Di Baybul in Ansa to Sɔm Kwɛstyɔn Dɛn
Wetin mek bɔku pipul dɛn de fil se Pɔsin de we mek wi?
Layf rili wɔndaful, nɔto so?
Na lɛk 3,000 ia so dɔn pas, frɔm we wan man bin rayt se: “Di we aw yu mek mi rili wɔndaful.” (Sam 139:14) Di we aw pikin kin bigin gro insay in mama in bɛlɛ, rili wɔndaful, nɔto so? Bɔku pipul dɛn biliv se Pɔsin de we mek ɔl di tin dɛn we gɛt layf.—Rid Sam 139:13-17; Di Ibru Pipul Dɛn 3:4.
Di Pɔsin we mek di wan ol wɔl fɔ lɛ wi de de, na in mek ɔltin we gɛt layf. (Sam 36:9) I dɔn tɛl mɔtalman bɔt udat i bi.—Rid Ayzaya 45:18.
Na frɔm animal dɛn wi kɔmɔt?
Wi gɛt bɔku tin dɛn na wi bɔdi we animal dɛnsɛf gɛt. Dis na bikɔs di Pɔsin we mek mɔtalman ɛn animal bin mek dɛn fɔ de na di wɔl. Na dɔti i tek mek di fɔs mɔtalman, nɔto frɔm animal i kɔmɔt.—Rid Jɛnɛsis 1:24; 2:7.
Tu tin dɛn de we de sho klia wan se mɔtalman difrɛn frɔm animal. Di fɔs wan na dat, mɔtalman ebul fɔ no di Pɔsin we mek am, i ebul fɔ lɛk di Pɔsin we mek am, ɛn i ebul fɔ rɛspɛkt di Pɔsin we mek am. Di sɛkɔn wan na dat, di Pɔsin we mek ɔltin nɔ mek animal dɛn fɔ de sote go, bɔt i mek mɔtalman dɛn fɔ de sote go. Bɔt naw, ɔlman dɔn gɛt sin bikɔs di fɔs pɔsin nɔ bin gri fɔ du wetin di Pɔsin we mek am, tɛl am fɔ du.—Rid Jɛnɛsis 1:27; 2:15-17.
