Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Kristiannan tin mag di krema nan defuntu?

Ta keda na e persona mes òf na su famia pa disidí si despues ku e fayesé ta krema su kurpa òf nò. Aunke Beibel no ta papia spesífikamente tokante e práktika akí, ta bon pa tuma nota ku despues ku Rei Saul i su yu hòmber Jonatan a muri, e israelitanan a kima nan kurpa i despues dera e wesunan. (1 Sam. 31:2, 8-13)—15/6, página 7.

Dikon nos por tin sigur ku no ta Dios ta pone kos malu pasa?

Tur Dios su kamindanan ta hustu. E ta un Dios hustu, fiel i rekto. Ademas, Yehova tin masha kariño i miserikòrdia. (Deu. 32:4; Sal. 145:17; Sant. 5:11)—1/7, página 4.

Kiko ta e desafionan ku un ruman por hañ’é kuné ora e muda bai den estranheria pa sirbi kaminda tin nesesidat di mas publikadó?

Tres di e desafionan ei ta pa (1) adaptá na e estilo di bida, (2) trata ku heimwé i (3) sera amistat. Hopi di nos rumannan a logra surpasá e desafionan akí i a haña hopi bendishon.—15/7, página 4-5.

Dikon Yosef su ruman hòmbernan tabata odi’é?

Un motibu ta ku Yakòb tabatin mas kariño pa Yosef; el a asta dun’é un túnika masha bunita. E ruman hòmbernan di Yosef a bira yalurs i a bend’é komo esklabo.—1/8, página 11-13.

Dikon e tratadonan nobo ta asina efikas i fásil pa usa?

Tur e tratadonan tin e mesun estilo. Kada tratado ta kontené un pregunta ku nos por hasi e doño di kas i tambe un teksto bíbliko ku nos por lesa p’e. Pues, sea kual sea su kontesta, nos por bai na e página paden i mustr’é kiko Beibel ta bisa. Ademas, nos por mustr’é e pregunta parti patras di e tratado ku nos por trata kuné na un siguiente bishita.—15/8, página 13-14.

Kiko e Peshitta siriako ta?

Siriako ta un dialekto arameo ku hopi hende a kuminsá usa den siglo 2 òf 3 despues di Kristu. Ta parse ku siriako tabata e promé idioma ku nan a usa pa tradusí algun parti di e Skritura Griego Kristian. Anto e vershon di Beibel tradusí na e idioma siriako a bira konosí komo e Peshitta.—1/9, página 13-14.

Kiko mayornan kristian por hasi pa nan por pastoriá nan yunan?

Ta importante pa mayornan skucha nan yunan pa por siña konosé nan. Mayornan tin ku hasi esfuerso tambe pa alimentá nan yunan spiritualmente. Guia nan ku hopi amor, por ehèmpel, ora nan tin duda enkuanto e bèrdat.—15/9, página 18-21.

Kiko ta algun di e kosnan ku lo no t’ei mas bou di e Reino di Dios?

Problema di salú, morto, desempleo, guera, skarsedat di kuminda i pobresa lo no t’ei mas.—1/10, página 6-7.

Kua pakto bíbliko ta permití hende goberná ku Kristu?

Despues ku Hesus a kome e último sena di Pasku ku su apòstelnan, el a sera un pakto ku su fiel disipelnan: e pakto di Reino. (Luk. 22:28-30) E pakto ei a sigurá e disipelnan ku nan lo goberná huntu ku Hesus den shelu.—15/10, página 16-17.

Duna dos ehèmpel bíbliko ku ta proba ku Satanas ta un persona real.

E Skritura ta bisa ku Satanas a papia ku Hesus ora el a purba di hink’é den tentashon. Den tempu di Yòb tambe Satanas a papia ku Dios. E relatonan akí ta mustra bon kla ku Satanas ta un persona real.—1/11, página 4-5.

Ken a forma parti di e “pueblo pa karga [Dios] su nòmber” ku Santiago a papia di dje na Echonan 15:14?

Wèl, tantu e kreyentenan hudiu komo esnan no-hudiu, kendenan Dios a skohe komo un rasa skohí pa “proklamá tur kaminda” su “kualidatnan ekselente.” (1 Ped. 2:9, 10)—15/11, página 24-25.

Na unda Timgad tabata situá, i ki aktitut algun hende di e lugá ei tabatin?

Timgad tabata un stat romano grandi den Nort Afrika (awe, Algeria). Un artefakto ku arkeólogonan a deskubrí ta duna prueba di loke algun hende ku tabata biba einan tabata kere. E tin un inskripshon ku ta bisa: “Yag, Baña, Hunga, Hari—Esei Ta Bida!” Esaki ta similar na e punto di bista menshoná na 1 Korintionan 15:32.—1/12, página 8-10.