Zeremi 31:15 i dir: “La sa ki Zeova i dir: ‘En lavwa Rama pe lamante e plere asodlarm: Rasel pe plere pour son bann garson. I pa ti oule ganny rekonforte konsernan son bann garson parski zot nepli la’”

Sa de garson Rasel pa ti mor avan li. Pour sa rezon, sa ki Zeremi ti ekri 1,000 an apre lanmor Rasel i kapab paret pa egzakt.

Premye garson Rasel ti apel Zozef. (Zen. 30:22-24) Pli tar i ti ganny en lot garson ki ti apel Benzamen. Me Rasel ti mor ler i ti pe donn nesans sa dezyenm garson. Alor, en kestyon ki ganny souleve se: Akoz Zeremi 31:15 i dir ki Rasel ti pe plere akoz son bann garson ti “nepli la”?

I byen pour note ki avek letan Zozef, sa premye garson ti vin papa Manase ek Efraim. (Zen. 41:50-52; 48:13-20) Pli tar, Efraim ti vin sa tribi pli enportan, ki ti annan plis lenfliyans e finalman i ti arive reprezant sa dis tribi ki ti dan rwayonm nor Izrael. De lot kote, Benzamen, sa dezyenm garson Rasel, ti vin sa tribi ki ti form parti sa rwayonm sid ansanm avek Zida. Alor, dan en sans senbolik, i kapab ganny dir ki Rasel i reprezant tou bann manman dan rwayonm nor ek sid.

Ler liv Zeremi ti ganny ekrir, bann Asiryen ti’n fini ganny laviktwar lo sa dis tribi dan rwayonm nor e bokou zot bann sitwayen ti’n ganny anmennen an egzil. Par kont, serten bann desandans Efraim ti’n kapab sove e al Zida. An 607 A.N.L., bann Babilonnyen ti ganny laviktwar lo sa de tribi dan sid, rwayonm Zida. I paret ki apre ki zot ti’n ranport laviktwar, bann Babilonnyen ti anmenn en kantite prizonnyen Rama ki ti apepre 8 kilomet nor Zerizalenm. (Zer. 40:1) Petet serten ti ganny touye laba dan teritwar Benzamen kot Rasel ti’n ganny antere. (1 Sam. 10:2) Alor, sa lekspresyon Rasel pe plere pour son bann garson i kapab vedir ki dan en sans senbolik, i ti dan sagrinasyon pour bann dimoun dan tribi Benzamen oubyen plizoumwen pour sa bann dimoun Rama. En lot posibilite i kapab vedir ki tou manman parmi pep Bondye ti pe plere akoz lanmor oubyen akoz pep Izrael ti’n ganny anmennen an egzil.

An tou ka, sa lekspresyon ki Zeremi ti servi konsernan Rasel pe plere pour son bann garson ti en parol profetik ki ti ganny akonplir plizyer santenn lannen pli tar ler Zezi ti ankor en pti zanfan e son lavi ti an danze. Dan sa letan, Lerwa Erod ti donn lord pour touy tou bann garson de-z-an e mwens dan lavil Betleenm, sid Zerizalenm. Alor, sa bann garson ti nepli la akoz zot ti’n mor. Zis mazin leokri ek lapenn sa bann manman ki ti’n perdi zot garson! I konmsi ou ti kapab tann zot leokri ziska Rama dan nor Zerizalenm.—Mat. 2:16-18.

I pour sa rezon ki sa lekspresyon Rasel pe plere pour son bann garson ki ti’n ganny touye i en parol apropriye pour dekrir latristes bann manman Zwif dan letan Zeremi ek dan letan Zezi. Byensir, bann ki ti mor e al dan “pei lennmi” lanmor i kapab retournen ler zot resisite.—Zer. 31:16; 1 Kor. 15:26.