Yu man memre san yu leisi na ini den Waktitoren di kon na doro no so langa pasa? Luku efu yu kan piki den aksi disi:

A fiti gi Kresten fu bron wan sma te a dede?

A de na wan sma srefi fu taki efu den musu bron en te a dede noso efu den musu beri en. Bijbel no e taki efu a bun noso fowtu fu bron wan sma te a dede. Ma wi kan leisi na ini Bijbel taki sma bron a dedeskin fu Kownu Saul nanga a di fu en manpikin Yonatan èn baka dati den beri den bonyo fu den (1 Sam. 31:2, 8-13).—15/6, bladzijde 7.

Fa wi kan de seiker taki a no Gado e meki takru sani pasa?

Ala ten Gado e du san reti. A no e du kruktudu, a de fu frutrow èn a abi wan krin ati. Yehovah lobi sma trutru èn a abi sari-ati (Deut. 32:4; Ps. 145:17; Yak. 5:11).—1/7, bladzijde 4.

San kan meki en muilek gi wan sma te a froisi go na wan kondre pe moro preikiman de fanowdu?

Dri sani di kan meki en muilek gi en na (1) taki a musu kenki a fasi fa a ben gwenti libi, (2) taki a o misi en famiri, èn (3) taki a musu leri fu meki mati nanga den brada nanga sisa fu a kondre. Furu sma di horidoro na ini den situwâsi disi, kisi furu blesi.—15/7, bladzijde 4, 5.

Fu san ede den brada fu Yosef ben teige en?

Wan sani na taki Yakob ben sori taki a lobi Yosef moro den, di a gi en wan moi dyakti. Den brada fu Yosef ben kon dyarusu na en tapu èn den seri en leki srafu.—1/8, bladzijde 11-13.

Fu san ede a makriki fu gebroiki den nyun traktaat?

Ala den nyun traktaat meki na a srefi fasi. Ibri traktaat e gi wi na okasi fu leisi wan Bijbeltekst èn fu poti wan aksi gi na ososma. Awansi san na ososma piki, wi kan opo a traktaat èn sori en san Bijbel e taki. Wi kan sori a sma na aksi na bakasei fu a traktaat èn go baka na en fu piki na aksi dati.—15/8, bladzijde 13, 14.

San na a Siriatongo Pesyita?

Na ini a di fu tu noso dri yarihondro, moro nanga moro sma bigin taki Siriatongo, wan sortu Arameisitongo. Soleki fa a sori, dan Siriatongo ben de a fosi tongo di sma vertaal pisi fu den Kresten Griki Buku fu Bijbel na ini. Sma kon sabi a vertaling fu Bijbel na ini Siriatongo leki a Pesyita.—1/9, bladzijde 13, 14.

San Kresten papa nanga mama kan du fu yepi den pikin?

A prenspari fu arki den pikin so taki yu kan kon sabi den. Meki muiti fu gi den Bijbel leri. Efu den e bigin tweifri na a tru bribi, dan yepi den na wan lobi-ati fasi fu no tweifri moro.—15/9, bladzijde 18-21.

Sortu sani no o de moro te Gado Kownukondre e tiri grontapu?

Siki nanga dede no o de moro, ala sma o abi wan wroko, angriten nanga feti no o de moro èn nowan sma o pôti.—1/10, bladzijde 6, 7.

Sortu frubontu di skrifi na ini Bijbel e meki taki tra sma kan tiri makandra nanga Krestes?

Baka a lasti Paskafesa di Yesus hori nanga den apostel fu en, a meki wan frubontu nanga den disipel fu en di wi e kari a Kownukondre frubontu (Luk. 22:28-30). A frubontu dati gi den a dyaranti taki den o tiri makandra nanga en na ini hemel.—15/10, bladzijde 16, 17.

Gi tu eksempre fu Bijbel di e sori taki Satan de trutru.

Bijbel e taki dati Satan ben taki nanga Yesus fu di a ben wani tesi en. Boiti dati, na ini a ten fu Yob, Satan ben taki nanga Gado. Den tori disi e sori taki Satan de trutru.—1/11, bladzijde 4, 5.

Suma ben de a ’pipel di musu tyari Gado en nen’, soleki fa Yakobus taki na Tori fu den apostel 15:14?

Den sma disi ben de Dyu bribiman nanga bribiman di no ben de Dyu. Den ben de wan spesrutu grupu sma di Gado ben teki fu „fruteri na ala sei fu den kefalek moi fasi” fu a sma di kari den (1 Petr. 2:9, 10).—15/11, bladzijde 24, 25.

Pe Timgad ben de èn fa son sma di ben tan drape ben e denki?

Timgad ben de wan bigi foto di den Romesma ben bow na ini Noord-Afrika (di wi sabi now leki Algaria). Wan sani di skrifi na a presi pe sma ben miti e sori fa son sma drape ben e denki: „Onti, wasi, prei, lafu, dati na a libi!” Na 1 Korentesma 15:32 wi kan leisi fu a srefi denki disi.—1/12, bladzijde 8-10.