Bo Ta Corda?
Bo a tuma tempo pa lesa e ultimo edicionnan di E Toren di Vigilancia? Wel, wak si bo por contesta e siguiente preguntanan:
Cristiannan tin mag di crema nan difunto?
Ta keda na e persona mes pa dicidi si despues cu e fayece ta crema su curpa of no. Aun- ke Bijbel no ta papia specificamente tocante e practica aki, ta bon pa tuma nota cu despues cu Rey Saul y su yiu homber Jonatan a muri, e Israelitanan a kima nan curpa y despues dera e wesonan. (1 Sam. 31:2, 8-13)
Dicon nos por tin sigur cu no ta Dios ta pone cos malo pasa?
Tur Dios su camindanan ta husto. E ta un Dios husto, fiel y recto. Ademas, Jehova tin hopi amor y misericordia. (Deu. 32:4; Sal. 145:17; Sant. 5:11)
Kico ta e desafionan cu un ruman por hay’e cu ne ora e muda bay den estranheria pa sirbi caminda tin necesidad di mas publicador?
Tres di e desafionan ey ta pa (1) adapta na e estilo di bida, (2) trata cu heimwee y (3) cera amistad. Hopi di nos rumannan a logra surpasa e desafionan aki y a haya hopi bendicion.
Dicon Jozef su ruman hombernan tabata odi’e?
Un motibo ta cu Jacob tabatin mas cariño pa Jozef; el a hasta dun’e un tunica masha bunita. E ruman hombernan di Jozef a bira jaloers y a bend’e como esclavo.
Dicon e tratadonan nobo ta asina eficaz y facil pa uza?
Tur e tratadonan tin e mesun estilo. Cada tratado ta contene un pregunta cu nos por haci e doño di cas y tambe un texto biblico cu nos por lesa p’e. Pues, sea loke sea su contesta, nos por bay na e pagina parti paden y mustr’e kico Bijbel ta bisa. Ademas, nos por mustr’e e pregunta parti patras di e tratado cu nos por trata cu ne na e siguiente bishita.
Kico e Peshitta Sirio ta?
Siriaco ta un dialecto Arameo cu hopi hende a cuminsa uza den siglo 2 of 3 despues di Cristo. Ta parce cu Sirio tabata e prome idioma cu nan a uza pa traduci algun parti di e Scritura Griego Cristian. Anto e version di Bijbel traduci na e idioma Sirio a bira conoci como e Peshitta.
Kico mayornan cristian por haci pa nan por pastorea nan yiunan?
Ta importante pa mayornan scucha nan yiunan pa nan por siña conoce nan. Mayornan tin cu ha- ci esfuerso tambe pa alimenta nan yiunan spiritualmente. Guia nan cu hopi amor, por ehempel, ora nan tin duda encuanto e berdad.
Kico ta algun di e cosnan cu lo no t’ey mas bou di e Reino di Dios?
Problema di salud, morto, desempleo, guera, scarsedad di cuminda y pobreza lo no t’ey mas.
Cua pacto biblico ta permiti hende goberna cu Cristo?
Despues cu Hesus a come e ultimo cena di Pasco cu su apostelnan, el a cera un pacto cu su fiel discipelnan: e pacto di Reino. (Luc. 22:28-30) E pacto ey a sigura e discipelnan cu nan lo goberna hunto cu Hesus den cielo.
Duna dos ehempel biblico cu ta proba cu Satanas ta un persona real.
E Scritura ta bisa cu Satanas a papia cu Hesus ora el a purba di pon’e cay den tentacion. Den tempo di Job tambe Satanas a papia cu Dios. E relatonan aki ta mustra bon cla cu Satanas ta un persona real.
Ken a forma parti di e “pueblo pa carga [Dios] su nomber” cu Santiago a papia di dje na Echonan 15:14?
Wel, tanto e creyentenan Hudiu como esnan no-Hudiu, kendenan Dios a scoge como un rasa scogi pa “proclama tur caminda” su “cualidadnan excelente.” (1 Ped. 2:9, 10)
Na unda Timgad tabata situa, y ki actitud algun hende di e luga ey tabatin?
Timgad tabata un stad Romano grandi den Noord Africa (awe, Algeria). Un artefacto cu arkeologonan a descubri ta duna nos un idea di loke algun hende cu tabata biba eynan tabata kere. E tin un inscripcion cu ta bisa: “Jaag, Baña, Hunga, Hari—Esey Ta Bida!” Esaki ta similar na e punto di bista menciona na 1 Corintionan 15:32.