Ieremia 31:15 ia gwau: “Lohiabada ia gwau, ‘Regena ta Rama dekenai idia kamonai noho, taitai bada ena regena. Unai be Rahela ese, iena natuna dainai ia taitai noho, idia mase vadaeni dainai. Bona Rahela ia ura lasi haida ese, ia do idia hamoalea, badina be iena natuna idia boio vadaeni.’”

Rahela ia mase neganai, iena natudia memero rua be idia do mauri noho. Unai dainai, Ieremia ena hereva Rahela ia mase bena lagani 1,000 murinai ia torea be reana ia maoro lasi.

Rahela ena natuna mero ginigunana be Iosepa. (Gen. 30:22-24) Gabeai, natuna iharuana ia havaraia, ena ladana be Beniamina. To, Rahela be Beniamina ia havaraia murinai ia mase. Unai dainai, inai henanadai ia vara: Dahaka dainai Ieremia 31:15 ia gwau, Rahela be ena natudia idia “boio vadaeni” dainai ia taitai?

Iosepa ena natuna rua be, Manase bona Eparaima. (Gen. 41:50-52; 48:13-20) Gabeai, Eparaima be Israela ena not kahana basileiana ena iduhu badana bona goadana ai ia lao, bona not kahana ena iduhu 10 ia gunalaia. To, Rahela ena natuna iharuana Beniamina ena iduhu be Israela ena saut kahana basileiana ena kahana ai ia lao. Unai dainai ita gwau diba, Rahela ese Israela ena not bona saut kahana basileiana ai idia noho sina ibounai ia laulaulaia.

Ieremia bukana idia torea neganai, Israela ena not kahana ena iduhu 10 basileiana be Asuria ese ia hadarerea, bona momo be igui hesiai taudia bamona idia abia lao. To, reana Eparaima ena bese taudia haida be Iuda dekenai idia heau mauri. Lagani 607 B.C.E. ai, Babulonia ese Iuda ena saut kahana ena iduhu rua basileiana ia hadarerea. Idia abia mauri taudia momo be Rama dekenai idia haboua, ia be Ierusalema ena not kahanai bona ena daudau be kilomita eit. (Ier. 40:1) Reana haida be unuseniai idia alaia. Unai be Beniamina ena tano, bona Rahela be unuseniai idia guria. (1 Sam. 10:2) Unai dainai, Rahela ena taitai karana ese Beniamina iduhu taudia o Rama taudia ese idia mamia lalohisihisi ia laulaulaia. Danu ita gwau diba, Ieremia ena hereva ese Israela sina iboudiai edia taitai karana ia herevalaia. Idia taitai badina Dirava ena taunimanima momo be idia mase bona haida be edia inai taudia ese idia abidia mauri.

Ieremia ese Rahela be ena natudia totona ia taitai karana ia herevalaia neganai, ia be do ia vara gauna ta ia perovetalaia. Unai be lagani handred momo murinai, Iesu ia maragi neganai, ia vara gauna ia herevalaia. King Heroda ese oda ia henia Betelehema, Ierusalema ena saut kahana dekenai, mauri lagani rua memero ibounai do idia alaia. Oibe, unai natudia be idia “boio,” anina be idia mase. Edia natudia totona idia taitai sina edia lalohisihisi mani oi laloa! Edia taitai regena be bada herea dainai, Rama, Ierusalema ena not kahana hanuana ai idia kamonai diba.​—Mat. 2:16-18.

Unai dainai, Ieremia bona Iesu ena negai, Rahela be ena natudia totona ia taitai karana be Iuda hahine ese edia natudia totona idia taitai karana ia laulaulaia. Unai dainai, idia mase taudia be edia inai tauna, mase ena tano dekenai idia lao, to toreisi lou negana ai, do idia giroa lou.​—Ier. 31:16; 1 Kor. 15:26