Kimsa waranqa maranak nayrajja, akham sasaw mä qellqerejj säna: “Jumaruw yuspagarsma, muspharkañpun [‘nayarojj luristajja’, NM]” sasa (Salmo 139:14). Ukajj cheqäskapuniwa. Mä wawajj kunjamsa mä jiskʼa celulataki wawar tukjje ukajj wali muspharkañawa. Walja jaqenakajja, taqe jakirinakaw mä Luririn luratätanjja sasaw amuyapjje. (Salmo 139:13-17 ukat Hebreos 3:4 liytʼäta.)

Alajjpacha Lurirejja, ukhamarakiw aka Oraqe ukat kunanakatï ukan utjki ukanak lurawayi (Salmo 36:9, NM). Juparakiw uñtʼayasiñatakejj jaqenakar parli. (Isaías 45:18, liytʼäta.)

Jaqen cuerpopajja, walja toqenakatwa animalanakar uñtasita ¿kunatsa ukhamäpacha? Animalanakasa ukat jaqenakasa, aka Oraqen jakasipjjañapatak luratäpjjewa, ukat mä sapa Luririn luratäpjjarakiwa. Jupajj janiw jaqerojj mä animalat lurkänti, jan ukasti laqʼatwa luräna. (Génesis 1:24; 2:7 liytʼäta.)

Pä toqetwa jaqenakajj animalat sipan mayja luratätanjja. Jiwasajja, Luririsarojj uñtʼsnawa, munsnawa ukat respetaraksnawa. Yaqhasti, animalanakat sipanjja, wiñay jakañasataki luratätanwa. Ukampis nayrïr awkisan Diosar jan istʼatap laykuw jiwtanjja. (Génesis 1:27; 2:15-17 liytʼäta.)