Ермея 31:15-де: «Реб шейле диййәр: „Рамадан бир сес эшидилди, агы ве аҗы перят сеслери, Рахел чагалары үчин аглаяр, теселли берилмегини ислемейәр, чүнки инди олар ёк“» дийилйәр.

Рахел ики оглундан өң арадан чыкяр. Онда Рахелиң өлүминден мүң йыл геченсоң, Ермеяның язан сөзлери нәмәни аңладяр?

Рахелиң илкинҗи оглы Юсупды (Гел. чык. 30:22—24). Икинҗи оглуның ады болса, Беняминди. Эмма Рахел оны дүнйә индиренде арадан чыкды. Онда нәме үчин Ермея 31:15-де Рахел: «Инди олар ёк» дийип, огуллары үчин аглаяр?

Юсубың Манаше ве Эфрайым атлы огуллары барды (Гел. чык. 41:50—52; 48:13—20). Эфрайым Ысрайылың он тайпалы демиргазык патышалыгының иң әхмиетлисиди ве онуң адыны гөтерйәрди. Рахелиң икинҗи оглы Бенямин болса, Яхуда билен гүнорта патышалыгына дегишлиди. Шол себәпли демиргазык ве гүнорта патышалыкларының әхли энелерине гөчме маныда Рахел дийилйәр.

Ермея китабы языланда Ысрайылың демиргазык он тайпалы патышалыгыны ашурлылар басып алып, халкыны сүргүн эдипди. Эмма Эфрайым тайпасындан көпүси Яхуда гачып гиден болмалы. Иң соңы б. э. өң 607-нҗи йылда бабыллылар ики тайпалы Яхуданы хем басып аляр. Шонда Иерусалимден 8 км демиргазыкда ерлешйән Рама шәхеринден көп адамлары сүргүн эдйәрлер (Ер. 40:1). Рахелиң җайланан еринде, ягны Беняминде яшаянларың көпүси өлдүрилипди (1 Шам. 10:2). Рахел огуллары үчин аглаяр дийилмеги Беняминде ве Рамада өлдүрилен адамлар үчин яс тутулмагыны аңладярды. Я-да Худайың халкының арасындакы әхли энелериң өлдүрилен ве сүргүн эдилен ысрайыллылар үчин эден перядыны аңладян болмалы.

Шейле-де Ермеяның «Рахел чагалары үчин аглаяр» диен сөзлери пыгамберликди. Бу пыгамберлик йүзлерче йыл геченсоң, Иса чага вагты җанына ховп абананда берҗай болды. Хиродес патыша Иерусалимиң гүнортасында ерлешйән Бейтуллахам шәхериндәки ики яша ченли әхли огланлары өлдүрмеги буйрупды. Шонда бир огланам галман, әхлиси өлдүрилипди. Огулларыны йитирен энелериң чекен хасратыны гөз өңүне гетириң! Оларың агы сеслери Иерусалимиң демиргазыгында ерлешйән Рама етди (Мат. 2:16—18).

«Рахелиң чагалары үчин агламагы» Ермеяның ве Исаның гүнлеринде Яхудадакы энелериң өлен чагалары үчин яс тутмагыны аңладяр. Элбетде әхли адамлар диреленде, оларың чагалары «душман юрдундан ызына гелер» (Ер. 31:16; 1 Кор. 15:26).