To nudi owhe 3 000 die, ohó milomilo-kantọ de wlan dọmọ: “Awujiji po nujiawu po mẹ wẹ yè dá mi.” (Psalm 139:14) Eyin a lẹnnupọndo aliho he mẹ nuvikun pẹvi dopo nọ wá lẹzun viyẹyẹ de te ji, be e ma nọ jiawu na we ya? Mẹsusu wẹ nọ kẹalọyi dọ Mẹdatọ de wẹ basi nutogbẹ̀ lẹ.—Hia Psalm 139:13-17; Heblu lẹ 3:4.

Mẹhe dá wẹkẹ bo wleawuna aigba to aliho de mẹ bọ nutogbẹ̀ lẹ sọgan nọ e ji wẹ yin asisa ogbẹ̀ tọn. (Psalm 36:9) E dọho hẹ gbẹtọvi lẹ bo hẹn ede zun yinyọnẹn na mí.—Hia Isaia 45:18.

Agbasa mítọn tindo nususu he agbasa kanlin lẹ tọn lọsu tindo. Ṣigba e yinmọ, na Mẹdatọ lọ dá gbẹtọ po kanlin lẹ po nado nọgbẹ̀ to aigba ji wutu. E dá gbẹtọvi tintan lọ sọn kọ́gudu mẹ, e ma yin sọn kanlin de mẹ gba. —Hia Gẹnẹsisi 1:24; 2:7.

Gbẹtọvi lẹ gbọnvo na kanlin lẹ to aliho titengbe awe mẹ. Tintan, gbẹtọvi lẹ sọgan yọ́n Mẹdatọ lọ, yiwanna ẹn, bo tindo sisi na ẹn. Awetọ, gbẹtọvi lẹ yin didá nado nọgbẹ̀ kakadoi, ṣigba e ma yinmọ na kanlin lẹ. To egbehe, gbẹtọvi lẹpo wẹ nọ kú na sunnu tintan lọ ma hodo anademẹ Mẹdatọ lọ tọn wutu.—Gẹnẹsisi 1:27; 2:15-17.