Bibilo ôr ken Yeremia 31:15 ér: “TER ngu kaan nahan er: Ungwa! imo ken Rama, kwelegh man mliam ma vaan tsung; Rahel ngu vaan ônov nav; a venda ishima i surun sha ci u ônov nav, gadia kera mba ga.”

Ônov mba Rahel mba uhar mbara yange ve vande kpen a na ga. Sha nahan yô, ka inja er kwagh u Rahel kpe, anyom kar 1,000 cii ve Yeremia va mase ngeren la ngu sha mi ga nahan.

Yosev lu wan u Rahel u hiihii. (Gen. 30:22-24) Shighe kar yô, a shi a mar wan ugen, i ii un iti ér Benyamin. Kpa Rahel yange kpe shighe u lu maren wan na u sha uhar la. Sha nahan yô, mpin due ér: Hii nan ve Yeremia 31:15 a kaa ér Rahel lu vaan ônov nav, ér “kera mba ga”?

Doo u se fa ser Yosev yange mar ônov uhar, ati a ve lu Manase man Eferaim. (Gen. 41:50-52; 48:13-20) Shighe kar yô, Eferaim za iti kpishi shi hemba ngeen a uipaven mbagenev mba ken tartor u Iserael u ken imbusutarimese la cii, shi yange tile sha ityough ki uipaven mbapuev mbara. Nahan kpa, ipaven i i due ken tsombor u Benyamin, wan u Rahel u sha uhar la di lu ken tartor u ken imbusutariyan la vea Yuda imôngo. Sha nahan yô, a fatyô u kaan ér, Rahel tile sha ityough ki ngô u ikyurior i Iserael cii, ka tartor u ken imbusutarimese man u ken imbusutariyan je la.

Shighe u i nger takerada u Yeremia la, Mbaashiria ta num sha uipaven mbapuev mba tartor u ken imbusutarimese la, nahan ve yem a ve uikyangen. Nahan kpa, alaghga ior mbagenev ken tsombor u Eferaim yevese yem ken haregh u Yuda. Ken inyom i 607 C.S.Y. (Cii man Shighe u Yesu) la, Mbababilon va hemba uipaven mbauhar mba ken tartor u Yuda u ken imbusutariyan la ityav. Ka inja er shighe u i hemba ve ityav la, i kôr ior kpishi i yem a ve ken gar u Rama. Gar ne lu vegher u ken imbusutarimese i gar u Yerusalem, shi gba ica a na kuma uikilomita 8 nahan. (Yer. 40:1) Alaghga yange a wua mbagenev hen gar u Rama, u lu ken haregh u Benyamin, ape i ii Rahel la. (1 Sam. 10:2) Nahan Rahel yange vaa sha injakwagh, sha ci u ku u i wua Mbabenyamin la, shin lu sha ci u mba i wua ve ken gar u Rama la. Shi alaghga mkaanem ma Yeremia mara lu ôron kwagh u mliam ma ungô mba ken Iserael cii lu vaan sha ci u i yem a ior mba Aôndo ken uikyangen la.

A̱ lu nyi je kpa, kwagh u Yeremia kaa ér Rahel ngu vaan ônov nav la lu kwaghôron u profeti, u tsengaôron kwagh u va er anyom uderi imôngo ken hemen, zum u i nôngo u wuan Yesu shighe u lu iyev la yô. Tor Herode yange wa tindi ér i wua hanma anikyundan u ken gar u Betelehem, u nan lu anyom ahar cii. Gar ne lu vegher u imbusutariyan i gar u Yerusalem. Sha nahan yô, ônov mbara kera lu ga, ve kpe. Hen ase er ungôôv mba i wua ônov vev la yange vea vaa kpishi sha ci u ônov vev “kera lu ga,” ve kpe yô! Lu inja er a fatyô u ungwan mliam vem mara ken Rama, u lu vegher u ken imbusutarimese u gar u Yerusalem la nahan.—Mat. 2:16-18.

Sha nahan yô, sha ayange a Yeremia la man sha shighe u i mar Yesu la cii, mliam ma Rahel lu vaan ônov nav la tese er ungôôv mba ken Mbayuda vaa ku u ônov vev yô. Nahan kpa, ishimaverenkeghen ngi ér, alaghga a va pase mbakpenev mba ve yem ken “tar u mbaihyomov vev” la a tuha, sha u nderen ve shin ku.—Yer. 31:16; 1 Kor. 15:26.