Eskritura iha Jeremias 31:15 hatete: “Jeová hatete nuneʼe: ‘Rona lian ida husi Ramá, tanis lelir no lian halerik nian: Rakel tanis hela ninia oan-mane sira. Nia lakohi simu konsola tanba ninia oan-mane sira la iha ona.’”

Tuir loloos Rakel mate uluk liu ninia oan-mane naʼin-rua. Entaun, buat neʼebé Jeremias hakerek tinan 1.000 liutiha Rakel nia mate, rona hanesan ladún han malu.

Ninia oan-mane primeiru mak José. (Gênesis [Kejadian] 30:22-24) Oan-mane segundu naran Benjamin. Rakel mate bainhira hahoris hela Benjamin. Entaun, neʼe hamosu pergunta ida kona-ba Jeremias 31:15, tanba eskritura neʼe dehan katak Rakel tanis tanba ninia oan sira la iha ona.

Atu komprende eskritura neʼe, ita presiza hatene katak ikusmai José iha oan rua naran Manase no Efraim. (Gênesis [Kejadian] 41:50-52; 48:13-20) Tanba suku Efraim iha influensia boot iha Izraél parte norte nian, ikusmai nia sai suku boot ida neʼebé reprezenta suku sanulu seluk. Benjamin sai suku Judá iha Izraél parte súl nian. Tan neʼe mak Rakel sai hanesan inan ida ba Izraél tomak.

Iha Jeremias nia tempu, Izraél parte norte nian ema Asíria halakon tiha ona no sira barak mak ema kaer hodi lori ba ema nia rai. Maibé, karik iha ema husi Efraim balu halai subar tiha ba Judá. Toʼo tiha tinan 607 molok Kristu, ema Babilónia mós bá halakon tan suku parte súl rua seluk iha Judá no kaer mós ema barak. Ema lori sira bá sidade ida naran Ramá, maizumenus kilómetru 8 husi Jeruzalein norte. (Jeremias [Yeremia] 40:1) Dala ruma mós ema bele oho sira balu iha Benjamin nia área neʼebé sira hakoi Rakel. (1 Samuel 10:2) Tan neʼe, Rakel nia tanis bele refere ba ema husi Benjamin hotu ka sira seluk neʼebé mate iha fatin besik Ramá nian. Rakel nia tanis mós bele hatudu kona-ba inan Izraél sira neʼebé tanis ba mate sira, ka ba Maromak nia povu neʼebé ema seluk kaer.

Kona-ba buat sira-neʼe, buat neʼebé ita presiza komprende mak, Jeremias nia liafuan kona-ba Rakel nia tanis mak profesia ida. Neʼe refere ba buat neʼebé akontese ba Jesus kuandu nia sei labarik. Tempu neʼe mak bainhira Liurai Herodes fó orden hodi oho hotu labarik sira husi tinan rua mai kraik iha Jeruzalein súl. Hanoin toʼok kona-ba inan sira neʼebé tanis tanba sira-nia oan-mane la iha tan ona. Ida-neʼe hanesan ema iha Ramá, parte norte husi Jeruzalein mós bele rona sira-nia lian tanis.—Mateus 2:16-18.

Nuneʼe mak Rakel nia tanis iha Jeremias nia tempu no iha Jesus nia tempu hatudu kona-ba ema Judeu nia inan sira tanis triste tanba sira-nia oan mate. Maibé ita hatene katak ema sira neʼebé mate ka bá tiha “inimigu nia fatin”, sei mai fali bainhira sira hetan fali moris-hiʼas.—Jeremias (Yeremia) 31:16; 1 Korinto 15:26.