Ma jọ obe Jerimaya 31:15 se nọ: “Enẹ ỌNOWO na ọ tae: ‘A yo uru evaọ Rama, enuobro gbe oviẹ owhawha: Reshẹl ọ be viẹ fiki emọ riẹ; ọrọwo nọ a sasa iẹ oma ha fiki emọ riẹ, fiki epanọ e gbẹriẹe he.’”

Emọ ivẹ nọ Reshẹl o yẹ e kake rehọ iẹe whu hu. Fikiere ohwo ọ rẹ sai roro nọ ẹme nọ Jerimaya o kere okenọ Reshẹl o whu vrẹ ikpe odu ọvo (1,000) no na ọ gba ha.

Josẹf ọ jọ ọmọ ọkpako Reshẹl. (Emu. 30:22-24) Uwhremu na, Reshẹl o te yẹ ọmọ ọfa nọ a se Bẹnjamin. Rekọ Reshẹl o whu okenọ o je yẹ ọmọ avivẹ nana. Onana o tẹ wha onọ jọ ze, inọ: Fikieme Jerimaya 31:15 o rọ ta nọ Reshẹl ọ jẹ viẹ fiki emọ riẹ nọ e “gbẹriẹe he”?

Muẹrohọ nọ Josẹf nọ ọ jọ ọmọ ọkpako Reshẹl o yẹ Manasẹ avọ Ifremu. (Emu. 41:50-52; 48:13-20) Uwhremu na, orua Ifremu u te zihe ruọ orua nọ o mae viodẹ jẹ mai wo ogaga evaọ ofẹ ẹkpẹlobọ ovatha-ọre uvie Izrẹl, u te dikihẹ kẹ erua ikpe Izrẹl nọ e jọ ofẹ yena. Evaọ abọdekọ riẹ, orua Bẹnjamin nọ ọ jọ ọmọ avivẹ Reshẹl, avọ orua Juda họ erua ivẹ nọ i kiọkọ nọ e jọ ofẹ obọze ovatha-ọre Izrẹl. Fikiere a sae ta nọ Reshẹl o dikihẹ kẹ iniemọ kpobi evaọ Izrẹl, te enọ e jọ uvie ẹkpẹlobọ ovatha-ọre gbe uvie obọze ovatha-ọre.

Okenọ Jerimaya o ro kere obe nọ a rọ odẹ riẹ se na, yọ ahwo Asiria a fi uvie nọ o jọ ẹkpẹlobọ ovatha-ọre Izrẹl kparobọ no je mu ibuobu rai kpohọ igbo no. Rekọ o sae jọnọ ahwo orua Ifremu jọ a dhẹ kpohọ ẹkwotọ Juda. Evaọ 607 taure Kristi ọ tẹ te ze, ahwo Babilọn a te fi erua ivẹ nọ e jọ ofẹ obọze ovatha-ọre na kparobọ. O wọhọ nọ evaọ etoke nọ a ro fi ai kparobọ na, ahwo Babilọn a koko ibuobu ahwo na họ ẹwho Rama nọ o rehọ emaele isoi thabọ no ẹkpẹlobọ ovatha-ọre Jerusalẹm. (Jeri. 40:1) Ẹsejọhọ a kpe ibuobu ahwo nana evaọ ẹkwotọ Bẹnjamin nọ a ki Reshẹl fihọ. (1 Sam. 10:2) Fikiere Reshẹl nọ ọ jẹ viẹ fiki emọ riẹ na o sai dikihẹ kẹ uweri nọ o jariẹ oke yena fiki oware nọ o via kẹ orua Bẹnjamin soso hayo otu rai nọ e jọ Rama na. O sai je dhesẹ nọ iniemọ Izrẹl kpobi a jẹ viẹ fiki ahwo Izrẹl nọ a kpe gbe enọ a mu kpohọ igbo.

Oghẹrẹ kpobi nọ o rrọ kẹhẹ, ẹme nọ Jerimaya ọ ta kpahe Reshẹl nọ ọ jẹ viẹ fiki emọ riẹ na yọ eruẹaruẹ kpahe oware nọ o via ikpe buobu nọ i lele i rie, nọ a jẹ gwọlọ kpe Jesu evaọ okenọ ọ jọ ọmọfofa. Herọd ovie na o jie uzi nọ a kpe emezae kpobi nọ e jọ ikpe ivẹ evaọ ẹwho Bẹtlẹhẹm nọ o jọ obọze ovatha-ọre. Fikiere emọ yena nọ a kpe na e gbẹ jọ họ. Dai roro epanọ ini nọ a kpe emọ rai na a viẹ te. O jọ wọhọ ẹsenọ edo oviẹ rai o je do te Rama, ẹwho nọ ọ jọ ẹkpẹlobọ ovatha-ọre Jerusalẹm.—Mat. 2:16-18.

Fikiere, ẹme nọ Jerimaya ọ ta inọ Reshẹl ọ jẹ viẹ fiki emọ riẹ na, u gine fo ẹme nọ a sai ro dhesẹ uweri nọ o jọ iniemọ ahwo Ju oma evaọ oke Jerimaya gbe oke Jesu fiki emọ rai nọ a kpe. Ahwo kpobi nọ a whu je kpohọ “ẹwho ọwegrẹ na” uwhu, a ti zihe ai no obọ ọwegrẹ yena ze evaọ oke ẹkparomatha.—Jeri. 31:16; 1 Kọr. 15:26.