Cokcok mwaki 3,000 mukato angec, laco lwod mo ocoyo ni: “Icweya i yo me aura mada.” (Jabuli 139:14, NW) Ka itamo i kom kit ma latin dongo kwede i ic ki i nyig kom acel keken, tika man pe miyo ibedo ki ur? Dano mapol gitamo ni Lacwec aye tye i nge diro ma nen i cwec.​—Kwan Jabuli 139:13-17; Jo Ibru 3:4.

Ngat ma ocweyo polo dok oyubo lobo wek dano gukwo iye-ni bene aye wang it me kwo. (Jabuli 36:9) En dong okubbe ki dano dok owacciwa lok madok i kome.​—Kwan Icaya 45:18.

Komwa rom ki kom lee i yo mapol. Ento man tye pienni Lacwec ocweyo dano kacel ki lee wek gukwo i lobo. En ocweyo dano mukwongo, pe ki i kom lee ento ki i apwa.​—Kwan Acakki 1:24; 2:7.

Dano gipat ki lee i yo aryo ma pigi tego. Mukwongo, dano gitye ki kero me ngeyo, maro, ki dong woro Lacwec. Me aryo, kadi bed ni lee pe kicweyogi me kwo pi naka, ento dano kicweyogi me kwo pi naka. Ento dano ducu gulako to pien laco mukwongo okwero winyo tira pa Lacwec.​—Kwan Acakki 1:27; 2:15-17.