Napapita imyaka 3,000 ukutula apo kalemba we lumbo alembeele ukuti: “Napangilwe mu musango wa kupapa kabili uwapesha amano.” (Amalumbo 139:14) Bushe tamupapa nga mwatontonkanya pa fyo umwana apangwa no kukula mu nda muli nyina? Abantu abengi balatasha Kabumba nga bamona ifintu ifyo abumba.—Belengeni Amalumbo 139:13-17; AbaHebere 3:4.

Lesa uwabumbile umuulu ne sonde ukuti tuleikalamo, e wabumbile ne fya mweo fyonse. (Amalumbo 36:9) Alitweba ukuti e wabumbile ifintu fyonse kabili alatusambilisha imibele yakwe.—Belengeni Esaya 45:18.

Ifyo Lesa apanga imibili ya bantu fyalipalanako ne fyo apanga imibili ya nama, pantu alefwaya abantu ne nama ukulaikala pa calo. Tabumbile umuntu ukufuma ku nama, lelo amubumbile ukufuma ku lukungu.—Belengeni Ukutendeka 1:24; 2:7.

Abantu balipusana ne nama mu fintu fibili ifikalamba. Ica kubalilapo ca kuti, abantu kuti baishiba, kuti batemwa kabili kuti bacindika na Kabumba. Cimbi ca kuti, Lesa tabumbile inama ukuti shileikala umuyayaya, lelo abumbile abantu ukuti baleikala umuyayaya. Nomba abantu balafwa pantu Adamu alikeene ukumfwila ifyo Kabumba alefwaya.—Belengeni Ukutendeka 1:27; 2:15-17.