i fu wene undo funi? Ani rengbe ka mangaha wo kina gu ka ani mangipai kuti ga Yesu kpiapai nga ga ingiingi paranga.

¹⁶ Oni bingo wai gu ingiingi aparanga du ti gi gaani regbo re ayugo gayo tambuahe tipa gu inapai nga ga Yekova gbiati gu nyemuse na undo dungurati afuhe fuyo. Wirina i akusi ko rogo dungurati ko ki di agarã 25 aya: “Wa i nakaraga re gimi ngbarago nakio kina ku mbatayo mbiko wa Yekova ‘agbandaka’ gimi ingapai. (Amo. 3:19) Aboro dunduko naundo re na kini kpinyemu re! Mi na wene agumere rogo toro yo.” Paranga wirinarani na kpara tiri kusayo ti Yekova tipa agarã bisue na ki karaga tiri aya: “Mi ainongo wai rengbe mi ka pepa wai si adu fere ka bi wai awirina ayugu gu nyemuse fere Yesu apepaha te. Si ima ngba kadu rogo ga Yekova riigbu!”

17, 18. (a) Gini apai wiriki ani he rogo agu akpiapai biata ani nawisigipai tipaha re? (b) Ginipai si aida si du nga gaani diaberã?

¹⁷ Gini apai wiriki ani he ti agu akpiapai du biata re? Bambataha nga, pai ho rengbe ani ka mangaha na ga boro sonakumbatayo rogo toro yo te. Yekova du namangaha. Uehe nga, ani arengbanga ka ya agu aboro dunduko nakodatiyo na ani watadu ani awirikapai na yo nika dia rengo kugume te. Ni yangaraha, ka si vura du nga kura aboro mbu rengo na ki sa giiyo na Yekova, ka ani bingoho nga i akaraganga tiyo berewe ya te. Na ka i yego, ani di yo kugume na ngbarago na ki nibiyo wa Yekova abiyo.

¹⁸ Ani ni basasa gbatanga inohe agbata, rugatinapai, gbiati tatamana. Wa mo nikaa geda ga Yesu akpiapai, mo sanahe nga rogoyo nga gine; tipagine i akehe ti ni ku rogo Ziazia Kekeapai; wai rengbe ani ka mangisunge na ni; na ginipai rengbe ani ka wirikaha behe tipa Yekova na Yesu. Nirengo, manga ani he wo nika yugo gupai nga ani ima rugatirani na afugo Yesu.