Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Mbela okuxwika oimhu okwa yuka ngoo kOvakriste?

Omunhu pauhandimwe oku na okuninga etokolo kutya oshimhu shaye otashi xwikwa po ile hasho. Nonande Ombibeli inai popya kondadalunde kombinga yaasho, ashike oshiwa okudidilika kutya oshimhu shohamba Saul noshomonamati waye Jonatan osha li sha xwikwa po nokufudika omute. (1 Sam. 31:2, 8-13) — 6/15, epandja 7.

Ongahelipi to dulu okupopya nokaana koye nopehe na okutanguna?

Diladila kutya okaana koye otashi dulika ashike taka kendabala okulongifa ounghulungu wako wokutomhafana notashi dulika inaka kanyatela nokuli ketaleko lako. Ponhele yokuhovela okutanguna, endulula osho ka ti. Ninga okwoongala kwoukwaneumbo opo mu kundafane eemhango di na sha nefimbo lokuuya keumbo nosho yo dimwe vali. — wp13 11/1, epandja 8-10.

Omashongo elipi umwe ta dulu okushakeneka ngeenge okwa tembukile koshilongo shi lili oko ku na omhumbwe inene yovaudifi?

Omashongo atatu oo (1) okutambula ko onghedi imwe yokukalamwenyo, (2) okulididimikila odjuulufi yokeumbo nosho yo (3) okupanga oukaume novamwatate vomoshitukulwa oko wa tembukila. Vahapu ovo va finda omashongo oo ova nangekwa noupuna munene. — 7/15, epandja 4-5.

Mbela efyo olo exulilo lovanhu?

Eshi Jesus a nyumuna ovanhu osha li euliko la yela kutya Kalunga okwe mu pa eenghono dokufinda efyo. Ombibeli oya ti Jesus paife oku “neeshapi defyo.” (Eh. 1:18) Onghee hano, Jesus ota ka yeulula eembila, ngaashi ashike a li a yandja elombwelo kutya emanya olo la li la idila pombila yaLasarus nali alangatifwe po. (Joh. 5:28, 29) — 3/1, epandja 6, 7.

Omolwashike oufo vape hava pondola neenghono nova pu okulongifa?

Oufo aveshe vape ova longwa monghedi ya faafana. Okafo keshe otake tu linyengifa tu leshe omushangwa mOmbibeli notu pule omuneumbo epulo. Kashi na nee mbudi kutya okwa nyamukula ngahelipi, ohatu dulu okupandja meni lokafo noku mu ulikila osho Ombibeli tai ti. Ohatu dulu yo oku mu ulikila epulo olo hatu uya okukundafana eshi hatu ka ninga elishuneko. — 8/15, epandja 13-14.

Eenghatu nhatu dilipi tadi dulu oku tu kwafela tu finde omayeleko?

Onghatu (1) Lungamena osho to tale, (2) Amena omadiladilo oye nosho yo (3) Lungamena eenghatu doye. Ngeenge owa kala wa pama nokufinda omayeleko, oto dulu okukala noushili kutya Kalunga ota ka kala yo e udite etumba omolwoye. (Omayel. 27:11) — 5/1, epandja 12-14.

Oshike osho ovadali Ovakriste tava dulu okuninga opo va life nawa ovana vavo?

Osha fimanenena okupwilikina kovana voye opo u va shiive nawa. Kendabala oku va palula pamhepo. Va wilika pahole, pashihopaenenwa, ngeenge tava kwatwa komalimbililo e na sha noinima yopamhepo. — 9/15, epandja 18-21.

Kalunga oha tale ko ngahelipi kushila omakaya?

Jehova Kalunga ohe tu hongo okupitila mEendjovo daye, Ombibeli, tu kale tu na etaleko liwa li na sha nomwenyo, omalutu nosho yo oukwatya wetu wokudiladila. Nopehe na omalimbililo, Kalunga okwa hala tu longife nawa onghalamwenyo yetu, omalutu etu nokuungaunga nao nefimaneko. (2 Kor. 7:1) — 7/1, epandja 4-6.

Ehangano lilipi mOmbibeli la pitika vamwe va ka pangele pamwe naKristus?

Konima yOpaasa yaxuuninwa pamwe novayapostoli vaye, Jesus okwa li a ninga ehangano novahongwa vaye ovadiinini, olo tali ifanwa ehangano lOuhamba. (Luk. 22:28-30) Ehangano olo ole va shilipaleka kutya otava ka pangela pamwe naJesus meulu. — 10/15, epandja 16-17.

Olyelye a shita Kalunga?

Okwa kala ko ofimbo oishitwa inaendunge yaha li ko, ngaashi Omona waye ewifa nosho yo ovaengeli. (Job 38:4, 7; Col. 1:15) Onghee hano, osha yela kutya tete okwa kala ko oye aeke. Ina shitwa molwaashi kapa li sha osho tashi dulu oku mu shita. — 9/1, epandja 15.

Oolyelye ovo va popiwa kuJakob mOilonga 15:14 ve li ‘oshiwana sha likolelwa edina laye’?

Ovo ova li Ovajuda novaitaveli vomoiwana imwe ovo va li va hoololwa kuKalunga va kale oshiwana oshihoololwa shi “hepaulule oilonga ya fimana” yaao e shi ifana. (1 Pet. 2:9, 10) — 11/15, epandja 24-25.