I roto ia Ieremia 31:15, te karanga ra e: ‘Te na ko mairā Iehova, E reo tei kitea i Rama, te aue, e te mii maata roa; ko Rahela i te aue anga i tana au tamariki, e kare rava akera ana tamariki, no te mea kare nei ratou.’

Kare te nga tamariki a Rahela i mate ana i mua ake iaia. No reira, ko ta Ieremia i tata i tetai 1,000 mataiti i muri ake i to Rahela mateanga, penei i te akara anga kua tarevake te reira.

Te tamaiti mua ta Rahela i anau mai, ko Iosepha. (Gene. 30:22-24) Muri mai kua anau mai te rua o tana tamaiti, ko Beniamina. Inara kua mate a Rahela i tona anau mai anga ia Beniamina. No reira penei ka ui tatou e: Eaa ra a Ieremia 31:15 i karanga ai e kua aue a Rahela i tana au tamariki no te mea “kare nei ratou”?

E mea puapinga kia kite e ko te tamaiti mua ko Iosepha, kua anau tana nga tamariki ko Manase raua ko Epheraima. (Gene. 41:50-52; 48:13-20) I muri mai, ko te kopu o Epheraima tei maata roa atu i roto i te patireia apa tokerau o Iseraela e kua riro ratou ei mata no te au kopu tai ngauru. I tetai tua ra, ko te kopu o Beniamina, te rua o te tamaiti a Rahela, ko ratou tetai tuanga o te patireia apatonga o Iuda. No reira ka rauka i te karanga e e akatutuanga a Rahela no te au metua vaine pouroa o Iseraela, te patireia apatokerau e te patireia apatonga.

I te tuatau i tataia ai te puka o Ieremia, e maata te au tangata tei apainaia ei tuikaa i te peke anga te patireia apatokerau o Iseraela ki to Asura. Inara, penei kua oro tetai o te uanga o Epheraima ki Iuda. I te mataiti 607 M.T.N., kua peke te patireia apatonga o Iuda ki to Babulonia. I te akara anga, e maata te aronga tuikaa tei apainaia ki Rama, mei te 8 kiro mita i te tua tokerau o Ierusalema. (Iere. 40:1) Penei kua tamateia tetai pae ki reira, vaitata ki te tanumanga o Rahela i roto i te oire o Beniamina. (1 Samu. 10:2) No reira te aue anga a Rahela i tana tamariki, ka tau kia karangaia e te aue ra aia i te ngati Beniamina me kore i te aronga tei tamateia i Rama. Tetai katoa, penei te tuatua ra a Ieremia no runga i te au metua vaine pouroa o te iti tangata o te Atua e aue ra i te mate anga me kore te akatuikaaia anga te iti tangata o te Atua.

Noatu te reira, te au tuatua a Ieremia no runga ia Rahela e aue ra i tana tamariki, e totou te reira tei tupu i te au anere mataiti i muri mai i te tuatau i rokoia ai a Iesu e te kino i tona tamarikianga. Kua akaue oki te Ariki ko Heroda e kia tamateia te au tamariki tamaroa ko tei tae ki te rua mataiti i Betelehema, i te tua tonga o Ierusalema. No reira kare nei ratou; kua mate oki ratou. Akamanako ana i te au metua vaine e atiati ra i te aue i ta ratou au tamariki tamaroa tei tamateia! Mei te mea rai e te akarongoia maira ta ratou aue i Rama, i te tua tokerau o Ierusalema.—Mata. 2:16-18.

No reira, i te tuatau o Ieremia e i to Iesu tuatau, te akaari maira to Rahela aue anga i tana au tamariki i te aue anga te au metua vaine ngati Iuda i te tamateia anga ta ratou tamariki. Tera ra, te aronga tei aere ki “te enua o te enemi” koia oki te mate, ka oki akaou mai ratou me akatuakaouia mai te aronga tei mate.—Iere. 31:16; 1 Kori. 15:26.