Myaka ta 3,000 mĩvĩtu, mũandĩki ũmwe wa Mbivilia aisye atĩĩ: “Nũmbĩtwe wa kũkĩwa na kũseng’ya.” (Savuli 139:14) We tyo ũseng’aa ĩla wasũanĩa ũndũ mwana ũmbĩkaa e ĩvunĩ kwa inyia? Andũ aingĩ nĩmamũkathaa Mũmbi moona ũndũ wũmbĩte syĩndũ kwa nzĩa ya ũsengy’a.—Soma Savuli 139:13-17; Aevelania 3:4.

Mũmbi witũ nĩwe woombie ĩtu na nthĩ, na anenga syũmbe syonthe thayũ. (Savuli 36:9) O na ĩngĩ, nĩwaneenie na andũ na nũtũtavĩtye ũndũ we ũilyĩ.—Soma Isaia 45:18.

Mĩĩ yitũ yĩthĩawa ĩvw’anene na ya nyamũ kwa nzĩa mbingĩ. Vailyĩ ũu nũndũ andũ na nyamũ syoombiwe syĩkalae kũũ nthĩ. Mũmbi witũ oombie mũndũ wa mbee kuma mũthanganĩ ĩndĩ ti kuma nyamũnĩ.—Soma Mwambĩlĩlyo 1:24; 2:7.

Andũ mavathũkene na nyamũ maũndũnĩ elĩ ma vata. Ũndũ wa mbee nĩ kana andũ methĩawa matonya kũmanya Mũmbi woo, makamwenda, na kũmũnenga ndaĩa. Ũndũ wa kelĩ nĩ kana nyamũ iyoombĩtwe syĩkalae tene na tene kĩvathũkany’o na andũ ala moombiwe mekalae tene na tene. Ĩndĩ ũmũnthĩ andũ onthe nĩmakusaa nũndũ mũndũ wa mbee nĩwaleile kũatĩĩa mĩao ya Mũmbi wake.—Soma Mwambĩlĩlyo 1:27; 2:15-17.