Binasam ta iray agano nin isyu na Say Panag-bantayan tan The Watchtower? Salim pa sirin ya ebatan irayan tepet:

Sarag to kasi cremation ed saray Kristiano?

Antokaman so gawaen ed bangkay na sakey et personal ya desisyon. Anggaman anggapoy direktan ibabaga na Biblia nipaakar ed cremation, makapainteres ya nabasan say bangkay nen Arin Saul tan say anak ton si Jonatan et pinoolan insan inkotkot. (1 Sam. 31:2, 8-13)—6/15, pahina 7.

Akin ya segurado tayon agmanlalapud Dios iray nagagawan mauges a bengatla?

Say Dios et matunong ed amin a gagawaen to. Kaptekan so amin a dalan to, tan sikatoy napanmatalkan. Si Jehova et maar-aro met tan mapangasi. (Deu. 32:4; Sal. 145:17; Sant. 5:11)—9/1, pahina 4.

Anto ray subok ya nayarin arapen na sakey no manlingkor ed arum a bansa ya mas baleg so pankaukolan?

Saratan ya subok et (1) pan-adjust ed duman klase na panagbilay, (2) pakakailiw, tan (3) pibagay ed saray agagi diman. Abendisyonan ya maong so dakel ya agagin asarag da irayan subok.—7/15, pahina 4-5.

Akin ya binusol si Jose na saray agagi to?

Say sakey ya rason et lapud mas inaro nen Jacob si Jose ya inikdan to ni ingen na espisyal ya kawes. Akaibeg iray agagi nen Jose kanian sikatoy inlako da bilang aripen.—8/1-E, pahina 11-13.

Akin ya epektibo tan mainomay ya usaren iray balon tract tayo?

Amin ya balon tract tayo et pareparehoy format da. Tutulongan itayo na kada tract ya mangibasay sakey ya teksto ed Biblia tan mantepet ed householder. Antokaman so iyebat to, ibukay tayo so tract ed onsublay ya pahina tan ipanengneng ed sikato no antoy ibabaga na Biblia. Sarag tayo met so mangitilak na tepet ya ebatan ed ipawil tayo.—8/15, pahina 13-14.

Anto so Syriac Peshitta?

Say Syriac et sakey ya dialekto na Aramaiko tan dakel so manguusar ed satan nen komadua o komatlon siglo C.E. Mapatnag ya saray kabiangan na Kristianon Griegon Kasulatan et inmunan nipatalos ed lenguahen Syriac. Say Biblia ya impatalos ed Syriac et tinawag ya Peshitta.—9/1-E, pahina 13-14.

Panon ya napastolan na saray atateng iray ananak da?

Importante so idengel ed ananak pian nakabat tayo ran maong. Pakanen iran maong ed espiritual. Maaro iran igiya, lalo la no panduaruwaan da ray katuaan ya ibabangat yod sikara.—9/15, pahina 18-21.

Anto ray anggapo la diad uley na Panarian na Dios?

Anggapo lay sakit tan ikapuy na laman, patey, agla onkulang so naakan, tan anggapo lay manirap.—11/1, pahina 6-7.

Anton sipanan ed Biblia so angiyabuloy ed arum ya miuley ed Kristo?

Kayari unor ya Paskua nen Jesus kaiba iray apostol, sikatoy akisipanan ed saray matoor ya disipulo to. Tinawag itan ya sipanan parad Panarian. (Luc. 22:28-30) Impaseguro na satan ed sikara ya nakaiba day Jesus ya manuley ed tawen.—10/15, pahina 16-17.

Mangiter na duaran alimbawa ed Biblia ya mangipanengneng ya si Satanas et tuan persona.

Ibabaga na Kasulatan ya akitongtong si Satanas ed si Jesus pian tuksoen to. Nen panaon met nen Job, akitongtong si Satanas ed Dios. Papaneknekan na sarayan salaysay ya si Satanas et tuan persona.—11/1-E, pahina 4-5.

Siopa ray “totoon parad ngaran to” ya tinukoy nen Santiago diad Gawa 15:14?

Sikara iramay Judio tan aliwan Judion mananisia ya pinilin kapolian na Dios ‘pian iyabawag dad amin a pasen iray alay abig a kualidad’ na samay anawag ed sikara. (1 Ped. 2:9, 10)—11/15, pahina 24-25.

Iner tay Timgad, tan antoy ugali na arum ya totoo ditan?

Say Timgad et baleg ya Romanon syudad nensaman diad North Africa (natan et Algeria). Walay akotkot ditan ya inskripsion ya mangipapanengneng no antoy ugali na arum ya totoo ditan. Oniay kuan to: “Pangerel na Ayep, Panames, Panggalaw, Panliket—Atan so Bilay!” Mipara itan ed samay nabasad 1 Corinto 15:32.—12/1-E, pahina 8-10.