Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu namuhasa kukumbulula vihula vino vinakavangizaho:

Vyuma muka vyalingishile vaYuleya vamulikulukaji lyamyaka lyakulivanga ‘vatalilile’ Meshiya?

Omu Yesu asemukile, kangelo kaYehova asolokele kuli tufunga vaze vapwile nakulama mikoko javo kwakamwihi naMbetelema. Kangelo avilikile ngwenyi: “Lelo lino kunganda yaNdavichi kunamisemukila Mulwilo, ikiye Kulishitu, Mwata.” (Luka 2:8-11)—2/15 lifwo 26.

Uno kufwa chaYesu twatela kuchanukanga ngachilihi?

Yesu ashikile vaka-kumukavangiza shimbu kanda afwenga ngwenyi vatela kulinganga chilika chakwanukanga kufwa chenyi. Ngachize kulinganga chilika chakwanuka kufwa chaYesu mwaka himwaka cheji kutukafwa tushinganyeke hazangi atwama nayo Yesu naYehova hali vatu.—4/1 lifwo 16.

Mwomwo ika kushikulu vatu vapulilenga uvwalo wavo?

Visoneka vyalumbununa vyuma vimwe vize vyalingishile vatu vamwe vapule uvwalo wavo? Makumbi ano, vatu kaveshi kupula uvwalo wavoko, oloze vaYuleya vamwe vapulilenga uvwalo wavo mangana vasolole nge vanahombo, vanakulinyenga, vanapihilila chipwe vanakulishona.—4/15 lifwo 32.

Uno chapwa chakutamo vaka-Kulishitu kulumba mufu tahi?

Kulumba mufu chipwe nduma chapwa kulisakwila mutu livene. Numba tuhu Mbimbiliya kayahanjika hatoma vilinga kanako, oloze twatachikiza nge omu Mwangana Saulu namwanenyi Yonatane vafwile, mijimba yavo vayilumbile kaha kufumaho vifuhwa vyavo vavivumbikile. (Samwe. 1, 31:2, 8-13)—6/15, lifwo 7.

Mwomwo ika vatu veji kulombelanga?

Vatu vamwe veji kulombanga mangana “vaunjise michima yavo.” Vaka-kwitava vamwe nawa veji kulombanga kuli Kalunga halwola luze navapwa muukalu nakushinganyeka ngwavo Kalunga mwakumbulula kulomba chavo hashimbu vene yize.—7/1 lifwo 3.

Ukalu muka nahase kumona muka-kwambulula uze mwaya nakuzachila kuze kuli nakusakiwa kukafwa mulifuchi lyeka?

Ukalu utatu wakufwana nge (1) Kwijilila chiyoyelo chachihya, (2) kwivwa uli chikuma, (3) kuwana masepa vavahya. Vandumbwetu vavavulu vaze vanamononga ukalu kana vanavakisula mwamunene kuli Yehova.—7/15, mafwo 4-5.

Mwomwo ika jitalakiti jetu jajihya japwa jajashi kuzachisa mumulimo wakwambulula?

Talakiti hitalakiti yatwama nachisoneka chize twatela kutangila mutu nachihula twatela kumuhulisa. Kweseka nomu mwakumbulula mutu, tunahase kupandumuna mukachi katalakiti nakumulweza vyuma yahanjika Mbimbiliya. Tunahase nawa kumuhulisa chihula chize natukeza kukakumbulula haungeji wakuhilukila.—8/15, mafwo 13-14.

Vyuma muka vatela kulinga visemi mangana vafungenga kanawa vana vavo?

Chapwa chachilemu visemi kwivwilila vyuma vali nakuhanjika vana vavo mangana vavatachikize kanawa. Fwilenu kuvazakama kushipilitu. Vatwaminyine muzangi chikumanyi nge kaveshi nakuhaka mangana kuvyuma vyakushipilituko.—9/15, mafwo 18-21.

Uno tunahase kufwelela ngachilihi ngwetu Kalunga keshi ikiye eji kunehanga vyuma vyavipiko?

Kalunga napu wakwoloka mujijila jenyi josena. Apwa wachiyulo, wakushishika kaha nawa wakusungama. Yehova atwama nazangi chikuma kaha nawa muka-kutetela. (Lushi. 32:4; Samu 145:17; Yako. 5:11)—10/1, lifwo 4.

Uno mauka akwitava osena eji kulemesanga Kalunga tahi?

Kweseka namijimbu yinakusoloka mukaye, munahase kukukulula ngwenu lwola lumwe vatu veji kulinganga vyuma vyavipi kuhichila mumauka akwitava. Keshi nge kwitava chosena chafuma kuli Kalunga wamuchanoko.—10/1 lifwo 16.

Chivwasano muka chatwama muMbimbiliya chize chahanjika havatu vaze navakayula naKulishitu?

Hanyima yakulinga chilika chaPaseka, Yesu alivwasanyine navaposetolo jenyi vakushishika vyachivwasano chaWangana. (Luka 22:28-30) Chivwasano kana chavakafwile vafwelele nge navakayula hamwe naYesu mwilu.—10/15, mafwo 16-17.

Veya vaze vapwile “vatu valijina lyenyi” vaze Yakova ahanjikile hachisoneka chaVilinga 15:14?

Vatu kana vapwile vaYuleya navaze kavapwile vaYuleyako vaze Kalunga asakwile kupwa muyachi wakusakula mangana ‘vavilikenga kwosena kuwaha’ chauze avasanyikile. (Petu. 1, 2:9, 10)—11/15, mafwo 24-25.