Eetaairü maʼaka 3.000 juya süchikijee nüshajüin David wanee pütchi makat mayaa: «Taʼwaajeechi pia süka anain maʼin takumajia putuma» (Salmo 139:14, TNM). Shiimain anain maʼin wakumajia. Jamüshijaʼa wanee joʼuu nukumajaaiwaʼaya süleʼeruʼu nii, akumajaashi nia sünainjee wanee célula otta ponoshootosü maʼin waaʼin sutuma tia, ¿aashimüin? Watta naalii wayuu anoujaka sünain eein chi Kakumalakai kasa süpüshuaʼa. (Paashajeʼera Salmo 139:13-17 otta Hebreokana 3:4, TNM.)

Chi Kakumalakai süpüshuaʼa tü kasa chakat iipünaa, niaʼaya neʼe akumajaka tü kasairua yaakat saaʼu tü Mmakat jee nia chi shikiishikai tü kataakalü oʼu (Salmo 36:9). Aashajaaichi nia sümaa tü wayuukalüirua süpüla neʼraajüinjachin nia. (Paashajeʼera Isaías 45:18.)

Tü mürütkalüirua, müsü aka waaʼin süka kajapüin shiairua, kooʼulin, kacheʼein jee keʼichin shiairua. Nnojoliipejeʼe waya akumajuushin sünainjee mürüt. Makaʼa sukuwaʼipa tü mürütkalüirua shia sutuma waneeshiain chi Kakumalakai shiairua otta nukumajüin süpüla yaainjatüin kepiain saaʼu tü Mmakat. Nnojotsü akumajuushin wayuu sünainjee tü mürütkalüirua, akumajünüsü wayuu sünainjee sümamüla mma. (Paashajeʼera Génesis 1:24 otta 2:7.)

Eesü piamasü kasa naataka atuma wakuwaʼipa suulia tü mürütkalüirua. Tü palajatkat shia sutuma wountüin weʼraajüin chi Kakumalakai waya, wountüin alin nia wapüla jee kojutüin nia wamüin. Tü wanee kasa naatakat atuma wakuwaʼipa suulia tü mürütkalüirua shia sutuma wakumajuushin süpüla katüinjatüin woʼu süpüla kaʼikat süpüshuaʼa. Nnojotsü müin sukuwaʼipa tü mürütkalüirua. Akanasaʼa ouktüin na wayuukana sutuma niyouktüin Adán niainjachin aluwataain naaʼu chi Kakumalakai nia. (Paashajeʼera Génesis 1:27 otta 2:15-17.)