Jeremaia 31:15 i tok: “Bikpela i tok olsem, ‘Bikpela krai na singsing sori i kamap long taun Rama. Em Resel i krai sori long ol pikinini bilong en i dai pinis. Na em i no laik bai ol manmeri i mekim gut bel bilong en, long wanem, olgeta pikinini bilong en i no moa i stap.’”

Tupela pikinini man bilong Resel i stap laip yet taim Resel i dai. Olsem na 1,000 yia bihain long taim Resel i dai, Jeremaia i raitim wanpela tok na sampela man i pilim olsem dispela tok i no stret.

Fesbon bilong Resel em Josep. (Stt. 30:22-24) Bihain em i karim Benjamin. Tasol Resel i dai taim em i karim Benjamin. Olsem na askim i kamap: Wai na Jeremaia 31:15 i tok Resel i krai sori long ol pikinini bilong em “i dai pinis”?

Tingim: Josep i kamapim Manase na Efraim. (Stt. 41:50-52; 48:13-20) Bihain, lain Efraim i kamap nambawan strongpela lain bilong 10-pela lain Israel long hap not, olsem na lain Efraim i stap olsem piksa bilong makim ol dispela lain. Tasol dispela lain husat i bin kamap long rot bilong Benjamin, em namba 2 pikinini bilong Resel, ol i kamap olsem hap bilong lain Juda long hap saut. Olsem na yumi ken tok Resel i stap olsem piksa bilong makim olgeta mama long Israel, long hap not na hap saut.

Taim Jeremaia i raitim buk bilong em, ol Asiria i kisim pinis 10-pela lain bilong Israel long hap not, na bringim planti bilong ol i go kalabus. Tasol ating sampela bilong lain Efraim i ranawe i go long graun bilong ol Juda. Long 607 B.C.E., ol Babilon i kam pait na kisim 2-pela lain Juda long hap saut. Long dispela taim, ol Babilon i kalabusim planti Juda na kisim ol i go long Rama, em i stap 8 kilomita longwe long Jerusalem, long hap not. (Jer. 40:1) Ating ol Babilon i kilim i dai sampela bilong ol long dispela graun bilong Benjamin we ol i bin planim Resel long en. (1 Sml. 10:2) Olsem na dispela tok long Resel i krai sori long ol pikinini bilong em inap makim olsem em i krai sori long lain bilong Benjamin, o em i krai long liklik hap lain bilong ol long Rama. Dispela tok inap makim tu olsem olgeta mama long lain bilong God i bin krai sori long sampela bilong lain Israel husat i dai, o ol i go kalabus long narapela kantri.

Tasol bikpela samting moa, tok bilong Jeremaia long Resel i krai sori long ol pikinini i olsem tok profet. Em i makim hevi i kamap planti handret yia bihain taim Jisas i stap pikinini yet na birua i laik painim em. King Herot i tok long ol i mas kilim i dai ol liklik pikinini man long Betlehem long hap saut bilong Jerusalem, kirap long ol bebi na i go inap long ol pikinini i gat 2-pela krismas. Olsem na ol dispela pikinini man i no stap moa—ol birua i kilim ol i dai. Yumi ken tingim bikpela krai sori bilong ol mama em pikinini bilong ol i dai pinis! I olsem ol man long Rama, long hap not bilong Jerusalem, inap harim dispela krai sori.—Mat. 2:16-18.

Olsem na long taim bilong Jeremaia na long taim Jisas i stap long graun, dispela tok long Resel i krai sori long ol pikinini bilong em i makim stret bikpela krai sori bilong ol mama Juda long ol pikinini bilong ol i dai pinis. Tasol yumi save olsem ol dispela pikinini husat i dai na i go long “kantri bilong ol birua,” ol inap i kam bek taim ol man i dai pinis i kirap bek.—Jer. 31:16; 1 Kor. 15:26.