Yeremia 31:15 ke tuba nde: “Mfumu Nzambi ke tuba nde: ‘Na bwala Rama bo ke wa ndinga ya nkento mosi ke dila, ke tula milolo mingi. Rashele ke dila bana na yandi; yandi ke zola ve nde bantu kwisa kukatula yandi mawa, sambu bana na yandi kele [diaka] ve.’”

Rashele fwaka na ntwala ya bana na yandi zole ya babakala. Yo yina, mambu yina Yeremia sonikaka bamvula 1 000 na nima ya lufwa ya Rashele lenda monana bonso nde yo kele ve ya siki-siki.

Mwana ya ntete ya Rashele vandaka Yozefi. (Kuy. 30:22-24) Na nima, yandi butaka Benyamini. Rashele fwaka ntangu Benyamini vandaka kubutuka. Ngiufula ya mfunu yo yai: Sambu na nki mukanda ya Yeremia 31:15 ke tuba nde Rashele vandaka kudila bana na yandi yina vandaka ‘diaka ve’?

Yo kele mfunu na kuzaba nde na nima ya bamvula, Yozefi mwana ya ntete ya Rashele butaka Manase ti Efrayimi. (Kuy. 41:50-52; 48:13-20) Na nima, dikanda ya Efrayimi kumaka dikanda mosi ya nene mpi ya lukumu na kati ya bikanda 10 ya kimfumu ya nordi ya Izraele mpi kumaka kuyala yo. Na ndambu ya nkaka, dikanda ya Benyamini mwana ya zole ya Rashele, vukanaka ti dikanda ya Yuda mpi bo salaka kimfumu ya sudi. Yo yina na mutindu mosi buna, bo lendaka kutuba nde, Rashele vandaka kumonisa bamama yonso ya dikanda ya Izraele.

Na bamvula yina bo sonikaka mukanda ya Yeremia, bikanda 10 ya kimfumu ya nordi ya Izraele vandaka dezia na nsi ya luyalu ya Asiria, mpi bo nataka bantu mingi ya bikanda yai na kimpika. Mbala ya nkaka, bantu mingi ya dikanda ya Efrayimi kwendaka kubumbana na bambanza ya Yuda. Na 607 N.T.B., bantu ya Babilone nwanisaka bikanda zole ya kimfumu ya sudi ya Yuda. Yo ke monana nde bo vukisaka bantu mingi yina bo nataka na kimpika na Rama, mbanza mosi yina vandaka na kitamina ya bakilometre kiteso ya 8 ti Yeruzalemi. (Yer. 40:1) Ziku bo fwaka bampika ya nkaka na mbanza ya Benyamini, kisika bo zikaka Rashele. (1 Sam. 10:2) Kudila ya Rashele lenda tendula na mutindu ya kifwani kudila yina bantu dilaka sambu na bampasi ya bantu ya dikanda ya Benyamini to kaka sambu na bantu ya Rama. Na mutindu ya nkaka, kudila yina lenda monisa kudila yina bamama yonso ya Izraele dilaka, ntangu bo fwaka bampika ya nkaka to sambu bantu ya Izraele kwendaka na kimpika.

Ata diambu yango salamaka nki mutindu, mambu yina Yeremia tubaka nde Rashele vandaka kudila bana na yandi vandaka mbikudulu ya mambu yina zolaka kusalama bamvu-nkama mingi na nima, ntangu luzingu ya Yezu kumaka na kigonsa. Ntotila Erode pesaka ntuma nde bo fwa bana yonso ya Betelemi ya babakala, banda bamvula zole kita. Betelemi vandaka na sudi ya Yeruzalemi. Yo yina, bo fwaka bana yina; na bangogo ya nkaka, bana yina vandaka diaka ve. Yindula mutindu bamama ya bana yina dilaka bana na bo! Yo vandaka bonso nde bidilu yina vandaka kuwakana tii na Rama, na nordi ya Yeruzalemi.—Mat. 2:16-18.

Yo yina, yo vanda na bilumbu ya Yeremia to na bilumbu ya Yezu, Rashele yina dilaka bana na yandi ke monisa mbote bidilu ya bamama ya Bayuda sambu na bana na bo yina fwaka. Ya kieleka, bantu yina fwaka mpi kwendaka na ‘ntoto ya mbeni’ lenda katuka na kimpika ya mbeni yai ntangu bantu ta futumuka.—Yer. 31:16; 1 Bak. 15:26.