Mĩaka ta 3,000 mĩhĩtũku, mwandĩki ũmwe wa Thaburi aandĩkire ũũ: “Mũũmbĩre ũrĩa nyũmbĩtwo nĩ wa magegania.” (Thaburi 139:14) Weciria ũrĩa kaana gakũraga kuuma kahengereta kanini mũno-rĩ, na githĩ ũndũ ũcio ndũtũmaga ũgege mũno? Andũ aingĩ merorera ũrĩa indo ithondeketwo, moigaga atĩ no nginya gũkorũo nĩ kũrĩ ũrĩa waciũmbire.—Thoma Thaburi 139:13-17; Ahibirania 3:4.

Ũrĩa wombire thĩ na igũrũ, na akĩũmba thĩ ũndũ ĩngĩtũũrũo nowe wombire muoyo. (Thaburi 36:9) Nĩ atũheete ũhoro, na agatũmenyithia ũrĩa ahaana.—Thoma Isaia 45:18.

Mĩĩrĩ iitũ nĩ ĩhaanaine na ya nyamũ na njĩra nyingĩ. Gĩtũmi nĩ tondũ, Mũũmbi ombire andũ ũndũ mangĩhota gũtũũra gũkũ thĩ, o ũndũ ũmwe na nyamũ. Ombire mũndũ wa mbere kuuma rũkũngũ-inĩ rwa thĩ, no ti kuuma kũrĩ nyamũ.—Thoma Kĩambĩrĩria 1:24; 2:7.

Andũ nĩ ngũrani na nyamũ maũndũ-inĩ merĩ ma bata. Wa mbere, andũ no mahote kũmenya, kwenda, na gũtĩĩa Mũũmbi wao. Wa kerĩ, andũ mombirũo matũũre tene na tene, no nyamũ tiguo ciombirũo. No andũ othe nĩ maagaire gĩkuũ tondũ mũndũ wa mbere nĩ aareganire na ũtongoria wa Ngai.—Thoma Kĩambĩrĩria 1:27; 2:15-17.