Bamvula kiteso ya 3 000 me luta, poete mosi sonikaka nde: “Nge salaka mono na mutindu mosi ya kuyituka ti ya boma.” (Nkunga 139:14) Keti nge ke yitukaka ve na kuzaba nde luzingu ya mwana ke yantikaka na selile mosi? Bantu mingi ke kwikilaka nde Ngangi muntu gangaka bima yonso.—Tanga Nkunga 139:13-17; Baebreo 3:4.

Muntu yina gangaka luyalanganu ti ntoto gangaka mpi luzingu. (Nkunga 36:10) Yandi ke solulaka ti bantu mpi ke zabisaka bo mambu ya me tala yandi.—Tanga Yezaya 45:18.

Nitu na beto me fwanana ti ya bambisi na mambu mingi sambu Ngangi gangaka bantu ti bambisi sambu bo zinga na ntoto. Yandi sadilaka ve mbisi sambu na kuganga muntu ya ntete kansi yandi sadilaka ntoto.—Tanga Kuyantika 1:24; 2:7.

Bantu me swaswana ti bambisi na mitindu zole. Ya ntete, bantu lenda zaba Ngangi, kuzola yandi mpi kuzitisa yandi. Ya zole, Ngangi gangaka bantu sambu bo zinga kimakulu kansi bambisi ve. Bubu yai, bantu yonso ke fwaka sambu muntu ya ntete lemfukilaka ve Ngangi.—Tanga Kuyantika 1:27; 2:15-17.