Midi jitatu ja mivu ku dima, saí musoneki ua soneka: “ki kôla ki ua ngi iudika, ki kuata uoma.” (Jisálamu 139:14) Mu kuijiia kiebhi o mona kia kula mu mala ia mama, ki kima kia ku diuana? Athu avulu, mu ku mona kiki a zuela kuila, kuala muéne muthu ua bhange o ngongo ni ima ioso.—Tanga Jisálamu 139:13-17; Jihebeleu 3:4.

O muthu ua bhange o ngongo ioso ni ixi phala o athu ku kala-mu, muéne ua bhange ué o muenhu. (Jisálamu 36:9) Muéne u zuela ni athu ia lungu ni muéne.—Tanga Izaia 45:18.

Ima iavulu ku mukutu uetu ia difu ni ia iama. Mukonda o athu ni iama, a a bhange kuala Nzambi phala ku kala ku muenhu mu ixi. Muéne ka bhange o diiala dia dianga bhu kaxi ka iama, maji ua mu bhange ni mavu.—Tanga Dimatekenu 1:24; 2:7.

O athu ka difu ni iama mu ima iiadi. Kia dianga, o athu a a bhange ni ku tena kua kuijiia ni ku zola, ni ku xila o Mubhangi. Kaiadi, o athu a a bhange phala ku kala ni muenhu ua kalelaku, maji o iama kana. Maji lelu, o athu oso a mu fua, mukonda o diiala dia dianga ka xikina ku belesela o itumu ia Mubhangi.—Tanga Dimatekenu 1:27; 2:15-17.